iVakaro Me Baleta Na Matavuvale—Tukutuku mai vua Na Kalou

Na koniferedi raraba oqo ni Okotova 2025 e vakatakilakilataka na ika 30 ni yabaki ni kena a kacivaki “Na Matavuvale: iVakaro iVuravura Raraba.” Ena ituvatuva vakalou, na ivakaro oqo, kei na vosa e veivakauqeti, a vakarautaki me “tokona ka vakaqaqacotaka na matavuvale, me yavu bula ni kawatamata.”

Na tamata yadua e lewe ni dua na matavuvale, se o dua na tina, tama, luvena yalewa se luvena tagane edua, makubuna edua, tukani gone, nei, momo, tuakana, ganena, se tavalena edua. Ia e bibi , vei keda yadua, me vaka e tukuni ena ivakaro “eda sa luvena yalewa se tagane lomani vakayalo na noda itubutubu vakalomalagi ka [tu] na keda dui ituvaki kei na icavacava vakalou.”

Ena noqu kacivi kina itutu tabu vaka apositolo ena 2015, e vakadreti vei au, “Na ivakaro oqo e nomu edaidai. Na yacamu [ni dusia na veivosa ‘Matabose ni Apositolo Le Tinikarua’ ena ulutaga] e tiko eke. Mo tugana ka vakavulica me vaka e nomu.”

Au taleitaka na ivakaro me baleta na matavuvale. Au tusanaka e veiyasai vuravura mai Aferika ki Ositerelia kei na veivanua tale eso na itavi ni matavuvale ena ituvatuva tawamudu ni Kalou. Na ivakaro e ivurevure vakalou, ka dodonu meda rokova ni sa itukutuku mai vua na Kalou.

Nanuma, taciqu kei na ganequ, me vaka au tukuna ena dua na koniferedi raraba sa oti ena itutu ni vunau oqo ni, “Bibi na vosaosa.”

Meu vakaraitaka vei kemuni na itukutuku baleta na ivakaro ni dua na uto ni itukutuku ni ka eda vakabauta.

Ena 1994, vo e dua na yabaki me kacivaki na ivakaro, eratou veivosakitaka na Kuoramu ni Apositolo Le Tinikarua na sala e sa dritani kina mai na lawa ni Kalou ni matavuvale, vakawati, kei na yagonisucu na veimatatamata kei na matanitu. “Ia oya a sega ni iotioti ni ka keitou a raica,” a qai vakamacalataka o Peresitedi Nelson. “Keitou raica rawa na nodra sasaga na vei itikotiko raraba eso me kau tani na itagede kece kei na kena yalani na veidauci. Keitou raica na veilecayaki ena vuku ni yago ni sucu. Keitou raica rawa ni na yaco mai.”

E ratou navuca na Le Tinikarua me vakarautaki edua na itukutuku volai, na ivakaro vakadonui, me vakamacalataka na itutu ni Lotu me baleta na matavuvale. Ena yabaki oya, o iratou na Apositolo oqo, daurairai kacivi mai vua na Kalou, eratou vakarautaka edua na ivakaro me baleta na matavuvale. A nanuma lesu o Peresitedi Dallin H. Oaks na nodratou gole vua na Turaga ena masumasu me ratou kila na ka “[me ratou] tukuna kei na sala [me ratou] tukuna kina.” E ratou vakaraitaka vei iratou na Mataveiliutaki Taumada: O Peresitedi Howard W. Hunter, Peresitedi Gordon B. Hinckley, kei Peresitedi Thomas S. Monson—me ratou vakatulewa kina.

Oti e vica na vula, ena Maji 1995, e mai takali o Peresitedi Hunter, ka yaco me ika 15 ni Peresitedi ni Lotu o Peresitedi Hinckley. Sa tu e ligana na ivakaro. Na gauna cava e vinaka me vakaraitaki kina na ivakaro oqo kina Lotu? Na gauna oya a qai yaco ni oti e ono na vula.

Vica na siga ni bera na koniferedi raraba ni Soqosoqo ni Veivukei ena Sepiteba 23, eratou veivakasalataki o Peresitedi Hinckley kei rau na nona daunivakasala kei iratou na Mataveiliutaki ni iSoqosoqo ni Veivukei Raraba. O iratou na marama, vakai iratou na iApositolo, e ratou kauwaitaki ira vakalevu na marama kei na matavuvale. Me ratou vakanamata kina matavuvale ena soqoni tarava .

E lokuci vei Peresitedi Hinckley me vosa vei ira na marama ena soqoni oya. E vakananuma tiko o koya na vanua me vakanamata kina na nona vosa. Ni toso tiko na veivosaki, e cavuta cake na yaca ni ivakaro ka se qai buli ia se bera ni vakaraitaki raraba “Na Matavuvale: iVakaro iVuravura Raraba.” E donu beka vanua eratou soqoni kina na marama oqo me caka kina edua na vakatulewa matata me baleta na matavuvale?

A vakamacalataka e muri na Peresitedi Raraba ni iSoqosoqo ni Veivukei o Peresitedi Elaine Jack: “Keitou sega ni kila ena gauna oya na cava na iVakaro kina Matavuvale. [Keitou rawa ni kila mai na iulutaga, ia keitou a vakila ni dua na ka e baleta na matavuvale ena kauta mai na vinaka. Keitou nuidei baleta ni ratou tiko na lewe ni Kuoramu ni Le Tinikarua eratou ciqoma tiko na ivakatakila.”

A vakairogorogo dina na soqoni ni iSoqosoqo ni Veivukei ena Vakarauwai oya. E qai vakamacalata o Peresitedi Hinckely na ivakaro ni matavuvale ena vosa bibi oqo: “Ena levu ni lasu era vakaraitaki me dina, ena levu ni veivakacalai me baleta na ivakatagedegede kei na yavunibula, ena levu ni veitemaki kei na veivagolei me takavi keda na duka kei vuravura, keitou veiuqeti ka veivakananumi me baleta na ivakatagedegede, ivunau, kei na ivakarau me baleta na matavuvale era dau vatonaka vakawasoma na parofita, daurairai, kei na dauvakatakila ni Lotu oqo ena kena ivolatukutuku makawa.”

A qai wilika taucoko o koya na ivakaro. Me vaka e tukuna na Turaga, “Se mai na domoqu ga se mai na domodra na noqu tamata, e tautauvata ga.”

E tukuna na ivakaro, “Na matavuvale e sa lesi mai vua na Kalou.” Au taleitaka na matata ni itukutuku oya. Na ivakaro edua na kaci vei keda ena noda bula vakayago meda dau nanuma tiko na keda ituvaki vakalou kei na veigauna tawamudu sa koto e matada. E vakatavulica o Peresitedi Nelson, “Oni luvena vakayalo dina na Kalou. Oqo na ka dina: Na kemu ituvaki e ka vakalou. Ena nomu vakasaqaqara vagumatua, na Kalou ena vakatara mo raica se o cei ona yaco mo vakataka.”

Ena gauna a vakaraitaki kina na ivakaro, e vuqa na tamata e vuravura era sega ni duavata kina. Sega ena gauna oya. Sega ena gauna oqo. Era tiko eso era sega ni duavata kei na ivakaro me baleta na matavuvale, na vakawati, kei na yago eda sucu kina. Eso era vakatututaka me vakasuka na lotu, me dikevi tale, se biu tani sara ga na ivakaro.

Na ivakaro oqo kina matavuvale, vaka a tukuna o Peresitedi Hinckley, na ivunau, kemuni na taciqu kei na ganequ. Na ivakavuvuli era salavata vakavinaka sara ga kei na sala ni Turaga kei na Nona salatu ni veiyalayalati. Na ivakavuvuli ena ivakaro era vakatakilai mai vua na Turaga o Jisu Karisito vei ira na Nona iApositolo ena gauna oya, ka vakina edaidai. Oqo na Nona Lotu; sa vakataudeitaka o Koya na veidina eso meda bulataka.

Eso vei kemuni ena vakananuma na ivakaro ka kaya, “Oqo e sega ni yaga vei au.” “E sega ni veidokai.” E sega ni vakaoya na ituvaki ni noqu matavuvale.” “E sega ni ganiti au.”

Vei ira e tiko na nodra kauwai, mo kila nio iko na luvedrau na itubutubu vakalomalagi, ka o tiki ni matavuvale nei Tamamu mai Lomalagi. E sega ni dua e kilai iko se kauwaitaki iko vakatitobu cake me vakataki Koya. Gole vei Koya; sovaraka na lomamu vei Koya, nuitaki Koya kei na Nona yalayala. O vuvale vata kei na nomu iVakabula, o Jisu Karisito, ka lomani iko. A lako mai o Koya i vuravura me sorovaka na noda ivalavalaca ka colata na noda caka cala kei na noda veisiga ca. E matata tu vei Koya na ka o sotava ka vakila tiko. Gole vei Koya; vakabauta ni na tala mai na Yalo Tabu me tiko kei iko, laveti iko, ka dusimaki iko. Vakila na Nodrau loloma ka “sovaraki yani kina yalodra na luve ni tamata; ka gadrevi vakalevu duadua kina mai vei ira na ka kecega sa ka rekitaki duadua kina yalo.”

O ira kece na Apositolo ni Turaga era lomani kemuni vakalevu. Keitou masulaki kemuni ka kerea na veidusimaki ni Turaga vei kemuni. Ni duavata tiko kei keitou. Oni bula tiko ena veigauna dredre ni saga tiko na meca moni yaco moni nona. Kakua ni vakatara mo vagolei tani. Ke sa yaco, lesu tale mai. E dodo tu yani na ligai keitou vei iko, ka vakakina o ira eso era lomani iko.

E tukuna na ivakaro, “Sa nodrau itavi vakalou na itubutubu mera susugi ira na luvedrau ena loloma kei na buladodonu.” Na iVola i Momani e vakarautaka na ikarua ni ivakadinadina ni dina oqo. Ena imatai ni tikina ena imatai ni wase, eda wilika kina,“Koi au, ko Nifai, au a sucu mai vei rau na itubutubu yalovinaka.” E vica mada vei keda eda tekivuna na iVola i Momani—ka tekivu tale ka tekivu tale—e yaco me kasa vei keda na veivosa oqo? Eda cavuqaqataka sara.

Naa yatu vosa oqo au taleitaka vakalevu ena ivakaro: “Ena qai kune na marau ni bula vakamatavuvale ni sa yavutaki ena ivakavuvuli i Jisu Karisito.”

Ocei e sega ni vinakata me marau.

“Na cava na ivakavuvuli i Jisu Karisito? Vakadua tale, ena vakaro: “Vakabauta, masumasu, veivutuni, veivosovosoti, veidokai, veilomani, yalololoma, cakacaka, kei na golevi ni veiitavi qaravi vivinaka eso.”

Na bula cava ena sega ni vinaka cake kevaka era bulataki na veivakavuvuli bibi oqo? Ena sega ni dua vei keda ena caka vinaka sara; ia eda rawa ni muria na vosa vuku i Peresitedi Hinckley, “Cakava na kena vinaka duadua o rawa ni cakava.”

Eda wilika ena ivakaro, “Mera veiliutaki na tama ena loloma kei na ivalavala dodonu,” ka sa “nodra itavi taumada na tina mera susugi ira cake na luvedra.” Vakatulewa e sega ni kena ibalebale na veivakasaurarataki kei na veisusu e sega ni kena ibalebale ni sega ni itavi bibi. Na Kalou sa solia vua na tagane kei na yalewa na itavi duidui ia erau itavi yaga ka veitokoni vakai rau.

Meu wasea mada edua na italanoa mai na noqu bula.

Keirau vulica kei watiqu me cakacaka vaka itokani vata ni oti na noqu cakava edua na digidigi ena dua na siga ka keirau sega ni ni veitalanaotaka. A kidacalataka o koya na ka au cakava, kurabui kina, ka biuti koya ena dua na itutu dredre. E muri, a biuta o koya na ligana i tabaqu ka kaya ena yalodei, “Ron, yalovinaka, kua ni cakava tale vei au na ka oya.” Keirau sa dau duavata tu ga mai na gauna oya.

Eda kunea ena ivakaro ni matavuvale: “itavi nei tama kei tina me rau veivukei vakaitokani duabau.”

Duabau edua na vosa e bibi. Ena veiyabaki ni neirau cakacaka vata kei Sisita Rasband keirau cakacakavata ena ka e vakatoka na ivakaro me “neirau itavi tabu,” keirau bucina me keirau colatavata na icolacola ni neirau vakaveiwatini. Nira sa vakawati kece na luvei keirau, keirau dau vakasalataki iratou vakaveiwatini kei Sisita Rasband ena sala meratou duavata kina vakaveiwatini.

Nida bula ena mata sa vakatabakidua kina lagilagi ni Kalou, eda na veirokorokovi ka veitokoni vakai keda. Na ituvatuva vakalou ni caka dodonu oqori era muataki keda kina bula tudei vakayadudua, noda matavuvale, kei na matatamata.

Na Tamada mai Lomalagi e vakarautaka na ivakaro kina matavuvale me vukea noda tuberi ivale vei Koya, me vukei keda meda vuli ka vakasinaiti ena loloma, igu, inaki, kei na kilaka tawamudu. Mai vuniyaloqu taucoko, au vakamasuti iko mo bula voleka Vua kei na Luvena Daulomani. Au yalataka nio kitaka vakakina, na Yalotabu ena uqeti ka dusimaki iko ka vukea mo vakila e lomamu na vakacegu e Rau yalataka o koya e “uasivia na ka kecega e kilai rawa.” Ena yacai Jisu Karisito, emeni.