Mo Dou Veivinakati kei na Kalou

Niu vulica na ivolanikalou, era basika na vosa au kauwai vakaidina kina, baleta ni vakaibalebale vakalevu ena veika au a lako curuma. Au a cakacaka vaka dauniveivaqaiqai vaka daunifika. Na kila, na vosa vakaduavatataki e vakavuna na noqu kauwai niu wilika na ivolanikalou. Na noqu cakacaka na vakaduavatataki ni wiliwili e ripotetaki ena ivolatukutuku vakailavo ena kila vakafika, dikevinifika, kei na kila ni veivaqaqai. Ena vosa tale eso, noqu lalawa na vakaduavatataki ni ripote vakailavo ena itukutuku vakailavo taumada me vakadeitaki na kena dodonu kei na yaga. Au saga vagumatua meu walia na leqa eso, ka matau me soli tu na gauna me wali kina na veileqa lalai sara madaga.

A vakamasuti ira mai Korinica na Apositolo o Paula mera “veivinakati kei na Kalou.” Na ibalebale ni veivinakati kei na Kalou na veivakaduavatataki kei na Kalou, se vakalesui mai ni veiwekani kei na Kalou e bonati se cavuka tu ena vuku ni noda cakacala se ivalavala. Vakarawarawa, sa ibalebale ni veivinakati kei na Kalou na vakaduavatataki ni lomada kei na ivalavala kina loma ni Kalou se, vaka nona vakatavulica na noda parofita lomani, me qaqa duadua ga na Kalou ena noda bula.

Me vaka e vakatavulici ena ivolanikalou, eda galala meda vakatulewa vakaikeda, “ni digitaka na sala kina mate tawamudu se na sala kina bula tawamudu.” Ia eda sega ni gugumatua, na galala qo ni cakacaka tu vakaikeda e rawa ni muataki kina tawavakaduavatataki ni loma ni Kalou.

A vakavulica na parofita o Jekope ni gauna eda sega ni veiyaloni se duavata kina kei na Kalou, na sala duadua ga eda rawa ni vakaduavatataki kina oya meda “veivinakati kei na [Kalou] ena veisorovaki i Karisito.” Dodonu meda vakila ni vakatautaki na veivakaduavatataki ena loloma veivueti, ni vakavuna tu na rawati ni veivinakati na ivalavala dokai ni veisorovaki i Jisu Karisito.

Nio vakasamataka vagumatua na nomu bula, vakananuma na gauna o yawa kina mai vua na Tamada Vakalomalagi ena vuku ni nomu yawaki Koya. Vaka oqo, rairai o sa vakaweleweletaka na nomu masu Vua se na muri ni Nona ivunau. Na gauna eda digitaka kina meda yawaka na Kalou, e dodonu meda tekivu sasagataka sara na veivinakati. A vakadreta na Turaga na noda itavi ni kaya, “Dou toro voleka mai vei au kau na qai toro voleka yani vei kemudou; dou vakasaqarai au vagumatua dou na qai kunei au; dou kerekere ka na soli vei kemudou; dou tukituki ka na dolavi vei kemudou.”

E vukei keda vakacava na iVakabula me vakalesuya mai ka vakaduavatataka na veiwekani bibi oqo? Vei au, au sa caka vinaka vakalevu ena noqu ilakolako ni veivakaduavatataki kei na Kalou niu muria na ivakasala i Peresitedi Nelson ka veivutuni e veisiga. Oqo na vuna ni sa vakatakila na veivinakati na vakalesui mai ni veiwekani cavuka, ena maliwa ni Kalou kei na tamata tabu yani, ena vagalalataki ni lati ni valavala ca.

Dua na veivinakati levu sara eda wilika ena ivolanikalou baleti Inosi. Dua na ka ena nona bula a veicalati tu kei na Kalou. A vakaraitaka na vakararavi kina Veisorovaki i Jisu Karisito me veivinakati kei na Kalou. A vakamacalataka na nona gagadre me veivutuni, nona yalomalumalumu, nona rai matua, kei na nona sasaga. Na nona veivinakati kei na Kalou e vakadeitaki ni rogo vua e dua na domo, ka kaya, “Inosi, sa vosoti na nomu ivalavala ca, ka ko na vakalougatataki.” A vakila o Inosi na revurevu ni veivutuni kei na veivinakati vua ni kaya, “Ia koi au ko Inosi, au kila ni sega ni rawa ni lasu na Kalou; o koya sa seyavu kina mai yaloqu na noqu kila na noqu cala.”

Na veivinakati e sega ni vakavotuya ga na vakacegu mai na vakilai ni cala ia na vakacegu talega vakaikeda kei ira na tani. E vakabula na veiwekani, vakamalumutaka na lomada, vaqaqacotaka na noda bula vakatisaipeli, ka vakalevutaka na nuidei kivua na Kalou. Na ka e vakavu nuinui kei na lomadei vakalevu vei au oya na vuanikau tale kadua ni veivinakati e vakamacalataka o Inosi ni a kaya, “Ia niu sa rogoca oti na vosa oqo koi au, ko Inosi, sa tekivu me dei sara na noqu vakabauti koya na Turaga.”

Niu se gonetagane, a tiko e dua na loga ni cherry levu i tukaqu ena yasai tinaqu. Au dau mai cakacaka ena logani cherry, vakalevu ena vulai katakata donuya na tamusuki ni cherry. Niu se gone sara, e dau soli vei au e dua na vokete ka qai talai cake tu ena vunikau meu tomi cherry.

A veisau na kena tamusuki na cherry ni sa volia o tukaqu e dua na misini vakatokai na daukuretaki cherry. Na misini oqo e mokota na tolo ni vunikau ka kuretaka, vakavuna mera lutu mai na vuani cherry kina lawa e vakayagataki me kumuna na cherry. Au siqema ni gauna e kuretaka kina na vunikau na daukuretaki, voleka nira qera taucoko na cherry ena vica ga na sekodi. Au siqema talega ni sega ni dua na leqa ke kuretaki tu na vunikau me 10 na sekodi se dua na miniti, ena sega ni lutu eso na cherry. Era tawayavalati rawa vakaidina.

Na kuretaki cherry mai na vunikau ena vuku ni talaraki ni ethylene. Qo e vakavuna na malumalumu ni veitiki ni maliwa ni taba ni cherry kei na vunikau. Ia, e cavuka vakarawarawa na taba ni cherry matua mai na vunikau ni malumalumu na isema.

Ena ivolanikalou, eda vulica na vosa vakatautauvata ni Taba i Jese me baleta na Mesaia, o Jisu Karisito, ka parofisaitaki ni lako mai na kawa i Jese, na tamai Tevita na Tui. Me vaka na kena vakamalumalumutaka na isema ni taba ni cherry matua, na talaidredre, vakatitiqa, kei na yaluma e rawa ni vakamalumalumutaka na keda isema kina Taba i Jese, se Jisu Karisito, vakatara meda kuretaki rawarawa ka tawase mai Vua. Ni rawa nida yalodina tu, sa dodonu meda taqomaki keda mai na malumalumu ni keda isema kivei Jisu Karisito.

Ena Vunau kei na Veiyalayalati, era vakasalataki mada ga na yalodina: “Ia e se rawa tikoga ni lutu na tamata mai na loloma soli wale ka vuki tani mai vua na Kalou bula.” Sa vakuria na Turaga, “Io, mera rogoca talega ko ira era sa vakatabui.” Me levei na lutu, sa vakasalataka na Turaga, “O koya sa kilikili sara me rogoca matua na isoqosoqo lotu ka dau masu tikoga, me kakua nira temaki kina.”

Rawa ni vakatauvatana na itutu ni kuretaki rawarawa kina ka e vakamacalataka na ivolanikalou me matua tu kina veivakarusai ena vuku ni nodra ivalavala. E rawa ni vakayagataki raraba talega na malanivosa me vakatakila na ituvaki ni lolovira, vakacaca, se leqa e vakavuna tu e dua na ka me kasere se voca.

Na cava e matataka na ka matua oqo? Sa kena ibalebale nida rawa ni yacova e dua na itoqa eda na sega ni rawa kina ni veisau? Sega, au nanuma sa kena ibalebale nida sa rawa ni yacova e dua na itoqa ni gauna e sega ni lomada tu kina na veisau. Na iwali ni matua tu kina veivakarusai oya meda cakava na ka eso ena vaqaqacotaka na noda isema vei Jisu Karisito. Me vaka sa tukuni, na veivutuni a muataki Inosi kina itoqa ni vakabauta tawakuretaki. E qaqaco na veivutuni—veivutuni matau, kusarawa, ka wasoma. Me vaka a vakatavulici keda kina o Peresitedi Nelson: “E sega na ka e veisereki cake, vakaturaga cake, se bibi cake kina noda torocake yadudua me vaka na vakanamata ni veivutuni e veisiga.”

Me ikuri ni veivutuni, a vakatavulica na parofita o Jekope na kilai ni liga ni Kalou ena noda bula, qarai kei na ciqomi ni vakatakila, kei na vakarorogo vua na Kalou ni vosa tu ena vukei keda meda kua ni kureitaki. A vakatavulica talega o Jekope,“O koya, keimami sa dau vakasaqarai ira kina na parofita, ka sa levu na neimami vakatakila kei na yalo ni parofisai; ka sa tu vei keimami na ivakadinadina kece oqo, keimami sa rawata kina na inuinui ka sa yaco me tawayavalati rawa na neimami vakabauta.” Na vakarorogo kei na cakacakataki ni nodra vosa kei na veisureti ni parofita kei na apositolo sa rawa ni vakatawai keda ena inuinui, nuidei, kei na qaqa, ka vakavuna tu me kua ni yavalati na noda vakabauta.

Au vulica na gagdre ni veivinakati kei na Kalou e dodonu me tomani tu ena gagadre ni veivutuni. Na veivutuni kei na vakilai ni veivakalougatataki ni Veisorovaki i Jisu Karisito sa muataki kina vakabauta tawayavalati. E muataki na vakabauta tawakuretaki kina gagadre meda dau veivinakati tu ga kei na Kalou. Oqo na tukutuku, se caka vakawasoma, kena ivakarau.

Taciqu kei na ganequ, au veisureti meda veivinakati kei na Kalou ena Veisorovaki i Jisu Karisito. Au vakadinadinataka ni vaqaqacotaka na keda isemavua na iVakabula na caka kei na muri ni veiyalayalati ka levea na matua ni veivakarusai. Au vakadinadinataka na veivinakati oqo kei na Kalou, ena Veisorovaki i Jisu Karisito, e veimuataki kina vakabauta tawakuretaki.

Au kila ni lomani iko kei au na Tamada Vakalomalagi, ka sa tala mai na Luvena Daulomani, o Jisu Karisito, me noda iVakabula, Dauveivueti, ka Dauniveivakaduavatataki levu. Au vakadinadinataki Jisu Karisito ka cakava tu ena yaca i Jisu Karisito, emeni.