Dou sa Vuli ka Veivakavulici Kece Talega

Na lewe ni Lotu i Jisu Karisito ni Yalododonu Edaidai, sa vakalougatataki tu ena veitokani ni dua na lewe Vakalou, eda rawa ni rawata na veivuke ni Dauveivakatavulici levu. Na Yalo Tabu e kila na ka kecega, vakadinadinataka na ka dina, ka “vakananumi kemudou ena ka kecega.” E dau tukuna wasoma o Peresitedi Russell M. Nelson na bibi ni kena rogoci na domo ni Turaga. E vakatavulica o koya na iwalewale meda sureta na veituberi ni Yalo Tabu ka vakamasuti keda meda vakalevutaka na noda kilaka vakayalo ka ciqoma na ivakatakila.

Nikua au sureti iko mo vakasamataka na itavi ni Yalo Tabu, e semati vakatabakidua na vulici kei na vakatavulici ni kosipeli ivale kei na lotu. Na Yalo Tabu e soli ena masu ni vakabauta ka da saga meda bula savasava ena isolisoli talei oqo. Na ivolavakarau veivakauqeti ni Lotu Veivakatavulici ena iVakarau ni iVakabula e dusimaka na ivakavuvuli eso e yavutaka na Turaga me vukea na sureti ni Yalo Tabu me noda dauveivakatavulici.

Dua na ivakavuvuli oqo na sureta na vuli vagumatua. Eliu, eda nanuma na veivakatavulici ni duana itubutubu se qasenivuli me sureta na Yalotabu kina nodra dui vakavakarau ka wasea na ka era vulica kei ira na gone se lewe ni kalasi, ka sa nodra itavi na vakarorogo. E cakacaka sara vakalevu, vaka dauvuli, meda vakavakarau kei na nodra vakarautaka na qasenivuli na ivakarau ni vuli meda ciqoma kina na ivakatakila kina yaloda kei na vakasama. Ia, ni soli na madigi meda wasea na ka eda vulica tiko ena ka eda kila vakakina ena Yalo Tabu, eda veivuke vakaikeda meda dusimaki ka vakavulici. Nida tutaka na ivakavuvuli ni kosipeli, na Yalotabu ena vakadinadinataka na kena dina taucoko.

Ena ka kecega, sa ivakaraitaki uasivi o Jisu Karisito. E sureti keda yadua o Koya meda vuli vagumatua ka vakatulewataka na noda dui vakadinadina. A sureti ira na nona tisaipeli mera vakarau kina vuli, mera wasea na ka era vulica tiko, ka cakacaka ena vakabauta. A masulaki ira o Koya, raica na kedra ituvaki vakalou, vakarorogo vei ira, ka vukea mera kila nira lomani ka gadrevi

Nida qasenivuli, meda vakanamata vakalevu kina nodra rawaka, ena sotavi ni nodra gagadre, kei na nodra vukei ni taraicake na itovo vakayalo ni bula taucoko vakatisaipeli. Vaka daunivuli, nida cakacakataka na noda dodonu ena ivakarau ni vuli, eda vakaraitaka vua na Yalo Tabu na noda lomasoli ni vakatavulici mai Vua.

Au vakavinavinakataka na qasenivuli e sureti au meu dua na daunivuli vinaka cake. Niu tekivu vuli torocake, e cala na noqu nanuma me dua na ka vosoti vakarawarawa na vuli me rawa nida vakatarai ena qito. Dua na siga, ni wiliki oti e dua na pepa au vola, a tukuna vei au na noqu parofesa ni tiko vei au na isolisoli ni dauvakasama gugumatua. Au sega saraga ni kila na kena ibalebale. Tukuna o koya na levu ga ni noqu gugumatua, ena rawa niu gonevuli vinaka. A sega ni votu vei au na vakasama oya. Nona gagadre, veivakayaloqaqataki, kei na veisureti e veisautaka na noqu ilakolako ni vuli ka vakalougatataka na noqu bula.

Dua tale na ivakavuvuli momona ni kena sureti na Yalo Tabu oya me vakavulici na ivunau dina. Kena ibalebale ni na noda vuli kosipeli kei na veidusimaki e yavutaki ena vosa ni Kalou eda sega ni usumaka se vakalewa na ka e sega ni vakatakila na Turaga. Ia, eda vakanamata kina ivakavuvuli ni kosipeli e veiganiti ka tawamudu, ka vakatara na Yalo Tabu me vakadinadinataka na ka dina. Vakadua tale, meda muria na ivakaraitaki ni iVakabula. Kaya o Koya, “Sa sega ni noqu na noqui vakavuvuli, sa nona ga ka talai au mai.”

Na ivakavuvuli dina e kune ena ivolanikalou kei na nodra ivakavuvuli na parofita ena gauna oqo. Na veivakauqeti ni Turaga me vulici na ivolanikalou vakayadua ka vakamatavuvale e tiko e valenilotu ena veimacawa mo vulica na Nona kosipeli e vakarautaka na ituvatuva momona me vulici kina na Nona ivakavuvuli ka rogoca na Domona. Eda vakasaqara na ivolanikalou me kilai na kena ibalebale, na ivakavuvuli era vakatavulica, kei na bulataki ni dina oqo ena noda bula. Sa dua dina na veivakalougatataki me tu vei keda na ivolanikalou. Raitayaloyalotaki Atama kei Ivi, Apinatai, Peresitedi Nelson, se Qasenivuli Levu, o Jisu Karisito, ni sikova tiko na noda itikotiko se kalasi me vakatavulici keda. E rawa kevaka eda kana tiko ena vosa ni Kalou. Ena sasaga wasoma, eda rawa ni vulica ni kila ka taleitaka na ivolanikalou ka nuitaka ni tiko kina na isau ni noda vakatataro.

E yaco e dua na gauna ni keirau se bera ni vakawati e sotava na watiqu, Kristi, e staova tiko na dredre me vakila na loloma ni Tamada Vakalomalagi ka kila vinaka na Nona ituvatuva me baleti koya. Ena nona masuta na veidusimakii, e vakauqeti me lewena na kalasi ni inisitute, ka me lewe ni kalasi ni Veiyalayalati Vou. Na ivakarau e vakatavulica kina na ivolanikalou na qasenivuli ni inisitute, kei na ivakarau ni veituberi, e vakaraitaka na levu ni nona taleitaka na vosa ni Kalou. Ni vuli tiko, e vakasorokakana vua na Yalo Tabu ni tiko e dua na ka ena ivolanikalou e gadreva tu. Na nona qasenivuli e taleitaka na ivolanikalou kei na veivakauqeti ni Yalo Tabu e bucina ilomana me tekivutaka na vulici vakabibi ni vosa ni Kalou—ka yaco me dua na ilakolako balavu ni saumaki levu kei na veiqaravi namaki.

Kena itinitini, e vakatututaki ena Veivakatavulici ena iVakarau ni iVakabula na noda veivakatavulici kei na vuli e dodonu me vakanamata vei Jisu Karisito. Eda rawa ni tukuni Koya vakalevu ena yalo veidokai ka vakasaqara vakalevu na madigi meda wasea kina na vakadinadina, vakavinavinaka, kei na loloma ki Vua. Se vakacava na ituvaki, nida nanumi Koya, e rawa tiko “vata kei [keda] na Nona Yalo Tabu.”

Dua na sala me koto kina o Jisu Karisito ena maliwa ni noda veivakatavulici oya me vakamatatataki ni sa ivakaraitaki uasivi o Koya, na itakele kei na ivakarau ni vakavuvuli taucoko ni kosipeli. Ke sega mada ga ni vakatakilai o Koya ena itukutuku vakaivolanikalou, eda rawa ni vakatakilai Koya tikoga me ivakaraitaki ni vakavuvuli e vakatavulici. Eda na taroga beka, “O kila beka e dua na gauna a ivakaraitaki kina ni vakavuvuli oqo o Jisu Karisito?”

Eda rawa ni vakanamata talega Vua ena vulici ni Nona itutu, itavi, kei na ivakarau, sagai me vulici sega ni ka walega e cakava ia na Nona kilai Koya vakavinaka. Me ivakaraitaki, ni vulici tu na ivakavuvuli ni veivutuni, sa ka bibi me kilai vakavinaka na iwalewale ni veivutuni. Ia e ka bibi me nanumi na ka e cakava o Jisu Karisito me rawa kina na veivutuni kei na cava e vakatavulica na veivutuni me baleti Koya, na kena ituvaki dina kei na ivakarau dina. Na cava e tukuna na madigi ni noda veivutuni baleta na Nona loloma, vosota, kei na loloma veivueti, Nona kila na keda ituvaki vakalou, Nona lomasoli me sorovaka na noda ivalavala ca, kei na marau e raica tu ena veivosoti? Na kilai ni Nona itutu—vaka na Lami ni Kalou, Dauveivueti, kei na Vuniwai—sa sala ni noda raica na veivutuni me Nona veisureti ni veivakasavasavataki, veisau, kei na veivakabulai. Na kilai ni veika e cakava o Koya ena vukuda kei na ka e tukuni me baleti Koya sa rawa ni vukea na noda “vakabauta kina veivutuni.”

Ena so gauna, eda sega ni raica rawa na ivakarau ni iVakabula e dusimaki ena na itukutuku vakaivolanikalou. Me ivakaraitaki, nida wiliki na nona tara na waqa o Nifai, eda na vakanamata ga vei Nifai. Ia na vakanamata vua na iVakabula e rawa ni vukei keda ni kila ni sega ni maroroi na itukutuku oqo me vakatavulici keda ena qaqa i Nifai ia me vakaraitaka na qaqa ni Kalou—ni solia o Koya na kaukauwa meda muria na Nona ivunauka vukei keda ena noda gagadre kece sara.

Eda rawa ni raica matua talega nai lutua ni tavi i Jisu Karisito ena ituvatuva ni bula marau maucokona ni Tamada Vakalomalagi. E rawa ni veisautaka na mua ni noda bula ni raica na keda ituvaki ena iloilo ni yavu tawamudu ni Kalou ka sega ni raica tu ena iloilo ni keda ituvaki vakayago. Na kosipeli e sega vakasaurarataki; e itukutuku vinaka ni ulubaleta na ivalavala ca kei na mate o Jisu Karisito Ena kena rawati na Nona loloma veivueti talei ena maroroi ni noda veiyalayalati kei na Kalou sa rawa nida bula marau kina oqo ka vakavakarau kina bula kei na Tamada Vakalomalagi me tawamudu. Nida vulica meda raica na Tamada Vakalomalagi kei na iVakabula ena ivolanikalou, eda na kilai Rau vakavinaka ka raica vakalevu cake ka vakaukauwa sara na Nodrau loloma kei na veivakayarayarataki kina noda bula.

Au na nanuma tu ga na Yalotabu au vakila vakacauravou ena nona a vakatavulica na neimami qasenivuli na iotioti ni siga ni bula ni iVakabula. A vukei keimami ni raica na totoka ni ka era yaco ena rumu e cake, Kecisemani, Kolikoca, kei na ibulubulu lala. A wasea o koya na nona vakavinavinaka cecekia me baleta na iVakabula kei na nona gagadre gumatua me muri Koya. E veisureti tu na nona veivakatavulici me vakadinadinataki Jisu Karisito na Yalo Tabu. Na Yalotabu au vakila ena kalasi oya e vakatitobutaka na noqu vakabauta ka vakalevutaka na noqu lomana ka vakacaucautaka na iVakabula. Na veivakayarayarataki ni qasenivuli oya e dei tu vei au ena noqu bula taucoko. Me vaka a kaya e dua na qasenivuli, “Eda rawa ni raraga na ligada ena buka ni noda vakabauta.”

Ena noda itikotiko kei na soqoni ni Lotu, nida vakanamata vei Jisu Karisito, vakatavulica na Nona ivunau, ka vuli vagumatua, eda sureta na Yalo Tabu me vakatitobutaka na noda vakabauti Jisu Karisito ka vukei keda meda vakataki Koya vakalevu, ka itakele ni vuli kei na vakatavulici ni kosipeli kecega.

Au vakavinavinakataki ira na qasenivuli ena noqu bula, o ira na itubutubu vinaka kei na iliuliu ni vanua, qasenivuli ni marama kei na turaga sa kacivi me vakatavulica ka ivakadinadina ena itutu ni vunau oqo, ka vukei keda meda kila ka muri Jisu Karisito. Au vakavinavinakataka na Yalo Tabu, na Qasenivuli vinaka. Ena vuku ni Yalo Tabu au kila kina ni lomani keda na Tamada Vakalomalagi ka tiko e dua na ituvatuva matau me baleti keda, ni o Jisu na Karisito, na iVakabula ka Dauveivueti e vuravura, ka vakalesui mai na Nona kosipeli kei na Nona Lotu. Au vakadinadinataka ena vakavinavinaka na veika oqo ena yaca i Jisu Karisito, emeni.