E Buki di Mormon—Un Tesoro Inmenso den Nos Trayekto

Dor di Elder Ozani Farias

Di e Setenta

Ora nos ta deleitá nos mes den e palabranan di Kristu ku tin den e Buki di Mormon, e Spiritu lo yuda nos komprondé bèrdatnan eterno.

Abo por kòrda un momentu den kua un persona a duna bo un regalo ku a kambia bo bida? E òktober aki ta marka 40 aña ku mi a risibí un di e regalonan di mas grandi den mi bida. Tempu ku mi tabata na skol sekundario, mi a nota ku un studiante den nos klas tabatin un lus ku tabata diferente for di mayoria di e otro hóbennan. Mi tabata gusta di ta rondó di dje. Un dia el a bisa ami ku e ta miembro di E Iglesia di Hesu-Kristu di e Santunan di e Delaster Dianan. Despues el a ofresé mi un regalo: un kopia di e Buki di Mormon. El a invita mi pa lesa algun página i pa reuní ku dos amigu ku por kontestá mi preguntanan. E amigunan ei tabata e mishoneronan.

Ora mi a reuní ku e mishoneronan, nan a siña mi e doktrina di Kristu i a invitá mi pa sigui e invitashon di e profeta Moroni: “I ora boso risibí e kosnan aki, mi lo eksortá boso pa boso puntra Dios, e Tata Eterno, den e nòmber di Kristu, si e kosnan aki no ta bèrdat; i si boso pidi ku un kurason sinsero, ku berdadero intenshon, ku fe den Kristu, e lo manifestá e bèrdat di dj’e na boso, pa e poder di Spiritu Santu.” (Moroni 10:4).

Mi a lesa diferente página di e Buki di Mormon i a hasi orashon. Maske ainda mi no tabatin komprondementu profundu di tur kos ku e mishoneronan tabata siña mi, mi tabata sinti den mi kurason ku lokual mi tabata lesa tabata bon i tabata bini di Dios. Mi a risibí e konfirmashon di Moroni su promesa: “Dor di e poder di e Spiritu Santu boso por sa e bèrdat di tur kos.”(Moroni 10:5).

Despues ku mi a wòrdu batisá den E Iglesia di Hesu-Kristu di e Santunan di e Delaster Dianan, algun amigu a trata di konvensé mi ku mi a tuma e desishon robes. Pero kada bes ku mi tabata wòrdu konfrontá ku tipo di dudanan asina òf oposishon, mi tabata risibí komfirmashon nobo pa medio di skrudiñá e Skrituranan i hasi orashon pa keda fiel na e kombenionan ku mi a sera ku Dios. For di e momento ei, e Buki di Mormon a bira mi kompañero i a kombertí den un tesoro inmenso den mi hornada mortal.

E Buki di Mormon ta mas ku djis un buki. E ta un otro tèstamènt di Hesu-Kristu, skirbí pa profetanan di antaño pa medio di e spiritu di profesia i revelashon.

E evento mas signifikante registrá den e Buki di Mormon ta e ministerio personal di Señor Hesu-Kristu entre e nefitanan poko despues di Su resurekshon. E Buki di Mormon “ta splika e doktrinanan di evangelio, resumí e plan di salbashon, i ta bisa hende lokual nan tin ku hasi pa haña pas den e bida aki i salbashon eterno den e bida ku ta bini” (introdukshon di e Buki di Mormon).

E promé edishon di e Buki di Mormon: Un otro Tèstamènt di Hesu-Kristu a wòrdu publiká den un siudat chikitu den e estado di New York na mart 1830. E profeta José Smith tabatin solamente 23 aña di edat ora ku el a kompletá e tradukshon di e buki den 1829. El a tradusí kasi henter e buki den menos ku 75 dia, anto e proseso di imprenta a tuma shete luna.

Awendia, aproksimadamente 80.000 mishonero di tempu kompletu ta sirbiendo den mas ku 150 pais komo boluntario, dedikando nan bida dunando testimonio ku e Buki di Mormon ta bèrdat i ku e ta testifiká di Hesu-Kristu.

Durante e seminario mas resien pa lidernan nobo di mishon den yüni di e aña aki, Presidente Russell M. Nelson, a kompartí su testimonio fuerte di e Buki di Mormon: “E Buki di Mormon ta … e palabra di Dios. E ta siña e doktrina di Kristu i ta splika mas tokante di e Salbador Su Ekspiasion ku kualke otro buki.”

Mi ke ofresé tres sugerensia ku por yuda profundisá nos kombershon na Hesu-Kristu pa medio di e Buki di Mormon:

1. Sea Diligente i Konsistente den Boso Estudio Diario.

Meskos ku Alma i e yunan hòmber di Mosia, nos mester“[skrudiñá] e Skrituranan diligentemente, pa [nos] por konosé e palabra di Dios” i wòrdu fortalesé den e bèrdat (Alma 17:2).

Durante ku nos tabata sirbiendo komo lidernan mishonal den e Mishon di Georgia Atlanta, nos a enkurashá kada mishonero pa studia e Buki di Mormon minimalmente 30 minüt tur dia. E kompromiso ei a engrandesé nos fe i a yuda nos buska i spera milagernan.

Por ta posibel ku despues di mishon kisas nos no tin e mes tantu tempu disponibel pa studia Skritura tur dia, pero mi ta primintí boso ku si boso sinseramente duna prioridat pa studia e Buki di Mormon den orashon kada dia, boso lo haña forsa spiritual mas grandi i konfiansa den Señor i Su promesanan.

2. Hasi Boso Estudio Mas Signifikativo dor di Deleitá riba e Palabranan di Kristu.

Nefi a siña: pa “Deleitá boso riba e palabranan di Kristu; pasobra tende, e palabranan di Kristu lo bisa boso tur kos ku boso mester hasi.”(2 Nefi 32:3).

Deleita ta nifiká mas ku djis lesa—e ta nifiká saboriá, meditá i aplik’é. Segun ku boso ta studia e Buki di Mormon, konsiderá maneranan pa hasi boso estudio di Skritura mas signifikativo. Por ehèmpel:

Hasi uso di e yudansanan ku tin disponibel den e app di Gospel Library.
Rekonosé bèrdatnan eterno ku ta yuda nos komprondé Dios Su Plan i guia nos pa hasi i mantené kombenionan ku nos Tata Selestial.
Suprayá frasenan signifikativo i registrá boso impreshonnan pa preservá lokual boso a siña durante boso estudio.

E Buki di Mormon tin e poder pa kontestá preguntanan di nos alma. Manera e profeta Nefi a bisa, nos mester “apliká tur Skritura riba nos mes pa nos probecho i instrukshon” (1 Nefi 19:23).

Ora ku nos ta deleitá den e palabranan di Kristu, nan lo habri e porta di revelashon i mustra nos kiko nos mester hasi den vários sirkunstansianan di nos bida pa yega mas serka di djE.

3. Kompartí Boso Testimonio di e Bèrdat di e Buki di Mormon.

Meskos ku Lehi tabata deseá pa kompartí e fruta de e palu di bida ku su famia (wak 1 Nefi 8:12), ora nos risibí un testimonio di e Buki di Mormon, nos ta desaroyá un deseo pa komparti e goso ku ta bini for di e konosementu di e evangelio di Hesu-Kristu.

Un di nos mishoneranan, Hermana Benson, kende ta asistiendo ku nos den e seshon aki, a kompartí ku mi su deseo pa yuda su ruman homber chikitu. Na e momentu ei, e tabata preparando pa sigui ku su estudio na skol sekundario i no tabata sigur tokante sirbi di un mishon. Mi a sinti un impreshon pa invitá Hermana Benson pa lesa e Buki di Mormon durante di e promé kuater lunanan di su mishon, markando su versíkulonan faborito, i depues manda e kopia ei pa su ruman hòmber.

Hermana Benson a manda un kopia marká di e Buki di Mormon pa su ruman hòmber i a invit’é pa lesa tur anochi for di dje. Mas despues el a kompartí ku mi: “Promé ku mi mishon, mi ruman hòmber no tabatin sigur ku e ke sirbi un mishon di tempu kompletu. Poko Poko, segun tempu, el a lesa e Buki di Mormon, el a bin haña goso grandi den su bida i a kuminsá konsiderá pa sirbi un mishon.”

Dos siman promé ku Hermana Benson a kompletá su mishon, su ruman hòmber a risibí e yamada pa su mishon. Awor e ta sirbiendo den e Mishon di Tuxtla Gutierrez México. Dor di e Buki di Mormon, Elder Benson por a mira su bida spiritual ku mas klaridat, kual a gui’é pa sirbi Señor i konfia ku kosnan lo sali bon. E desishon ei tabata un milager—influensiá pa e poder di e palabranan di Kristu

Mi rumannan stimá, mi ta enkurashá kada un di boso pa profundisá boso estudio di e Buki di Mormon. Mi sa ku ora ku nos deleitá nos mes riba e palabranan di Kristu ku tin den e Buki di Mormon, e Spiritu lo yuda nos komprondé bèrdatnan eterno i kompartí nos testimonionan ku konvikshon na esnan ku Señor a prepará pa skucha Su mensahe. Señor a bisa,“Mi skohínan ta skucha mi bos i no ta enduresé nan kurason” (Doktrina i Kombenionan 29:7). Mi ta testifiká ku esnan ku puntra Dios den fe lo risibí un testimonio di e bèrdat i divinidat di e Buki di Mormon pa poder di e Spiritu Santu. Di esaki mi ta testifiká den e nòmber di Hesu-Kristu, amèn.