Na Rarama ni Matanisiga ena Cava ni Noqu Bula

Ena dua na gauna lekaleka sa oti, au a sotava e dua na ka dredre sara. Erau sa veibiu tu o tamaqu kei tinaqu, ka cakacaka e vanua tani o tinaqu. Au a tubu cake vata kei buqu—o koya a vakatakilai au ki na kosipeli kei na Lotu. Ia ena yabaki oqo, a takali yani vakasauri o koya.

O koya na iotioti ni tamata au nanuma ni na mate. Ena so na gauna au nanuma niu na mate e liu baleta ni a bulabula vinaka sara tu o koya! E sega ni dau vakaraitaka vakadua o koya na malumalumu ka dau kaukauwa tu ga e mataqu. Au a sega vakadua ni vakasamataka rawa na noqu bula me yali kina o koya.

Ni sa takali oti o koya, au dau diva ena so na gauna meu mate talega. Au a vakasamataka meu vakamatei au. Ia sega ni dede au a gole ki na dua na itaviqaravi ni itabagone ena iteki ka vulica kina e dua na lesoni me baleta na yavu ni veivakabulai.

Au kila tu na yavu ni veivakabulai, ia a rairai vakalailai ga noqu kila baleta na ka a yaco vei buqu. Niu a vakarorogo, au vakasamataka sara, “Au guilecava na veivakalougatataki ni solibula i Jisu Karisito ena vukuqu.”

Au qai kila ni a mate o Jisu Karisito me vakabulai au. E sega ni dodonu meu tinia koso noqu bula baleta na leqa au sotava tiko. Na ituvatuva ni marau e solia vei au na inuinui niu na raici buqu tale ena dua na siga, baleta ni sega ni oti na bula ni da sa mate. Au gadreva meu muria tikoga na iVakabula me rawa ni’u raici koya tale.

Ni sa mate oti o buqu, a toki mai au o tavalequ ka yaco me noqu ivakatawa. Era noqui itokani vinaka duadua na tavalequ, ia se dredre tikoga na veisau. Au a vulica meu cakava kece na cakacaka e dau cakava tu o buqu. Au a vakayadrati au ga meu laki vuli ka qarava na vale.

A dau tukuna tu ga o noqu bisopi me baleta na bula rawati koya, kau a vakasaqara oqo ena Valenivola ni Kosipeli. E vukei au meu tu vakai au ga.

Au se veitaratara tiko ga kei tamaqu. Dua na siga, keirau a veiba. E sa dredre sara vei au, ia vakasauri ga a dua na madigi me’u lako ena dua na ilakolako ni itabagone kina valetabu. Niu tiko ena valetabu, au a vakila na vakacegu. Au sega ni vakasamataka na leqa e vale. Au sega ni vakasamataka na noqu cudruvi tamaqu. Au vakasamataka na veika au rawa ni cakava meu vukei koya kina. Au vakasamataka meu ivakaraitaki vinaka. Au vakasamataka na veika tawamudu, me baleta na noqu vauci vata kei rau na noqu itubutubu ena valetabu ena dua na siga. Au a nanuma meu kere veivosoti vei tamaqu ena noqu veivala vata kei koya.

Au sa vulica meu dau vakanamata tu ga vei Jisu Karisito kei na Tamada Vakalomalagi. Au rawata na noqu kaukauwa mai vei Rau, kau nanuma ni Rau sa dau tu mai e dakuqu.

Na noqu kila na yavu ni veivakabulai, vakabibi na Veisorovaki ni iVakabula, a vukei au me vakamalumalumutaka na noqu nanuma me’u vakamatei au ga. E vukei au meu vakila na vakacegu ni bula. E solia vei au na inuinui ni’u na rawa ni sotavi buqu tale ena yasa kadua ni ilati ena dua na siga.

O Jisu Karisito na inuinui me’u tomana tiko ga na noqu bula e dina ga ni levu tu na noqu bolebole. E tawamudu na Nona lomani au. O Koya na rarama ni matanisiga ena noqu bula. Ni liwa na cava se tau na uca, sa tikoga o Koya. O Koya sa noqu iVakabula. O Koya sa noqu itikotiko. O Koya sa noqu bula. O Koya sa dau tosoi au tikoga. O Koya sa dua na vuna au taleitaka kina na bula.