Veivuke kei na Veituberi me Baleta na Nomu Veisiga ni Mataka

Au a yabaki 17 tiko ena gauna a sikova kina na Ceva kei Korea na parofita, o Peresitedi Spencer W. Kimball (1895–1985), ena 1975. Au raici koya ena dua na soqoni ka ra soqoni vata kina e rauta ni 400 na itabagone mai Korea mera rogoca na domona.

A wasea o Peresitedi Kimball na nona vulica na ivolanikalou ka masu ena veisiga mai na gauna a se gone kina. A tukuna na bibi ni kena tuvanaki na veika me vakaliuci. A kaya o koya ni dodonu meda tiko ena semineri, vakavakarau ki na kaulotu kei na vakamau tawamudu, ka cakacakataka na veivakabulai. A wasea talega na nona ivakadinadina.

Na nona vosa na parofita a vakararamataka na noqu vakasama. Au a se vuli tiko ena koronivuli torocake, ia au a sega ni taleitaka na vuli. Au a taleitaka na qito! Au dau qito soka ena gauna ga e tiko kina na noqu madigi ka dau qito vakawasoma ka sega ni vuli. Au a sega ni dua na gonevuli vinaka. Niu rogoca oti na parofita, au se taleitaka tiko ga na soka, ia au a nanuma meu vakaliuca eso na ka.

Au na cakava na noqu vinaka taucoko meu vuli. Au na laki kaulotu, vauci ena valetabu, ka me dua na noqu matavuvale mamarau. Au kila ni kevaka meu na rawata na veisiga ni mataka cecere oqo, au na gadreva meu muria na parofita—se cava ga.

Ena veimadigi kei na bolebole kece o na sotava, o na tiko vinaka nio muria na veidusimaki era vakarautaka na parofita bula.

Au a yalataka meu laki kaulotu, ia e tiko talega na veiqaravi ni mataivalu e Sauca Korea. Ni oti na vuli torocake, e vuqa na cauravou era curu kina mataivalu, vakayacora na nodra veiqaravi e gadrevi, ka ra tomana sara na nodra vuli ka kunea na cakacaka. A dredre me soli tale e rua na yabaki kina veiqaravi vakadaukaulotu. E a vica wale ga na daukaulotu ni Korea ena gauna oya.

Niu sa yabaki 19, au a dei tiko ena noqu yalayala ka vakarautaka ka vakauta yani na noqu pepa ni kaulotu. Au a kacivi meu laki veiqaravi ena Tabana ni Kaulotu na Korea Busan. Ni oti e dua na yabaki, au a curu ki na mataivalu. Au a rarawa vakalevu ni sa tarovi na noqu kaulotu.

Niu sa vakacavara na noqu veiqaravi vakamataivalu ni oti e tolu na yabaki, au a vakila niu se bera ni vakacavara na noqu kaulotu. Era kaya kece vei au, “O sa kaulotu oti. E kila vinaka tu na Turaga na kemu ituvaki, sa donu kina na veiqaravi me dua ga na yabaki.”

Au a tarogi noqu itokani vinaka mai na semineri se cava meu cakava. A kaya o koya ni kila ni’u na veiqaravi me dua tale na yabaki ni noqu kaulotu. Na nona veivakabauti e solia vei au na yalodei kei na veivakadeitaki me’u veiqaravi tale. Au a veiqaravi ena ikarua ni yabaki ni noqu kaulotu ena Tabana ni Kaulotu na Korea Seoul. Niu qai oti mai, au sa yabaki 25. Au a qai vakamautaka e muri na itokani vata ga oya ka keirau a vauci ena Valetabu e Laie Hawaii.

Na ka oqo e vakavulica vei au nio na dau vinaka tu ga ena gauna mada ga e sega ni yaco kina na veika ena sala o a tuvanaka. Ni salavata kei na loma ni Turaga vei iko na nomu ituvatuva kei na raivotu, ena vukei iko o Koya ena nomu vakatulewa ni bula.

E dina ga niu sega ni vakadeitaka vakaitabagone na mataqali bula cava au na rawata, au raica ni vakaliuca ni veika vakayalo e idola ni rawa-ka—sega walega ena bula oqo, ia ena bula talega sa bera mai.

Nio a papitaiso, o a ciqoma na isolisoli ni Yalo Tabu. Nio vakanamata ki na veivakauqeti o ciqoma, ena taqomaki iko na Yalo Tabu ka tuberi iko ena sala dodonu mo lako kina. Ona vakila tale ga na vakacegu.

Nio vakavakarau kina nomu veisiga ni mataka, nanuma mo:

• Vulica na ivolanikalou.

• Tomana mo dau masu.

• Muria na parofita.

• Dau vakararavi tikoga vua na Turaga

Niu se vakataki iko, au vulica na ivakarau kei na itovo ni iVakabula kei na sala meu rawa ni vakataki Koya vakalevu cake kina. E sa vinaka ka uasivi sara o Koya Au sega ni rawa ni vakataki Koya taucoko ena bula oqo, ia au sa tovolea tiko na noqu vinaka taucoko, ka’u sa yaco me’u vinaka cake ena noqu cakava vakakina.

Au kila ni bula tiko o Jisu Karisito. Ena vukuna, sa tu kina vei au e dua na inuinui cecere me baleta na veisiga ni mataka—ka rawa talega vei iko!