Sa Rui Levu na Veivakatovolei
Na bolebole sa tiki tu ni bula. Ia ena veivuke, eda na rawa ni raici ira ena rai ni Kalou.
Na Ulunivanua o Timpanogos e dua na ulunivanua e Utah, Amerika, e 11,000 na fiti (3,353 m) na kena cecere ka sinai tu ena waisavu, bari-ni-vatu, vanua veico bulabula, kei na manumanu kila. Nio tucake tu ena ruku ni dua na ulunivanua vakaoqo ena rawa ni vakavuna mo vakila nio sa ka lailai ga. O na sega ni rai uabaleta rawa se vakavolivolita. E rawa ni rairai levu sara ka sega ni vorati rawa.
Ia, e dua na draiva 10 na miniti na kena yawa mai na Ulunivanua o Timpanogos e rawa kina vei iko mo lai raica mai ena dua tale na kena irairai. Mai na rai oqo, e rawa nio raica na salatu kei na gaunisala era sa takosova tu na ulunivanua. Oqo e vakaraitaka ni so era sa lesu mai kina e liu ka ni tiko e dua na sala taqomaki wavokita na ulunivanua.
Na veivakatovolei ena nomu bula ena gauna oqo ena rairai vakilai vakakina. Na sotava na bolebole dredre sara e rawa ni vaka meda rai cake tu ki na veiulunivanua rui levu sara o sega kina ni raica rawa se vakavolivoliti ira. E rawa ni vaka me ra levu sara ka rairai dredre mera lako siviti. Na veivakatovolei oqori ena rawa sara mada ga ni vakavuna mo vakila ni o sa lailai ga, yalolailai, rere, se tu duadua tu.
Ia oqo e dua tale na ka me tovolei. Taura e dua na ikalawa ki muri ka tovolea mo raica na nomu veivakatovolei mai na dua tale na rai—na rai ni Kalou.
Ena rai oqo, ona kila talega nio sega ni biu duadua tu mo walia na nomu leqa. E tiko e dua na Tamada mai Lomalagi ka lomani iko ka na vukei iko. Eso tale, vakabibi na iVakabula, era sa sotava talega na veigauna dredre. Era vinakata me dusimaki iko mo vorata rawa kina na nomu veivakatovolei, na veika lelevu sara mada ga.
Eda na Veisautaka Vakacava na Noda Rai?
1 Muria na ituvatuva nei Tamada Vakalomalagi.
Sa noda ivakaraitaki uasivi o Jisu Karisito Na ivakavuvuli a vakavulica o Koya e matata, kaukauwa, ka rawarawa na kena kilai. Sa kena ibalebale beka oqori ni ra dau rawarawa tu ga me ra vakamuri? Ia, e sega. Sega ena veigauna kece. Ia ena veigauna kece eda muri Koya kina ena vakabauta, sa tekivu me veisau na noda rai. Eda sa tekivu raica na bolebole me madigi ni noda dodoliga yani vua na iVakabula ka sega ni raici ira me itotogi, icori, se veivakataotaki ka tarovi keda tiko.
2 Kere veivuke vua na Kalou.
Na Kalou e Tamamu Vakalomalagi. E kilai iko, lomani iko, ka sa vakarau tu me vukei iko ena gauna cava ga o kerea kina. E sa vakavulica o Peresitedi Russell M. Nelson ni “rai ni Turaga e ulabaleta na nomu vuku vakayago. Na Nona sauma na nomu masu ena rawa nio kurabui kina ka na vukei iko mo vakasama vakasilesitieli.”
Ni ko masu, ena vukei iko na Kalou mo raica na veika o sega ni rawa ni raica ena gauna oqo. E rawa ni tuberi iko ena nomu veivakatovolei ka solia sara mada ga vei iko na vakacegu kei na kaukauwa nio muri Koya.
3 Kerea na veivuke mai vei ira tale eso.
Sa biuti ira na tamata vinaka na Tamada Vakalomalagi ena nomu bula ka rawa ni ra vukei iko. Nio sotava tiko na bolebole e vaka me sa toka e matamu, vakasamataka mo vosa vua e dua na lewe ni matavuvale nuitaki, e dua na itokani, dua na iliuliu ni Lotu, se nomu bisopi.
Na kerei ni dua na lewe ni matabete bula kilikili me vakalougatataka na vakacegu kei na veidusimaki sa dua tale na sala totoka mo raici iko kina kei na bula ena rai ni Kalou.
Raica Vakamatata
Me vaka e dua na ulunivanua tuwawa e tucake tu ena nomu sala, ena so na gauna e rawa ni vakilai ni sa rui levu na nomu veivakatovolei. Ia ni ko bulataka na ituvatuva ni Kalou ka laiva me vukei iko o Koya kei ira tale eso, sa rawa mo raica na nomu bolebole ena duatani na rai.
E rawa nio taura e dua na ikalawa i muri ka raica ni tiko e dua na sala mo vorata kina na nomu veivakatovolei. E vakarautaka tu o Jisu Karisito e dua na sala o rawa ni muria. Se vakacava sara na levu ni nomu vakatovolei, e kaukauwa cake na Kalou.