Bendishoná ta e Pasifikadónan

Imaginá ku mi ku bo ta un hóben adolesente na Kafárnao, serka Laman di Galilea, durante e ministerio di Hesu-Kristu. E rumor ta plama di un rabino—un maestro—kende su mensahe ta atraé multitut. Bisiñanan ta plania pa biaha bai un seru ku bista riba laman pa skuch’E.

Bo ta uni na otronan ku ta kanando riba e kamindanan yen di stòf di Galilea. Na bo yegada, e multitut grandi reuní pa skucha e Hesus aki ta sorprendé bo. Algun ta susurá ketu ketu, “Mesias.”

Abo ta skucha. Su palabranan ta toka bo kurason. Durante e kaminata largu pa kas, bo ta skohe kietut riba kombersashon.

Bo ta meditá riba kosnan maravioso—kosnan ku ta surpasá asta e lei di Moises. El a papia di bira e otro banda di kara i stima bo enemigunan. El a primintí, “Bendishoná ta e pasifikadónan: pasó nan lo wòrdu yamá e yunan di Dios.”

Den boso realidat, ora boso ta sinti e peso di dianan difísil—insertidumbre i miedu—pas ta sinti leu.

Bo pasonan ta aselerá; bo ta yega kas sin rosea. Bo famia ta reuní; bo tata ta puntra, “Konta nos loke bo a tende i sinti.”

Bo ta kompartí ku El a invitá bo pa laga bo lus bria dilanti di otronan, pa buska rektitut asta ora bo ta wòrdu persiguí. Bo stèm ta tembla ora bo ta ripiti: “Bendishoná ta e pasifikadónan: pasó nan lo wòrdu yamá e yunan di Dios.”

Bo ta puntra: “Mi por bira un pasifikadó, ora mundu ta den konmoshon, ora mi kurason ta yen di miedu, i ora ta parse ku pas ta leu?”

Bo tata ta wak bo mama i ta kontesta suavemente: “Sí. Nos ta kuminsá na e lugá mas básiko—den nos kurason. Despues den nos hogarnan i famianan. Ora nos ta práktika aki, pasifikashon por ekspandé na nos kayanan i pueblonan.”

Bai dilanti 2,000 aña. No mester imágina—esaki ta nos realidat. Aunke e preshonnan sintí pa e generashon di awendia ku ta lantando ta diferente for di esnan di e persona yòn d i Galilea—polarisashon, sekularisashon, represalia, rabia den trafiko, indignashon i krítika riba medionan sosial—ambos generashon ta enfrentá kulturanan di konflikto i tenshon.

Ku gratitut, nos hómber i muhénan hóben tambe ta wòrdu atraé pa nan momentunan di seminario manera: Predikashi-riba-Seru, konferensianan di Pa e Fortalesa di Hubentut, i Bini, Sigui Mi. Aki nan ta risibí e mesun invitashonnan di Señor: pa laga nan lus bria dilanti di otro, pa buska rektitut asta ora nan ta wòrdu persiguí, i pa stima nan enemigunan.

Nan ta risibí tambe palabranan di ánimo for di profetanan bibu di e Restourashon: “Tin Nesesidat di Pasifikadónan.” Tin desakuerdo sin ta desagradabel. Remplasá kontenshon i orguyo pa pordon i amor. Traha brùgnan di kooperashon i komprenshon, no murayanan di prehuisio òf segregashon. I mesun promesa: “Bendishoná ta e pasifikadónan: pasó nan lo wòrdu yamá e yunan di Dios.”

E kurason di e generashon nobo di awe ta yená ku un testimonio di Hesu-Kristu i un speransa pa futuro. Pero nan tambe ta puntra nan mes: “Mi por bira un pasifikadó, ora e mundu ta den konmoshon, mi kurason ta yen di miedu, i pas ta parse asina leu?”

E kontesta resonante un biaha mas ta sí! Nos ta brasa e palabranan di e Salbador: “Pas mi ta laga boso, mi pas mi ta duna boso. … No laga boso kurason bira turbulento, ni tampoko lag’é tin miedu.”

Awendia, pasifikashon ainda ta kuminsá na e lugá mas básiko—den nos kurason. Despues den kas i famianan. Ora nos ta praktiká aya, e pasifikashon lo ekspandé den nos besindarionan i komunidatnan.

Laga nos konsiderá mas aleu e tres lugánan aki kaminda un Santu di e Delaster Dianan moderno ta hasi pas.

E promé ta den nos kurason. Un elemento visibel di Kristu su ministerio ta mustra kon e muchanan tabata wòrdu tresé serka djE. Einan tin un pista. Mirando den e kurason pasifikadó, puru i inosente di un mucha, nos por haña un inspirashon pa nos kurason. Aki tin kon algun mucha di edat di Primaria a kontestá “Kiko ta nifiká pa ta un pasifikadó?”

Mi ta kompartí nan kontestanan direktamente for di nan kurason! Luke a bisa, “Semper yuda otronan.” Grace a kompartí kon importante ta pa pordoná otro, asta ora e no ta sinti hustu. Anna a bisa, “Mi a mira unu ku no tabatin niun hende pa hunga kuné, p’esei mi a bai hunga kuné.” Lindy a bisa ku ta un pasifikadó, kiermen yuda otro hende. “Despues bo ta pasa e informashon. E lo sigui bai i bai.” Liam a bisa: “No sea falsu ku otro hende, asta si nan ta falsu ku bo.” London a bisa, “Si un persona tenta òf ta falsu ku bo, bo ta bisa, ‘Por fabor stòp.’” Trevor a opservá, “Si tin un donut ku a keda i boso tur kier e, boso ta kompartí.”

E reakshonnan di e muchanan aki ta un prueba pa mi ku nos tur a nase ku e tendensia divino pa bondat i kompashon. E evangelio di Hesu-Kristu ta kultivá e karakterístikanan divino akí, inkluyendo e karakterístikanan pasifikadó, i ta pone nan den nos kurason, bendishonando nos den e bida aki i den e siguiente.

Di dos, konstruyendo pasifikadó den nos kasnan usando e modelo di Señor pa influensiá nos relashonnan ku otro: persuashon, pasenshi, bondat, humildat i amor sinsero.

Aki tin un historia inspiradó ku ta mustra kon un famia a hasi pasifikashon un asuntu di famia, butando e prinsipionan aki den práktika.

Muchanan den e famia aki tabatin problema den nan relashon ku un adulto ku su komportashon hopi bia tabata fadá, banidoso, i seku. E yunan, heridá i frustrá, a kuminsá puntra nan mes si e úniko manera pa sigui ta pa imitá e mesun komportashon malbado ei.

Un anochi, e famia a papia abertamente ku otro tokante e tenshon i e daño ku e tabata kousa. I despues un idea a surgi—no solamente un solushon, sino un eksperimento.

En bes di reakshoná ku silensio òf vengansa, e yiunan lo a hasi algu inesperá: nan lo reakshoná ku bondat. No ta djis moderashon kortes, sino un ekspreshon deliberá i sinsero di palabranan bondadoso i aktonan di konsiderashon, no ta importá kon nan a ser tratá bèk. Tur tabata di akuerdo pa purba esaki pa un tempu fiho, despues di kua nan lo reuní i reflekshoná.

Ounke algun tabata duda na kuminsamentu, nan a entregá nan mes na e plan ku kurason sinsero.

Loke a sosodé despues no tabata nada straño.

E kombersashonnan friu a kuminsá deskonhelá. Sonrisanan a remplasá frustrashon. E adulto, ku un tempu tabata distante i duru, a kuminsá kambia. E yunan, ku a haña forsa dor di nan desishon di guia ku amor, a haña goso den e transformashon. E kambio tabata asina profundo ku e reunion di kontinuashon ku a wòrdu planiá nunka tabata nesesario. Bondat a hasi su trabou trankil.

Ku tempu, nan a forma amistat di bèrdat ku a animá tur hende. Pa nos ta pasifikadó, nos ta pordoná otro hende i deliberadamente ta edifiká otro hendena lugá di tene nan abou.

Di tres, pasifikadó den nos komunidatnan. Den e añanan problemátiko di e Di dos Guera Mundial, Elder John A. Widtsoe a siña: “E úniko manera pa konstruí un komunidat di pas ta pa konstruí hòmbernan i muhénan ku ta stimadó i kreadó di pas. Kada persona, pa medio di e doktrina di Kristu … ta tene den su mannan e pas di [henter] mundu.”

E siguiente relato ta ilustrá e prinsipio aki bon.

Algun aña pasá, dos hòmber—un imam Musulman i un pastor Kristian di Nigeria-—tabata pará na banda kontrario di un divishon religioso doloroso. Tur dos a sufri hopi. I sinembargo, dor di e poder ku pordon tin pa kura, nan a skohe pa kana un kaminda huntu.

Imam Muhammad Ashafa i Pastor James Wuye a bira amigu i partnernan improbabel den pas. Huntu nan a lanta un sentro pa mediashon interreligioso. Awor nan ta siña otro hende pa remplasá odio ku speransa. Nan a keda nominá dos bia pa e Premio Nobel di Pas i resientemente nan a bira e promé personanan ku a risibí e Premio di Pas di Commonwealth.

E eks enemigunan aki ta biaha banda di otro awor aki pa rekonstruí loke a wòrdu kibrá, testigunan bibu ku e invitashon di e Salbador pa ta pasifikadónan no ta solamente posibel, sino tambe poderoso.

Ora nos yega na konosementu di e gloria di Dios, e ora ei nos “lo no tin e mente pa hasi otro daño, sino pa biba na pas.” Den nos kongregashonnan i nos komunidatnan, laga nos opta pa mira otro komo yu di Dios.

Den resúmen, mi ta ofresé un invitashon. Pasifikashon ta eksigí akshon—kiko esei por ta, pa kada un di nos, kuminsando mañan? Lo bo konsiderá un plan di tres paso pa pasifikadó pa un siman?

1. Un área di kas liber di kontenshon: Ora kontenshon kuminsá, pousa i kuminsá atrobe ku palabranan i aktonan bondadoso.

2. Traha un brùg digital: Promé ku bo post, kontestá òf komentá online, puntra bo mes: “E kos aki lo traha un brùg?” Si ta no, stòp. No mand’é. Na lugá di esei, kompartí loke ta bon. Publiká pas na lugá di odio.

3. Drecha i reuní: Kada miembro di famia por buska un relashon tenso pa pidi diskulpa, sirbi otro, drecha i reuní.

Algun luna a pasá for di e momentu ku mi a sinti un impreshon ku no por nenga ku a kondusí na e mensahe aki: “Bendishoná ta e pasifikadónan.” Den konklushon, laga mi kompartí ku boso algun impreshon ku a keda den mi kurason durante e tempu akí.

Pasifikashon ta un atributo Kristian. Pasifikadónan tin biaha ta wòrdu etiketá komo ingenuo òf debil—for di tur banda. Sinembargo, ta un pasifikadó no ta nifiká ta débil, sino fuerte den un manera ku mundu no por komprondé. Pasifikashon ta rekerí kurashi i kompromiso, pero no ta rekerí sakrifisio di prinsipio. Pasifikashon ta pa liderà ku un kurason habrí, no ku un mente será. E ta pa aserká otro ku mannan ekstendé, no ku moketa será. Pasifikashon no ta un kos nobo, ku ta sali kayente for di imprenta. E tabata siñá pa Hesu-Kristu Mes, tantu pa esnan den Beibel komo pa esnan den e Buki di Mormon. For di e promé dianan di e Restourashon te dia di awe, profetanan moderno a siña hende pa ta pasifikádo.

Nos ta kumpli ku nos ròl divino komo yu di un Tata Selestial amoroso ora nos ta hasi esfuerso pa ta pasifikadónan. Mi ta duna mi testimonio di Hesu-Kristu, kende ta e Prínsipe di Pas, e Yu di e Dios bibu, den e nòmber di Hesu-Krustu, amèn.