E Nòmber pa Medio di Kual Bo ta Wòrdu Yamá

Presidente Russell M. Nelson a siña ku si Señor tabata papia ku nos direktamente, e promé kos ku E lo a sòru pa nos komprondé ta nos berdadero identidat: nos ta yunan di Dios, yunan di e kombenio, i disipelnan di Hesu-Kristu. Kualke otro designashon lo desepshoná nos na final.

Mi a siña esaki pa mi mes ora mi yu mayó a risibí su promé telefòn selular. Ku hopi emoshon, el a kuminsá hinka nòmbernan di su famia i amigunan den su kontaktonan. Un dia, mi a nota ku su mama tabata yamando. Riba e pantaya a aparesé e nòmber “Mama.” Esei tabata un eskoho sensibel i digno—i, mi ta atmití, un señal di rèspèt pa e mihó mayor den nos kas. Naturalmente, mi a bira kurioso. Ki nòmber el a duna ami?

Mi a buska dor di su kontaktonan, asumiendo ku si Wendi tabata “Mama,” ami mester ta “Tata.” No tabata einan. Mi a buska pa “Papa.” Ainda nada. Mi kuriosidat a bira preokupashon leve. “E ta yama mi ‘Corey’?” No. Den un último esfuerso, mi a pensa, “Nos ta hungadónan di futbòl—kisas e ta yamá mi ‘Pelé.’” M’a keda ku gana. Finalmente, mi a yama su number mi mes, i dos palabra a aparesé riba su pantaya: “No Mama”!

Rumannan, pa medio di kual nòmber boso ta wòrdu yamá?

Hesus a yama Su siguidónan pa hopi nòmber: Disípulonan. Yunan hòmber i yunan muhé. Yunan di e profetanan. Karnénan. Amigunan. E Lus di mundu. Santunan. Kada un ta karga nifikashon eterno i ta enfatisá un relashon personal ku e Salbador.

Pero entre e nòmbernan aki, unu ta resaltá riba e sobrá—e nòmber di Kristu. Den e Buki di Mormon, Rei Benjamin a siña poderosamente:

“No tin ningun otro nòmber duná pa medio di kua salbashon ta bini, p’esei, mi ke pa boso tuma riba boso e nòmber di Kristu. …

“Awor lo sosodé ku ken ku hasi esaki lo wòrdu hañá na e man drechi di Dios, pasobra e lo sa e nòmber pa kua e lo wòrdu yamá; pasobra e lo wòrdu yamá pa e nòmber di Kristu.”

Esnan ku tuma riba nan mes e nòmber di Kristu ta bira Su disipelnan i testigunan. Den e buki di Echonan, nos ta lesa ku despues di e Resurekshon di Hesu-Kristu, testigunan skohí a wòrdu mandá pa testifiká ku ken ku kere den Hesus, a wòrdu batisá, i a risibí e Spiritu Santu lo risibí un remishon di pikánan. Esnan ku a risibí e ordenansanan sagrado aki a reuní ku Iglesia, a bira disipel, i a wòrdu yamá Kristian. E Buki di Mormon tambe ta deskribí kreyentenan den Kristu komo Kristiannan i hendenan di pakto komo “e yunan di Kristu, su yunan hòmber i su yunan muhé.”

Kiko ta nifiká pa wòrdu yamá na e nòmber di Kristu? E ta nifiká hasi i warda kombenionan,semper kòrda riba djE,warda Su mandamentunan,i ta “dispuesto … pa para komo testigunan di Dios na tur momentu i den tur kos.” E ta nifiká para huntu ku profetanan i apòstelnan segun ku nan ta hiba e mensahe di Kristu—ku su doktrina, kombenionan, i ordenansanan—rònt mundu. E ta nifiká tambe sirbi otronan pa aliviá sufrimentu, siendo un lus, i pa trese speransa den Kristu pa tur hende. Naturalmente, esaki ta un proseso di bida largu. E Profeta José Smith a siña ku “esaki ta un stashon na kua ningun hende nunka a yega den un momentu.”

Pasobra e hornada di disipel ta tuma tempu i esfuerso konstruí “liña riba liña, presepto riba presepto,” ta fásil pa keda pegá den títulonan mundano. Esakinan ta duna solamente balor temporal i nunka lo ta sufisiente riba nan mes. Redenshon i e kosnan di eternidat solamente “ta bini den i pa medio di e Santu Mesias.” P’esei, sigui konseho profétiko pa hasi disipulado un prioridat ta tantu oportuno komo sabio, spesialmente den un era di asina tantu bos i influensia kompetitivo. Esaki tabata sentral den e konseho di Rei Benjamin ora el a bisa, “Lo mi ke pa boso kòrda di retené e nòmber [di Kristu] skirbí semper den boso kurason, … pa boso tende i konosé e bos pa medio di kual boso lo wòrdu yamá, i tambe, e nòmber pa medio di kual e lo yama boso.”

Mi a mira esaki den mi mes famia. Mi bisawelo Martin Gassner a kambia pa semper pasobra un presidente di rama humilde a kontestá e yamada di e Salbador. Na Alemania na 1909, tempu tabata duru i sèn tabata skars. Martin tabata traha komo wèlder den un planta di fabrikashon di pipa. Segun su mes atmishon, mayoria di e dianan di pago tabata kaba den bebementu, humamentu i kumpramentu di bebida den bar. Su kasá finalmente a atvertié ku si e no kambia, e lo bai.

Un dia, Martin su kolega di trabou a topa kuné na kaminda pa e bar ku un foyeto religioso machiká den su man. El a hañ’é riba kaya i a bisa Martin ku el a sinti algu diferente despues di a lesa e pamfleta titulá Was wissen Sie von den Mormonen?, òf Kiko bo sa di e Mormonnan? Mi tin sigur ku e titulo ei a kambia.

Un adrès di stèmpel na e parti patras tabata djis sufisiente legibel pa desifrá unda e iglesia tabata situá. E tabata un distansia konsiderabel, pero nan a keda konmoví pa loke nan a lesa i a disidí di tuma e trein e djadumingu ei pa investigá. Ora nan a yega, nan a konstatá ku e adrès no tabata e iglesia ku nan a spera, sino un kas funerario. Martin a duda—pasobra di bèrdat, un iglesia den un kas di entiero tabata zona un tiki muchu manera un pakete inapropiá.

Pero ariba, den un sala di hür, nan a haña un grupo chikitu di Santunan reuní. Un hòmber a invitá nan na e reunion di testimonio. Martin a wòrdu toká pa e Spiritu i tabata asina impreshoná pa e testimonionan simpel i ferviente ku el a duna su testimonio. I tabata einan, na e lugá mas improbabel ei, ku el a bisa ku e tabata sa kaba ku e mester ta bèrdat.

Despues, e hòmber a introdusí su mes komo e presidente di rama i a puntr’é si nan lo regresá. Martin a splika ku e tabata biba muchu leu i no por a paga e biahe semanal. E presidente di rama simplemente a bisa: “Sigui mi.”

Nan a kana algun kuadra pa un fábrika den serkania kaminda e amigu di e presidente di e rama tabata traha. Despues di un kòmbersashon kòrtiku, Martin i su amigu tur dos a haña un trabou ofresé na nan. E ora ei e presidente di rama a hiba nan na un edifisio di apartamentu i a sigurá un bibienda pa nan famianan.

Tur esaki a sosodé denter di dos ora. Martin su famia a muda e siguiente siman. Seis luna despues nan a batisá. E hòmber ku un tempu tabata konosí komo un buraché sin speransa a bira asina ardiente den su fe nobo ku hende den siudat a kuminsá yam’é, kisas no asina kariñosamente, “e saserdote.”

Pa loke ta trata e presidente di rama, mi no por bisa bo su nòmber—su identidat a bai pèrdí ku tempu. Pero mi ta yam’é un disipel, embahador, Kristian, un bon Samaritano, i amigu. Ta sinti su influensia ainda, 116 aña despues, i mi ta para riba e skoudernan di su disipulado.

“Tin un dicho ku bo por konta e simianan den un apel, pero bo no por konta e apelnan ku ta bini for di un simia.” E simia ku e presidente di rama a planta a produsí fruta inkontabel . E lo no tabatin idea ku 48 aña despues, vários generashon di famia di Martin na tur dos banda di e velo lo a wòrdu seyá den e Tèmpel di Bern Suisa.

Kisas e sermonnan di mas grandi ta esnan ku nunka nos ta tende pero esnan ku nos ta mira den e akshonnan i echonan trankil i modesto opservá den bida di hende komun i koriente ku, purbando di ta manera Hesus, ta hasi kosnan bon. Loke e presidente di rama aki a hasi no tabata parti di un lista di kontròl. E tabata simplemente bibando e evangelio manera deskribí den e buki di Alma: “Nan no a manda ningun bai … ku tabatin hamber, òf ku tabatin set, òf ku tabata malu, … nan tabata liberal na tur, tantu bieu komo yòn, … tantu hòmber komo muhé.” I, un punto ku nos no mester pèrdè for di bista, nan no a manda ningun bai “sea for di iglesia òf den iglesia.”

Esnan ku ta tuma riba nan mes e nòmber di Kristu, ta rekonosé, manera José Smith a bisa, “Un hòmber yená ku e amor di Dios, no ta kontentu ku bendishoná su famia so, pero ta bai rònt di henter mundu, ansioso pa bendishoná henter e rasa humano.”

Asina Hesus a biba. De echo, El a hasi asina tantu ku Su disipelnan no por a skirbi tur kos. Apòstel Huan a registrá, “Tin tambe hopi otro kos ku Hesus a hasi, ku, si nan a wòrdu skirbí kada unu, mi ta suponé ku ni mundu mes no por a kontené e bukinan ku mester a wòrdu skirbí.”

Laga nos hasi esfuerso pa sigui e ehèmpel di Kristu, hasiendo bon i hasiendo disipulado un prioridat pa bida largu pa asina kada bes ku nos interkambiá ku otronan, nan lo por sinti e amor di Dios i e poder di konfirmashon di Spiritu Santu. E ora ei nos por uni na mi bisawelo i miónes di otronan ku a deklará, manera e disipel Andres, “Nos a haña e Mesias.”

Na final, nos identidat no ta wòrdu definí pa mundu. Pero nos disipulado ta wòrdu definí dor di e ordenansanan ku nos ta risibí, e kombenionan ku nos ta warda, i e amor ku nos ta mustra na Dios i próhimo dor di simplemente hasi bon. Manera Presidente Nelson a siña, enbèrdat nos ta yunan di Dios, yunan di e kombenio, disipelnan di Hesu-Kristu.

Mi ta testifiká ku Hesu-Kristu ta biba i a redimí nos. E ta Esun ku a bisa: “Mi a yamá bo na … nòmber, bo ta di mi.” Den e nòmber di Hesu-Kristu, amèn.