Na Turaga e Raica na Yalo
Na veika e gadreva na Kalou me vakayacori na Nona inaki ka vukei keda meda ucui Koya, oya meda vagolea taucoko na yaloga Vua.
Ni vakaroti me digitaka na tui vou kei Isireli mai vei iratou na luvei Jese, na parofita o Samuela, ni raica na ulumatua tagane i Jese, o Iliapi, a kailavaka ena reki, “Sa tu vakaidina beka ena mata i Jiova na nona lumuti.” Ia o Iliapi a sega ni nona tamata digitaki na Turaga. E tukuna na iVakabula vei Samuela, “Mo kakua ni raica na matana, se na kena balavu; niu sa sega ni digitaki koya: ni sa sega ni raica ko Jiova me vaka sa raica ko ira na tamata; ni sa raica na ka esau ko ira na tamata, ia sa raica na yalo ko Jiova.”
E dina nio Tevita a sega ni kaukauwa vakayago se maqosa sara mai vei iratou na tacina, ia e tudei na yalona ena mata ni Kalou. E lomana na Kalou ena yalona taucoko ka tu vua na gagadre me talairawarawa Vua. A sega ni yamekemeke na nona vakabauta na loloma ni Kalou, kei na veivakalougatataki yalataki, ena nona vakaraitaka e muri nia valuti ka ravuti Kolaiaci ena veivuke ni Turaga.
Na italanoa e vakatavulica ni gadreva na Kalou me vakayacora na nona inaki ka vukei keda meda ucui Koya meda vagolea taucoko na yaloga Vua. Kina daunilawa, e vakarota o Koya, “Mo lomana na Turaga na Kalou ena lomamu taucoko” Sa sureti keda o Jisu meda soli keda: “Raica sa vinakata na Turaga na yalo sa malumalumu ka talairawarawa.” Vei ira na Nifaiti, e sureti ira na iVakabula sa tucaketale, “Ia mo ni na cabora ga me isoro vei au na yalo raramusumusu kei na yalo bibivoro.”
Na cava e va kina oya? Na iVakabula a vakatavulica ni kevaka e gole vakataucoko na yaloda Vua, ena vuku ni Nona veisorovaki ena rawa meda vakalougatataki ena kaukauwa kei na isolisoli vakayalo eda gadreva meda rawa kina na bolebole vakayago, vorata na veitemaki, ciqoma na veidusimaki kei na kila ka, ka vakila na reki kei na vakacegu ena noda bula. “Ena tubu mai ena veika lalai na veika cecere.” A kaya o Koya ni rawa “ni qai vakayacora me vu ni nodra kaukauwa na veika malumalumu” ka vakalougatataki keda ena ka kecega eda gadreva meda rawa ka kina ena bula vakayago oqo ka rawata na bula tawamudu. ”Sa kalougata ko ira sa yalosavasava,” a kaya o Koya, ”nira na raica na Kalou.”
Au vakabauta ni oqo na vuna, vaka tikina, a dau vakadodonutaki ira kina na vunivola kei na Farisi o Jisu Karisito nia veiqaravi voli e vuravura. Dina ga nira gumatua ni maroroya Nona lawa, era cakava ena inaki cala. A cudruvi ira o Koya, ka kaya, “Ko ira na tamata oqo era sa vakarokorokotaki au ena gusudra, ia na yalodra sa yawa tani vei au.”
E ivakananumi vinaka vei ira kece Nona tisaipeli sega ni baleta ga na ka eda cakava—noda vosa kei na ivalavala—baleta na inaki eda cakava kina na ka e kerea vei keda o Jisu Karisito—noda gagadre kei na inaki. A kaya, “Ni koi Au na Turaga, au na lewai ira na tamata kecega me vaka na nodra cakacaka, me vaka na gagadre ni lomadra.” Na Tamada Vakalomalagi e gadreva na talairawarawa kei na veiqaravi mai vei ira na Luvena. E vinakata o Koya meda cakava na veika oya ena yalodina baleta nida lomani Koya mai vu ni yaloda. E vinakata o Koya meda gadreva meda vakataki Koya.
Oqo, kevaka e kauwaitaka vakalevu na iVakabula na bulabula vakayalo ni lomada—na cava e vinakata mai vua edua na tisaipeli dina—eda na dikeva vakaevei na lomada me kila ni sa dodonu ena mata ni Kalou?
Wale ga oqo, keirau lesu mai kei watiqu ena kaulotu i Potukali, e dikevi vakavuniwai na yagoi keirau me kilai kina na ituvaki ni neirau bula vakayago. Eso na vakadidike e vakanamata kina ituvaki ni neirau uto—me vaka na tauri dra, na misini ni dikevi uto, kei na lomaocaoca. Au vakabauta na iVakabula e vakarautaka vei keda edua na ivakarau ni vakadidike vakayalo, meda kila kina na ituvaki vakayalo ni lomada. Meu wasea mada vei kemuni e vica.
Dikevi na Yalo ena Kaukauwa ni Bula Vakayalo
iMatai, noda vakanamata, na ka me liu, kei na inaki
“Ni tiko talega na yalomudou ena yasana sa tiko kina na nomudou iyau,” a vakavulica o Jisu. Na iyau oya edua na ka e talei vei keda, eda vagolea kina na noda igu kei na vakasama. Na vanua eda digia me vakayagataki noda gauna ka vakanamata kina, vakakina na veika e vakauqeti keda meda cakava, e tukuna vakalevu na yaloda. Na iVakabula a tukuna ni dina ga e levu era kacivi mai Vua, e lailai era digitaki “baleta ga ni sa rui domona na lomadra na veika ni vuravura, ka ra gadreva mera dokai kina mai vei ira na tamata.” Au dauvakaliuca beka na iVakabula ena noqu bula? Na ka kece au cakava, e vakatabakidua beka kina Nona lagilagi?
iKarua, na Noda Vakadonua Meda Talairawarawa kina iVakaro ni Kalou
Ena ivolanikalou taucoko, na Turaga kei ira Nona parofita era vakatauvatana na dokadoka kei na talaidredre vata kei na yalo kaukauwa. E vakadreti ratou na tacina o Nifai, ka kaya: “Sa rawa vakacava mo dou sega ni maroroya na ivakaro ni Turaga? A cava mo dou rusa kina, ena vuku ni kaukauwa ni lomamudou?” Vei ira na Yalododonu e Missouri, a vakarota na Turaga, “Ia ko koya sa waraka ga me kitaka na ka e vakaroti vua, se muria na ivakaro ena yalo lomalomarua, ka rogoca ena vucesa, ena cudruvi vakaidina.” E dina na iVakabula e sega ni namaka meda uasivi ena muri ni Nona ivakaro, ia e kerea o Koya me tu na gagadre kei na sasaga meda maroroya ena lomada taucoko.
iKatolu, na Noda Yalodina ena Vulici ni iVolanikalou kei na Vakasaqarai ni iVakatakila
Na Turaga e vakadreti liver Cowdery, “mo tugana na noqu vosa ki lomamu.” Eda sureti meda vakasaqara na ivolanikalou ena yalodina, ena kaukauwa ni Yalo Tabu, saga meda rawata na kilaka kei na ivakadinadina ni dina na kosipeli, e lomada.
Na parofita o Apinatai a vunauci ira na bete ni Tui ca o Noa nira a sega ni cakava na ka oya, ka kaya, “Dou sa sega ni vakasaqara sara kina mo dou kila; o koya dou sa sega kina ni yalomatua.” Au saga tiko beka ena yalodina meu vulica na ivolanikalou e veisiga ka saga e lomaqu meu kilai ira ena masumasu?
iKava, Noda Vakanananu kei na Vosa
Na iVakabula e vakavulica ni “sa curu yani mai na yalo na vakasama ca” ka “na cavuta na gusuda na ka sa oso vakalevu kina na lomada.” Na ivakarau ni noda nanuma kei na vosa e ivakaraitaki vinaka ni savasava ni lomada. Au susuga tiko beka e levu na vakanananu ca baleta nodra ivalavala kei na inaki na tani, se baleti au ga? Sa rui totolo beka noqu vakalewai ira ka vakadiloi ira na tani? Se meu vaqara na iulubale se vakadonui au me baleta na noqu cala? Vakacava na veika au tukuna? E veilaveti ka veiuqeti beka vei ira era tu voliti au? Se e vakavure vakawasoma na veisaqasaqa kei na veicati?
Ni oti noqu dikevi vakavuniwai, a tukuna vei au na noqu vuniwai, ni bulabula vinaka na noqu uto—ia e tiko e vica na kauwai ka gadrevi me wali sara ga, ni bera nira vakatubu leqa. E vakatututaka eso na veisau kina ivakarau ni noqu bula. Vakakina, ni o vakayacora na vakadidike vakayalo oqo me baleta na lomamu ka raica eso na ivakatakilakila ca ni tekivu curu yani vakamalua, yalovinaka kua ni taqaya! Na iVakabula e vakarautaka eso na wainimate vinaka vakayalo kei na veiqaravi me vukei iko. E yalataka tale ga o Koya me solia vei iko edua na yalo vou! Oqo eso na ivalavala ena rawa ni vakatorocaketaka na bulabula vakayalo ni yaloda.
Vakavinakataka na Bula Vakayalo ni Yalomu
iMatai, Vaqaqacotaka na Nomu Veiwekani kei Karisito
Nida vakarautaka na gauna e veisiga meda toro voleka vei Karisito, ena veisautaki na lomada. Na vulici ni ivolanikalou e veisiga, salavata kei na masu yalodina kei na lolo, ena vakatubura nomu lomana na iVakabula ka vaqaqacotaka na nomu vakabauta kei na gagadre ni veivutuni ka cabora ena yalomalumalumu na lomamu vua na Kalou. Vakasamataka mada na ivakaraitaki i Nifai: “O koya, au sa tagi kina vua na Turaga; ka raica sa sikovi au mai ko koya, ka vakamalumalumutaka na lomaqu, kau sa vakabauta kina na vosa kecega a vosataka ko tamaqu.”
Nida vakabulabulataka na sore ni vakabauta ena noda gagadre kei na ivalavala dodonu, eda na vakila na vakasavasavataki ni lomada vaka e yaco vei ira na Nifaiti: “Ia era sa daulolo ka masu vakawasoma, ka sa tubu ka kaukauwa cake tiko ga na nodra yalomalumalumu, ka sa dei ka tudei tiko ga na nodra vakabauta na Karisito, ka vakasinaiti kina na yalodra ena marau kei na vakacegu, io, ka sa vakasavasavataki ka vakatabui na yalodra, na veivakatabui sa yaco ena vuku ni nodra solia na yalodra vua na Kalou.”
iKarua, me Duavata na Lomamu kei na Lomana
Na iVakabula a vakavulica, “Kevaka dou sa lomani au dou talairawarawa kina noqu ivunau.” E sureti keda o Koya meda vakaraitaka na noda loloma nida cakava ka maroroya noda veiyalayalati vata kei Koya. Nida saga e veisiga meda maroroya na Nona ivakaro, veivutuni ena yalodina mai na noda ivalavala ca, ka vosota tiko ena noda taura na Yacana ka duavata na lomada kei na Lomana, eda na rawa ni vakalougatataki ena veitokani ni Yalo Tabu.
E vakadinadinataka o Nifai: “Au kila ni kevaka dou na muria na Luvena, ena lomamudou taucoko, ka sega ni ia na veivakaisini kei na veidabui ena mata ni Kalou, ia ena gagadre dina, ka veivutunitaka na nomudou ivalavala ca, ka vakadinadina vua na Tamada ni sa lomamudou mo dou taura na yacai Karisito, ena papitaiso, ena qai soli vei kemudou na Yalo Tabu.” Na Yalo Tabu ena tuberi iko ka vukei iko mo kila na loma ni Turaga ka cakava na digidigi vinaka.
iTinitini, Qarava na Kalou kei ira na Tani ena Lomamu Taucoko
Na iVakabula e sureti keda kece meda “qaravi koya ena yaloda taucoko.” Ni da digitaka meda cakava na veika yadua e kerea vei keda na Turaga—vaka na maroroi ni vunau, vakayagataka na sakaramede, sokalou ena valetabu, ka veiqaravi vei ira na tani—ena yalodina kei na inaki dina, ena mana ka vakayalo na itavi yadua ni veiqaravi kei na sokalou ka vaqaqacotaka na noda vakabauta kei na ivakadinadina ka sinai na lomada ena reki kei na loloma vua na Kalou kei ira na kainoda.
Na taro nei Alama na profita e se voqa tiko nikua: “Ko ni sa sucu li vakayalo vua na Kalou? Ko ni sa ucui koya tiko li ena kemu irairai? Ko ni sa vakila li na veisau levu oqo e lomamuni?”
Kemuni na taciqu kei na ganequ, au sureti kemuni moni solia taucoko na lomamuni vua na iVakabula nikua. Meda vakayacora na veisokalou kei na veiqaravi yadua ena yalodina kei na inaki dina. Vakatikitikitaka na veivagolei tani ni vuravura ka saga me vakaibalebale na nomu gauna vata kei na Turaga ena veisiga ni nomu bula. Veivutuni ka lesu Vua ena lomamu taucoko, ka na vosoti iko o Koya ka ovici iko ena Ligana dauloloma. Mo kakua ni vakasaqara na veika ni vuravura oqo, ia mo digitaka na mata sa vakatabakidua ki na Nona lagilagi ka vakasaqara na veika e vinaka cake. E kila na nomu vakanananu kei na gagadre ni lomamu, nio lako mai Vua, ena vakalougatataki iko ena kaukauwa, yalodei, vakacegu, kei na reki ena bula oqo kei na Nona matanitu vakasilesitieli me tawamudu.
Au kila ni bula tiko o Jisu Karisito. O Koya na noda Dauveivueti. E lomani iko kei au o Koya ena Lomana taucoko. Ena yacai Jisu Karisito, emeni.