Kòrdando e Karné

Kristu ta e Bon Wardadó. Kada unu di e tou ta presioso p’É. E ta modelá pastoreo manera un patronchi i a siña nos den palabra i akshon e kualidatnan di un bon wardadó di karné, inkluso konosementu di bo karnénan na nòmber, stima nan, buska i haña esnan ku ta pèrdí, duna nan kuminda, i finalmente, guia nan pa yega kas bèk. E ta spera ku nos lo hasi mesun kos manera Su ko- wardadónan di karné.

Nos por siña hopi tokante servisio na e manera di Señor for di e profeta di antaño—un wardadó di karné eksepshonal—Moroni. El a biba den tempunan hopi difísil, sin e benefisionan di telefòn selular, kòmpiuter i internet. Pero e tabata logra mantené pista di su karnénan. Kon esei tabata sosodé? Nos ta haña un ñapa di su metodologia den Moroni 6 Einan nos por lesa ku miembronan “tabata wòrdu registrá entre e hendenan di e iglesia di Kristu; i nan nòmbernan tabata wòrdu saká i kòrdá i nutrí pa e bon palabra di Dios, pa asina mantenenan den e kaminda korekto. … E Iglesia tabata bini huntu frekuentemente, pa yuna i hasi orashon, i pa papia unu ku otro tokante e bienestar di nan almanan”(Moroni 6:4–5; enfasis agregá).

Pa Moroni, tur kos tabata tokante di pueblo—nòmbernan! E tabata praktiká e prinsipio di “konta i ta konsiente” di manera ku tur lo wòrdu rekòrdá. Kualke di nan ku tabata lucha of dualu tabata wòrdu notá, permitiendo e Santunan pa diskutí nan bienestar den konsehonan. Meskos ku e wardadó ku a laga e nobentinuebe (safe i sigurá, mi ta sigur) i a bai buska esun ku tabata pèrdí (wak Lukas 15:4–7), a wòrdu pidí na nos pa pone tinu na nos tounan di karné—pa nota i kòrda pa bai i hasi mesun kos.

Komo un lider di mishon na India, mi ta kòrda ku mi a puntra e presidente di rama tokante algun di su metanan pa e aña benidero: “Kuantu hòmber lo bo prepará pa risibí e saserdosio di Melkisedèk?” Mesora su kontesta tabata “Shete!”

Mi a keda asombrá ta for di kua atmósfera el a saka e number spesifiko ei! Promé ku ami por a kontesta, el a saka un pida papel ku e numbernan di unu te ku shete skirbí na e parti abou. E promé sinku liñanan tabatin nòmber riba nan—hende real ku e i su quorum di èldernan lo bai invitá i kurashá pa tin e bendishon di e saserdosio den nan bida. Naturalmente, mi mester a puntr’é tokante e liñanan seis i shete ku tabata bashí. “O, Presidente,” el a bisa, sakudiendo su kabes simpatikamente, “ku siguransa nos lo batisá por lo ménos dos hòmber den kuminsamentu di aña ku por tin e saserdosio na fin di aña.” E lider ekselente aki a komprondé e prinsipio di “konta i ta konsiente.”

Kristu a organisá Su Iglesia di un manera ku lo ta difísil pa lubidá un alma, pasobra tur ta kerí p’É. Kada individuo den un bario, no opstante edat òf género, tin un multitut di mayordomonan—wardadónan—ku ta enkargá pa pone tinu na nan i keda kòrda nan. Na un hòmber hóben, por ehèmpel, a wòrdu asigná pa su bienestar un obispado, rumannan ministrante, konseheronan hóben adulto, maestronan di seminario, presidensianan di quorum, i algun mas—tur sirbiendo komo nètnan di siguridat, mará firme bou di e hubentut pa fangu e hòmber hóben si e kai. Asta si djis un nèt so ta korektamente posishoná, e hóben ei lo ta safe, notá i rekordá. I tòg, hopi bia nos no ta haña niun nèt na su lugá. Hende ta dualu ku regularidat den neblina—i ningun hende ta nota. Kon nos por ta mihó wardadónan di karné? Nos por siña konta i ta konsiente.

Iglesia ta suministrá nos ku reportenan i hèrmèntnan pa hasi netamente esei—pa rekòrda. E relato trimestral ta un ehèmpel primordial. E ta permití nos pa konta i pa sea konsiente di kada miembro diferente biaha i tuma nota di esnan ku ta hasi falta òf ku tin mester di nos yudansa i nos amor. E lista di akshon i entrevista ta identifiká esnan ku ta rekerí nos atenshon mesora, meskos ku e relato di e Rekomendashon pa Tèmpel i otro relatonan. E hèrmènt nan aki di konta i ta konsiente ta enfoká nos riba hende. Ken tin mester di un yamamentu, un avanse den saserdosio òf yudansa pa hiba nòmber di un famia na tèmpel? Ken nos por ofresé yudansa pa prepará su mes pa un mishon di tempu kompletu? Ken su falta nos a sinti e luna aki? E hèrmèntnan aki ta yuda nos pa rekòrda hende.

Mi tabata konosé un famia di Merka ku a tuma un asignashon na Afrika. Riba e promé djadumingu ku nan a kana drenta e úniko unidat di Iglesia den e país, nan a wòrdu saludá ku hopi entusiasmo. Na final di e mainta ei, e hòmber su kasá a keda yamá komo presidente di Sosiedat di Sokoro i e komo lider di Hòmbernan Hóben! El a puntra e presidente di rama ku tabata mustra agotá kuantu hòmber hóben tin. E lider fiel, di promé generashon a mustra patras den e kapèl i a bisa, “E dosnan ei.” E hòmber tabatin un poko duda, pues el a bai kas ku un lista di rama, i mesora el a nota ku aktualmente tabatin 20 hòmber hóben riba e lista. El a bai bèk serka e presidente di rama i a puntr’é pa dos hóben adulto dinámiko i bilingwe pa sirbi komo su konseheronan, despues a sinta ku nan i e dos muchanan hòmber pa repasá e nòmbernan.

Despues e hendenan hóben i diligente aki a kuminsá traha. Den e siguiente lunanan ku a sigui, nan a logra haña tur e hòmbernan hoben ku tabata riba e lista. Nòmber pa nòmber, tur e karnénan pèrdí ei a wòrdu yamá bonbiní bèk pa nan amigunan i a wòrdu alimentá spiritualmente i físikamente! Den un aña di tempu, riba kualke djadumingu, tabatin un averahe di 21 hòmber hóben presente. Danki na hòmbernan hóben ku a konta i registrá.

Un bon amigu di mi, komo un studiante hóben graduá, a muda ku su famia pa un siudat Merikano grandi pa sigui ku su edukashon. El a wòrdu yamá mesora pa presidí riba e quorum di eldernan. Un poko nervioso tokante su promé entrevista ku e presidente di estaka, e tabata determiná pa bai prepará. El a bisa e presidente di estaka ku e tin tres meta pa e aña benidero: (1) Un presensia di 90 porshento, (2) un lès di evangelio supstansial semanalmente, i (3) i kada luna un aktividat di quorum bon planiá.

Sonriendo na mi amigu, e sabio presidente aki a puntré, “Bo por menshoná un miembro di quorum ménos aktivo kual bo por yuda yega tèmpel ku su famia e aña aki?” Esei a kue mi amigu di sorpresa. El a pensa ku koutela i el a bini ku un nòmber. “Skirbi esei” e presidente di estaka bisa. Despues e lider eksperensiá aki a hasi e mesun pregunta tres biaha mas—i asina e entrevista a terminá. E hóben aki a kana sali for di entrevista ei despues di a siña un dje lèsnan di mas grandi di liderazgo i servisio. El a drenta e entrevista ku programanan, lèsnan i aktividatnan. El a sali afó ku nòmbernan! E kuater nòmbernan ei despues a bira un enfoke mas grandi di su ministerio i esun di su quorum.

Komo un lider di mishon, mi a bishitá un di mi ramanan riba un djadumingu mainta. Mi a nota ku e presidente di rama kada bes tabata saka un karchi di papel for di su saku i skirbi algu ariba. Mi a disidí di puntr’é tokante esei despues di e último orashon. Unabes ku e reunion a terminá, i promé ku ami por a puntra tokante e karchi, e lider mishonal di rama a kore subi podio, kaminda e papel a keda entregá na dje. Mesora ami a sigui e lider entusiasmá aki pa su reunion semanal di koordinashon mishonal di rama. Promé ku nan a kuminsá, el a saka e papel for di su saku. E tabata yená ku nòmbernan di miembronan ku a hasi falta den reunion sakramental. Den un par di minüt, kada miembro di konseho a selektá un òf dos nòmber, komprometiendo di bishitá nan e mesun dia ei pa sigurá ku nan tabata bon i laga nan sa ku nan a hasi falta. Awèl esei ta konta i ta konsiente.

Mi ta kòrda un distrito, algun ora ku avion for di e tèmpel mas serkano, kaminda mantenementu di un rekomendashon di tèmpel tabata un prioridat haltu, maske ku probablemente nunka lo e wòrdu usá. E promé djadumingu di kada luna, lidernan tabata usa nan hèrmèntnan di kontamentu pa duna kuenta di nan miembronan investí. Si nan haña ku un rekomendashon ta serka di kaduká, e sekretario ehekutivo lo traha un sita pa un entrevista di renobashon. Hende ku rekomendashonnan kaduká a wòrdu konsehá, despues a buska pa yuda nan regresá na e kaminda di kombenio. Mi a puntra kuantu di nan miembronan ku investidura tabatin un rekomendashon aktual. E kontesta tabata un asombroso 98.6 porshento. Ora mi a puntra tokante e seis di kual nan rekomendashon a kaduka, e lidernan tabata por a identifiká nan na nòmber i deskribí n’ami kuantu esfuerso ta wòrdu hasí pa haña nan bèk!

Algun aña pasá, mi famia a muda bèk pa Merka. Tabata hopi eksitante pa nos, pa asistí na Iglesia akinan atrobe despues di 26 aña asombroso den unidatnan chikitu i mas aislá. Mi a wòrdu yamá komo mishonero di bario. Nos tabatin un gran lider mishonal di bario i nos tabata hasi kosnan inkreibel i duna lès na hendenan maravioso. Mi a wòrdu pidí pa asistí na un reunion di konseho di bario pa opservá i pa haña yudansa ku e amigunan ku nos tabata traha kuné. Mi a keda sorprendí ora ku tur lokual a keda diskutí tabata un aktividat benidero di bario. Mi a aserká e lider di mishon di bario despues i a opiná ku e no a haña e chèns di regresá i raportá tokante nos hendenan. Su kontesta? “O, ami nunka ta logra raportá.”

Mi kompará esei ku un reunion di konseho di rama na Lahore, Pakistan, na kuá mi a asistí djis simannan promé. E grupo chikitu aki tabata sintá huntu rondó di un mesa chikitu, i tur loke nan tabata papia di dje tabata hende. Nòmbernan. Kada lider tabata raportá tokante nan mayordomia i e personanan i famianan ku tabata konserní nan. Tur a haña e chens pa añadí nan pensamentunan na e mihó maneranan ku por bendishoná esnan den e diskushon. Plannan a wòrdu trahá i asignashonnan duná. Esta un lès espléndido di konta i ta konsiente pa nòmber for di nos rumannan di promé generashon.

Den e Iglesia di Hesu-Kristu, nos a wòrdu instruí pa profetanan di pasado i profetanan di presente—i pa e patronchi instruí pa nos Salbador—kon pa ministrá. Nos ta tuma nòmbernan, nos ta rekòrda, i nos ta bai den konseho tokante bienestar di almanan. Lidernan ku hasi esaki nunka lo tin falta di punto di agenda den nan reunionnan di konseho! E prinsipio di kontadó i ta konsiente ta traha. E ta e manera di Sèñor. Nos por hasi mihó. Na Dios, ku a krea e universo i ta manda riba tur, e obra aki—Su obra i gloria—ta hopi personal. I asina mester ta pa kada un di nos, manera instrumentonan den Su mannan den Su obra asombroso di salbashon i eksaltashon. Milagernan den bida di hende real lo ta e resultado. Den e nòmber di Hesu-Kristu, amèn.