Hesu-Kristu i Bo Komienso Nobo

Hesus “a anda hasiendo bon.” Nos ta lesa e simpel relato ei den e buki di Echonan. Ki enorme eufemismo esei ta! Hesus seguramente a anda hasiendo bon! E ta e esensia—i fuente—di bondat! El a dediká henter Su bida mortal na hasi bon. E ta “mizerikordioso i yen di grasia, ku grandesa di ánimo, i abundante,” infinito den bondat i eterno den mizerikòrdia.

Kualkier intento pa deskribí òf resumí Su bondat i mizerikòrdia lo ta un eufemismo! Di bèrdat, manera e Apòstel Huan a purba di ekspresá, si nos purba di registrá kada instansia i manifestashon di e Salbador su bondat, “a ni mundu lo no tabata sufisiente pa e bukinan ku lo tin ku wòrdu skirbí.”

E poko ehèmpelnan spesífiko ku nos a inmortalisá den Skritura di Hesus “hasiendo bon” ta lanta rèspèt i asombro profundo, espesialmente ora ku realmente nos ta konsiderá kon e lo tabata pa ta ei nan, pa ta testigu di Su milagernan, pa risibí Su siñansanan, i pa eksperensiá Su sanashon. El a kombersá ku e marginalnan sosial, El a mishi ku esnan enfermo i no limpi. El a brinda konsuelo na esnan kansá, El a siña bèrdatnan ku ta libra i El a yama pekadónan na arepentimentu. Na kada leproso, hòmber siegu, un muhé ku ta kometé adulterio; na esun lam, e surdu, i e muda; na kada mama aflihí, tata desesperá, i viuda aflihí; na esun kondená, esun bergonsá, i esun ku ta sufri; na esnan morto den kurpa òf e mortonan den spiritu, loke El a hasi ta ofresé un komienso nobo. Sí, otro eufemismo asombroso!

Tur kos ku El a bisa i a proveé un komienso nobo pa tur esnan ku El a sana, bendishoná, siña, i liberá di piká. E no a apartá for di nan, i E di bèrdat E lo no apartá for di bo. Imaginá den e momentu aki skuchando kualkier un di e palabranan aki ku ta duna bida, for di djE.

“Mi yu, bo pikánan ta pordoná.”

“Dama, mi ta bisa na bo, lanta.”

“Sea limpi.”

“Ami tampoko no ta kondená bo: bai, i no peka mas.”

“Muhé, ta di bon konsuelo: bo fé a sana bo; bai ku pas.”

E Salbador Su palabranan na e individuonan aki tabata breve, pero ku nan El a skèts horizontenan enorme nobo di pordón, sanashon, restourashon, pas, i bida eterno. I e notisia glorioso ta, E ta ofresé e mesun komienso nobo na abo i na ami. Nos tur por tin un komienso nobo pa medio di, i dor di Hesu-Kristu. Asta abo. Komiensonan nobo ta na e kurason di e Tata su plan pa Su yunan. Esaki ta e Iglesia di komiensonan nobo! Esaki ta e Iglesia di kuminsamentunan nobo!

Ku boutismo pa medio di awa i e Spiritu, nos ta “nase atrobe” i por “kana den bida nobo.” Kuantu speransa e komienso nobo aki ta trese pa unu ku a sufri bou di karganan di piká òf a sufri di e efektonan di un bida turbulento i relashonnan disfunshonal? Hesus no tabatin mester di pordon di piká òf un komienso nobo den bida, tòg E mes a wòrdu batisá, mustrando nos den gran alivio e kaminda na e komienso nobo ku El a skarf pa kada un di nos.

I nos komienso nobo no ta djis sosodé un biaha. Nos tin e tendensia di pensa ku nos boutismo ta nos úniko oportunidat pa un komienso nobo. E no t’asina. Nos no tin solamente un chèns. E komiensonan nobo aki por sosodé tur dia! I sigur tur siman ora nos ta kome un pida pan chikí i bebe e kùp chikí di awa den memoria di e don di nos Salbador perfekto, ku a muri ku e propósito èksprès di duna nos mas tantu komiensonan nobo segun nos mester! Hesus ta duna nos hopi komiensonan nobo segun nos mester.

Ku dedikashon i alegria den un bida nobo den Kristu, nos por bira un “kriatura nobo,” kaminda kosnan bieu ta pasa i tur kos ta bira nobo. Ki alivio e tipo di manisé nobo aki ta trese na e alma ku a sigui purba, dor di sigui skohe fe den nos Redentor Su poder pa sana i restourá, apesar di e kontratempunan di biba den un mundu kaí? E Salbador no a entregá nunka riba Su kompromiso pa kumpli e boluntat di e Tata i kompletá Su mishon ekspiatorio dibino, asta dor di doló ku a kousa ku El a tembla, sangra for di kada porio, sufri den kurpa i spiritu, i hasi orashon pa e kòpi marga por wòrdu kitá. Un bes mas, E tabata demostrando na nos kiko ta nifiká perserveransia fiel ku Dios.

Ku kada kombenio ku nos hasi i kada esfuerso ku nos hasi pa warda esaki, nos por risibí un “kurason nobo” i un midí mas pleno di un “spiritu nobo.” Poko poko, mas i mas nos invitá Su bondat den nos kurason i deshasí di e stèmnan outo destruktivo den nos kabes, nos ta kombertí den Su pueblo pasobra di bèrdat nos ta hasié nos Dios. Hesus ta deseá fervientemente di ta nos Rei i nos Wardadó i nos Prínsipe di Pas, i nos por skohe pa E ta asina den nos propio kurason i mente.

Arepentimentu ta habri e porta na nos komienso nobo, kuminsamentu nobo, i segundo oportunidatnan. Nos kerido Presidente Russell M. Nelson su siñansanan a aklará malkomprondementunan tokante e don divino di arepentimentu, i ami ta pensa ku finalmente nos a kuminsá ta komprondé.

E ta emoshonante pa skucha nos hóbennan deskribí kiko arepentimentu ta nifiká pa nan. Resientemente mi a skucha un mucha muhé hóben bisa, ku un sonrisa riba su kara, “Ora mi pensa di arepentimentu, arepentimentu diario, mi ta sinti un goso i speransa inkreibel. Mi ta sinti e amor i felisidat di mi Tata Selestial i mi Salbador. Mi no tin miedu di bini na Tata Selestial den orashon i puntra pa Su yudansa ku kualkier kos ku mi ta luchando kuné. Mi sa ku nan no ta tratando pa gara mi hasiendo algu robes. Nan brasanan ta hanchu habrí. Esaki ta arepentimentu pa ami,” el a bisa. E mucha muhé hóben aki ta komprondé ku dor di Hesu-Kristu e por tin komiensonan nobo.

Bo mester di un komienso nobo? Bo por kuminsá di nobo, asta abo? Pensa riba e hendenan ku e Salbador a ministrá na dje—e hendenan ku El a siña, sana, kria, pordoná, i restorá. E tabata selektandonan for di un klase ekonómiko partikular òf orígen? E tabata distinguí entre e rekto i e pekadó? E tabata siñalá hende pasobra nan tabata meresé mas òf ta mas kerí? No.

Algun a akudí na djE, ku gran fe, keriendo den Su poder pa sana—manera e muhe ku e problema di fluho di sanger, e kapitan romano ku su siervo tabata muriendo, e leproso, Jairo i e siegu Bartimaeus. Nan tur a pone nan fe den wega, sperando ku e bondat i poder di e rabi di Názarèt lo kambia nan bida i nan perspektivanan. I El a hasié. El a laga su sanashon flui.

Pero Hesus a bendishoná tambe esnan ku tabatin fe vasilante, manera e tata di e mucha siegu ku a sklama, kisas manera abo a hasi, “Señor, mi ta kere; yuda mi inkredulidat.” I El a asta drama kompashon riba esnan ku no a busk’é mes, manera e muhé gará den adulterio, e viuda di Nain, e hòmber inkapasitá na e awanan di Betesda, i e hòmber nasé siegu. Bo a sinti ku el anda ta hasi bon den bo bida asta ora abo no a busk’é of siguié?

Na kada un di e figuranan di Skritura aki, i na tur ku a skucha i respondé, El a duna un komienso nobo, sea e tabata un bida nobo, pordoná di piká, òf un bida nobo saná di enfermedat, òf un bida nobo lantá for di morto.

Kiko esaki ta nifiká pa abo i pa ami? Su bondat i mizerikòrdia i bondat amoroso no konosé límitenan. Komiensonan nobo ta na e kurason di e Tata Su plan! Kuminsamentunan nobo ta e mishon di e Yu! Manesénan nobo, kapítulonan nobo, i oportunidatnan nobo ta e núkleo nan simpel di e bon notisia di e evangelio!

Pues, bo a pasa muchu tempu alehá for di bo kombenionan pa risibí un komienso nobo? No. Bo a hasi esaki òf esaya muchu biaha pa duna bo un otro chèns? No. Bo a alehá demasiado for di Kristu pa e tin ku yuda bo skirbi un historia nobo for di awor pa dilanti? No. E atversario ta e úniko ku ta benefisiá for di e idea ku bo ta hundí. Bo no ta.

I komiensonan nobo ta mas ku solamente nos pikánan i erornan. Pa medio di e bondat i grasia di e Salbador, nos por tin kuminsamentunan nobo ku ta duna impulso na kambio den nos mentalidatnan bieu, mal kustumbernan, aktitutnan negativo, sintimentunan di impotensia i tendensianan pa kulpa otronan i evitá responsabilidatnan personal. Di bèrdat bo por kambia kosnan tokante bo mes ku a bin ta wanta bo abou pa hopi aña. Bo por kuminsá atrobe pa medio di e poder di e Maestro di komiensonan nobo. Nunka e ta kansa di duna komiensonan nobo na nos.

Na esnan ku ta lucha ku e mesun piká òf e mesun kontratempu kada bes di nobo, sigui bai. E no a pone un blokada di kaminda bo dilanti. E no a pone límitenan na bo di dos oportunidat. Abo sigui pa dilanti. Abo sigui lucha. Bo ta buska yudansa di esnan rondó di bo. I bo ta konfia den e komienso nobo ku tin ei nan pa bo pa kada bes ku bo akudí na bo Tata den sinseridat di kurason. Ban laga pikánan deliberá atras, ripitishonnan kasual i e rebelion orguyoso tras di bo, kaminda nan ta pertenesé. Bo no mester ta e hende ku bo tabata promé. Brasa bo kuminsamentu nobo, bo segundo òf di tres òf kuater—òf shen—chèns, ofresé na bo pa medio di e sanger ekspiatorio di Hesu Kristu.

Mi ta mas agradesí di loke por wòrdu deskribí pa tur e komiensonan nobo ku a wòrdu duna na mi i pa esnan ku lo wòrdu ofresé na mi ainda.

Nos Salbador a pronunsiá un eufemismo final kual sin dje no tin motibu pa spera òf regosihá e dia aki. Despues di e agonianan di Getsemani i na e konklushon di e krus di tortura, El a bisa simplemente, “El a terminá.” Profesia di mesias a wòrdu kumplí, i e pago kompletu di e debe pa humanidat su pikánan i sufrimentu a wòrdu pagá. El a deklará “terminá” Su sakrifisio infinito i eterno. Sinembargo Su Ekspiashon lo no tabata kompletu te na momentu ku E mes eksperensiá bida nobo riba e di tres dia, e komienso nobo komo un ser glorifiká, resusitá pa medio di e poder di e Tata.

Pasobra semper El a hasi e kosnan ei kual ta komplasé Su Tata, i pasobra El “a sufri e boluntat di e Tata den tur kos,” abo i ami por tin komiensonan nobo. Por fabor risibí bo komienso nobo, asta awe, awor aki. Hesu-Kristu ta Outor i Esun ku ta finalisá nos fe, skirbiendo kapítulonan nobo huntu ku nos ku ta inkontabel. E ta e Prinsipio i e fin—e fin di nos bèrgwensa i sufrimentu, i e komienso di un bida nobo den djE, permitiendo nos risibí su grasia, laga atras e pasado i kuminsá atrobe ku un manesé nobo kuantu bes ku nos mester. Di bèrdat Su “bondat i mizerikòrdia lo sigui [nos] tur e dianan di [nos bida].” Den e nòmber di Hesu-Kristu, amèn.