Na Matadredredre kei na Yalo ni Vakavinavinaka
Na vinaka ni nodra bula na noda Yalododonu mai Aferika e qai vakavotui vakavinaka ena nodra sotava na dredre ni bula kei na gagadre ni dua na Lotu e tubu tiko.
Rauta ni dua na yabaki sa oti, au a vagalalataki mai na noqu ilesilesi ena Mataveiliutaki ni Vitusagavulu, a kacivaki eke ena koniferedi raraba. Baleta ni qai kacivaki na yacaqu voleka kina yacadra na Vakaitutu Raraba era sa emeritu, e vuqa era nanuma ni sa oti talega noqu gauna ni veiqaravi. Ni oti na koniferedi, au ciqoma e vuqa na itukutuku ni vakavinavinaka kei na vakanuinui vinaka ena vuku ni noqu bula. Eso era tuvakarau mera volia na noqu vale mai na Vualiku kei Salt Lake. E totoka niu vakila niu dau nanumi tu vakakina niu kila ni na sega ni leqa na kena volitaki na noqu vale niu sa cegu. Ia au se bera ni yacova yani.
Na noqu ilesilesi vou e kauti keirau kei Monica kina vanua totoka o Aferika, na vanua e tubu tiko kina na lotu. Ei veivakalougatataki dina na veiqaravi ena kedra maliwa na Yalododonu yalodina ena iWasewase o niCeva kei Aferika ena ka raica tu na loloma ni Kalou ena vukudra. E veivakauqeti meda raica na matavuvale ena veituvaki ni duidui ni bula, okati kina o ira na lewenilotu rawati ira ka vuli vinaka, nira solia tu nodra gauna kei na taledi mera qaravi ira na tani.
Ena gauna vata oya, ena vuku ni wiliwili ni lewenivanu , vuqa na tamata era sega ni rawaka vinaka era sa lewena tiko na Lotu ka sa veisau nodra bula ena vuku ni veivakalougatataki ni yalodina ni ikatini kei na veimadigi ni vuli e vakaratuaaka na Lotu. Na parokaramu eso me vaka na Succed in School, EnglishConnect, BYU–Pathway Worldwide, kei na Perpetual Education Fund e vakalougatataka e vuqa na bula, vakauasivi na itabatamata era tubucake tiko.
A tukuna o Peresitedi James E. Faust, “A tukuni ni lotu oqo e vaka me sega sara ni rawati ira na tamata rawaka ena nodra bula ia vakavuqa e dau veisautaka nodra bula na tamata sega ni rawaka vinaka mera tamata vinaka.”
Na vinaka ni nodra bula na noda Yalododonu mai Aferika e qai vakavotui vakavinaka ena nodra sotava na dredre ni bula kei na gagadre ni dua na Lotu e tubu tiko. Era dau sotava ena ivakarau ni rai uasivi. Era kila vinaka na ivakavuvuli kilai levu nei Peresitedi Russell M. Nelson.
“Na reki eda vakila e vakatau vakalailai sara ena ituvaki ni noda bula ka sa baleta vakatabakidua na veika e vakanamata kina na noda bula.
“Ni vakanamata na noda bula kina ituvatuva ni veivakabulai ni Kalou vei Jisu Karisito kei na Nona kosipeli, e rawa nida reki veitalia na cava e yaco—se sega ni yaco—ena noda bula.”
E kunea na reki se cava ga na dredre e yaco tiko. Era vulica ni keda isema vua na iVakabula ena rawa kina meda sotava na dredre ena matadredredre kei na yalo ni vakavinavinaka.
Meu wasea mada eso na ka au sa sotava vata kei ira na Yalododonu oqo ka matanataki kina na ivakavuvuli oqo, tekivu e Mozambique.
Mozambique
Ena vica na vula sa oti, au a dabe vakatulewa ena dua na koniferedi ni iteki ni dua na iteki yabaki dua ka sa 10 na kena tabanilotu. E sivia ni 2,000 na tamata era vakasinaita na valenilotu lailai kei na tolu na valelaca e tautuba. Na peresitedi ni iteki e yabaki 31, na watina yabaki 26, ka rua na luvedrau lalai. E liutaka tiko o koya na iteki tubucake tiko ka levu na kena dredre sega ni dua na kena kudru—na matadredredre ga kei na yalo ni vakavinavinaka.
Ena veivakatarogi kei na peteriaki, au kila kina ni tauvimate bibi tu o watina, ka dredre sara na nona rawata na veiqaravi e gadreva. Ni vakaraitaki oti vei peresitedi ni iteki na leqa oqo, keirau a solia vua e dua na veivakalougatataki ni matabete. Au taroga vei peteriaki se vica na veivakalougatataki vakapeteriaki e dau solia.
“Walu kina tini,” e kaya.
Au taroga, “Dua na vula?”
A sauma o koya, “Dua na macawa. Au vakasalataki koya ni sega soti ni vinaka me levu tu vakaoya.
“Elder Godoy,” e kaya o koya, “era lako tiko ga mai e veimacawa, okati kina na lewenilotu vou kei na vuqa na itabagone.” Vakadua tale, sega ni dua na kudru—matadredredre ga kei na yalo ni vakavinavinaka.
Ni oti na soqoni ena bogi ni Vakarauwai ni koniferedi ni iteki, niu lesu tiko kina otela, au raici ira na tamata nira voli kakana tiko e tolo ni gaunisala ena bogi levu. Au taorgi noqu draiva se cava na vuna ni sa butobuto ka sega nira cakava ena siga. A sauma nira a cakacaka tiko ena siga mera rawata na ilavo mera qai volivoli malua.
“Oi, era cakacaka tiko nikua mera qai kana ni mataka, au kaya.
E vakadodonutaki au, “Sega, era cakacaka tiko ena siga mera kania ena bogi qo.” Au nuitaka mera vinaka cake na noda lewenilotu, ia a vakadeitaka o koya ni vuqa era sotava tiko na ka vata oya ena vanua oya. Ena mataka ka tarava, ena soqoni ena Sigatabu au sa qai kila vakadua na ituvaki ni nodra bula, e tarai au vakalevu tale na nodra matadredredre kei na yalo ni vakavinavinaka.
Zambia
Ni keirau gole tiko ena soqoni ni Sigatabu, keirau raica kei peresitedi ni iteki e dua na veiwatini rau taubale tiko e gaunisala kei na dua na gone dramidrami kei na rua na gonelalai. Keirau kele me ratou vodo. Eratou kurabui ka marau. Niu taroga se vakacava na balavu nodatou taubale ivalenilotu, e sauma o tamadratou ni rawa ni 45 na miniti kina dua na auwa vakatau ena totolo ni nodrau taubale na gone. Eratou dau taubale vaqo, ena veisigatabu, sega ni dua na vosa—ena matadredredre ga kei na yalo ni vakavinavinaka.
Malawi
Ena dua na Sigatabu ni bera na koniferedi ni iteki, au sikova e rua na tabana ka rau vakayagataka tiko na koronivuli me nodrau vanua ni soqoni. Au kurabuitaka na ituvaki vakaciriloloma ni vale, ka sega mada ga na kena iyaya ni veiqaravi. Niu sotavi ira e vica na lewenilotu e kea au tuvakarau meu kerea na veivosoti ena ituvaki sega ni veiganiti ni nodra valenilotu, ia era marautaka ni toka voleka na nodra vanua ni soqoni, ka sega kina na taubale vakabalavu. Vakadua tale, sega talega na kudru—na matadredredre ga kei na yalo ni vakavinavinaka.
Simibabue
Ni oti na veituberi ni veiliutaki ena Vakarauwai, a kauti au na peresitedi ni iteki kina soqoni ena Sigatabu ka vakayacori ena dua na vale redetaki. Era tiko kina e 240 na tamata. A vakaveikilaitaki iratou vei au na lewe 10 na lewenilotu vou era papitaiso ena macawa oya o bisopi. Era tawana e rua na rumu lalai na ivavakoso, eso era dabe talega e tautuba, ka raica tiko mai na soqoni ena katubaleka kei na katuba. Sega ni dua na kudru—na matadredredre ga kei na yalo ni vakavinavinaka.
Lesotho
Au sikova talega na matanitu totoka lailai oqo, ka dau kilai talega me “matanitu ni veiulunivanua,” meu raica e dua na tikina ni Lotu sa vakarau tiko me dua na iteki. Ni oti na veisoqoni ena Vakarauwai, au a tiko ena lotu ni Sigatabu ena dua na nodra tabana ena dua na vale redetaki. Sa sinai vuabale sara tu ga na rumu ni sakaramede ka ra tucake tu e tuba na tamata me ra vakaivotavota. Au tukuna vei peresitedi ni tabana ni gadrevi me dua na vale levu cake. Au kurabui, ni tukuna vei au ni oya na veimama ga ni nona lewenilotu. Na ikarua ni veimama era na qai lako mai kina ikarua ni soqoni ni sakaramede ni oti na ikarua ni auwa. Sega talega na kudru—na matadredredre ga kei na yalo ni vakavinavinaka.
Au lesu tale i Lesotho ena dua na gauna ena vuku ni dua na vakacalaka bibi ka ra okati kina e vicavata na noda itabagone, ka sa tukuna oti o Elder D. Todd Christofferson. Niu sikovi ira na matavuvale kei ira na iliuliu au namaka yani e dua na draki ni lomabibi. Ia sotavi ira na Yalododonu qaqa ka mamarau era lakocuruma tiko na gauna oya ena dua na ivakarau veilaveti ka veivakauqeti.
Mpho Anicia Nku, yabaki14, ka bula mai na vakacala ka ena iyaloyalo oqo, a vakamacalataka vakavinaka ena nona vosa: “Nuitaki Jisu ka dau raici Koya ga, baleta ena Vukuna ko na kunea na vakacegu, ka na vukei iko o koya mo vosota rawa.”
Qori e vica ga na ivakaraitaki eda raica kina na nodra ivakarau vinaka baleta nira yavutaka nodra bula ena kosipeli i Jisu Karisito. Era kila na vanua mera kunea kina na veivuke kei na inuinui.
Na Kaukauwa ni Veivakabulai ni Vakabula
E rawa vakacava vua na iVakabula me karoni ira kei keda ena veituvaki cava ga ni noda bula? Na kena isau e rawa ni kunei ena ivolanikalou:
“Ia ena lako yani ko koya, ena vakila na mosi kei na vakarawarawataki kei na veivakatovolei kecega.
“Ena soli Koya me mate me kila kina na nodra malumalumu, na nona tamata, ka vakabulai ira ena nona yalololoma.”
Me vaka e vakatavulica o Elder Bednar, e sega ni dua na mosi ni yago, na yaluma, se malumalumu eda rawa ni sotava e sega ni kila na iVakabula. “O iko kei au, ena dua na gauna ni bula malumalumu eda rawa ni kacivaka yani, ‘E sega ni dua e kila na [veika au lako curuma tiko].’ Sega ni nidua na tamata, era, kila. Ia na luve ni Kalou e kila vakavinaka sara.” Cava na vuna? Baleta “ni sa vakila ka colata ko Koya na noda icolacola ni se bera sara o keda.”
Au tinia ena noqu ivakadinadina baleti Karisito ka kunei ena Maciu 11:
“Dou lako mai vei au, koi kemudou vakaaduaga sa oca, ka colata na icolacola bibi, ia kau na vakacegui kemudou.
“Vakataqara vei kemudou na noqu ivua, ka vuli vei au; niu sa yalomalua ka yalomalumalumu: dou na kunea kina na vakacegu ni yalomudou.
“Ni sa rawarawa na noqu ivua, ka mamada na noqu icolacola.”
Me vakataki ira ga na Yalododonu mai Aferika, au kila ni dina na yalayala oqo. E dina mai kea ka dina ena veivanua kecega. Au vakadinadinataka oqo ena yaca i Jisu Karisito, emeni.