Na Matavuvale-Yavutaki ena Kosipeli i Jisu Karisito

Na ivunau ni Lotu i Jisu Karisito ni Yalododonu Edaidai sa vakabibitaka na matavuvale. E ka bibi ena noda ivakavuvuli baleta na matavuvale na valetabu. Na cakacakatabu vakalotu e ciqomi e vakataraikeda meda lesu tale ka duavata vakamatavuvale ena kena iserau na Tamada Vakalomalagi.

Ena s Sigatabu ni koniferedi raraba ni Epereli 2025, a kacivaka kina o Peresitedi Russell M. Nelson na kena tara 200 na valetabu vou. E taleitaka na kena dau kacivaki na valetabu vou ena icavacava ni koniferedi raraba, eda marautaka vata kei koya. Ia, ena vuku ni levu ni iwiliwili ni valetabu era sa tuvai ka tara tiiko, e vinaka meda na qai kacivaka vakamalua na valetabu vou. Oya na vuna, ena veivakadonui ni Kuoromu ni Apositolo Le Tinikarua, eda na sega ni kacivaka na valetabu vou ena koniferedi oqo. Meda na tomana ga na kena vakarautakai na cakacakatabu ni valetabu vei ira na lewenilotu e vuravura taucoko, oka kina na gauna kei na vanua eda na kacivaka kina na tara ni valetavu vou.

Na tiki ni noqu vosa ena yakavi nikua e volai ni oti na nona mai takali na Peresitedi lomani Rusell M. Nelson. Na veika oqo e volai ka vakadonui ena vica na macawa sa oti, e tukuna na noqu ivakavuvuli, e dusimaki mai vua na Turaga.

Na ivakaro ni matavuvale, ka kacivaki ena 30 na yabaki sa oti, e vakadeitaka “na matavuvale sa ilesilesi vaKalou” ka “sa yavu ni tuvatuva ni Dauniveibuli kina nodra icavacava tawamudu na Luvena.” E vakadeitaka tale “ni se dei tu na ivakaro ni Kalou vei ira na Luvena mera vakatubu kawa ka vakatawai vuravura.” Ka, “keitou cauraka talega ni sa vakarota na Kalou me na vakayagataki walega na kaukauwa tabu ni vakatubukawa kivua na tagane kei yalewa, ka sa vakamautaki vakalawa me rau veiwatini.” Me vaka nona a vakatavulica-Elder Russell M. Nelson ena gauna oya e dua na ivavakoso e BYU ni matavuvale sa “ka bibi ena ituvatuva ni Kalou. Vakaidina, e dua na inaki ni tuvatuva oya me vakacerecerea na matavuvale.”

Na Lotu i Jisu Karisito ni Yalododonu Edaidai e kilai me lotu yavutaki-vakamatavuvale. E dina! Na noda veiwekani kei na Kalou kei na inaki ni noda bula vakayago e vakamacalataki ena ituvaki ni matavuvale. Na kosipeli i Jisu Karisito sa ituvatuva ni Tamada Vakalomalagi kina nodra tiko vinaka na Luvena vakayalo. Eda rawa ni kaya ni vakatavulici taumada vei keda na ituvatuva ni kosipeli ena matabose ni matavuvale tawamudu, esa vakayacori tu ena noda dui matavuvale, kena inaki levu na nodra bula vakacerecerei na luve ni Kalou ena veimatavuvale tawamudu.

Se vakacava na uto ni ivanau, e tiko ga na veisaqasaqa. E Amerika keimami sotava tiko na vakacacani ni vakawati kei na vakatubu kawa. Voleka ni dua na drau na yabaki na kena lutu sobu na ivakarau ni lewenivale ka liutaka na veiwatini, ka vakakina na iwiliwili ni sucu. Na vakamau kei na iwiliwili ni sucu ni noda lewe ni Lotu vinaka cake sara, ia era lutu talega vakatotolo. Sa ka bibi me kakua ni yali vei ira na Yalododonu Edaidai na nodra kila na inaki ni vakawati kei na nodra yaga na gone. Oqori noda sasaga ni vei siga ni mataka. “Na bula vakacerecerei e tiki ni matavuvale,” E vakatavulica o Peresitedi Nelson. Na bula ni veivakacerecerei ni matavuvale ena rawa ga ena loma ni cakacaka ni veivakabulai vakalotu ni kosipeli i Jisu Karisito.”

Na lutu sobu ni vakawati kei na vakatubu kawa sa kilai tu ena inaki vuni eso, ia sa dodonu me vinaka cake na yavunibula kei na ivalavala ni Yalododonu Edaidai—sega ni muria—na veiwalewale oya.

Niu se cauravou ena 80 na yabaki sa oti, au dau tiko voli ena nodrau were na tubuqu ena ituvaki e voleka ni ka kecega e yaco ena siga oya sa vakatautaki tu kina matavuvale. E sega na retio yaloyalo se yaya vakalivaliva eso me vagolei tani mai na itaviqaravi ni matavuvale. Kena veibasai, ena bula ena vei koro lelevu nikua, e lewe lailai na lewenilotu era sotava na itaviqaravi yavutaki vakamatavuvale. Na bula ena koro levu kei na sala ni veilakoyaki ni gauna oqo, veivakamarautaki, kei na totolo ni veitaratara e vakarawarawataka vei ira na itabagone ni okata na nodra itikotiko me icili, na vanua era moce ka kana kina vagauna ia e lailai kina na veidusimaki vakaitubutubu ena veika era cakava.

Na veivakayarayarataki vakaitubutubu sa seavu talega ena ivakarau era bula tiko kina e levu na lewe ni Lotu ena gauna oqo. Ena gauna eliu, dua na veivakayarayarataki levu e vakaduavatataka na matavuvale oya na kena lakocurumi vata na dredre ena sasagataki ni lalawaka matau—vaka na samaki ni veikau se na rawati ni bula. Na matavuvale sa dua na tabana tuvanaki ka vakarautaki ni vakavure ilavo. Nikua, levu na matavuvale sa tabana ni vakayagataki lavo, ka sega ni gadreva na itagede cecere ni mataisoqosoqo kei na duavata vakamatavuvale.

Ni lutu na veivakayarayarataki vakaitubutubu, e tiko ga vei ira na Yalododonu Edaidai na itavi soli vakalou ni vakavulica na luvedra mera vakavakarau kina noda icavacava tawamudu vakamatavuvale (raica na Vunau kei na Veiyalayalati 68:25). Vuqa vei keda sa dodonu me cakava qo ni sega ni taucoko tu na noda matavuvale. Na veisere, mate, kei na veibiu sa yaco vakaidina. Au sotava oya ena matavuvale au susu kina.

A mate o tamaqu niu sa yabaki vitu, ka susugi au na taciqu gone kei na ganequ na tinai keitou dawai. Ena veituvaki dredre, a toso ga i liu o koya. E galili ka bikai, ia na nona veivuke na Turaga, na nona ivakavuvuli qaqa ena ivunau ni Lotu vakalesui mai e tuberi keitou. Na sala a masuta kina o koya na veivuke vakalomalagi ena susugi ni luvena, e veivakalougatataki koya dina! Keitou susugi ena dua na vuvale mamarau ka dau vakilai tu kina na tamai keitou sa mate. A vakatavulica o tinai keitou ni tiko na tamai keitou ka tiko na watina ka keitou na dua tikoga na matavuvale ena vuku ni nodrau vakamau ena valetabu. E tiko tani vakawawa na tamai keitou baleta ni kacivi koya na Turaga kina dua tale na cakacaka.

Au kila nira sega ni marau tu e vuqa na matavuvale, ia sa rawa ni vakatavulica na tina yadua na loloma ni Tamada Vakalomalagi kei na veivakalougatataki vakaoti ni vakamau ena valetabu. O rawa talega ni cakava qo! E vakadeitaka na ituvatuva ni Tamada Vakalomalagi na dina oqo kina tamata kecega. Eda vakavinavinakataka taucoko na vakamau ena valetabu vakakina na veivakalougatataki namaki ni vauci tu vaka dua na matavuvale tawamudu. Vakataki tinaqu, keitou taleitaka ni cavuta na yalayala i Liai vua na luvena o Jekope ni Kalou, “ena vakatabuya na nomu rarawa mo rawata kina na vinaka” (2 Nifai 2:2). E baleta kece sara na matavuvale Yalododonu Edaidai, taucoko se tawataucoko tu. Eda lotu ni matavuvale.

Na nodai vunau kei na noda vakabauta na matavuvale tawamudu sa vaqaqacotaki ka vauci keda. Au na sega ni guilecava na yalayala i Tukaqu Harris, ni keitou a tiko voli na gone ena nona were volekati Payson, Utah. A dolea vei au o koya na itukutuku ni rarawa ni sa mate o tamaqu ena vanua yawa o Denver, Colorado. Au a cici kina noqu rumu ni moce ka tekiduru ena yasa ni davodavo, ka tagi voli. A muri au o tukaqu ka mai tekiduru tu e yasaqu ka kaya, “Au sa na tamamu.” Na yalayala malumu oya e ivakaraitaki kaukauwa ni ka era rawa ni kitaka na tubuda me vakatawani na vanua e lala ni dua e leqa se yali na lewe ni matavuvale.

iTubutubu, vakawati se sega—kei ira eso vaka na tubuda ka vakatawana na itutu oya vei ira na gone—era sa qasenivuli liu. Na nodra ivakavuvuli mana duadua oya na ivakaraitaki. Na loma ni matavuvale e vanua vinaka me vakaraitaki ka vulici kina na yavunibula tawamudu eso vaka na bibi ni vakawati kei na vakaluveni, na inaki ni bula, kei na ivurevure dina ni reki. E vanua vinaka talega me vulici kina na lesoni bibi tale eso ni bula, vaka na yaloloma, veivosoti, vakatulewa vinaka, kei na yaga ni vuli kei na cakacaka yalodina.

E dina, e tiko kina lewe ni Lotu e vuqa na lewe ni matavuvale lomani ka sega ni tugana na yavunibula kei na nanamaki ni kosipeli. Na lewenilotu vakaoqo era gadreva na noda loloma kei na vosota. Ena noda veimaliwai, e dodonu meda nanuma ni sega ni yalana na bula vakataucoko eda vakasaqara na veileqa eso ni noda bula Na ivakavuvuli levu ena Vunau kei na Veiyalayalati 138:57–59 e vakadeitaka vei keda ni veivutuni kei na tubu vakayalo sa rawa ni tomani ena vuravura ni yalo ni oti na bula vakayago. Sa bibi sara, ni duavata na matavuvale mera veivaqaqacotaki vakai ira, sa dodonu meda nanuma taucoko ni ivalavala ca kei na malumalumu eda lako curuma taucoko ena bula oqo e rawa ni vosoti ena veivutuni ena vuku ni Veisorovaki lagilagi kei na veivakabulai i Jisu Karisito.

Sa noda ivakaraitaki uasivi duadua o Jisu Karisito na noda iVakabula. Eda na vakalougatataki kevaka eda moica na noda bula kina Nona ivakavuvuli kei na solibula. Na muri Karisito kei na soli keda kina veiqaravi vakaikeda sa iwali vinaka duadua ni bulakocokoco kei na buladuadua e vaka me sa matau tu oqo.

Sa itavi talega ni tubutubu na nodra vakatavulici na luvedra ena vuli tara me ikuri ni ivakavuvuli ni kosipeli. Era duavata na matavuvale nira cakava vata eso na ka vakaibalebale. Na teitei vakamatavuvale e tara na veiwekani vakavuvale. Na veika sotavi marautaki vakamatavuvale e vaqaqacotaka na isema ni matavuvale. Na keba, itaviqaravi ni qito, kei na veivakalasai tale eso esa yaga sara me vauci kina na matavuvale. Mera qai vakarautaka na matavuvale na soqoni vata vakamatavuvale me nanumi kina na tubudra, ka veimuataki kina valetabu.

Mera vakavulici ira na gone na itubutubu ena kilaka maqosa ni bula, cakacaka ena lomanibai kei na itikotiko. Na vulici ni vosa eso sa yaga sara ki na vakavakarau ni kaulotu kei na bula ena gauna oqo. O ira na qasenivuli ni ulutaga eso oqo sa rawa ni tubutubu se tubudra se lewe ni isema ni matavuvale. Era bulabula na matavuvale nira vuli vakailawalawa ka veivakasalataki vata ena ka kece e vakavukauwai kina matavuvale kei ira na lewena.

Eso na rairai kaya, “E sega na neimami gauna ena ka vakaoqori.” Me kune na gauna ni kena caka na ka yaga vakaidina, era rawa ni vakabulabulataka e vuqa na itubutubu na nodra matavuvale kevaka era bokocakece na nodra iyaya vakatekinolaji. Ni nanuma na itubutubu, na ka era vinakata dina tu na gone me vakayakavi oya na gauna vata kei iko.

E yaco na veivakalougatataki levu kina matavuvale era masu vata, tekiduru ena bogi kei na mataka ena vakavinavinakataki ni veivakalougatataki ka masulaka na kauwai eso e tiko. Era sa vakalougatataki talega na matavuvale nira sokalou vata ena soqoni ni Lotu kei na soqo vakalotu tale eso. Sa vaqaqacotaki talega na ivau ni matavuvale ena italanoa ni matavuvale, caka ni vakarau tudei vakavuvale, kei na wasei ni ka tabu era sotavi. A vakananumi keda o Peresitedi Spencer W. Kimball ni “talanoa veivakauqeti baleta keda kei ira na tubuda e yaragi qaqa ni veivakatavulici.” Era sa ivurevure vinaka sara ni veivakauqeti vei keda kei na noda kawa.

Au vakadinadinataka na Turaga o Jisu Karisito, ni Luvena Duabau Ga na Kalou, na Tamada Tawamudu. Sa veisureti tu meda muria na salatu ni veiyalayalati e muataki kina vakasoqoni vata ni matavuvale vakalomalagi. Na kaukauwa ni veivauci ni matabete, ka dusimaki ena idola vakalesui mai ena Valetabu e Kirtland, kauti ira vata mai na matavuvale me tawamudu (raica na Vunau kei na Veiyalayalati 110:13–16). E vakayagataki tiko oqo ka tubu na iwiliwili ni valetabu ni Turaga e vuravura raraba. Oqo na ka dina. Meda sa tiki ni cakacaka oqo, sa noqu masu, ena yaca i Jisu Karisito, emeni.