Na Kosipeli i Jisu Karisito: Na Rorogo ni Veivakacaucautaki
Na kosipeli vakalesuimai ena kauta mai na inaki kei na reki vei iko ena nomu ilakolako kina bula tawamudu.
Rarama ni iNuinui, mai vei Simon Dewey
Niu veiqaravi tiko vaka iliuliu ni kaulotu mai Japani ena vica na yabaki sa oti, au a vakatarogi koya e dua na turaga ka a lewena na Lotu ena dua na yabaki yani ki liu ka a segata tiko me ciqoma e dua na ivolatara ni valetabu.
Ena neirau veivosaki, a vakamacalataka kina na lewenilotu vou oqo na nona vakavinavinakataka vakatitobu na veivakalougatataki a ciqoma ena yabaki mai na gauna a papitaiso kina. Vei au, a vakaraitaka o koya e dua na yalodei ni veiyalayalati ka vu mai na nona kila na kosipeli, ka sa yavutaki vakatitobu tu vua. O koya e dua na tisaipeli saumaki i Jisu Karisito ka a sotava e dua na veisau levu ni yalo (raica na Mosaia 5:2).
Ni oti na veivakatarogi, au tukuna vua na peresitedi ni tikina na noqu kurabui ni ra sa kunea na daukaulotu kei ira na lewenilotu, ka ra susuga cake vakayalo, e dua na turaga vakasakiti vakaoqo ka tu vua na rawa ka vakaoqo.
Au kurabui niu kila ni gauna a tekivu sota kina na turaga oqo kei ira na daukaulotu ka lako i lotu, a sega tu ni vakaitikotiko ka sega ni dei tu na nona ituvaki. Na nona vulica na kosipeli na tacida oqo kei na nona saumaki mai ena vica na vula sa yaco kina ki na nona veisau mana, ka biuti koya ena dua na salatu ni bula rawati koya vakayalo ka vakayago kei na reki.
Na kosipeli a solia vua na tacida oqo e dua na iyaloyalo matata ni inaki ni nona bula. Na dina matata ka talei ni kosipeli a kauta mai vua na isau ni taro bibi ni bula vakavuravura oqo. Na veivakalougatataki vakaoqori e tautauvata na kena sa vakarautaki tu vei iko kei ira kece na luve ni Kalou ena kosipeli i Jisu Karisito.
Na iNaki ni Bula
E sa vakalesui mai na kosipeli i Jisu Karisito vua na Parofita o Josefa Simici Ena iotioti ni nona ivakadinadina ki na Lotu, a kaya kina o Peresitedi M. Russell Ballard (1928–2023), ka a Peresitedi Vakatawa ni Kuoramu ni iApositolo Lewe Tinikarua ena gauna oya:
“Eda kila o cei na Kalou; eda kila o cei na iVakabula baleta ni tiko vei keda o Josefa. …
“… Eda sa kalougata ni da kila na veika eda kila me baleta na noda inaki ni bula, na vuna eda tiko kina eke, na veika e dodonu meda tovolea tiko meda cakava ka rawata ena noda bula e veisiga.”
Vei ira na lewe ni Lotu i Jisu Karisito ni Yalododonu Edaidai, na kila ka oqori e oka kina na kilai ni “ituvatuva uasivi” ni veivakabulai, ka kilai talega me “ituvatuva cecere ni bula marau,” “na ituvatuva ni veisereki,” kei na “ituvatuva ni loloma cecere” (Alama 42:8, 11, 15). Na kilai vakamatata ni ituvatuva vakasakiti ni Kalou e “kauta tani na veika vuni ni bula kei na veilecayaki mai na noda veisiga ni mataka.” E bibi ka uto ni ituvatuva o ya kei na inaki ni bula sa ikoya na “ivunau i Karisito.”
Mai na kosipeli, eda kila ni da sa luve ni Kalou, ka talai mai i vuravura meda vakatovolei ka vakavakarau meda tucaketale (raica na Vunau kei na Veiyalayalati 76:39). Eda kila na ivakaro ka vakavulici meda “kila na ka vinaka mai na ca” (2 Nifai 2:5). Eda kila nida mai tiko eke meda veilomani ka veiqaravi ka sa kacivi keda na iVakabula meda vakamalumalumutaka na vuravura ka vukei ira na tani mera cakava vakakina (raica na Joni 16:33).
Na ka a vakatoka o Josefa Simici me “rorogo ni marau ni Kosipeli ni noda Turaga o Jisu Karisito” ena vaqaqacotaki keda ena veisiga dredre ka kauta mai na ibalebale kei na inaki vei keda kei ira tale eso.
Talairawarawa kei na Veivakalougatataki
Sa solia vei keda na Kalou na galala ni digidigi me rawa ni da saumi taro ena vuku ni noda digidigi (raica na Vunau kei na Veiyalayalati 101:78; raica talega na 2 Nifai 2:16). Me tiki ni “veibasai ni ka kecega” (2 Nifai 2:11), sa vakatarai kina o Setani me temaki keda meda vakayagataka cala na noda galala ni digidigi.
Ena noda gauna oqo, a kaciva na Parofita o Josefa Simici na Turaga o Jisu Karisito “ka vosa vua mai lomalagi, ka solia vua na ivakaro” (Vunau kei na Veiyalayalati 1:17). E tomana tikoga na Turaga na nona vakatakila na Nona ivakaro kei na lewa vei ira na Nona parofita e dai baleta ni gadreva o Koya me kauti keda ki na marau ena bula oqo kei na lagilagi vakasilesitieli ena bula ka tarava.
Vunau vei ira na Nifai ko Tui Penijamini, mai vei Gary L. Kapp
Vakatavulici ni Vunau Dina, mai vei Michael Malm
Vunau tiko o Josefa Simici, mai vei Sam Lawlor
Talairawarawa kina ivakaro ni Kalou e dodonu me lako mai ena noda yalodina kei na lomani Koya. A kacivaka na Turaga o Jisu Karisito, “Kevaka dou sa lomani au, dou talairawarawa kina noqu vunau” (Joni 14:15). Na isau cecere ni noda vakaraitaka na noda lomana na Turaga ena noda muria na Nona ivakaro sai koya na veivakalougatataki e kauta mai na marau kei na reki (raica na Vunau kei na Veiyalayalati 130:20–21).
Ena dua na rai matata me baleta na noda itekitekivu vakalou kei na icavacava, eda kila ni “veika sara ga ena cakava [na noda] bula vakayago me vinaka duadua e rawa ni yaco me ka vata ga ka na cakava na [noda] bula ena veigauna tawamudu me vinaka duadua e rawa ni yaco!”
Reki ena Nomu iLakolako
O koya na curuvou rekitaki au a sotava mai Japani ena vica na yabaki sa oti a kunea na kosipeli vakalesui mai i Jisu Karisito ena nona gugumatua kei na nodra o ira na daukaulotu kei na lewenilotu. A kunea na nona inaki ka vakarabailevutaka na nona raivotu me baleta na ituvatuva cecere ni bula marau, ka kauta mai vua na veivakalougatataki kei na reki ka laveti koya cake vakayago ka vakayalo.
A vakatavulica o Elder Patrick Kearon ena Kuoramu ni iApositolo Lewe Tinikarua:
“Ena vuku ni nona ituvatuva ni loloma na Tamada Vakalomalagi ena vukuda yadua na Luvena, vakakina ena vuku ni nona bula ni veivueti kei na itavi na noda iVakabula, ko Jisu Karisito, e rawa— ka dodonu vei keda meda—tamata mamarau taudua e vuravura! Ni liwavi keda tiko mada ga na cava ni bula ena dua na vuravura leqaleqa, e rawa nida susuga e dua na yalo ni reki kei na sautu qaqaco ka veimaroroi ena vuku ni noda inuinui vei Karisito kei na noda kila na noda tikina ena ituvatuva totoka ni marau.”
Au solia na noqu vakavinavinaka, kei na ivakadinadina ni, kosipeli vakalesui mai i Jisu Karisito kei na ituvatuva cecere ni bula marau. Au sureti kemuni moni vakaivotavota ena vua ni kosipeli ka vakila na reki levu cake ena nomuni ilakolako kina bula tawamudu.