Na iVola i Momani—Na iYau Talei ena Noda iLakolako

Mai vei Elder Ozani Farias

Ena Vitusagavulu

Nida kana magiti ena vosa i Karisito ka kunei ena iVola i Momani, na Yalo ena vukei keda meda kila vakavinaka na veidina tawamudu.

E rawa beka nio nanuma edua na gauna a solia kina vei iko edua na tamata edua na iloloma ka a veisautaka na nomu bula? Na Okotova qo ena yacovi kina na ika 40 ni yabaki au a ciqoma kina edua vei ira na iloloma cecere duadua ena noqu bula. Niu se tiko ena vuli torocake, au a raica ni dua na noqu lewe ni kalasi a dau mata mamarau vakalevu cake mai vei ira na itabagone tale eso. Au a dau taleitaka meu tiko voleka vua. A tukuna o koya vei au ena dua na siga ni lewena Na Lotu i Jisu Karisito ni Yalododonu Edaidai. A qai solia vei au edua na iloloma: edua na ilavelave ni iVola i Momani. A sureti au o koya meu wilika e vica na tabana ka sota kei rau e rua na itokani erau rawa ni sauma na noqu taro. O irau na itokani oya sai irau na daukaulotu.

Ena gauna au a sotavi rau kina na daukaulotu, erau a vakavulica vei au na ivunau i Karisito ka sureti au meu muria na veisureti nei Moronai na parofita: “Ia ni dou sa ciqoma na veika oqo, au gadreva meu vakamasuti kemudou, mo dou kerea vua na Kalou, na Tamada Tawamudu, ena yaca i Karisito, kevaka era sega ni dina na veika oqo; ia kevaka dou sa kerea ena yalodina, ena lomamudou taucoko, ka vakabauta na Karisito, ena vakatakila vei kemudou ko koya ena kaukaua ni Yalo Tabu ni sa dina” (Moroni 10:4).

Au a wilika e vica na taba ni iVola i Momani ka masu. E dina ga ni a se sega ni titobu sara na veika au kila me baleta na veika erau a vakavulica tiko vei au na daukaulotu, au a vakila e lomaqu ni ka au wilika tiko a ka vinaka ka sa mai vua na Kalou. Au a ciqoma na veivakadeitaki ni yalayala i Moronai: “Ia ena kaukauwa ni Yalo Tabu dou na kila kina na dina ni veika kecega.(Moronai 10:5).

Ni oti noqu papitaisotaki kina Lotu i Jisu Karisito ni Yalododonu Edaidai, eso na noqu itokani era a tovolea mera vakaraitaka vei au niu a cakava edua na digidigi cala. Ia ena veigauna au sotava kina na vakatitiqa se veisaqasaqa vaka oya, au dau ciqoma na veivakadeitaki vou mai na vulici ni ivolanikalou kei na masu meu dinata tiko na veiyalayalati kau sa cakava oti vata kei na Kalou. Mai na gauna oya, na iVola i Momani sa dau noqu itokani ka sa yaco me noqu iyau talei ena noqu ilakolako ena bula vakayago.

Na iVola i Momani e sega ni dua walega na ivola. O koya edua tale na ivakadinadina kei Jisu Karisito, ka a volai mai vei ira e vuqa na parofita makawa ena yalo ni parofisai kei na ivakatakila.

Na ka bibi duadua a yaco ka volai ena iVola i Momani oya na nona cakacaka vakalotu na Turaga ko Jisu Karisito ena kedra maliwa na Nifaiti ni oti toka ga na Nona Tucake tale mai na mate. Na iVola i Momani “e vakamacalataka na ivunau ni kosipeli, ka tuva na ituvatuva ni veivakabulai, ka tukuna vei ira na tamata na ka mera kitaka mera rawata kina na vakacegu ena bula oqo kei na bula tawamudu ena bula sa bera mai” (a ivakamacala taumada ni iVola i Momani).

Na imatai ni itabataba ni iVola i Momani: E Dua Tale na iVakadinadina kei Jisu Karisito, a tabaki ena dua na taoni lailai ena yasana o New York ena Maji ni 1830. Se qai yabaki 23 na Parofita o Josefa Simici ena gauna a vakacavara kina na kena vakadewataki na ivola ena 1829. A vakadewataka na ivola taucoko ena loma ni 75 na siga, na kena tabaki e taura e rauta ni vitu na vula.

Edaidai, e rauta ni 80,000 na kaulotu tudei ena sivia na 150 na veimatanitu era veiqaravi tiko vakavoladia, ena nodra solia na nodra bula mera vakadinadinataka ni dina na iVola i Momani ka tusanaki Jisu Karisito.

Ena nodra semina wale tiko ga oqo na peresitedi ni tabana ni kaulotu ena June ni yabaki oqo, a wasea kina o Peresitedi Russell M. Nelson na nona ivakadinadina kaukaua ni iVola i Momani: “Na iVola i Momani e vosa ni Kalou. E vakavulica na ivunau i Karisito ka vakamacalataka vakalevu cake na Veisorovaki ni iVakabula mai [na] dua tale na ivola.”

Au vinakata meu solia e tolu na ivakatutu ka na rawa ni vukea me vakatitobutaka na noda saumaki vei Jisu Karisito ena vulici ni iVola i Momani:

1. Gumatua ka Kua ni Gucetaka na Nomu Vulica e Veisiga

Me vakataki Alama kei iratou na luvei Mosaia, meda “[vakasaqaqara] vagumatua ena ivolanikalou, me rawa kina [nida] kila na vosa ni Kalou” ka vakaukauataki ena dina (Alama 17:2).

Ena neirau veiqaravi vakailiuiliu ni kaulotu e Atlanta Georgia Mission, keirau vakauqeti ira kece na daukaulotu mera vulica na iVola i Momani ke lailai sara me 30 na miniti e veisiga. Na yalayala oya a vakalevutaka na neirau vakabauta ka vukei keirau me keirau vakasaqara ka namaka na cakamana.

Ena sega beka ni rawa ni tiko na gauna vakaoya ni vuli ivolanikalou ni oti na kaulotu, ia au yalataka kevaka o vakaliuca ena yalodina na vulici ni iVola i Momani ena masumasu e veisiga, o na kunea e levu cake na kaukaua vakayalo kei na nuitaka na Turaga kei na Nona yalayala kece.

2. Mo Cakava na Nomu Vuli me Vakaibalebale Cake ena nomu Kana Magiti ena Vosa i Karisito

Evakavulica o Nifai: “Mo dou tugana ki lomamudou na vosa i Karisito; raica na vosa i Karisito sa tukuna vei kemudou na veika kece mo dou kitaka” (2 Nifai 32:3).

Na kana magiti e sega ni wiliwili wale ga—e kena ibalebale mo taleitaka, vakananuma, ka bulataka. Nio vulica na iVola i Momani, navuca eso na sala me vakaibalebale cake kina na nomu vulica na ivolanikalou. Me kena ivakaraitaki:

Vakayagataki ira na ivukevuke era tiko ena app ni Valenivola Vakosipeli.
Me kilai na veidina tawamudu ka ra vukei keda meda kila vakavinaka na ituvatuva ni Kalou ka tuberi keda meda cakava ka maroroya na veiyalayalati vata kei na Tamada Vakalomalagi.
Makataka na veimala ni vosa bibi ka vola na nomu vakasama me maroroi kina na ka o vulica ena gauna ni nomu vuli.

Na iVola i Momani e tu kina na kaukauwa me sauma na vakatataro ni yalo ni tamata. Me vaka a kaya o Nifai, e dodonu meda “vakatautauvatataka vei keimami na ivolanikalou me rawa ni yaga vei keimami, ka me keimami vuli kina.” (1 Nifai 19:23).

Nida kana magiti ena vosa i Karisito, era na dolava na katuba kina ivakatakila ka vakaraitaka vei keda na ka meda cakava ena veituvaki duidui kece ni noda bula meda toro voleka kina vei Koya.

3. Mo Cavuta na Nomu iVakadinadina me baleta na Dina ni iVola i Momani

Me vaka ga na nona a gadreva o Liai me wasea na vua ni vunikau ni bula vata kei na nona matavuvale (raica na 1 Nifai 8:12), nida rawata edua na noda ivakadinadina ni iVola i Momani, ena vure mai edua na gagadre meda wasea na reki ka vu mai na noda kila na kosipeli i Jisu Karisito.

Edua na neirau daukaulotu, o Sisita Benson, ka tiko tale ga ena soqoni oqo, a wasea vei au na nona gagadre me vukei ganena gone. Ena gauna oya, a vakavakarau tiko kina o koya kina vuli torocake, ka a sega tiko ni vakadeitaka mei lai kaulotu. Au a vakauqeti meu sureti Sisita Benson me wilika na iVola i Momani ena loma ni imatai ni va na vula ni nona kaulotu, makataka nona tiki ni ivolanikalou talei, ka qai vakauta na ilavelave oya vei ganena.

A vakauta o Sisita Benson na ilavelave makataki oya ni iVola i Momani, ka sureti ganena me wiliwili mai kina ena veibogi. A qai wasea vei au e muri o koya: “Ni bera noqu kaulotu, a sega ni vakadeitaka o ganequ se na vinakata me lai veiqaravi vakadaukaulotu tudei. Vakamalua, ni toso na gauna, ni wilika tiko na iVola i Momani, a kunea vakalevu cake na reki ena nona bula ka tekivu me navuca me lako ki kaulotu.”

Ni vo e rua na macawa me vakacavara o Sisita Benson na nona kaulotu, a ciqoma o ganena na nona veikacivi ni kaulotu. E veiqaravi tiko oqo o koya ena tabana ni kaulotu na Mexico Tuxtla Gutiérrez Mission. Mai na iVola i Momani, a raica kina o Elder Benson na nona bula ena rai matata vakayalo, ka muataki koya me qarava na Kalou ka nuitaka ni na vinaka na veika kece. Na digidigi oya a veivakurabuitaki dina— ka a yaco ena kaukaua ni vosa i Karisito.

Taciqu kei na ganequ lomani, au vakayaloqaqataki kemuni vakayadua moni vakatitobutaka na vulici ni iVola i Momani. Au kila nida kana magiti ena vosa i Karisito ka kunei ena iVola i Momani, na Yalotabu ena vukei keda meda kila vinaka na veidina tawamudu ka wasea na noda ivakadinadina ena doudou vei ira era sa vakarautaka tu na Turaga mera rogoca na Nona itukutuku. Na Turaga a cavuta, “Ko ira na noqu digitaki era na rogoca na domoqu ka sega ni vakaukauataka na lomadra” (Vunau kei na Veiyalayalati 29:7). Au tusanaka nio ira era kerea na Kalou ena vakabauta, era na rawata edua na ivakadinadina ni dina kei na vakalou ni iVola i Momani ena kaukaua ni Yalo Tabu. Au vakadinadinataka oqo ena yaca i Jisu Karisito, emeni.