Señor ta wak e kurason.
Tur lokual Dios mester pa kumpli ku Su propósitonan i yuda nos bira e persona ku E ke pa nos bira ta pa kada un di nos bira nos kurason kompletu na dj’E.
Ora a mandá pa skohe e rei nobo di Israel for di entre e yunan di Isaí, profeta Samuel, ora el a wak Isaí su yu mayó, Eliab, el a sklama ku entusiasmo, “Siguramente e ungí di Señor ta su dilanti.” Pero Eliab no tabata Señor su siervo skohí. E Salbador a atvertí Samuel: “No wak aparensia, ni haltura òf estatura; pasobra Mi a rechas’é: pasobra Señor no ta mira manera hende ta mira; pasobra hende ta wak e aparensia, ma Señor ta wak e kurason.”
Miéntras David kisas no tabata fisikamente esun mas fuerte òf mas sabí den su rumannan hòmber, su kurason tabata fuerte den bista di Dios. E tabata stima Dios ku henter su kurason i tabatin un deseo profundo pa obedesé Dios. E tabatin fe firme den Dios Su amor, poder i bendishonnan primintí, manera ela demonstrá mas despues ora ku sin miedu el a bringa ku Goliath i a triumfá ku yudansa di Señor.
E historia aki ta siña nos ku tur lokual Dios mester pa kumpli ku Su propósito nan i yuda nos bira e persona ku E ke pa nos bira ta pa kada un di nos bira nos kurason kompletu na dj’E. Na un abogado, “El a bisa, lo bo stima Señor bo Dios ku henter bo kurason.” Na e Profeta José Smith, El a bisa, “Mira, Señor ta rekerí bo kurason i un mente dispuesto.” I na e Nefitanan, e Salbador resusitá ta ekstendé e invitashon aki: “Boso lo sakrifiká na mi un kurason kibrá i un spiritu kontrito.”
Di kon esei ta asina? E Salbador a siña nos ku si nos kurason ta kompletamente dediká na dj’E dor di su sakrifisio ekspiatorio, nos por ta bendishoná ku e forsa i talentonan spiritual ku nos tin mester pa por triumfá riba desafíonan mortal, resistí tentashon, risibí guia i komprondementu i sinti goso i pas den nos bida. “For di kosnan chikitu ta sali loke ta grandi.” El a bisa ku E por “hasi kosnan debil bira fuerte” i bendishoná nos ku tur lokual ku nos tin mester pa por ta eksitoso den e bida mortal i pa por risibí bida eterno. El a bisa, “Bendishoná ta esnan puru di kurason: pasobra nan lo mira Dios.”
Mi ta kere ku esaki ta e motibu pakiko, por lo ménos en parti, Hesukristu asina hopi bia a korigí e eskribanan i fariseonan durante Su ministerio mortal. Maske ku nan tabata diligente den mantené Su lei, nan tabata hasi esei pa e motibunan robes. El a skual nan, bisando, “e hende nan aki ta aserka mi ku nan boka i honra mi ku nan lepnan, pero nan kurason ta leu for di mi.”
Esaki ta un rekordatorio na tur Su disipelnan ku no ta solamente lokual nos ta hasi—nos palabranan i akshonnan—pero tambe e motibu pakiko nos ta hasi lokual Hesu-Kristu ta pidi nos hasi—nos deseonan i motibunan. El a bisa, “Pasobra Ami Señor, lo husga tur hende konforme nan akshonnan, konforme e deseo di nan kurason.” Nos Tata Selestial ta deseá mas ku aktonan outomatiko di obedensia i servisio di Su yunan. E ke pa nos hasi e kosnan ei ku intenshon real, pasobra nos ta stim’É ku henter nos kurason. E ke pa nos tin e deseo pa bira manera E.
Awor, si e estado di salú spiritual di nos kurason ta e promé preokupashon di e Salbador—lokual E ta buska den un disipel berdadero—kon nos lo por eksaminá nos kurason i sa si e ta bon den bista di Dios?
Resientemente, ora ku ami i mi kasá a regresá for di nos mishon na Portugal, nos a hasi un kantidat di tèst di salú pa evaluá nos kondishon físiko. Algun di e tèstnan ei tabata enfoká riba salú di nos kurason—manera tèstnan di sanger, ekokardiogram i tèstnan di strès. Mi ta kere ku e Salbador tambe a duna nos un sèt di tèstnan spiritual ku nos por usa pa determiná kondishon spiritual di nos kurason. Permití mi kompartí algun ku boso.
Evaluando Boso Kurason ku Pruebanan Spiritual
Promé, Nos Enfoke, Prioridatnan, i Motibunan.
“Pasobra kaminda bo tesoro ta, einan bo kurason tambe lo ta,” Hesus a siña nos. Un tesoro ta algu presioso pa nos, algu na kual nos ta dediká esfuerso i atenshon. Na unda nos ta skohe pa pasa nos tempu i enfoká nos atenshon, meskos tambe lokual ta motivá nos pa hasi lokual nos ta hasi, ta bisa hopi di nos kurason. E Salbador a amonestá nos ku miéntras hopi ta yamá dor di dj’E, poko ta skohí “ pasombra nan kurason ta muchu pegá na e kosnan di e mundu aki, i nan ta aspirá na e honor di hende” Mi ta hasi e Salbador un prioridat den mi bida? Mi wowo ta solamente fihá riba Su gloria den tur lokual mi ta hasi?
Di Dos, Nos Disponibilidat pa Obedesé Dios Su Mandamentunan.
Den henter e Skritura, Señor i Su profetanan a asosiá orguyo i desobedensia ku tin un kurason duru. Nefi a eksortá su rumannan homber, bisando:“Kon por ta ku boso no ta warda e mandamentunan di Señor? Kon por ta ku boso lo muri, pa kousa di e boso kurason duru? ” Na e Santunan di Missouri, Señor a amonestá, “Pero esun ku no ta hasi nada, sino te ora e wòrdu mandá, i ta risibí un mandamentu ku duda den su kurason, i ta kumpli’é ku flohera, e lo ta maldishoná.” Miéntras e Salbador no ta spera perfekshon den obedesé Su mandamentunan, E ta pidi nos pa tin e deseo i ta aspirá pa kumpli nan ku henter nos kurason.
Di Tres, Nos Diligensia den Skrudiñá e Skrituranan i Buska Revelashon
Señor a amonestá Oliverio Cowdery pa “atesorá e palabranan den su kurason.” Nos ta wòrdu invitá pa buska e Skrituranan diligentemente i, pa medio di e poder di Spiritu Santu, buska pa optené komprondementu i un testimonio di e bèrdat di e evangelio den nos kurason.
E profeta Abinadi a reprendé e saserdotenan di e malbado Rei Noe pa no hasi esei, bisando: “Boso no a apliká boso kurason na komprondementu; p’esei, boso no tabata sabí.” Ami ta hasiendo un esfuerso serio pa skrudiñá e Skrituranan tur dia i apliká komprondementu den mi kurason dor di orashon?
Di Kuater, Nos Pensamentunan i Palabranan.
E Salbador a siña ku “for di e kurason ta sali pensamentunan maligno¨ i ku “for di e abundansha di e kurason e boka ta papia.” E kalidat di nos pensamentu i palabranan ta un bon indikadó di e puresa di nos kurason. Mi ta fomentando muchu pensamentu negativo tokante e akshonnan òf motibunan di otro hende, òf asta tokante mi mes? Mi ta muchu lihé pa husga i kondená otronan? Mi ta buska pa haña eksküsnan òf hustifikashon pa mi erornan? Anto kiko ta di mi palabranan? Nan ta elevá i inspirá esnan rondó di mi? Of nan ta krea konflikto i renkor?
Despues ku mi tèstnan físiko a keda kompletá, mi dòkter a bisa mi ku, en general, mi kurason tabata salú—pero tabatin algun preokupashon ku mester a wòrdu atendé awor, promé ku nan bira serio. E ora ei ela preskribí algun kambio den mi estilo di bida. Di mes manera, segun ku bo ta hasi e evaluashon spiritual aki di bo kurason i nota ku algun síntoma negativo ta kuminsá drenta, por fabor no kai den pániko! E Salbador ta proveé remedi i tratamentu ekselente pa yuda bo. El a hasta primintí pa duna nos un kurason nobo Ata aki algun akshon ku por mehorá e forsa spiritual di boso kurason.
Mehorando Salú Spiritual di Boso Kurason
Na promé lugá, Fortifiká Boso Relashon ku Kristu
Segun ku nos ta dediká tempu diariamente pa yega mas serka di Kristu, nos kurason ta kambia. Estudio diario di e Skrituranan, kompañá pa orashon sinsero i ayuno regular, lo oumentá bo amor pa e Salbador i fortalesé bo fe i deseo pa arepentí i entregá bo kurason humildemente na Dios. Konsiderá e ehèmpel di Nefi: “Mi a sklama na Señor; i mira El a bishitá mi, i a moldia mi kurason ku mi a kere tur e palabranan kual a wòrdu papiá dor di mi tata.”
Segun ku nos ta sigui nutri e simia di fe dor di nos deseonan i akshonnan hustu, nos lo eksperensiá e mesun santifikashon di nos kurason manera e nefitanan: “Nan tabata yuna i hasi orashon hopi biaha, i a bira mas i mas fuerte den nan humildat, i mas firme den e fe di Kristu, pa yena nan almanan ku goso i konsuelo, si, pa asta e purifikashon i e santifikashon di nan kurason, kual santifikashon ta bini pa motibu ku nan a entregá nan kurason na Dios.”
Di Dos, Afiliá Boso Deseo na Esun di dj’É
E Salbador a siña, “Si bo ta stima Mi, kumpli ku mi mandamentunan.” E ta invitá nos pa demostrá nos amor dor di sera kombenionan ku n’É. Segun ku nos ta purba tur dia pa kumpli ku Su mandamentunan, i sinseramente arepentí di nos pikánan, i perseverá den tuma Su nòmber riba nos i aliniá nos deseo ku esun di dj’É, nos por ta bendishoná ku e kompaño kontinuo di e Spiritu Santu.
Nefi a testifiká: “Mi sa ku si boso sigui e Yu, ku pleno propósito di kurason, aktuando sin hipokresia i sin engaño dilanti di Dios, pero ku intenshon real, arepintiendo di boso pikánan, dunando testimonio na e Tata ku boso ta dispuesto pa tuma riba boso e nòmber di Kristu, pa medio di boutismo … , e ora ei boso lo risibí e Spiritu Santu.” E Spiritu Santu lo guia boso i yuda boso konosé e deseo di Señor i hasi bon eskohonan.
Na último lugá, Sirbi Dios i Otronan ku Henter Boso Kurason
E Salbador ta invitá nos tur pa §sirbi’É ku henter nos kurason.” Ora nos skohe pa hasi kada un di e kosnan ku Señor a pidi nos pa hasi—manera kumplí ku e mandamentunan, tuma parti na e sakramentu, adorashon den tèmpel, i sirbi otronan—ku un kurason sinsero i intenshon real, kada akto di servisio i alabansa ta bira un eksperensia spiritual hopi poderoso ku ta fortifiká nos fe i testimonio i ta yena nos kurason ku goso i amor pa Dios i nos próhimo.
E profeta Alma su pregunta ta resoná ketu bai awendia: “Boso a nase spiritualmente di Dios? Boso a risibí su imagen den boso kara? Boso a eksperiensiá e kambio poderoso aki den boso kurason?”
Rumannan, mi ta invitá boso pa duna henter boso kurason na e Salbador awe. Laga kada akto di alabansa i servisio ta sinsero i intenshonal. Pone un banda e distraishonnan di e mundu i lucha pa optené un tempu signifikativo pa Señor kada dia di nos bida. Arepentí i bolbe bèk serka dj’É ku henter boso kurason, i E lo pordoná boso i tuma boso den Su brasanan di amor No buska e kosnan di e mundu aki, pero skohe pa tin boso wowo fihá na Su gloria i buska e kosnan di unu mihó. E konosé boso pensamentunan i e deseonan di boso kurason, i ora boso bini serka dj’É, E lo bendishoná boso ku forsa, konfiansa, pas i goso den e bida aki i un lugá den Su reino selestial pa tur eternidat.
Mi sá ku Hesu-Kristu ta bibu. E ta nos Redentor. I E ta stima boso i ami ku henter Su kurason. Den e nòmber di Hesu Kristu, amèn.