Bai i Hasi Meskos

Aproksimadamente, 91pK [promé ku Kristu], Amon, un mishonero di Buki di Mormon a introdusí su mes na Rei Lamoni bisando, “mi ta deseá pa biba entre e pueblo aki pa un tempu; … [i] lo mi ta bo siervo.” Pa motibu di su servisio na e rei, Amon a haña un oportunidat pa “papia ku kurashi, … i bisa [Rei Lamoni] … pa medio di kua poder” el a ehekutá su servisio. A kambio, e rei a primintí ku “kualke kos ku [Amon] deseá … [e rei lo] dun’é.” Amon su úniko petishon tabata pa e rei skucha e mensahe di e evangelio di Hesu-Kristu. Amon su sevisio a resultá den “míles di alma [tresé] na arepentimentu.”

Den nos tempu, servisio ta sigui kondusí otronan na e evangelio. Hermana Bevan tabata sirbiendo komo un mishonero di enseñansa ora el a kuminsá eksperensiá problemanan di salú rekiriendo su regreso pa kas pa tratamentu. Enbes di wòrdu relevá, e tabata por a sigui sirbi komo un mishonero di servisio for di kas.

Miéntras nan tabata bishitá un parke, Hermana Bevan i un amiga a haña impreshon pa papia ku un mama ku kuater yu yòn, pero nan a duda i e famia a kore bai. E siguiente dia, nan a regresá na e parke, pidiendo den orashon pa e famia aki lo ta ei. Milagrosamente, e mama tabata sinta na eksaktamente mesun lugá ku e dia promé. E bia aki Hermana Bevan i su amiga a aserká e mama, sera konosí kuné i a deskubrí ku e tabatin mester di yudansa desesperadamente. Nan a proveé asistensia i despues a invit’é pa siña tokante e evangelio.

Pa motibu di e servisio ei i e invitashon, e mama i su yu mas grandi a wòrdu batisá, siguí pa esun siguiente mas grandi un aña pasá. Nan a keda miembronan aktivo te awe. Hermana Bevan tabata sa ku e eksperensia aki a wòrdu inspirá divinamente i “a proba na [dje] ku [e] tabata eksaktamente kaminda Dios mester di [dje] pa ta.”

Meskos ku Amon i Hermana Bevan, ora nos ta sirbi otronan, nos “ta mustra bon ehèmpelnan na nan” i nan ta deseá pa konosé e “motibu di e speransa ku ta den [nos].”

Hesus ta invitá nos pa “bai, i hasi meskos.”

Presidente Russell M. Nelson a yama “tur hòmber hóben digno, ku por pa prepará pa i sirbi un mishon” i pa tur hermana hóben ku por pa “hasi orashon pa sa si Señor lo ke pa [e] sirbi un mishon, El a primintí ku “bo desishon pa sirbi un mishon, sea ta proselitismo òf un mishon di servisio, lo bendishoná abo i hopi otro.” Mishonnan di servisio a kambia e definishon di e palabra kapas. Awor tur hòmber i muhé hóben ku ta deseá pa sirbi un mishon di tempu kompleto pa Señor por hasi esei, ku masha poko eksepshon.

Elder Holgado ta un ehèmpel di ta kapas pa sirbi sin importá sirkunstansianan personal. El a nase ku un impedimentu genétiko straño, kual a ekskluíe pa sirbi un mishon di enseñansa. Elder Holgado a wòrdu yamá komo un mishonero di servisio i tabata boluntario den almasen di obispu, kaminda e tabata yuda otronan haña e asistensia ku nan tabatin mester. El a yena rèkinan, pone bèrdura den saku, i kibra kahanan di karton.

Ora Elder Holgado a papia den reuinion sakramental despues di su mishon, el a kompartí, ku “Dios mester di mishoneronan di servisio. E mester di hende pa stima i sirbi otronnan. E hendenan aki ta stòk papel di wc, pone brókoli den saku, traha meubel, i ta bon na otro hende.”

Boso no mester di tin asignashon di servisio òf tin un plaka mishonal pa hasi bon. Kada akto di servisio ta rekonosé pa e Salbador. Nos tur ta kapas pa yuda otronan bini na Kristu pa medio di sirbi ku amor bondadoso. Nos tur por ministrá den nòmber di Kristu na un hende pa medio di e poder di e Spiritu Santu i biba komo ehèmpelnan di fe den Hesu-Kristu Servisio ta permití nos pa presentá nos mes komo sakrifisionan bibu ku ta aseptabel pa Dios.

Hesus ta invitá nos pa “bai, i hasi meskos.”

Un mishonero hóben ku a wòrdu transferí for di un asignashon di enseñansa pa un asignashon di servisio tabata lucha ku algun desafio personal ku a lag’é den nesesidat di e poder sanadó di Kristu. Servisio konsagrá a trese e poder ei den su bida. El a bisa, “Mi a sinti ku tempu mi tabata luchando, mi por a sinti Kristu ta elevá mi. Tin algu spesial tokante den wak’E bendishoná hende pa medio di un banko di kuminda, den tèmpel, i pa medio di Su evangelio.”

E elder aki a kuminsá sinti goso mas profundo, i su entusiasmo resien deskubrí a bendishoná e i henter su famia. E Spiritu a drenta nan hogar mas abundantemente, nan a asistí na tèmpel huntu mas regularmente, i Kristu a bira un enfoke mas grandi den nan famia. E mishonero aki ta kere ku Kristu a salba su bida i a bendishoná su famia pa medio di servisio.

Presidente Nelson a siña, “Disposishon pa sirbi i fortalesé otronan ta para komo un símbolo di un hende su preparashon pa wòrdu saná” pa e poder redentor di e Salbador.

Hesus ta invitá nos pa “bai, i hasi meskos.”

Ora boso òf un miembro di famia ta bendishoná ku un yamamentu komo un mishonero di servisio, esei ta un momento pa selebrá. Awor boso famia lo tin un representante di Señor Hesu-Kristu apartá bibando den boso hogar. Esei lo kambia boso tur pa e mihó. No mester tin desepshon den kualke yamamentu pa sirbi. Nos ta kanta, “Lo mi bai kaminda bo ke pa mi bai” i “Lo mi ta loke bo ke pa mi ta.” Esaki ta un oportunidat pa mustra ku realmente nos kier men loke nos ta bisa!

Na boso tur ku ta sirbi, i spesialmente na e mas di 4,000 mishoneronan di servisio hóben, nos ta stima boso! Si mishoneronan di enseñansa ta e boka di Señor, e ora ei, mishoneronan di servisio ta Señor su mannan, i boso no ta mishoneronan di segunda klase. Kada un di boso ta vital pa trese Israel huntu. Presidente Nelson ta siña ku “kada biaha ku nos hasi algu ku ta yuda un persona … pa hasi i warda nan kombenionan ku Dios, nos ta yudando pa trese Israel huntu.”

Boso mishoneronan di servisio ta trese Israel huntu den asina tantu manera, i boso servisio ta kambia bida. Hopi bia boso no sa ken e benefisiario di boso servisio ta, pero Dios sa. Kòrda semper ku “te asina leu ku boso [sirbi] un di esnan di mas chikitu di esakinan, … boso [ta sirbiE].”Nos ta tende boso bosnan segun ku boso ta boluntario na sentronan di yamada di Iglesia; nos ta mira boso sonrisa ora boso ta yuda den organisashonnan di komunidat; i nos ta sinti boso lus ora boso ta sirbi den tèmpelnan. Boso ta alimentá esnan ku hamber, bisti esnan sunú, i duna di bebe na esnan ku set.

Nos tur tin ku bai i hasi meskos.

Servisio tin e poder pa habri kurasonnan na e evangelio i ta permití nos tur pa duna henter nos alma na Kristu. E ta kambia nos kurason pa bira mas manera E, i den e proseso, nos ta elevá otronan. Presidente Nelson a puntra un bia, “Den e mundu aflihí aki ku dekadensia spiritual, hendenan por … hasi un diferensia?” Su kontesta: “Sí! … ‘E pueblo di kombenio di Señor, … armá … ku e poder di Dios den gran gloria’ … por elevá e bidanan di henter humanidat,” Mediante servisio nos por kambia kurasonnan—i e mundu.

Kristu “a bai rònt hasiendo bon.” El a ministra na esnan enfermo duna bista na esnan siegu, i bishitá esnan oprimí. El a kushiná kuminda, a yuda na fiestanan di kasamentu, i a alimentá míles ku tabatin hamber. Ora nos ta duna servisio na esun den e nòmber di Kristu, nos ta bira kada bia mas santu i digno di e don di bida eterno. Hesu-Kristu ta biba. E ta Salbador di ami i di boso. E ta nos Redentor. E ta nos gran ehèmpel di ministrashon. Mi ta invitá kada un di nos pa bai i hasi meskos. Den e nòmber di Hesu Kristu, amèn.