Almanan Humilde ta Hinka Rudia na Altarnan

Komo un mucha hòmber yòn di 15 aña, mi a puntra mi tata si lo mi por falta sakramento—djis un djadumingu den yanüari pa un wega speshal di futbòl merikano. El a bisa ku mi tabata grandi sufisiente pa hasi e eskoho ei pa mi mes i a puntra mi pa konsiderá un konseho. El a bisa, “Si bo skohe pa falta sakramento un biaha, e ta muchu mas fásil pa bo skohe pa falt’é atrobe.”

Si e Salbador ta e gran konektadó, e ora ei e atversario ta e separadó. E, Satanas ta tenta nos pa separá nos for di nos lugánan di adorashon konsagrá i for di e protekshon di Hesu-Kristu. Ora nos adorá e Salbador, nos ta risibí “poder pa bai kontra e koriente natural mundano.” Ora nos pasa tempu den komunion kun’É, Nos tin un promesa di wòrdu “librá for di Satanas.” “E ora ei, segun nos ta warda nos kombenionan, E ta investí nos ku Su … poder ku ta fortalesé.” O, kon mi ta apresiá e eksperensia di ta den komunion ku e Salbador pa medio di kombenionan hasí na e altarnan santu.

Konstruí i komprondé e Salbador su Ekspiashon eterno liña pa liña, presepto pa presepto ta proveé un èntermentu spiritual kontra e mañanan di e atversario. E hóben Elder Jaggi na México, Hermana Jaggi na Bèlgika, i otro misioneronan rònt mundu tin hopi probabilidat di wak nan amigunan reklamá e bendishonnan di boutismo i risibí e don di Spiritu Santu si nan amigunan ta asistí na e reunion sakramental durante e promé siman di kontakto.

Un hóben adulto na Tonga òf Samoa tin hopi mas probabilidat pa wòrdu seyá den e kas di Señor si nan a prepará pa risibí nan investidura poko despues di a gradua for di skol. Den e investidura, miembronan ta wòrdu invitá pa biba, obedesé, i warda sinku lei kual ta konferí nan bida ku poder i protekshon. Segun nos ta hasi kombenionan ku Señor, un relashon mútuo ta wòrdu formá. Nos ta demostrá nos lealtat i amor p’E. Nos fortalesa i poder ta krese ku kada promesa ku nos hasi i warda.

Ora nos hinka rudia humildemente i simbólikamente na e altarnan di Señor, e ta un oportunidat pa reflekshon, “frená pa loke ta trata e orguyo di [nos] kurason, … [humiando nos mes] dilanti Dios.” Promé ku sali ku mi amigunan, komo hóben, mi mama tabata bisa hopi bes, “Kòrda ken bo ta, i laga sa ora bo yega kas.” Algun anochi, mi a keda sin mèldu pasobra mi a yega kas muchu lat. Mi ta arepentí di a pèrdè e bishitanan importante ei ku mi mama.

Awe, mi ta spera ku anhelo pa komuniká ku mi Tata Selestial. Den mi patronchi diario di adorashon personal, mi ta hinka rudia den orashon banda di mi kama ku famia, i ta imaginá mi mes hinkando rudia na e altarnan, reflehando riba i eksaminando mi bida. Mi ta pensa tokante e sakramento, asta pidanan di pan grandi, kibrá i garná pa nos, tur un símbolo di nos Salbador su kurpa kibrá. Mi ta kòrda di Presidente Dallin H. Oaks su siñansa ku “kada pida di pan ta úniko, meskos ku e personanan ku ta partisipá di dje ta úniko.” Ora mi hinka rudia den orashon, mi ta pensa riba kon mi por duna Dios mi boluntat.

Elder Davi d A. Bednar a siña ku “E ordenansa di e santa sena ta un ripitishon i invitashon sagrado pa arepentí sinseramente i pa wòrdu renobá spiritualmente. E akto di partisipá di e santa sena, den i di su mes, no ta kita piká. Pero ora nos prepará konsientemente i partisipá den e ordenansa sagrado aki ku un kurason kibrá i un spiritu abatí, e ora ei e promesa ta ku nos por tin e spiritu di Señor semper ku nos. I pa medio di e poder di Spiritu Santu ku ta santifiká komo nos kompañero konstante, nos por tin semper un remishon di nos pikánan.”

Ora Amy i ami wak nos eksperensianan di bida di aserka, nos ta selebrá e regalo di Hesu-Kristu su amor perfekto i sakrifisio. Nos ta wak tambe kon e furia di fièrnu a wòrdu di los. Kon nos por surpasá e miradanan ku ta husga, ansiedat, depreshon, kanser, diabétis, tentamentu online, identidat hòrta, pèrdida di embaraso, i e pèrdida di un yu, un ruman hòmber, i un tata? Pasobra Hesu-Kristu a bebe di e kopa amargo di temblamentu, e kopa di furia—pa ami, pa mi famia, pa nos tur!

Getsemani, pa Adam Abram, kortesia di altusfineart.com © 2025

E “kòpi marga” El a bebe den e Hardin di Getsemani i Su sufrimentu “a intensifiká” na e krus di Kalvario ta permití nos pone esnan duru, esnan insolente, e violentonan, esnan furioso i esnan ku ta tembla riba e altarnan di Señor i wòrdu “santifiká pa medio di e resepshon di e Spiritu Santu,” semper.

Hermana Patricia Holland a bisa, “Mi orashon mas profundo pa bo i pa mi mes awe ta ku nos lo entregá nos mes kompletamente, pone nos mes na Dios su altar di promesa i amor sin importá unda nos ta i sin importá kiko nos a hasi.”

Ora nos yega na e altar, nos no ta ganando un rekompensa; nos ta siñando tokante e Dunadó di Regalo. Den e siñamentu i union di kombenio ta bini sanashon. Nefi a bisa, “El a yena mi ku su amor, te ku mi karni por a wòrdu devorá.” I nos kerido Salbador a invitá, “Lo bo no bolbe na mi, i arepentí di bo pikánan, i sea kombertí, pa mi por sana bo?”

Ora ku nos dos yu muhénan, Mackenzie i Emma, tabata chikitu, un di nan kuentanan faborito tabata E Kronikonan di Narnia: E Leon, E Hèks i e Kashi di Paña. Nos tur a namorá di e leon, Aslan. Un di nos anochinan mas memorabel lesando e buki tabata ora e gran leon a entregá su bida pa Edmund. Memorabel pasobra mayornan i yunan a drama lágrimanan ora e Leon su bida a wòrdu kitá riba e Mesa di Piedra dor di e Hèks. Memorabel pasobra speransa a persistí, apesar di e tragedia, te ora ku e loke ta espektakular a sosodé. Gritunan di goso a resoná den e kamber chikitu ei ora ku Aslan a resusitá i bisa, “Si e hèks tabata sa e berdadero nifikashon di sakrifisio, … e lo tabata sa ku si un víktima boluntario ku no a kometé ningun traishon muri na lugá di un traidor, e Mesa di Piedra lo sker, i morto mes lo kuminsá desviá.”

Hesu-Kristu ta sana tur herida. Hesu-Kristu ta hasi posibel pa biba atrobe.

Den su diskurso di konferensia general na Òktober 2022, Presidente Russell M. Nelson a deskribí un grupo di tur ku tabata pasa dor di un kas habrí di tèmpel. Un mucha hòmber yòn tabata ei nan. Presidente Nelson a siña:

“Ora e grupo di tur a drenta un kamber di investidura, e mucha hòmber a mustra na e altar, kaminda hendenan ta bai na rudia pa hasi kombenionan ku Dios, i bisa, ‘O, esei ta bunita. Aki ta un lugá pa hendenan deskansá den nan rekorido di tèmpel.’

“… Probablemente e no tabatin ni un idea di e konekshon direkto entre hasi kombenio ku Dios den e tèmpel i e Salbador Su promesa impreshonante:

“Bini serka Mi, tur ku ta laborá i ta kargá, i Ami lo duna boso deskanso.

“Tuma mi yugo riba bo, i siña di mi; … i lo bo haña deskanso den bo alma.

“‘Pasó mi yugo ta suave, i mi karga ta lihé’ [Mateo 11:28–30; énfasis agregá].”

“E yu di Hende no tin lugá pa pone su kabes,” tòg El a invitá Su disípelnan, abo i ami, na e mesa di sakramento pa deskansá kunÉ ei nan. Ora ku “almanan humilde hinka rudia na altarnan,” pas ta abundá. Nos Salbador su brasanan ta ekstendé; Su mesa ta sirbí. Bin adorá e Yu di Dios na Su santu altarnan. Den e nòmber di Hesu Kristu, amèn.