Meda Veitalanotaka baleta na iLavo!

E kila o Jisu ni levu tu na ka o gadreva (me vakataka, na kakana) ka vinakata (me vakataka, na qito). E vakavulica o Koya, “Dou kumuna vata na nomudou iyau mai lomalagi, sa sega ni vakacacana kina na sarasara se na veveka” (Maciu 6:19–21). E levu na ka e voli ena ilavo e dau yali yani, okoya mo nanuma vinaka na ka o volia.

E rawa nio nanuma tiko na ilavo nio tawasei ira tani na nomu gagadre mai na veika o vinakata. Vakasamataka mada, “Au volia tiko beka oqo baleta ni’u gadreva se baleta ni’u vinakata ?” Kevaka o sega ni vakadeitaka, tovolea mo wawa me dua na vula; ni sa oti na gauna oya, taroga tale na taro oqori. Ni o cakava qori, o na sega ni volia na veika o vinakata, ka saga mo matavinaka kina vei ira na tani. Ia, o na vakatulewataka vinaka na gauna mo maroroya kina na ilavo kei na gauna mo vakayagataka kina.

Ena vosa vakatautauvata ni taledi, e vakamacalataka kina o Jisu e dua na turaga ka solia e duidui na ilavo (ka vakatokai na “taledi”) vei iratou e tolu na dauveiqaravi. E rua na dauveiqaravi e vakaruataka na ilavo a soli vei rau, ka buluta na nona ilavo e dua na dauveiqaravi. Ni lesu mai na ivakavuvuli, e a marautaki rau na dauveiqaravi ka vakalevutaka cake na nodrau taledi ka sega ni marautaka na tamata ka sega ni kitaka vakakina (raica na Maciu 25:14–30).

Me vaka ga a solia na turaga ena vosa vakatautauvata na taledi vei ira na nona italai, ena gauna e vakalougatataki iko kina na Kalou ena ilavo, e namaka vei iko o Koya mo vakayagataka na nomu veika vakailavo mo vakalougatataki iko kina kei ira tale eso. Nio qaravi ira na tani, o sa vakayacora na ivakaro nei Jisu mo “lomana na kai nomu me vaka ko lomani iko” (Marika 12:31).

E sega ni ca mo volia kina na veika vinaka, ia e dodonu mo vakasamataka na nomu gagadre kei ira tale eso ni bera ni o volivoli. Nio vakasamataka na nodra gagadre na tani, ena vukei iko na Kalou mo kila na sala mo vakayagataka kina na ilavo mo vakalougatataki ira kina na tamata ena nomu bula.

Ke o leqataka ni na sega ni veirauti nomu ilavo ni o saumi ikatini, wilika na veivosa veivakacegui oqo mai vua na Kalou: “Dou kauta kece mai nai sigana ki na lololo … ka vakatovolei au mada kina … se’u na dolava se segai, na katuba ni lomalagi, ka sovaraka vei kemudou na ka ni veivakalougatataki, me na sautu dina sara” (Malakai 3:10). Kevaka o sauma na nomu ikatini, ena vakalougatataki iko vakalevu cake na Kalou mai na kena o rawa ni vakasamataka!

O na sega beka ni vakalougatataki ena sala vakayago—ena sega beka ni tiko vei iko na ilavo o vinakata mo volia e dua na sote sau levu o taleitaka, o na gadreva beka kina mo lokuyarataka na gagadre totolo. Ia ena vakalougatataki iko na Turaga. Ni toso na gauna, o na raica ni rawarawa cake na saumi ikatini, ka na rawa ni sotava vinaka cake na yalomu na lomaleqa vakailavo e tu vei iko.

Nuitaka na vosa nei Peresitedi Russell M. Nelson: “E sega ni yalani na nona rawa ni vukei iko na iVakabula” (Koniferedi raraba ni Okot. 2024 [Liaona, Nove. 2024, 122]). Ni ko vakayagataka vakavinaka na nomu ilavo mo sotava kina na nomu gagadre, qaravi ira na tani, ka sauma na nomu ikatini, o na kunea kina e dua na loloma titobu cake vua na Kalou kei ira tale eso ka vakavinavinakataka na veika sa tu vei iko.