“Bo Ta Stima Mi?”

Den e interkambio instruktivo entre Pedro i e Señor resusitá na e Laman di Tiberias, nos ta siña di maneranan ku nos por mustra nos amor pa Señor.

“Hesus a bisa na Simon Pedro: Simon, yu di Jonas, bo ta stima mi mas ku esakinan? El a bis’é: Sí, Señor; bo sa ku mi ta stima bo.”

E pregunta klave den e investigashon aki di Señor ta “Bo ta stima mi mas ku esakinan?” Nos ta mustra nos amor na Señor ora nos pone E riba “esakinan,” i “esakinan” por ta kualke hende, kualke aktividat, òf kualke kos ku ta priva E di ta e influensia mas importante den nos bida.

Nunka lo no tin sufisiente tempu den un dia, un siman, un luna òf un aña pa hasi tur loke nos ke òf mester logra. Parti di e prueba di mortalidat ta pa usa e rekurso presioso di tempu pa loke ta mas importante pa nos bienestar eterno i pone un banda e kosnan ku ta ménos importante.

Presidente Russell M. Nelson a bisa: “E pregunta pa kada un di nos … ta meskos. … Bo ta dispuesto pa laga Dios ta e influensia di mas importante den bo bida? Lo bo pèrmití Su palabranan, Su mandamentunan, i Su kombenionan pa influensiá lokual bo ta hasi kada dia? Lo bo pèrmití Su stèm pa tuma prioridat riba tur otro? Bo ta dispuesto pa laga loke ku E tin mester pa bo hasi ta mas importante ku otro ambishon? Bo ta dispuesto pa bo boluntat wòrdu gulí den esun di djE?” Nos ta demostrá ku nos ta disipel i ku nos tin amor pa Dios ora nos hasi E nos prioridat prinsipal.

Den e siguiente versíkulo di e mesun diskushon aki entre Pedro i e Salbador, nos ta siña di un otro manera ku Señor ta rekonosé nos ekspreshonnan di amor: “[Señor] ta bolbe puntr’é pa di dos biaha, Simon, yu di Jonas, bo ta stima mi? El a bis’é: Sí, Señor; bo sa ku mi ta stima bo. El a bis’é: Kuida mi karnénan.”

Nos ta mustra nos amor pa Tata Selestial ora nos ta sirbi, skucha, stima, alsa, òf ministrá na Su yunan. E servisio ei por ta mes simpel ku berdaderamente mira otronan sin huisio. Den e sekshon 76 di e Doktrina i Kombenionan, nos ta haña un bista di e karakter di esnan ku lo heredá un gloria selestial: “Nan ta mira manera nan ta wòrdu mirá, i konosé manera nan ta wòrdu konosí.” Nan ta mira otronan manera Dios ta mira nan, i E ta mira nan manera nan por bira, ku potensial divino glorioso.

Despues di a regresá kas for di mi mishon, mi a tuma over e negoshi di limpia kurá ku ami i mi rumannan a kuminsá komo adolesente. Mi tabata okupá tambe ku mi estudio universitario. Un siman di primavera, áwaseru pisá i èksamennan final na kaminda a laga mi abrumá i mi a kai atras ku trabou di kurá.

Meimei di siman e shelu a bira kla, i mi a plania pa alkansá trabou di kurá despues di mi klasnan. Pero ora mi a yega kas, mi trùk i ekipo no tabata t’ei mas. Kurioso, mi a bishitá e kuránan programá; kada un tabata bunita kòrtá kaba. Na e último kurá riba e skema, mi a mira mi ruman hòmber mas yòn kanando tras di e mashin di kòrta yerba. El a mira mi, a sonreí i a saludá. Yená ku gratitut, mi a bras’é i gradisié. Su akto signifikante di servisio a fortalesé mi amor i lealtat p’e profundamente. Sirbiendo otro ta un manera inkonfundibel ku nos ta mustra nos amor pa Dios i Su Yu Stimá.

Tambe nos ta manifestá nos amor pa Dios dor di tin un kurason gradisido. Señor a bisa, “No tin nada ku hende por hasi ku ta ofendé Dios, … eksepto esnan ku no ta konfesá su man den tur kos.” Nos ta mustra nos amor pa Dios dor di rekonos’É komo e fuente di tur kos bon den nos bida.

Den e promé dianan di lansamentu di un kompania, mi partner di negoshi i ami tabata hasi orashon sinseramente promé ku reunionnan importante, pidiendo yudansa di Tata Selestial. Bes tras bes, Dios a kontestá nos orashonnan, i nos reunionnan a bai bon. Despues di un reunion, mi partner di negoshi a señalá ku nos tabata lihé pa pidi yudansa pero lento pa duna danki. For di e tempu ei, nos a hasié un kustumber pa ofresé orashonnan sinsero di gratitut, rekonosiendo e man di Señor den nos éksitonan. Nos ta mustra nos amor pa Dios ku “un aktitut di gratitut.”

Un otro manera ku nos ta mustra nos amor pa Tata Selestial i Su Yu Stimá ta pa skohe pa obedesé Nan. E Salbador a bisa, “Si bo stima mi, warda Mi mandamentunan.” E tipo di obedensia aki no ta ni siegu ni obligatorio sino ta un ekspreshon sinsero i dispuesto di amor. Tata den Shelu ke pa nos kièr ta obediente. Hermana Tamara W. Runia a yama esaki “obedensia kariñoso.” El a bisa, “Ounke nos no tin obedensia perfekto ainda, nos ta purba obedensia kariñoso awor, skohe pa keda, bes tras bes, pasobra nos ta stim’É.”

Tata Selestial a duna nos albedrio pa inspirá nos pa kièr skohe E. Su obra i gloria no ta solamente pa efektuá nos bida eterno pero tambe ta inkluí un speransa ku nos deseo di mas grandi ta pa regresá serka djE. Sinembargo, nunka E lo obligá nos pa obedesé. Den e himno “Know This, That Every Soul Is Free” [Sa Esaki, Ku Tur Alma Ta Liber], nos ta kanta:

Komo lidernan di mishon, mi kasá, Christina, i ami a wòrdu inspirá pa asina tantu mishonero ku a skohe pa ta obediente, no solamente pasobra e tabata un norma misional pero pasobra nan tabata ke mustra nan amor pa Señor dor di skohe humildemente pa represent’É.

Elder Dale G. Renlund a bisa: “Nos Tata Selestial su meta den kriansa no ta pa laga Su yunan hasi loke ta korekto; e ta pa laga Su yunan skohe pa hasi loke ta korekto i finalmente bira manera E. Si E simplemente tabata ke pa nos ta obediente, E lo a usa rekompensa i kastigunan inmediato pa influensiá nos komportashonnan.” Nos ta demostrá nos amor pa Dios ora nos skohe pa obedes’É.

Nos Tata Selestial i nos Salbador ta rekonosé nos ekspreshonnan di amor pa Nan ora nos pone Nan na promé lugá den nos bida, sirbi otro, rekonosé ku gratitut kada bendishon di Nan, i skohe pa obedesé i sigui Nan.

Mi ta testifiká ku kada un di nos berdaderamente ta un yu di Dios i E ta stima nos perfektamente. Mi ta testifiká ku E ta anhelá pa nos eksperensiá Su amor den maneranan ku nos ta rekonosé i komprondé. I e paradokso bunita ta ku nos lo eksperensiá Su amor pa nos mas profundo ainda segun ku nos ta mustra nos amor p’E. Den e nòmber di Hesu-Kristu, amèn.