Yená ku e Birtut di Dominio Propio

Na mei 2021, miéntras e tabata bishitando e trabounan di renobashon di e tèmpel di Salt Lake, Presidente Russell M. Nelson a keda maraviá di e esfuersonan di e pioneronan kende, ku rekursonan limitá i un fe sin tambaliá, a konstruí e edifisio sagrado ei, un obra maestro físiko i spiritual ku a resistí e prueba di tempu. Sinembargo, el a opservá tambe e efektonan di eroshon, kual ku tempu a kousa burakunan den e piedranan di e tèmpel su fundeshi original i instabilidat den e masoneria, señalnan kla di e nesesidat pa refuerso struktural.

Nos kerido profeta a siña nos e ora ei ku meskos ku e tabata nesesario pa implementá medidanan mayó pa fortalesé e fundeshi di e tèmpel pa e por resistí e forsanan di naturalesa, nos tambe mester tuma medidanan ekstraordinario—-kisas medidanan ku nos no a tuma nunka promé —pa fortalesé nos propio fundeshi spiritual den Hesu-Kristu. Den su mensahe memorabel, El a laga nos ku dos pregunta profundo pa reflekshon personal: “Kon firme bo fundeshi ta? I kua refuersonan pa bo testimonio i entendimentu di e evangelio ta nesesario?”

E evangelio di Hesu-Kristu ta proveé nos ku inspirashon divino i medionan efektivo pa prevení e eroshon spiritual den nos alma, reforsando nos fundeshi ku poder i yudando nos evitá burakunan den nos fe i instabilidat den tantu nos testimonio i nos entendimentu di e bèrdatnan sagrado di e evangelio. Un prinsipio partikularmente relevante pa logra e propósito aki ta den sekshon 12 di Doktrina i Kombenionan, un revelashon duná pa medio di e Profeta José Smith na José Knight, un hòmber hustu ku sinseramente a buska pa komprondé Señor Su boluntat, no pa djis un kambio, pero pa para firme den su disipulado—“firme manera e pilánan di shelu.” Señor a deklará:

“Mira, Mi ta bisa na boso, i tambe na tur esnan ku tin deseonan pa sali i establesé e obra aki;

“I niun hende no por yuda den e obra aki eksepto e lo ta humilde i yen di amor, teniendo fe, speransa, i karidat, siendo moderá den tur kos, kualkier kos ku lo konfi’é kuné”

E Salbador su guia, registrá den e revelashon sagrado aki, ta rekordá nos ku dominio propio ta un refuerso esensial pa un fundeshi firme den Hesu-Kristu. E ta un di e birtutnan indispensabel, no solamente pa esnan ku a wòrdu yamá pa sirbi, pero pa tur ku a hasi kombenionan sagrado ku Señor i ta aseptá pa siguiÉ ku fe. Dominio propio ta harmonisá i fortalesé otro atributonan manera Kristu menshoná den e revelashon aki; humildat, fe, speransa, karidat, i e amor puru ku ta flihí for di dj’É. Ademas, kultivá dominio propio ta un manera signifikativo pa protehá nos alma kontra e eroshon spiritual sutil pero konstante kousá pa e influensianan mundano ku por debilitá nos fundeshi den Hesu-Kristu.

Entre e kualidatnan ku ta yena e disipulado berdadero di Hesu-Kristu, dominio propio ta resaltá komo un reflekshon di e Salbador Mes, un fruta presioso di e Spiritu, disponibel pa tur ku para habrí pa influensia divino. Ta e birtut ta trese harmonia na e kurason, formando deseonan i emoshonnan ku sabiduria i trankilidat. Den Skrituranan, dominio propio ta bin dilanti komo un parti esensial di e progreso den nos hornada spiritual, kondusiendo nos na pasenshi, piedat, i kompashon, tanten e ta refiná nos sintimentunan, nos palabranan, i nos akshonnan.

Disipelnan di Kristu ku ta lucha pa kultivá e atributo Kristian aki ta yega na bira mas humilde i yen di amor. Un fortalesa sereno ta lanta den nan, i nan ta bira mas kapabel pa restringí rabia, fomentá pasenshi, i trata otronan ku toleransia, rèspèt, i dignidat, asta ora ku e bientunan di atversidat ta supla ferosmente. Nan ta lucha pa no aktua ku impulso pero ta skohe pa aktua ku sabiduria spiritual, guiá pa humildat i e influensia suave di e Spiritu Santu. Den e forma aki, nan ta bira ménos vulnerabel pa eroshon spiritual pasobra, manera e Apòstel Pablo a siña, nan sa ku nan por hasi tur kos pa medio di Kristu, ku ta fortalesé nan asta ora nan mester enfrentá pruebanan ku lo por sakudí nan testimonio di djE.

Den su epístola na Tito, Pablo a duna konseho sagrado tokante e kualifikashonnan di esnan ku ta deseá pa representá e Salbador i hasi Su boluntat ku fe i dedikashon. El a bisa ku nan lo mester ta hospitalario, sobrio, hustu, i santu—kualidatnan ku klaramente ta reflehá e influensia di dominio propio.

Sinembargo, Pablo a atvertí ku nan lo no mester ta “tèrko, no ta rabia lihé, … [i] i no atakadó” Tal karakterístikanan ta kontrario na e mente di e Salbador i ta opstakulisá kresementu spiritual berdadero. Den e konteksto di Skrituranan, “sin terkedat” ta esun ku ta ninga di aktua ku arogansia i orguyo; “no ta rabia lihé” ta un hende ku ta evitá e impulso natural di pèrdè pasenshi i bira iritá; i “no atakadó” ta referí na un hende ku ta rechasá pleitu, agresividat i komportashon brutal, verbalmente, físikamente, i emoshonalmente. Segun nos ta lucha pa kambia nos komportashon ku fe i humildat, nos por ta firmemente ankrá na e baranka sólido di Su grasia i bira instrumentonan puru i di pòlish den Su mannan santu.

Reflehando riba e nesesidat pa kultivá e birtut di dominio propio, mi ta kòrda riba e palabranan di Hanna, e mama di e profeta Samuel—un muhé di fe remarkabel ku, asta despues di pruebanan grandi a ofresé un kantika di gradisimentu na Señor. El a bisa: “No papia mas ku tantu orguyo, no laga arogansia sali for di boso boka, pasobra Señor ta un Dios di konosementu, i pa medio di djE akshonnan ta wòrdu pisá.” Su kantika ta mas ku un orashon—e ta un invitashon dirigí na su mes pa aktua ku humildat, dominio propio i moderashon. Hanna ta rekordá nos ku e fortalesa spiritual berdadero no ta keda ekspresá den reakshonnan ku impulso òf palabranan sobèrbè, pero den aktitutnan moderá i atento alineá ku Señor Su sabiduria.

Generalmente, e mundu ta glorifiká komportashonnan ku ta nase di agresividat, arogansia, i falta di pasenshi, i eksesivo, hopi bes ku ta hustifiká tal aktitutnan kousá pa e preshonnan di bida diario i e inklinashonnan pa ku rekonosementu i popularidat. Ora ku nos apartá bista for di e birtut di dominio propio i ignorá e influensia suave i moderá di e Spiritu Santu den nos manera di aktua i papia, fásilmente nos ta kai den e enemigu su trampa, kual inevitablemente ta hiba nos na ekspresá palabranan i adoptá aktitutnan ku nos lo lamentá profundamente, sea den nos relashonnan sosial, familiar, òf asta eklesiástiko. E evangelio di Hesu-Kristu ta invitá nos pa ehersé e birtut aki spesialmente den tempunan di reto, pasobra e ta presisamente na e okashonnan aki ku e karakter berdadero di un individuo ta wòrdu revelá. Manera Martin Luther King Jr. a bisa un bia, “E berdadero realidat moral di un hende no ta unda e ta pará den momentunan konfortabel i kumbiniente, pero kaminda e ta para na momentunan di reto i kontra atversidat.”

Komo un pueblo di kombenio, nos ta yamá pa biba ku nos kurason firmemente ankrá den e promesanan sagrado ku nos a hasi na Señor, siguiendo kuidadosamente e kaminda ku El a establesé pa medio di Su ehèmpel perfekto. A kambio, El a primintí, “Di bèrdat, di bèrdat, Mi ta bisa boso, ku esaki ta mi doktrina, i esun ku konstruí riba esaki lo konstruí riba mi baranka, i e portanan di fièrnu lo no prevalesé kontra nan.”

E Salbador su ministerio na tera a wòrdu marká pa e birtut di dominio propio den tur aspektonan di Su karakter. Pa medio di Su ehèmpel perfekto, El a siña nos pa “tene pasenshi den aflikshonnan, no insultá esnan ku ta insultá.” Manera el a siña ku nos no mester sede na rabia pa motibu di disputa i kontenshonnan. El a deklará, “Boso mester arepentí, i bira manera un mucha chikitu.” El a siña tambe ku tur ku ta deseá pa bini na djE ku propósito íntegro di kurason mester rekonsiliá ku esnan ku nan ta rabiá kuné òf ku esnan ku tin algu kontra nan. Ku un aktitut di dominio propio i un kurason yen di kompashon, El a sigurá nos ku ora ku nos wòrdu tratá ku duresa, falta di bondat, falta di rèspèt, òf ignoransia, Su bondat lo no apartá for di nos, i e kombenio di Su pas lo no wòrdu kitá for di nos bida.

Algun aña pasa, mi kasá i ami tabatin e privilegio sagrado di reuní ku algun miembronan fiel di Iglesia na Suidat di Mexico. Hopi di nan, sea personalmente òf pa medio di nan sernan kerí, a pasa den pruebanan indeskriptibel, inkluso sekuestronan, homisidionan, i otro tragedianan doloroso.

Ora nos a wak den e karanan di e Santunan aki, nos no a mira rabia, resentimentu, òf un deseo di vengansa. Mas bien, nos a wak un humildat silensioso. Nan aparensia, ounke marká pa tristesa, tabata radia un anhelo sinsero pa sanashon i konsuelo. Maske ku nan kurason tabata kibrá pa sufrimentu, e Santunan aki a pusha pa dilanti ku fe den Hesu-Kristu, skohiendo pa no permití nan aflikshonnan bira burakunan den nan fe òf kousa instabilidat den nan testimonio di e evangelio.

Na e konklushon di e enkuentro sagrado ei, nos a saludá kada un di nan. Kada saludo ku man, kada brasa, a bira un testimonio silensioso di ku e yudansa di Señor, nos por skohe pa respondé ku dominio propio na e frustrashon i retonan di bida. Nan ehèmpel sereno i modesto a sirbi komo un invitashon tierno pa kana e kaminda di e Salbador ku dominio propio den tur kos. Nos a sinti manera ku nos tabata den presensia di angelnan.

Hesu-Kristu, esun mas grandi di nos tur, a sufri pa nos te ora El a sangra for di kada porio, tòg nunka E no a permití rabia pa penetrá Su kurason, ni el a bira agresivo, ofensivo, òf laga palabranan profano skapa Su lepnan, asta meimei di aflikshon. Ku un dominio propio perfekto i humildat inigualabel, E no a pensa riba Su Mes pero di kada un di Dios su yunan—pasado, presente, i futuro. E Apòstel Pedro a testifiká di e aktitut sublime di Kristu ora el a deklará, “Ken, ora ku el a wòrdu insultá, no a insultá atrobe; ora el a sufri, e no a menasá; pero el a entregá su mes na esun ku ta husga hustu.” Asta meimei di Su agonia di mas grandi, e Salbador a demonstrá un dominio propio perfekto i divino. El a deklará, “Sinembargo, gloria sea na e Tata, i mi a bebe i terminá mi preparashonnan pa ku e yunan di hende.”

Mi kerido rumannan, mi ta ekstendé un invitashon sinsero na nos tur pa yena nos mente i kurason ku e birtut Kristian di dominio propio, komo un reakshon sagrado na e yamada profétiko di nos kerido Presidente Russell M. Nelson. Segun nos ta lucha ku fe i diligensia pa fomentá dominio propio den nos akshonnan i palabranan, mi ta testifiká ku nos lo fortalesé i ankra nos bida mas firmemente riba e fundeshi sigur di nos Redentor.

Mi ta testifká solemnemente ku e búskeda konstante di dominio propio ta purifiká nos alma i ta santifiká nos kurason dilanti e Salbador, halando nos suavemente na djE i preparando nos, ku speransa i pas, pa e dia glorioso ei ora ku nos lo topa kunÉ na Su Segunda Binida. Mi ta kompartí e palabranan sagrado aki den e nòmber sagrado di nos Salbador Hesu-Kristu, amèn.