I Awor Mi ta Mira

Ku amor sinsero nos tur ta hasi eko di Presidente Oaks su homenahe na e fayesementu di President Russell M. Nelson. I ku amor igual i tristesa profundo, nos tur ta rekonosé e tragedianan resientemente na Michigan i kasi tur dia rònt mundu. Nos ta rekonosé e kosnan aki ku amor i konfiansa den Señor Hesu-Kristu.

E di nuebe kapítulo di Huan ta registrá e eksperensia di Hesus i Su disipelnan pasando banda di un mendigo, siegu for di nasementu. Esaki a pone ku e disipelnan a puntra Hesus diferente preguntanan religioso kompleho tokante e origen i transmishon di limitashon di e hòmber aki. E Maestro a respondé dor di hasi un kos masha simpel i masha sorprendente. El a skupi den tera i a traha un meskla chikitu di klèi. Despues El a apliká esaki na e wowonan di e hòmber, i a duné isntrukshon pa laba kara den e pisina di Siloam. Tur esaki e hòmber siegu a hasi obedientemente i a “bini [dilanti] mirando,” e Skritura ta bisa. Kon importante evidensia ta, ku diferensia di e deseonan òf argumento òf asta malisia den oposishon na e bèrdat.

Awèl, spantá ku e milager aki atrobe lo agregá na e menasa ku Hesus tabata pa nan presuntu outoridat, e enemigunan di e Salbador a konfrontá e hòmber ku bista nobo i a bisa ku rabia, “Nos sa ku [Hesus] ta un pekadó.” E hòmber a skucha pa un momento, i despues a bisa, “Si E ta pekadó … , mi no sa: [pero] un kos mi [sa], … ku, mi tabata siegu, i awor mi ta mira.”

Hesus a duna e promé nifikashon na e interkambio aki, bisando Su disipelnan ku tur esaki a sosodé “pa e obranan di Dios por wòrdu manifestá.” Kòrda ku dos bia den e narashon aki e Salbador su akshon a wòrdu referí na dje komo “ungi” e wowonan di e hòmber siegu, un akto ku mester wòrdu kompletá ku labamentu. E deskripshon aki di “e obra di Dios [siendo] manifestá posiblemente por a sugerí e realisashon di un ordenansa.

Un otro bèrdat ku ta evidente aki ta e instrumèntnan ku e Kreadó di shelu i tera i tur loke ta den nan ta usá pa proveé e milager aki: skupi i un man yen di tera! E ingredientenan hopi improbabel aki ta deklará ku Dios por bendishoná nos mediante di kualkier método ku E skohe. Manera Namaan a resistí e Riu Yordan òf algun di e yunan di Israel rechasando pa mira na e kolebra riba e palu, kon fásil ta pa nos pa deskartá e fuente di nos redenshon pasobra e ingredientenan i instrumèntnan ta parse demasiado simpel.

Pero nos ta kòrda for di e Buki di Mormon ku algun kos ta kla i presioso i ku promé ku Hesus su nasementu, lo wòrdu profestisá ku “e [lo] no [tin] forma ni bunitesa; i ora nos [lo] mir’E, no tin bunitesa ku nos lo deseá E.” Kuantu biaha Dios a manda Su mensahe mahestuoso mediante un presidente di Sosiedat di Sokoro resien yamá i hopi ansioso òf un mucha hòmber sin edukashon na un kunuku na New York òf un mishonero nobo nobo òf un beibi drumí den un pesebre.

Pues kiko si e kontestanan na nos orashonnan ta bini den maneranan simpel òf kompliká? Nos ta dispuesto pa perseverá, pa purba na biba Kristu su evangelio sin importá kuantu skupi i klei mester? E por tasina ku e lo no ta semper kla pa nos kiko ta wòrdu hasí òf dikon, i, di tempu pa tempu, nos tur lo sinti un tiki manera e hermana ansiano ku a bisa, “Señor, kiko bo ta pensa tokante un bendishon ku no ta disfrasá?

Konsiderá e evidensia di un otro bèrdat, esaki tokante e santu saserdosio. Dokumentando e organisashon di iglesia meridiano, Lukas su promé frasenan ta bisa, “Despues el a yama su diesdos disipel huntu, i a duna nan poder i outoridat,” donnan no konsedé a base di kredensialnan impresivo ni determiná pa tradishon òf derechi di nasementu. Nan no ta wòrdu otorgá pa un skol di divinidat òf un seminario teológiko. Nan ta konferí solamente dor di ponementu di man dor di unu ku tabatin mannan outorisá poné riba dje den un sekuensia kontinuo ku ta bai bèk na e fuente di tur outoridat divino, Señor Hesu-Kristu.

I den un iglesia ku ta komprondé e don di mizerikòrdia, e lo no ta un otro evidensia maravioso di e bèrdat di iglesia pa mira e bendishon i kombenionan aki bai serka nos famianan morto, esnan di nos famia ku a bai promé ku nos? Nan mester wòrdu kastigá pasobra nan no tabatin akseso na e evangelio òf pasobra nan a nase den un tempu òf na un lugá kaminda ordenansa i kombenionan divino no tabata disponibel pa nan? E Iglesia di Hesu-Kristu di e Santunan di e Delaster Dianan tin kasnan di Señor sagrado dediká den kua obra mizerikordioso i salbadó ta wòrdu hasí vikariamente tur dia i anochi pa esnan ku a fayesé, tambe ofresiendo oportunidatnan di adorashon i ordenansanan pa esnan bibu. Na mi konosementu, e evidensia partikular aki di Dios su bèrdat, Su amor universal pa e bibu i e morto, no ta mirá tur kaminda den e mundu—eksepto den un iglesia ku ta demostrá bèrdat den e kaso partikular aki: E Iglesia di Hesu-Kristu di e Santunan di e Delaster Dianan.

Mi promé enkuentro visual ku dunamentu di bista, i dunamentu di bida ku evidensia real di bèrdat no a bini ku hunta klèi òf den e pisina di Siloam. Nò, e instrumènt di bèrdat ku a trese mi sanashon di Señor a bini manera páginanan den un buki, sí, e Buki di Mormon: Un Otro Tèstamènt di Hesu-Kristu! E afirmashonnan tokante e buki aki a wòrdu ataká i rechasá algun inkrédulonan, tin bia igualando e hostilidat di esnan ku a bisa e hòmber ku a sana ku no ta posibel ku e por a eksperensiá loke e tabata sa ku el a eksperensiá.

A tira na mi kara ku e medionan pa kua e buki aki a sali na kla no tabata práktiko, inkreibel, bergonsoso, asta impuru. Awor, esei ta lenguahe duru di kualke hende ku ta presumí di sa e medionan pa kua e buki a sali na kla, ya ku e úniko deskripshon ku a duna di e medionan aki ku tabata tradusí “pa don i poder di Dios.” Ta esei. Esei ta tur kos. Den kualke kaso, e impakto di e Buki di Mormon den mi bida no ta ménos milagroso ku e aplikashon di skupi i tera riba wowonan di e hòmber siegu. E tabata, pa mi, un bara di seguridat pa mi alma, un lus di revelashon trasendente i penetrante, un iluminashon di e kaminda ku mi mester kana ora neblinanan di skuridat bini. I sigur nan a hasié, i sigur nan lo hasié.

I debí na e bista el a konsedé n’ami di mi Salbador Su amor universal i grasia redentor, mi ta kompartí ku boso mi testimonio, hustifiká aki manera e mayornan di e hòmber nobo bendishoná a bisa nan yu hòmber mester wòrdu skuchá pasobra e tabata “mayor di edat.” Wèl, ami tambe. E tabatin edat sufisiente pa wòrdu tumá na serio, nan a impliká . Wèl, ami tambe. Falta dos luna pa mi di 85 kumpleaño. Mi tabata na rant di morto i a bin bèk. Mi a kana huntu ku reinan i profetanan, ku presidentenan i apòstelnan. Mihó di tur, tabatin bia ku mi a wòrdu abrumá pa e Spiritu Santu di Dios. Mi ta konfia ku mi testimonio mester haña por lo ménos un tiki konsiderashon aki.

Awor, rumannan, mi a yega na e konvikshon di henter mi alma ku E Iglesia di Hesu-Kristu di e Santunan di e Delaster Dianan ta un restourashon berdadero di e Iglesia di e Tèstamènt Nobo—i mas—pasobra mi no por ninga e evidensia ku e Buki di Mormon ta bèrdat, e palabra di Dios mes. For di e promé eksperensianan aki, mi ta suponé ku mi tabatin un mil—diesmil?—otro evidensia ku tur loke mi a papia di dje awe ta bèrdat. Pues mi ta kontentu awor pa ta huntu ku mi amigu riba e kayanan di Herusalèm, kaminda mi ta kanta ku mi stèm disminuí:

Den e nòmber di Hesu-Kristu, amèn.