E Evangelio di Hesu-Kristu Sentralisá riba Famia

E doktrina di E Iglesia di Hesu-Kristu di e Santunan di e Delaster Dianan ta konsentrá riba famia. Esensial pa nos doktrina pa famia ta e tèmpel. E ordenansanan risibí ei ta permití nos pa regresá komo famianan eterno den e presensia di nos Tata Selestial.

Na konferensia general di aprel 2025, Presidente Russell M. Nelson a anunsiá e konstrukshon di 200 tèmpel nobo. E tabata gusta pa anunsiá tèmpelnan nobo na klousura di kada konferensia general, i nos tur tabata gosa kuné. Sinembargo, ku e kantidat grandi di tèmpel awor den e promé fasenan di planifikashon i konstrukshon, ta apropiá pa nos baha e anunsio di tèmpelnan nobo. P’esei ku aprobashon di e Quorum di e Diesdos Apòstelnan, nos lo no aunsiá ningun tèmpel nobo na e konferensia a Awor nos lo sigui dilanti den proveé e ordenansanan di tèmpel na miembronan di Iglesia den henter mundu, inkluso ki ora i unda pa anunsiá e konstrukshon di tèmpelnan nobo.

E porshon di mi diskurso ku mi a kaba di duna tabata skirbí despues di e fayesementu di nos kerido Presidente Russell M. Nelson. Loke ta sigui awor tabata skirbí i aprobá simannan promé, pero ainda e ta representá mi siñansanan, inspirá pa Señor.

E proklamashon di famia, anunsiá 30 aña pasá, ta deklará ku “e famia ta ordená pa Dios” i “ta sentral na e Kreador su plan pa e destino eterno di Su yunan.” E ta deklará tambe “ku Dios Su mandamentu na Su yunan pa multipliká i yena e mundu ta keda bálido.” I, “nos ta deklará ademas ku Dios a manda pa e podernan sagrado di prokreashon mester wòrdu utilisá solamente entre hòmber i muhé, legalmente kasá komo esposo i esposa.” I e tempu ei Elder Russell M. Nelson a siña un oudiensia di Universidat Brigham Young ku e famia ta “sentral pa Dios su plan. … Den realidat, un propósito di e plan ta pa eksaltá e famia.”

E Iglesia di Hesu-Kristu tin bes ta konosí komo un Iglesia sentralisá riba famia. E ta! Nos relashon na Dios i e propósito di nos bida mortal ta wòrdu spliká den términonan di e famia. E evangelio di Hesu-Kristu ta e plan di nos Tata Selestial pa e benefisio di Su yunan spiritual. Di bèrdat nos por bisa ku e plan di evangelio a wòrdu siñá na nos promé den e konsilio di un famia eterno, e ta implementá pa medio di nos famia mortal, i su destino previsibel ta pa eksaltá e yunan di Dios den famianan eterno.

Apesar di e konteksto di doktrina, tin oposishon. Na Merka nos ta sufriendo di un deterioro den matrimonio i maternidat. Pa kasi shen aña e proporshon di hogarnan ku parehanan kasá na kabes a disminuí, i asina meskos e índise di nasementu. E matrimonionan i índisenan di nasementu di nos Iglesia ta hopi mas positivo, pero nan tambe a baha di manera signifikante. Ta vital ku Santunan di Delaster Dianan no pèrdè nan entendimentu di e propósito di matrimonio i e balor di muchanan. Esei ta e futuro pa kual nos ta lucha. “Eksaltashon ta un asuntu di famia,” Presidente Nelson a siña nos. “Solamente pa medio di e ordenansanan salbadó di e evangelio di Hesu-Kristu famianan por wòrdu eksaltá.”

E bahada nashonal di matrimonio i hañamentu di yu ta komprendibel pa motibunan históriko, pero Santunan di Delaster Dianan su balor i práktikanan mester mehorá—no sigui—e tendensianan ei.

Den mi tempu di mucha 80 aña pasá, mi tabata biba na e kunuku di mi abuelonan den un ambiente kaminda kasi tur kos ku tabata sosodé durante dia tabata bou di direkshon di e famia. No tabatin televishon òf otro kosnan elektróniko pa distraí for di aktividatnan di famia. Kontrario, den e sosiedat urbano di awendia, poko miembro ta eksperensiá aktividatnan konsistente di famia. Bida urbano i transporte moderno, entrenamentu organisá, komunikashon di velosidat haltu a fasilitá ku hóbennan ta trata nan hogarnan komo kasnan di hospedahe, kaminda nan ta drumi i kome ratu ratu, pero kaminda tin muchu ménos direkshon paternal di nan aktividatnan.

Influensianan di mayornan tambe a bira suak dor di e manera den kual mayoria di miembronan aktual di Iglesia ta gana nan bida. Den pasado, un di e gran influensianan ku tabata uni famia tabata e eksperensia i lucha huntu pa por logra un meta komun manera dominá e desierto i gana nan bida. E famia tabata un unidat di produkshon ekonómiko organisá i dirigí. Awendia, mayoria famia ta unidatnan di konsumo ekonómiko, kual no ta rekerí un grado haltu di organisashon i koperashon den famia.

Segun influensia paternal ta disminuí, Santunan di Delaster Dianan ainda tin un responsabilidat di Dios pa siña nan yunan pa prepará pa nos famia su destino den eternidat (wak Doktrina i Kombenionan 68:25). Hopi di nos mester hasi esaki ora ku no ta henter nos famia ta tradishonal. Divorsio, morto, i separashon ta realidatnan. Mi a eksperensiá esei den e famia den kual ami a wòrdu kriá.

Mi tata a muri ora mi tabatin shete aña, pues mi ruman hòmber mas yòn i ruman muhé i ami a wòrdu kriá pa un mama viuda. Den e situashonnan di mas difísil, el a perseverá. E tabata su so i kibrá, pero ku yudansa di Señor su siñansa poderoso di e doktrina di e Iglesia restourá a guia nos. Kuantu el a hasi orashon pa asistensia selestial den kria su yunan, i el a wòrdu bendishoná! Nos a wòrdu kriá den un hogar alegre den kual nos tata defuntu tabata semper un realidat. El a siña nos ku nos tabatin un tata i ku e tabatin un esposo i semper nos lo ta un famia dor di nan matrimonio den tèmpel. Nos tata tabata ousente solamente temporalmente pasobra Señor a yam’é pa un obra diferente.

Mi sa ku hopi otro famianan no ta asina felis, pero tur mama por siña di e amor di un Tata Selestial i e eventual bendishonnan di un matrimonio den tèmpel. Bo tambe por hasi ésaki! Tata Selestial Su plan ta sigurá e posibilidat aki pa tur hende. Nos tur ta gradesido pa matrimonio den tèmpel i pa e posibel bendishonnan di ta seyá komo un famia eterno. Manera mi mama, nos stima pa sita Lehi su promesa na su yu Yakob ku Dios “lo konsagrá bo aflikshonnan pa bo probecho” (2 Nefi 2:2). Esaki ta konta pa tur famia Santu di Delaster Dianan, kompletu òf aktualmente inkompletu. Nos ta un iglesia di famia.

Nos doktrina i nos kreensia den famianan eterno ta fortalesé i uni nos. Nunka lo mi lubidá e promesa di mi Abuelo Harris parti mama, ora ku nos komo mucha tabata biba na nan kunuku serka di Payson, Utah. El a duna mi e notisia trágiko ku mi tata a muri leu aya na Denver, Colorado. Mi a kore bai den kamber i hinka rudia banda di e kama, yorando ku henter mi kurason. Abuelo a sigui mi i a bai na su rudianan banda di mi i bisa, “Ami lo ta bo tata.” E promesa tierno ei ta un ehèmpel poderoso di loke abuelonan por hasi pa yena e bashí ora famianan pèrdè òf ta falta un miembro.

Mayornan soltero òf kasá—i otronan, manera abuelonan ku ta yena e ròl ei pa muchanan—ta e maestro di maestronan. Nan siñansanan mas efikas ta pa medio di ehèmpel. E sírkulo di famia ta e lugá ideal pa demostrá i siña balornan eterno, manera e importansia di matrimonio i muchanan, e propósito di bida, i e berdadero fuente di goso. E ta e mihó lugá tambe pa siña otro lèsnan esensial di bida, manera bondat, pordoná, kontrol propio, i e balor di edukashon i trabou honesto.

Naturalmente, hopi miembronan di Iglesia tin miembronan di famia kerí ku no ta aseptá e balor i ekspektativanan di e evangelio. Tal miembronan tin mester di nos amor i pasenshi. Ora nos ta relashoná nos mes un ku otro, nos tin ku kòrda ku e perfekshon ku nos ta buska no ta limitá na e sirkunstansianan yen di strès di mortalidat. E gran siñansa den Doktrina i Kombenio138:57–59 ta sigurá ku arepentimentu i kresementu spiritual por kontinuá den e mundu di spiritu ku ta sigui mortalidat. Mas importante, segun famianan ta uni pa fortalesé unu na otro, nos tur tin ku kòrda ku e pikánan i defisiensianan inevitabel ku nos tur ta eksperensiá den mortalidat por wòrdu pordoná pa medio di arepentimentu pa motibu di e ekspiashon glorioso i salbadó di Hesu-Kristu.

Nos Salbador, Hesu-Kristu ta nos modelo supremo. Nos lo wòrdu bendishoná si nos hasi nos bida un modelo segun Su siñansanan i sakrifisio propio. Siguiendo Hesu-Kristu i pone nos mes den servisio unu na otro ta e mihó remedi pa e egoismo i individualismo ku awor ta parse di ta asina komun.

Mayornan tin e deber tambe pa siña nan yunan konosementu práktiko apart for di e prinsipionan di evangelio. Famia ta uni ora nan hasi kosnan signifikativo huntu. Hardinnan familiar ta konstruí relashonnan di famia. Eksperensianan familiar felis ta fortalesé lasonan familiar. Kampamentu, aktividatnan di spòrt, i otro rekreashon ta spesialmente di balor pa uni famianan. Famianan mester organisá reunionnan familiar pa rekordá antepasadonan, kual ta kondusí na e tèmpel.

Mayornan mester eduká muchanan den e abilidatnan básiko di bida, inkluyendo traha den kurá i hogar. Siña idiomanan ta un preparashon útil pa servisio di misionero i bida moderno. E maestronan di e tópikonan aki por ta mayornan òf abuelonan òf miembronan di famia djaleu. Famia ta floresé ora nan siña komo un grupo i deliberá huntu den konseho riba tur sorto di preokupashon pa ku e famia i su miembronan.

Algun por bisa, “Pero nos no tin tempu pa nada di esei nan.” Ora saka tempu pa hasi loke realmente ta di balor, hopi mayor lo deskubrí ku nan por aktivá nan famia si nan tur paga nan teknologianan. I mayornan, kòrda loke e muchanan ei kier realmente pa sena ta tempu ku bo.

Bendishonnan grandi ta bini pa famianan si nan hasi orashon huntu, hinka rudia di dia i anochi pa ofresé gradisimentu i pa hasi orashon riba preokupashonnan komun. Famianan ta wòrdu bendishoná tambe ora nan adorá huntu den servisionan di Iglesia i den otro ambientenan di deboshon. Lasonan familiar ta wòrdu fortalesé tambe pa medio di historianan di famia, kreando tradishonnan, i kompartiendo eksperensianan sagrado. Presidente Spencer W. Kimball a kòrda nos ku “historianan di inspirashon for di nos propio bida i esnan di nos antepasadonan ta hèrmèntnan di siñansa poderoso.” Hopi bes nan ta e mihó rekursonan di inspirashon pa nos i nos posteridat.

Mi ta testifiká di Señor Hesu-Kristu, ku ta e Uniko Yu Engendrá di Dios, nos Tata Eterno. E ta invitá nos pa sigui e kaminda di kombenio ku ta kondusí na un reunion familiar selestial. E podernan seyadó di e saserdosio, dirigí pa medio di e yabinan restourá den e Tèmpel di Kirtland, ta trese famianan huntu pa eternidat (wak Doktrina i Kombenionan 110:13–16). Nan ta wòrdu ehersé aktualmente den un kantidat kresiente di tèmpelnan di Señor rònt mundu. Esaki ta real. Laga nos ta parti di dje, ta mi orashon, den e nòmber di Hesu-Kristu, amèn.