Señor ta Aselerando Su Obra

Charles Dickens a kuminsá su novela klásiko Un Kuenta di Dos Suidat ku e afirmashon ku “e tabata e mihó di tempu, e tabata e pió di tempu.” Den un sentido, esaki ta bèrdat den nos dianan.

Nos ta biba den un tempu turbulento ora “henter e tera [ta] den konmoshon.” Presidente Russell M. Nelson su atvertensia pa ta pasifikadónan, komo siguidónan di Hesu-Kristu, a wòrdu enfatisá bunita awe mainta dor di Elder Gary E. Stevenson. Esaki ta un parti esensial di fomentá union, pas i sanashon pa “e pió tempu.”

Nos ta biba tambe den “e mihó tempu,” loke lo ta mi énfasis. Señor, den e prefasio di Doktrina i Kombenionan, sekshon 1, a deklará ku e plenitut di e evangelio lo “wordu proklamá … te na e fin di mundu.” Señor ta berdaderamente aselerando Su trabou den nos tempu. Nos mester ta profundamente agradesido pa e aselerashon, ku tin i ta sosodiendo apesar di e tempunan di desafio aki. Nos ta biba den un époka ku e siguidónan di Señor ta privilegiá di tende Su bos i respondé ku kurason i mentenan habrí. Miembronan di E Iglesia di Hesu-Kristu di e Santunan di Delaster Dianan, ku ta komprometé ku e Salbador i Su mandamentunan, ta hañando propósito i pas personal profundo.

Na vários momentu den e historia di Iglesia, tabatin un oumento signifikante den esnan ku a drenta e kaminda di kombenio. Un di e periodonan ei a tuma lugá entre 1837 i 1850. Algun di e promé Apòstelnan den e Iglesia restourá di Señor a sirbi mishonnan na Reino Uní. E mishonnan aki a resultá den míles uniendo na Iglesia, i pa 1850 tabatin mas miembro di Iglesia ku tabata biba na Reino Uní ku na Merka. E tempu ei, Señor a dirigí e Santunan aki pa reuní na Utah. Un emigrashon masal a tuma lugá, algun sostené pa fiansa suministrá pa e Fondo di Emigrashon Perpetuo.

Mi ta gusta e relato di e yegada na e Vaye di Salt Lake di un kantidat grandi di komberso for di Inglatera i Wales na 1852. E grupo a wòrdu risibí pa e Promé Presidensia na e boka di Emigration Canyon kompañá pa e Grupo di Kapitan Pitt. Deseret News a deskribí nan komo “un grupo di peregrino [inkluyendo] rumannan muhé i muchanan, kanando, kimá pa solo, i batí pa wer, pero no bandoná; nan kurason tabata lihé i flotante, kual tabata klaramente manifestá dor di nan kara felis i alegre.”

Segun ku nan a “pasa e Kuadra di Tèmpel, … miéntras míles di hòmber, muhé, i mucha, a reuní, for di vários parti di e siudat, pa uni den e bon biní glorioso i alegre.” Presidente Brigham Young a dirigí su mes na nan: “Ku Señor Dios di Israel bendishoná boso. … Nos a hasi orashon pa boso kontinuamente; míles di orashon a wòrdu ofresé pa boso, dia pa dia, na Esun ku a ordená nos pa reuní Israel, salba e yunan di hende pa medio di e predikashi di e evangelio, i prepará nan pa e binida di e Mesias.”

Den e spiritu di e okashon alegre ei, laga mi sigurá un biaha mas tur kombertí nobo i esnan ku ta regresá na e Iglesia di Señor: nos ta stima boso; nos mester di bo; Señor mester di boso. Kisas nos no ta yama boso bon biní ku un banda marchando, pero nos ta hasi orashon pa e bendishonnan di shelu asistí na boso esfuersonan pa progresá riba e kaminda di kombenio ku ta kondusí na Dios Tata i Hesu-Kristu den e reino selestial.

Tin evidensia kla ku fe den Hesu-Kristu ta oumentando den nos tempu. Den e Iglesia di Hesu-Kristu di e Santunan di e Delaster Dianan, tabatin un oumento remarkabel den kombershonnan. Den e último 36 lunanan kasi 900.000 komberso a uni na e Iglesia. E kombersonan aki ta konstituí aproksimadamente 5 porshento di e total di miembresia di Iglesia. Nos ta yama bon biní na miembronan nobo ku brasa habrí i apresio profundo pa e kaminda ku boso a skohe.

E 900.000 kombersonan aki den e último 36 luna ta surpasá e miembresia total di Iglesia na su di 110 aniversario na 1940, ku tabata djis mas ku 860.000 miembro. Esaki tabata e aña ku Elder Jeffrey R. Holland, Elder Dieter F. Uchtdorf, i ami a nase.

E kombersonan nobo maravioso aki ta bini di tur parti di mundu. Den e promé seis lunanan di e aña aki, e kombershonnan a subi ku mas ku 20 porshento riba e aña anterior na Europa, Afrika, Asia, Pasífiko i Latino Amérika. Na Norte Amerika nos a mira un oumento di 17 porshento. E trabou di Señor ta sigui bai dilanti den maneranan poderoso. E kantidatnan kresiente aki ta un testimonio kla ku e evangelio ta tokando kurasonnan i ta kambiando bidanan tur kaminda.

Den nos tempu, e kombersonan presioso aki no ta reuní mas na un lugá sentral. Pa motibu di e fe i konsagrashon di e miembronan di Iglesia, rekursonan ta disponibel pa sostené kongregashonnan—ku konstrukshon di kapianan i tèmpelnan—rònt mundu. Ku e yabinan nesesario di saserdosio i e rekursonan suministrá, ordenansanan di salbashon ta disponibel awor den mayoria parti di mundu.

Sin importá unda nos ta biba, miembronan aktual mester yama bon biní na míles i míles di miembro nobo meskos ku nos a hasi ku e Santunan ingles i gales ku mi a deskribí for di nos historia anteriormente. Mi ta gusta Elder Gerrit W. Gong su diskurso den e seshon aki kaminda el a siña nos ku niun hende no mester sinta su so ni emoshonalmente ni spiritualmente.

Nos deber sagrado ta pa aseptá i yama bon biní na miembronan nobo i esnan ku ta regresá. Miéntras Señor ta aselerá Su obra, nos mester stima, kuida, i sirbi esnan ku ta aseptá Su evangelio. Nos por yuda konstruí un pueblo di Sion, kaminda nos ta “di un kurason i un mente, i [ta biba] den hustisia.” Pa ta unu ku Señor, nos mester ta unu dilanti di Señor. Tur miembro, sin importá e fecha di boutismo, ta kompartí un responsabilidat pa yama otronan bon biní.

Mi konseho na e miembronan di Iglesia ta pa lora nos brasanan rònt di e hendenan elekto presioso aki ku a aseptá e evangelio di Hesu-Kristu.

Presidente Gordon B. Hinckley a siña nos ku un komberso nobo mester di “un amigu, un responsabilidat, i kuido ku ‘e bon palabra di Dios’ (Moroni 6:4).” Nos por ta entre e amigunan ku ta sigurá e kombersonan nobo aki ku nan ta pertenesé i no ta djis invitado. Nos por yuda nan komprondé ku nan ta disipelnan di Hesu-Kristu ku por ministrá na otronan i aseptá yamadanan pa sirbi. Kombersonan hóben mester konsiderá sirbi un mishon di tempu kompletu. Tur hende mester ta determiná pa hasi esfuerso pa biba un bida manera Kristu.

Hopi ta uni na Iglesia ku gran sakrifisio personal i desesperadamente mester di e amor i sosten di nan kompañeronan Santunan.

Na esnan di boso ku ta nobo òf ta regresando na e fe, tin retonan ku boso por enfrentá. Tene pasenshi ku bo mes. E mishoneronan a siñá bo e doktrina esensial i a splika e kombenionan i ordenansanan di e reino, kual ta wòrdu stipulá den e Skrituranan i den Prediká Mi Evangelio.

Risibiendo e ordenansanan i kombenionan i biba e mandamentunan ta esensial. Enfoká riba e kombenionan nesesario pa eksaltashon. E evangelio ta hasi eksaltashon posibel, kual ta rekerí hasi i warda kombenionan sagrado ku Dios. Fuera di boutismo, konfirmashon, i e konferensia di e Saserdosio di Melkisedèk pa hende hòmber, e kombenionan ku nos ta hasi ta wòrdu ehekutá den tèmpel. Pa e mortonan, kada un di e ordenansanan di salbashon aki ta wòrdu ehekutá solamente den e tèmpel. Di akuerdo ku esaki, prepará bo mes pa e tèmpel mester ta un meta di tempu kòrtiku.

Tin bia lo bo sintí bo inadekuá tokante loke bo sa. Konosementu di evangelio ta un gran bendishon optené inkrementalmente den transkurso di tempu, pero e no ta un ordenansa di salbashon. E evangelio no ta un prueba di konosementu. Sinembargo, manera Presidente Russell M. Nelson a primintí: “Miéntras bo ta studia e Buki Mormon den orashon tur dia, lo bo tuma mihó desishonnan—tur dia. … Míentras bo ta skrudiñá loke bo ta studia, e bentananan di shelu lo habri i lo bo risibí kontestanan riba bo propio preguntanan i direkshon pa bo propio bida.”

Ademas, kada aña den rotashon e kuríkulo di Iglesia den reunionnan di djadumingu ta kubri e Tèstamènt Bieu, e Tèstamènt Nobo, e Buki di Mormon, i e Doktrina i Kombenionan. Ku tempu lo bo sinti mas sigur segun ku bo konosementu di evangelio ta krese. Estudio regular di e Skrituranan lo bendishoná i enrikesé boso bida dor di profundisá boso kombershon na e evangelio di Hesu-Kristu.

Siñando e doktrina puru di Hesu-Kristu ta un buskeda di henter bida, tantu den entendimentu di doktrina komo den biba un bida manera Kristu. Kombenionan esensial ta proveé ​​un kuadro kual nos ta deskribí komo e kaminda di kombenio. E prinsipionan aki a wòrdu siñá poderosamente dor di Presidente Nelson. Tur miembro, spesialmente esnan nobo i esnan ku ta regresá, lo wòrdu bendishoná dor di studia i adoptá su mensahenan profétiko riba kombenionan i e kaminda di kombenio.

Si bo pone un meta pa risibí dignamente kada kombenio nesesario pa eksaltashon, lo bo ta riba e kaminda ku ta kondusí na e reino selestial. E tèmpel i ordenansanan di e tèmpel mester ta nos enfoke. Mayoria kombenionan ta disponibel pa kada individuo. Un kombenio, matrimonio eterno, ta enserá uni bo esfuersonan ku un kompañero. Nos meta mester ta pa haña e kompañero eterno ei.

Sinembargo, no desanimá si matrimonio eterno no ta posibel n’e momentu aki. Profetanan a siña ku ningun bendishon lo wòrdu retené for di miembronan fiel ku ta warda e mandamentunan. Un profeta di e Buki di Mormon, Rei Benjamin, a bisa esaki bunita: “Esnan ku ta warda e mandamentunan di Dios … ta bendishoná den tur kos, … i si nan … [ta] fiel te na fin … nan por biba ku Dios den un estado di felisidat sin fin.”

Lo bo haña, si bo no a hasié kaba, ku e miembronan no ta perfekto. Doktrina revelá ta hasié kla ku den nos estadia aki riba tera, nos lo kometé erornan. Nos ta biba den un mundu imperfekto i kaí, no un mundu selestial. E bida aki ta un tempu di prueba, ku oportunidatnan konstante pa arepentí i proba nos mes.

Nos tur ta sinti nos inadekuá segun ku nos ta lucha pa bira manera Hesu-Kristu. Su Ekspiashon ta permití nos pa arepentí diariamente segun ku nos ta faya. Manera Nefi, un otro profeta di e Buki di Mormon, a bisa: “[Nos] mester bai dilanti ku un firmesa den Kristu, teniendo un brio perfekto di speransa, i un amor pa Dios i pa tur hende. P’esei, si boso bai dilanti, deleitando riba e palabra di Kristu, i perseverá te na fin, mira, asina e Tata ta bisa: Boso lo tin bida eterno.”

Ora nos ta kontemplá e retonan di nos tempu, nos mester kòrda ku e Salbador, durante Su ministerio terenal, tambe a biba den tempunan turbulento i violento. Su enfoke no tabata riba e retonan polítiko di e tempu ei; e tabata riba e perfekshon di e Santunan.

Siguiendo e Salbador i Su doktrina i siñansanan nunka tabata fásil den un mundu ku ta konstantemente den konmoshon. E no tabata fásil pa e Salbador den e mundu volatil durante su estadia mortal, e no tabata fásil pa nos promé lidernan i miembronan, i e no ta fásil pa nos. Afortunadamente, profetanan bibu ta proveé ​​e guia ku nos mester spesífikamente pa nos dia. Presidente Dallin H. Oaks lo sigui ku e herensia spiritualmente poderoso ei.

Mi ta testifiká ku e doktrina di e Iglesia di Hesu-Kristu ta eterno i bèrdat. Mi ta duna mi testimonio sigur ku Hesu-Kristu ta biba i pa motibu di Su Ekspiashon, nos por ta un kunE. Den e nòmber sagrado di Hesu-Kristu, amèn.