Na iWalewale ni Tukutuku Vinaka

Kevaka oni sa sikova oti na neitou vanua vakaitikotiko o Louisiana, oni sa na rairai tovolea e vuqa na keimami kakana—na gumbo, jambalaya, étouffée, kei na so tale.

Eso na gauna, au dau yalobolebole meu vakasaqara e dua vei ira na kakana oya. Na kena iotioti tawavolai ni sa uli taucoko na kena gacagaca ka sa muri matata na kena ivakasala oya me tovolei vakaoti sara me raici ke dua na ka e lutu koto. Ena gauna oya, au rawa ni rogoca na daunivakasaqa ni Creole ni vakasorokakana kina daligaqu, “Biuta tale kina eso na Tony.” Na Tony e dua na ikanakana va Creole e caka e Opelousas, Louisiana, na tauni ena noqu itikotiko. E dau vakayagataki tu me “gacagaca vuni” me walia na tavere eso a caka ni muri tu na iwalewale.

Na watiqu, Michelle, kei au keirau veiqaravi vakailiuliu ni kaulotu e Louisiana . Sa neirau ivakarau tudei mera vakatavulici na daukaulotu ena ivakarau ni kena vakasaqari na iwalewale talei ni jambalaya ena iotioti ni bogi ni nodra kaulotu ni bera nira lesu kina nodra matavuvale. Me ikuri ni nodra vakadinadinataka na kosipeli vakalesui mai i Jisu Karisito, era biuta na neimami daukaulotu na tabana ni kaulotu ena vakavinavinakataki ni walewale.

Ena vica na vula sa oti, au asarasara voli ena Valenivola ni Tukutuku ni Lotu ka raica e dua na isema kina sokomuni ni vidio leleka vakatokai na Restoration Conversations kei President Russell M. Nelson. Au a kauwaitaka na ulutaga ni dua na vidio lekaleka ena lisi kau matadredredre sara. A vakatokai “Scriptures Are God’s Recipes for Happy Living.” Au a tabaka totolo sara na vidio rua na miniti oya ka saravi Peresitedi Nelson ni vakatavulica e dua na itukutuku momona ka qaqa ki na ilawalawa gone ena Lalai ena sala mera marau kina. A vakavuvulitaka: “Ke o cakava tu e dua na keke, o muria na ivakasala, se vaevei? Ka na rawaka sara ena veigauna, se vaevei?”

A tomana, ni tukuna voli nona sa vakarau yabaki 95 tu: “Era kaya na tamata, ‘Na cava o kania tu? Na cava nomu ka vuni?’” Sauma o koya, “Na ka vuni sa vakatokai na ivolanikalou. Mo na qai wilika ka tovolea tu.”

Io, sa koya saraga oya. Na ka vuni ni bula marau voli oya na muri ga ni walewale ni Kalou me vaka e vakaraitaki tu ena ivolanikalou. Au vakatoka na “iWalewale ni Tukutuku Vinaka.”

Na cava o cakava ke cala e dua na ka ni muri tu na iwalewale? Io, e umani tu ena iWalewale ni Tukutuku Vinaka na “gacagaca vuni” me vakadeitaka ni ko na cakava donu tu vakaoti. Sa kena isau tu ga o Jisu Karisito.

Au kila ni tiko eso na gauna eda nanuma ni rairai sega ni vinaka soti na noda gacagaca, se da sotavi dredre ni muri vakasala tu, se cakava e dua na ka e vakatani no, se yaco e dua na ka eda sega ni lewa rawa, ka so tale .

Na cava na iwali? Sa rawarawa me vakuri eso tale na ka e sureti Jisu Karisito tu ki na noda bula.

Ia, na cava na irairai ni kena vakuri eso tale na Jisu Karisito kina nomu bula?

Niu veiqaravi tu vaka peresitedi ni kaulotu, a noqu na madigi meu sotavi ira vakayadua na neimami daukaulotu gone ena veimacawa ono. Donuya na sota vakayadua, dau matau tu mera vaqara na veidusimaki na daukaulotu ena sala me vakavinakataki ka vaqaqacotaki na nodra veitokani.

Ena dua na gauna, a basika mai e dua na daukaulotu ena nona veivakatarogi ka dabe sobu. Au raica rawa mai na ivukuvuki ni yagona ni tarabi koto e dua na ka ena nona vakasama. Au a taroga, “Elder, na cava o na via veivosakitaka nikua”? A tomana tu me vakamacalataka na bolebole eso e sotava voli vata na nona itokani kei na sala esa vakaleqa tiko kina na nodrau cakacaka vakaulotu. Ni tonawanawa tu na matana, a raici au o koya ka taroga, “Peresitedi, na cava meu cakava?”

Ena gauna oya, au a sega ni kila rawa na sala meu sauma kina. Ni oti vakalailai, au a kerei koya ke sa donu me keirau tekiduru vata ena masulaki ni veituberi ni Yalotabu. A vakadonuya o koya, ka keirau tekiduru vata ka masuta na veivakauqeti.

Ni oti na masu, keirau a tomana vakalailai na tekiduru ka qai dabe ena idabedabe ka veiwadravi tu. Au a kerea ke rawa ni keirau wilika vata e dua na tikina. Ni keirau dolava na neirau ivolanikalou, au a cegu ka tukuna vua, “Elder, ni daru wilika na tikina oqo, yalovinaka tarogi iko ena taro oqo: Keu bulataka na veika oqo, ena vakavinakataka li na noqu veitokani kei na neirau cakacaka vakaulotu?”

Keirau qai dolava na Moronai 7:45 ka wilika vakadomoilevu; “Sa dauvosota vakadede na loloma uasivi, sa yalovinaka, sa sega ni vuvu, sa sega ni vakalevulevui ira, sa sega ni qara na ka me nona ga, sa sega ni vakacudrui vakarawarawa, sa sega ni dauloma ca, ka sega ni rekitaka na caka cala, ia sa rekitaka ga na dina, sa vosota na ka kecega, sa vakabauta na ka kecega, sa vakanuinuitaka na ka kecega, sa vosota na ka kecega.”

A qai raici au o elder ni tonawanawa tu na matana ka kaya, “Io, Peresitedi, ia esa dredre toka ni caka.” Au duavata ka vakananumi koya ni sa luve ni Kalou o koya, ena inaki vakalou me cakava vata tu kei na Turaga.

Keirau qai veivosakitaka vakalekaleka na italanoa vakaibalebale ni babasobu a vakatavulica o Elder Clark G. Gilbert ena Vitusagavulu, ka vakananumi keda ni dodonu meda tekivu ena vanua eda tiko kina vatakei na Turaga, toso ki liu vakakina ki cake ena veidusimaki donu. Au rawa ni kaya ni vaka me se luvuci koto o koya ena veikalawa e tarava, kau mani tarogi koya me vakamacalataka na ka e kila tu ena tikina “ena dau rawa na veika lelevu mai na veika lalai ka rawarawa.” A tomana me vakamacalataka o koya na ivakavuvuli ni rawa ni yaco na veika lelevu mai na caka ni veika lalai ka rawarawa. Au kerei koya me taura e dua na miniti ka vakatakila e rua na ka lalai ka rawarawa e rawa ni cakava me yalovinaka kina vua na nona itokani.

Ni oti vakalailai, sa wasea o koya na nona nanuma. Au qai kerei koya me taura e dua na miniti ka vakatakila e rua na ka lalai ka rawarawa e rawa ni cakava me yalovinaka kina vua na nona itokani. A volai sara ni wasea o koya na nona vakasama e rua. Esa matata tu ni a vakasamataka voli o koya na ka oqo ni bera na neirau sota. Au a sureti koya me kauta na ka eso oya kivua na Kalou ena masu ka kerea na veivakadeitaki, veidusimaki, kei na veivakauqeti ena sala me vakayacori kina na nona lalawaka ena inaki dina. Sa vakadonuya o koya. Ni oti neirau veivosaki, au a kerei koya me vakarautaka e dua na vakasama lekaleka ena nona ivola e veimacawa.

Ena veimacawa ka tarava, au rawa ni raica ena nona ivola e veimacawa ni sa vinaka cake na ka eso. Ia sega walega niu raica na vinaka cake oya ena nona ivola e veimacawa, au sa raica rawa talega ena ivola e veimacawa ni nona itokani. Donuya na neirau sota vata ka tarava, au raica na veisau ena kena irairai kei na yalona me vaka na rairai ni bogi mai na siga. Au tarogi koya, “Ia, Elder, esa dina li ni sega ni mudu na loloma uasivi?’” A sauma o koya ena matadredredre, “Io, ka na dau rawa na veika lelevu mai na veika lalai ka rawarawa.”

Ni ko muria na iWalewale ni Tukutuku Vinaka ni bula marau, nanuma na ivakavuvuli i Peresitedi Nelson: “Na vakatataro se leqa cavaga e tiko vei iko, sa kune tu ga na kena isau ena bula kei na ivakavuvuli i Jisu Karisito. Vulica vakalevu na Nona Veisorovaki, Nona loloma, Nona loloma soliwale, Nona ivunau, kei na Nona kosipeli vakalesui mai ni veivakabulai kei na tubu. Gole ki Vua! Muri Koya!”

Ni ko gadreva mo “rogoci Koya” ka kila na sala mo sureti Jisu Karisito kina ki na nomu bula, navuca na veika oqo sa vakatavulici keda kina o Peresitedi Nelson ena noda vakatakila:

“Vakaraica e dua na vanua vagagalu o rawa ni taleva wasoma. Vakamalumalumutaki iko kivua na Kalou. Talaucaka na lomamu kivua na Tamamu Vakalomalagi. Gole ki Vua ena isau ni vakatataro kei na vakacegu.

“Masu ena yaca i Jisu Karisito ena vuku ni nomu kauwai, nomu taqaya, nomu malumalumu—io, na gagano saraga ni lomamu. Ka qai vakarorogo! Vola na vakanananu era basika mai vei iko. Vola na ka eso o vakila ka salamuria mo vakayacora ni ko sa vakayarayarataki kina. Ni ko taleva na ka oqo ena siga veitaravi, vula veitaravi, kei na yabaki veitaravi, o na ‘tubu ki na ivakavuvuli ni vakatakila.’”

Au vakadinadinataka nio Jisu Karisito e noda iVakabula ka Dauniveivueti. E sa “vakayacora na ka kecega eda gadreva meda lesu kina vua na Tamada Vakalomalagi.“ Ena yacai Jisu Karisito, emeni.