Cakava na Nomu iTavi ena Yalomu Taucoko

Na veika au sotava ena simuleita ni vuka sa ivakananumi bibi vei au ni noda vinaka ena dua na ka—ena vuka, voce, culacula, cuki, se kilaka—e gadrevi kina na bula vakaivakarau e veigauna kei na vakatovotovo.

Ena taura beka e vica na yabaki me rawati e dua na kila se taraicake ni taledi. O na cakacaka vakaukauwa me rawa ni vaka na gunu wai vei iko. Ia kevaka o nanuma ni kena ibalebale oya ni rawa nio cegu na vakatovotovo kei na vuli, sa na tekivu me seyavu yani na kilaka kei na maqosa o a rawata ena isau levu.

Oqo e baleta na maqosa me vaka na vulici e dua na vosa, qiria e dua na iyaya ni vakatagi, kei na vukataka e dua na waqavuka. E baleta talega nomu yaco mo tisaipeli i Karisito.

Kena rawarawa ga, na bula vakatisaipeli e ka ni bula vakaivakarau.

E sega ni dua na sasaga me vakawaleni, ka sega ni dau yaco vakacalaka.

Na vakabauti Jisu Karisito e isolisoli, ia na kena ciqomi e dua na digidigi mai vuniyaloda ka me soli kina na noda “kaukauwa, vakasama kei na igu taucoko.” E ka ni vakatovotovo e veisiga. E veiauwa. E ka ni vuli e veigauna kei na yalayala vakainaki. Na noda vakabauta, noda yalodina vua na iVakabula, ena kaukauwa cake ni sa vakatovolei ena veisaqasaqa eda sotava ena bula oqo. Ena tudei ni da vakabulabulataka tiko, ni da bulataka tiko, ka sega ni guce mai.

Ena yasana kadua, kevaka eda sega ni vakayagataka na vakabauta kei na kena mana veivakadeitaki, sa yaco me sega na yalodei ena veika eda dau vakabibitaka—ka sega soti ni da logavinaka sara ena veika eda a kila ena dua na gauna ni dina.

Na veitemaki e sega ni dau rawai keda sa tekivu me sega ni rerevaki ka maleleti vakalevu.

Na caudre ni noda ivakadinadina e vakatakatai keda toka ga ena dua na gauna. E gadrevi me uturi tiko e veigauna me ramase na kena caudre.

Ena Veiyalayalati Vou, a vakavulica na iVakabula e dua na italanoa vakaibalebale baleta e dua na turaga, e solia vei iratou na nona tamata na veivakabauti—e dua na umailavo ka vakatokai na taledi. Na tamata a vakayagataka vagumatua na nona taledi a vakatubura. O koya a buluta na nona taledi a qai vakayalia.

Na lesoni? E solia vei keda na Kalou na isolisoli—ni kilaka, maqosa, na madigi—ka vinakata o Koya me da vakayagataka ka vakalevulevuya me rawa ni vakalougatataki keda ka vakalougatataki ira na vo ni Luvena. Ena sega ni yaco oqori kevaka eda biuta ena dua na vata rewaicake me vaka e dua na bilo icocovi me da qai sarava ena so na gauna. Na noda isolisoli ena vakalevulevui ka vakalevutaki ga ni vakayagataki.

“I Elder Uchtdorf,” o na kaya beka, “E sega ni dua na noqu isolisoli se taledi—e sega o koya e dua na kena yaga.” Rairai o raici beka eso ka laurai levu na nodra isolisoli qai rairai vinaka ka sega soti ni rairai vinaka nio vakatauvatani iko. O na nanuma beka ni ena bula taumada, ena siga ni vakaraitaki isolisoli cecere kei na taledi, a lailai sara na ka ena nomu peleti—vakauasivi ni vakatauvatani ki na nodra peleti sinai vuabale eso tale.

Isa, au diva ga kevaka au rawa ni mokoti iko ka vukea mo kila na dina levu oqo: O iko e dua na kabula vakalougatataki ena rarama, na luvena vakayalo na Kalou tawayalani! Ka tu e lomamu e dua na vunilagi ka sega vei iko na kaukauwa mo raica rawa.

Me vaka era vola na dauserekali, o lako mai ki vuravura “muria mai na veio lagilagi”!

Na italanoa ni kemu ivuvu e vakalou, ka vakakina na kemu icavacava. O biuti lomalagi mo lako mai ki ke, ia ko lomalagi se sega vakadua ni biuti iko!

O sega sara ni dua na ka wale.

E tiko na nomu isolisoli!

Eda wilika ena Vunau kei na Veiyalayalati:

ni sa vuqa tu na isolisoli, ka sa soli ki na tamata yadua mai vua na Yalo ni Kalou.

Sa soli e dua vei ira e so, ka dua tale vei ira e so tani, io me dui yaga vei ira.”

Eso vei ira oqo era volai tu ena ivolanikalou E vuqa era sega ni vakakina.

Me vaka e tukuna na parofita levu o Moronai, “Mo dou kakua ni cakitaka na isolisoli ni Kalou, ni sa vuqa sara; ka ra sa lako kecega mai vua na Kalou.” Era na vakatakilai ira beka mai ena “sala duidui eso; ia na Kalou vata ga e cakava na ka kecega.”

E dina beka ni dau sega ni tatalivaliva na noda isolisoli vakayalo, e sega ni kena ibalebale oqori ni ra sega ni bibi. Meu wasea mada vei kemuni eso na isolisoli vakayalo au sa raica vei ira na lewenilotu e vuravura taucoko? Vakasamataka mada kevaka o sa vakalougatataki tiko ena dua se sivia na isolisoli me vaka na:

• Yalololoma.

• Kauwaitaki ira na tamata era dau beci tu.

• Vaqara na iulubale mo dau mamarau.

• Dautataro.

• Dau raica na veicakacaka mana lalai.

• Dau veivakacaucautaki mai vuniyalomu.

• Dauveivosoti.

• Veivutuni.

• Vosota vakadede.

• Vakamacalataka vakarawarawa na ka.

• Dau veikilai yalo kei ira na gone.

• Tokoni ira na iliuliu ni Lotu.

• Vukei ira na tani me ra kila ni ra itaukei.

O na sega beka ni raica ni ra vakaraitaki ena vakaraitaki taledi ni tabanalevu na isolisoli eso oqo. Ia au nuitaka ni o rawa ni raica na kena vakamareqeti ki na cakacaka ni Turaga, kei na nomu rawa ni tara, vakalougatataka, se vakabula sara mada ga e dua na luvena na Kalou ena nomu isolisoli. Nanuma tiko: “Ena dau rawa na veika lelevu mai na veika lalai ka rawarawa.”

Daru cakava na nodaru itavi lailai.

Kemuni na taciqu kei na ganequ lomani, itokani lomani, au masuta ni na vukei keda na Yalotabu meda kila na isolisoli kei na taledi sa solia vei keda na Kalou. Oti, meda qai, me vaka na tamata yalodina ena nona italanoa vakaibalebale na Turaga, vakalevutaka ka vaqaqacotaka.

Ena yaco mai na siga eda na tucake e matana na Tamada mai Lomalagi yalololoma me da solia na itukutuku ni noda veiqaravi. Ena vinakata o Koya me kila na cava eda a cakava ena isolisoli a solia vei keda o Koya—vakauasivi, na ivakarau eda a vakayagataka kina me da vakalougatataki ira na Luvena. E kila o Koya o cei o keda, o cei eda a buli me vaka, o koya sa cecere kina na veika e namaka vei keda o Koya.

Ia e sega ni namaka vei keda me dua na rika vakairogorogo ka vakaitamera vaka-supamen meda yaco kina. Ena vuravura a bulia o Koya, na tubu e dau toso vakamalua vakalalai—ia e toso tikoga ka sega ni malumu mai.

Sai Jisu Karisito sa cakava oti na itavi sega ni vakatamata ena nona vakadruka na mate kei na ivalavala ca.

Noda itavi meda muria na Karisito. Noda itavi meda vukitani mai na ivalavala ca, vuki vua na iVakabula, ka lako ena Nona sala, dua na ikalawa ena dua na gauna. Nida vakayacora oqo, ena gumatua kei na yalodina, eda na luvata tani na ivesu ni yacokoso kei na malumalumu ka yaco vakamalua mo vakasavasavataki, me yacova na siga vinaka sara oya ni da na vakataucokotaki Vua.

Na veivakalougatataki sa voleka mai. Na veika yalataki sa vakarau tu. Sa tadola tu na katuba. Sa noda na digidigi me da curu yani ka tekivu.

Ena lailai beka na kena itekitekivu Ia sa ikoya tiko oya.

Ena vanua e malumalumu kina na vakabauta, tekivu ena inuinui vei Karisito Jisu kei na Nona kaukauwa me veisavai me savavuka.

E kerea na Tamada meda sotava na bolebole oqo ni vakabauta kei na bula vakatisaipeli sega ni vaka e dua na dau saravanua ia me vaka e dua e tudei nona vakabauta sa biuti Papiloni ka vagoleya na yalona, vakasama, kakalawa ki Saioni.

Eda kila ni noda sasaga walega ena sega ni rawa ni da yaco kina me selesitieli. Ia e rawa nida yaco kina meda yalodina ka dei tiko vei Jisu Karisito, ia o Koya e rawa ni cakava me da selesitieli.

Ena vukuna na noda iVakabula lomani, e sega ni dua na ka e sega kina na qaqa. Kevaka eda biuta na noda inuinui kei na vakabauta Vua, sa vakadeitaki tu na noda qaqa. Sa yalataka vei keda o Koya meda rawata na Nona kaukauwa, Nona mana, Nona loloma soliwale levu. Dua na ikalawa ena dua na gauna, vakalalai, eda na toro volekata yani na siga levu ka uasivi sara oya nida na bula vata kei Koya kei ira na noda daulomani ena lagilagi tawamudu.

Meda yaco ki kea, sa dodonu meda cakava na noda itavi nikua kei na veisiga kecega. Eda vakavinavinaka ena ikalawa eda cavuta ena noa, ia eda sega ni yaco ga e kea. Eda kila ni se balavu na ilakolako, ka da sega ni laiva me da yalolailai kina.

Oqori sa iusutu ni noda bula - nida tisaipeli i Jisu Karisito.

Au uqeta ka vakalougatataka na lewenilotu yadua me nuitaka na iVakabula me rawa ni vakaitavi, ena vosota kei na gumatuaena nomu qarava nomu itavi e vuniyalomu—me taucoko kina na nomu reki, me dua na siga mo na ciqoma na veika kece e nei Tamana. Sa noqu ivakadinadina oqo ena yaca i Jisu Karisito, emeni.