“Ko sa Lomani Au?”
Kevaka meda vakaraitaka noda lomana na Kalou, e dodonu meda kila na sala e kila kina o Koya noda vakaraitaka na loloma.
Ena vosa vakatauvata ni gone cidroi, e dredre vei tuakana me marautaka ni sa lesu mai vale o tacina gone ni oti na gauna ni nona digidigi cala ka “vakayalia kina na nona iyau ena ivalavala ca.” Na dokadoka kei na vakadonui koya ga o tuakana a sega ni ciqoma kina me marautaka ni sa veivutuni lesu mai o tacina. Eda rawa ni vakalaiva me siviti keda na veimadigi mera kua ni kila o ira eda lomana, ena noda vosa kei na ivalavala, nida lomani ira vakaidina.
E vuqa na ivakaraitaki mana ena ivolanikalou baleta na loloma dina e wasei ka ciqomi: Naomi kei Ruci, Amoni kei Tui Lamonai, na gone cidroi kei tamana, na iVakabula kei ira na Nona tisaipeli.
Ni soli wale na loloma ka ciqomi ena yalodina, ena yaco me tubu na loloma vei koya a solia kei koya a ciqoma.
Na loloma ni Kalou e uasivi duadua, tawamudu, ka gugumatua, ka “sa kamikamica sara.” Sa vakasinaita na yalo ena “marau levu.” Ia, so na gauna eda raica ni dredre meda kila na loloma ni Kalou ena noda bula. Ia, na Tamada Vakalomalagi dauloloma e gadreva vakabibi meda sotava na Nona loloma ni “vosa vei [keda] o ya [meda na] kila.” O Koya ena vakaraitaka na Nona loloma vei keda ena sala vei keda, vakayadudua meda, rawa ni kila kina. Eda rawa ni sotava na loloma ni Kalou nida raica na totoka ni veika bula, ciqoma na isau ni masu, se na vakanananu e yaco mai noda vakasama ena gauna donu eda gadreva, se sotava na gauna kamica ni marau. Na ivakaraitaki cecere duadua ni Nona loloma na Tamada Vakalomalagi e cokonaki kina na vakasama kei na yalo ena gauna e vakadonuya kina na Luvena Daulomani me soli Koya me isoro.
Me vaka na tuakai gone cidroi, eda dau raici keda ga. Eda vakaogai na kena vakasaqarai na ivakadinadina ni loloma ni Kalou vei keda, ia eda rarawataka nida sega ni raica rawa. Ia na vakasama totoka oya na levu ga ni noda raicamatua meda vakaraitaka na noda lomana na Kalou, na kena rawarawa cake meda kila na Nona lomani keda. E rairai koya qo na vuna a sauma kina na iVakabula na taro oqo “A cava nai vakaro levu e na vunau?“ ena veisureti rawarawa ka bibi oqo: “Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega.”
Eso na gauna na sala eda vakaraitaka kina na noda lomani ira eda vakamareqeta e sega ni sala era kila kina na loloma. Ena vakamosi yalo vei koya e solia kei koya e ciqoma. Ena veivuke beka meda tarogi ira eda lomana era kila vakacava nira lomani. Vakakina, kevaka meda vakaraitaka noda lomana na Kalou, e dodonu meda kila vinaka na Nona kila na noda loloma. E ka ni marau, ni tuvana vakamatata o Koya e vica na sala ena ivolanikalou e rawa meda vakaraitaka kina nida lomani Koya.
Ko sa Lomani Au Vakalevu Ka Vakalailai ko Iratou Oqo?
Na nodrau veivakasalataki o Pita kei na Turaga sa tucaketale ena Wai mai Taiperia, eda vulica kina na sala eda rawa ni vakaraitaka kina ni da lomana na Turaga.
“Sa kaya vei Saimoni Pita ko Jisu, Saimoni, na luvei Jona, ko sa lomani au vakalevu, ka vakalailai ko iratou oqo? Sa kaya vua ko koya, Io, na Turaga; ko ni sa kila niu sa lomani kemuni.”
Na malanivosa bibi ena tikina oqo oya “ko sa lomani au vakalevu ka vakalailai ko iratou oqo?” Eda vakaraitaka na noda lomana na Turaga nida vakaliuci Koya cake “maivei ira oqo,” kei “iratou oqo” se o cei, na itaviqaravi, se cava e sosomitaki Koya mai na nona ivakaraitaki vinaka kina noda bula.
Ena sega ni veirauti na gauna ena dua na siga, dua na macawa, dua na vula, se dua na yabaki meda cakava na veika kece eda gadreva se vinakata meda rawata. E tiki ni vakatovolei ena bula meda vakayagataka na ivurevure talei oya ni gauna ni ka bibi kina noda vinaka tawamudu ka biuta laivi na veika e tawayaga.
E tukuna o Peresitedi Russell M. Nelson: “Na taro vei keda vakayadua sa koya vata ga. O sa tu vakarau mo vakatara na Kalou me tiki bibi ni nomu bula? Ona vakatara na Nona vosa, na Nona ivakaro, kei na Nona veiyalayalati me veivakauqeti ena veika o vakayacora e veisiga? Ona vakatara beka na Domona me liu duadua mai vei ira na kena vo? O sa tu vakarau mo solia na cava ga e gadreva o Koya mo cakava me bibi duadua mai na nomu veisasaga kecega? O sa tu vakarau mo solia me duavata na lomamu kei na Lomana?” Eda vakaraitaka na noda bula vakatisaipeli kei na lomana na Kalou nida vakaliuci Koya.
Vakani Ira na Noqu Sipi
Ena tikina e tarava ena nona vosa tiko ga vei Pita kei na iVakabula, eda vulica e dua tale na sala e kila kina na Turaga nida vakaraitaka na noda loloma: “Sa kaya tale vakarua [na Turaga] vei koya, Saimoni, na luvei Jona, ko sa lomani au? Sa kaya vua ko koya, Io, na Turaga; ko ni sa kila niu sa lomani kemuni. Sa kaya vua ko Koya, Vakatawana na noqu sipi.”
Eda vakaraitaka nida lomana na Tamada Vakalomalagi nida qarava, vakarorogo, lomana, laveta cake, se vueti ira na Luvena. Na veiqaravi oya ena rawarawa vakaidina nida raici ira ka sega ni vakalelewa. Ena ika 76 ni wase ni Vunau kei na Veiyalayalati, eda raica na nodra itovo o ira era na rawata na lagilagi kei silesitieli: “Ka ra raica me vaka era sa laurai, ka kila me vaka era sa kilai.” Era raici ira me vaka e raici ira na Kalou, ka raici ira o Koya ena veika era rawa ni rawata, ena lagilagi vakalolu.
Niu lesu mai vale ni oti na kaulotu, au cicivaka na bisinisi ni koti co keirau a tekivuna kei taciqu ni keirau se cauravou lalai. Au osooso tale tikoga ena noqu vuli ena univesiti. Dua na macawa ni vulai kadakada, na tau bi ni uca kei na veitarogi levu e vakavuna me bera na noqu cakacaka.
Ena loma ni macawa sa rarama mai na lomalagi, au nanuma meu sa tomana na koti co ni oti na kalasi. Ia niu yaco i vale, sa yali na noqu lori kei na iyaya ni cakacaka. Noqu via kila, au laki raica na matanivale mera koti, ia era sa koti tu vakavinaka. Ena iotioti ni matanivale me koti, au raici taciqu lailai ni biliga tiko na ikoti ni co. A raici au mai, dredre, ka yaloyalo mai. Au luvuci ena marau, au mokoti koya ka vakavinavinakataki koya. Na nona veiqaravi e vaqaqacotaka na noqu loloma kei na dina vua. Na veiqaravi vakai keda e dua na sala tawacala eda vakaraitaka kina noda lomana na Kalou kei na Luvena Daulomani.
Vakatusa Na Ligana ena Ka Kecega
Eda sa vakatakila talega nida lomana na Kalou ni sa vakavinavinaka tiko na yaloda. A kaya na Turaga, “Ka ni sega tale ni dua na ka meda ivalavala ca kina vua na Kalou na tamata, .ia o ira ga era sega ni vakatusa na ligana ena ka kecega.” Eda vakaraitaka nida lomana na Kalou ena noda vakadinadinataki Koya ni sa ivurevure ni veika vinaka kecega ena noda bula.
Ni se qai tauyavu na neirau kabani, keirau dau masu vagumatua kei noqu itokani vakabisinisi ni bera na bose bibi eso, ka kerea na veivuke ni Tamada Vakalomalagi. Vuqa na gauna, e dau sauma mai na Kalou na neirau masu, ka toso vinaka na bose. Ni oti e dua na bose, e vakaraitaka na noqu itokani vakabisinisi ni totolo na neirau kere veivuke ka berabera neirau vakavinavinaka. Tekivu mai kea, keirau sa vakamatautaka me cabori na masu ni vakavinavinaka, me dolei kina na liga ni Turaga ena neirau rawa ka. Eda vakaraitaka nida lomana na Kalou ena “itovo ni vakavinavinaka.”
Kevaka Dou Lomani Au, Dou Talairawarawa kina Noqu iVunau
E dua tale na sala eda vakaraitaka kina nida lomana na Tamada Vakalomalagi kei na Luvena Daulomani ena noda digia meda talairawarawa vei Rau. A kaya na iVakabula: “Kevaka dou sa lomani au, dou talairawarawa kina noqu vunau.” Na mataqali talairawarawa vakaoqo e sega ni mataboko se lewai mai ia sa dua na ivakaraitaki ena yalodina kei na ivakaraitaki ni loloma E gadreva na Tamada mai Lomalagi meda vinakata na talairawarawa. E vakatoka na ka oqo o Sister Tamara W. Runia me “talairawarawa ena loloma.” E tukuna, “E dina ni sega ni uasivi na noda talairawarawa nikua, eda tovolea meda talairawarawa ena loloma gauna oqo, digitaka meda tiko ga, tomana ka tomana tiko, baleta nida lomani Koya.”
E solia vei keda na Tamada Vakalomalagi na galala me vakauqeti keda meda vinakata meda digitaki Koya. Na Nona cakacaka kei na lagilagi e sega walega ni kauta mai na bula tawamudu oka talega na inuinui ni noda gagadre cecere meda lesu Vua. Ia, ena sega vakadua ni vakasaurarataki keda meda talairawarawa. Na serenilotu “Know This, That Every Soul Is Free,” eda lagata:
Vaka liuliu ni kaulotu, era dau vakauqeti au kei na watiqu, o Christina, e vuqa na daukaulotu era digitaka mera talairawarawa, sega ni baleta na itagade ni kaulotu ia baleta era vinakata mera vakaraitaka nira lomana na Turaga era digitaka ena yalomalua mera matataki Koya.
E kaya o Elder Dale G. Renlund: “Na nodrau lalawa vakaitubutubu na Tamada Vakalomalagi e sega ni nodra cakava na Luvena na ka e dodonu; ia mera digitaka na ka dodonu ka yaco mera vakataki Koya. Ke gadreva o Koya meda talairawarawa ga, ena vakayagataka o Koya na veisaumi ka veitotogitaki sara vakatotolo me vakauqeta na noda itovo.” Eda vakaraitaka nida lomana na Kalou nida digitaka meda talairawarawa Vua.
Na Tamada Vakalomalagi kei na noda iVakabula e kila vinaka na ivakaraitaka ni noda lomani Rau nida vakaliuci Rau ena noda bula, veiqaravi vakai keda, marautaka ka vakavinavinakataka na veivakalougatataki mai vei Rau, ka digitaka meda talairawarawa ka muri Rau.
Au vakadinadinataka nio keda kece eda luvena dina na Kalou ka lomani keda vakataucoko o Koya. Au vakadinadinataka ni gadreva o Koya meda sotava na Nona loloma ena sala eda raica ka kila vinaka. Vakakina, au vakadinadinataka nida na sotava na Nona loloma vei keda vakabibi nida vakaraitaka noda lomani Koya. Ena yacai Jisu Karisito, emeni.