Introdukshon

Mi kerido rumannan, nos ta reuní miéntras nos ta lamentá e fayesementu di nos kerido Presidente Russell M. Nelson. Mi ta papia na boso komo e Presidente di e Quorum di e Diesdos, den kual posishon mi a wòrdu sostené kaba den kada konferensia di nos konferensianan di bario, estaka, i general—durante e shete aña i mei ku a pasa.

Nos ta sigui dilanti ku e konferensia general semi anual, prosediendo komo planiá i ku diskursantenan i músika asigná pa Presidente Nelson despues di lunanan di preparashon. E úniko adishonnan ta esaki, mi splikashon di introdukshon, i mi diskurso na lugá di Presidente Nelson den e seshon di klousura riba djadumingu atardi.

Esaki ta e promé bia den kasi 75 aña ku un Presidente di Iglesia a fayesé algun dia promé ku konferensia general. Esei a pone ku nos a plania kon nos lo tene reunionnan di liderazgo vital en konekshon ku konferensia general i tambe seshonnan di konferensia general, na mes momento programá su entiero mas pronto posibel. Presidente Nelson a komprondé e balor di konferensia general pa proveé direkshon na e Santunan den e lunanan ku ta bini. Nos ta honr’é dor di sigui ku e programa di konferensia planiá ku el a aprobá.

Den e tempu aki di tristesa, nos ya kaba a tene un reunion pa duna homenahe na Presidente Russell M. Nelson promé ku nos reunionnan di konferensia general i despues a programá su entiero mas lihé posibel despues di konferensia. Tur esaki a wòrdu hasí ku aprobashon di e famia di Presidente Nelson i e Quorum di Diesdos.

Ya komo nos tur ku a wòrdu asigná pa diskursá den konferensia general lo kier dediká nos tempu asigná pa duna homenahe personal na Presidente Nelson, p’esei nos a pidi na tur nos diskurantenan di konferensia tene tal homenahenan aki na un mínimo, posponiendo homenahenan elaborá pa e entiero, kual nos a kuminsá plania kaba.

Mi propio homenahe kòrtiku—adekuá pa e konferensia aki i na e homenahenan ku nos a duna kaba—ta esaki: mi a stima Russell M. Nelson i a siña muchu mas tokante e evangelio i liderazgo den evangelio for di mi amistat i asosiashon di hopi tempu kuné ku di kualke otro lider ku mi a yega di konosé personalmente. E ta nos modelo komo un siervo i siguidó di Señor Hesu-Kristu. Di e kosnan aki Mi ta tèstifiká, den e nòmber di Hesu-Kristu., amèn.