Ena Tikoga kei Iko na Kalou

Ni’u se qai yabaki walu, rau a sotavi buqu kei noqu nei na daukaulotu ena gaunisala. Ni keitou vulica oti na kosipeli, keitou a papitaiso kece. Ia, ena 2020, keitou a sega ni lako i lotu ena vuku ni COVID. A qai yaco kina me tini na neitou vakabauta.

Ena rua na yabaki sa oti, au a sega mada ga ni vakabauta na Kalou se kila kevaka e bula dina tiko o Koya. Ena dua na siga ni oti na vuli, au a vinakata me’u takosova na gaunisala me’u volia e dua na kakana vakalomavinaka. Ia a tukuna vei au e dua na domo meu kakua ni takosova na gaunisala. Au a tu vakadua, ka rau qai coqa sara ga e mataqu e rua na motoka. Kevaka meu a takosova na gaunisala, ke coqai au na motoka se vakamatei au. Au qai kila kina ni Kalou e kilai au ka lomani au tu. E dina ga niu a sega ni vakabauti Koya ka sega ni dau lako i lotu ena gauna o ya, e se lomani au tikoga ka taqomaki au o Koya.

Au tekivu wilika tale na iVola i Momani ka yaco meu kila ni sa vosa ni Kalou. Au a tekivu lako tale ki lotu. Ni’u dau lako ki lotu, au vakila na vakacegu, loloma ni Kalou, kei na Nona veivuke. Au vakila ni dau tikoga vata kei au o Koya, ka sa vakavuna me’u marau.

Na noqu sere ni lotu taleitaki na “Au Luve ni Kalou” baleta ni vakananuma vei au ni lomani keda na Tamada Vakalomalagi ka vukei keda. Au taleitaka talega na ivolanikalou 2 Nifai 2:27, ka tukuna tiko na sala eda galala kina meda digitaka na dodonu mai na cala.

Ena vuqa na vula sa oti, a tekivu lako vata mai kei au o taciqu i lotu, ia ni oti vakalailai a cegu o koya. E dau lomaleqataka na nodra nanuma na nona itokani kei ira tale eso. E nanuma o koya ni vakamadua me lako ki na noda lotu, ia au tukuna vua ni sega ni dua na ka na nodra nanuma na itokani. Ia na ka e nanuma na Kalou e ka bibi.

Era sega ni dau lako i lotu na noqu matavuvale. Au dau lako duadua ga. Baleta ni sega na basi ena noqu gaunisala ki na vale ni Lotu, au dau taubale me rauta ni 30 na miniti me’u yaco yani kina. Eratou lomaleqataka na noqu matavuvale na nodra nanuma na tamata me baleti iratou, ia au dau kaya ni sega ni dua na ka baleta ni’u kila ni dina.

Niu sotavi ira na noqu itokani, era dau gunuva na kofi ena so na gauna. Ni’u raica oqori, ena so na gauna au vinakata talega meu gunu kofi. Ia au dau nanuma ni sa tiko vata kei au na Kalou. E dau taura tu na ligaqu ka vukei au. Au dau rogoca e dua na domo ka tukuna vei au meu kakua ni cakava, kau kila ni sa vukei au tiko na Kalou meu vorata na bolebole oqo.

Kevaka me’u na vakasalataka e dua ena noqu ituvaki, au na kaya vei ira nio sa vakalougatataki vakalevu, ka sa levu na nomu vakabauta. O sega ni tiko duadua, baleta ni rawa nira solia vei iko na lewe ni Lotu kei ira na daukaulotu na ivakasala vinaka. E lomani iko na Kalou. O iko na Luvena tagane se yalewa, ka vinakata o Koya me vukei iko.