E Reseta di Bon Notisia

Si bo a yega di bishitá nos estado natal di Louisiana, probablemente bo ta konosí ku hopi di nos platonan sabroso—gumbo, jambalaya, étouffée, i e lista ta sigui i sigui.

Ratu ratu, mi ta sinti mi mes ku sufisiente kurashi pa kushiná un di e resetanan sabroso ei. E paso final indokumentá despues di meskla tur e ingredientenan i sigui e instrukshonnan detayá ta pa hasi e último tèst di sabor i wak si ta falta algu. Na e punto ei, mi por a skucha e leyendanan di e kushina krioyo susurando den mi oreanan, “Pone mas Tony den dje.” Tony ta un speserei krioyo trahá na Opelousas, Louisiana, mi siudat natal. E ta wòrdu hopi usá komo e “ingrediente sekreto” pa kompensá e imperfekshonnan ku ta keda hasi miéntras ta sigui e reseta.

Mi kasá, Michelle i ami tabatin e honor pa sirbi komo lidernan di mishon na Louisiana. Nos tabatin un tradishon di siña e misioneronan kon pa kushiná su reseta speshal di jambalaya riba nan lastu anochi den e kas di mishon promé nan regresá serka nan famia. Ademas di nan testimonio di e evangelio restourá di Hesu-Kristu, nos misioneronan tabata bandoná e mishon ku un apresio pa resetanan.

Algun luna pasá, mi tabata buskando dor di e Biblioteka Digital di Iglesia i a wak un lenk ku ta bai na e kolekshon di videonan kòrtiku yamá Kombersashonnan tokante restourashon ku Presidente Russell M. Nelson. E título di un di e videonan kòrtiku den e lista a hala mi atenshon i a pone mi hari. E yama “Skrituranan ta Dios Su Resetanan pa un Bida Felis.” Inmediatamente mi a klek riba e video di dos minüt ei i wak Presidente Nelson siña un grupo di muchanan di Primaria un mensahe simpel i poderoso tokante kon pa ta felis. El a siña: “Si bo ta trahando un bolo, bo ta sigui e instrukshonnan, no t’asina? I lo bo haña un bon resultado kada bes, no t’asina?

El a sigui, papiando tokante kumplimentu di 95 aña pronto: “Hende ta bisa, ‘Ki bo ta kome? Kiko ta bo sekreto?’” El a respondé, “E sekreto yama e Skrituranan. Lo bo por lesa nan i purba nan.”

Wèl, ata nos tin e ei. E simpel sekreto pa un bida felis ta djis sigui Dios su reseta manera ta detayá den e Skrituranan. Ami ta yam’é e “Reseta di Bon Notisia.”

Kiko bo ta hasi si algu bai robes ora bo ta siguiendo e reseta? Wèl, ankrá den e Reseta di Bon Notisia tin e “ingrediente sekreto” pa sigurá ku semper bo ta hasié bon na final. E kontesta Semper Ta Hesu-Kristu.

Mi ta kere ku nos tur tin momentunan kaminda nos ta sinti ku nos ingredientenan no ta bon sufisiente, òf nos tin difikultat pa sigui e instrukshonnan, òf kisas nos ta hasi algu ku no ta segun e órden, òf ta sosodé algu for di nos kontrol, etcetera.

Kiko ta e remedi? E ta simpel pa agregá mas di loke ta invitá Hesu-Kristu den nos bida.

Pues, kon e lo ta pa agregá mas Hesu-Kristu den bo bida?

Miéntras mi tabata sirbiendo komo presidente di mishon, mi tabatin e plaser di reuní, personalmente ku kada un di nos misioneronan yòn kada seis siman. Durante e reunionnan personal, tabata komun ku misioneronan ta buska guia riba kon pa mehorá e efektividat di nan kompañerismo.

Na un okashon, un misionero a bin su entrevista personal i a kai sinta. Mi por a ripara na su lenguahe korporal ku algu tabata pisa hopi na su kabes. Mi a puntra, “Elder, kiko lo bo kier papia di dje awe?” El a kuminsá deskribí algun di e retonan ku e tabatin ku su kompañero i kon e tabata afektá nan abilidat pa hasi obra misional. Ku awa na su wowonan, el a wak mi i puntra, “Presidente, kiko lo mi mester hasi?”

Na e momentu ei, sinseramente mi no tabata sa kon pa reakshoná. Despues di un ratu, mi a puntr’é si tabata oké pa nos hinka rudia huntu den orashon pa risibí guia for di e Spiritu. El a bai di akuerdo, i nos a hinka rudia huntu i a hasi orashon pa inspirashon.

Despues di e orashon, nos a keda na rudia pa un ratu kòrtiku i despues a sinta den nos stulnan mirando otro. Mi a puntra si nos por lesa un Skritura huntu. Miéntras nos tabata habri nos Skrituranan, mi a wanta i bisé, “Elder, miéntras nos ta lesa e Skritura aki, por fabor puntra bo mes e siguiente preguntanan: Si mi ta biba e atributonan aki, lo e mehorá mi kompañerismo i nos obra misional?

E ora ei nos a habri Moroni 7:45 i lesa na bos haltu: I karidat tin pasenshi, i ta kariñoso, i no ta envidiá, no ta alsa su mes, no ta buska su mes interes, no ta wòrdu proboká fásilmente, no ta pensa maldat, i no ta regosihá den maldat pero ta regosihá den e bèrdat, ta sufri tur kos, ta kere tur kos, ta spera tur kos, ta soportá tur kos.

E ora ei e Elder a wak mi ku awa na su wowonan i bisa, “Si, Presidente, pero esei ta duru pa hasi.” Mi a bai di akuerdo i rekordé ku e ta un yu di Dios, ku potensial divino pa hasié huntu ku Señor.

Despues nos a diskutí brevemente e parabola di e liña di progreso ku Elder Clark G. Gilbert di e setenta a siña, kual a rekordá nos ku nos mester kuminsá kaminda nos ta i, huntu ku Señor, avansá i bai den un direkshon positivo. Mi por a ripará ku ainda e tabata sinti un tiki abrumá ku e siguiente pasonan, pues mi a puntr’é pa deskribí su entendimentu di e Skritura “pa medio di kosnan chikitu i simpel kosnan grandi ta sosodé.” El a sigui deskribí e konsepto ku dor di hasi kosnan chikitu i simpel kosnan grandi por sosodé. Mi a puntr’é pa tuma un minüt i identifiká dos kos chikitu i simpel ku el lo por hasi pa ta amabel ku su kompañero.

Despues di un momentu, el a kompartí su pensamentunan. Despues mi a puntr’é pa tuma un minüt pa identifiká dos kos chikitu i simpel ku e lo por hasi pa tin pasenshi ku su kompañero. Kasi inmediatamente el a kompartí su dos pensamentunan. Tabata evidente ku ya el a bini ta meditá riba esaki promé ku e reunion. Mi a invit’é pa bai ku e poko asuntunan ei na Dios den orashon i puntra pa konfirmashon, direkshon, i inspirashon riba kon pa ehekutá su plan ku intenshon real. El a bai di akuerdo. Ora nos a terminá, mi a puntr’é pa proveé un aktualisashon breve den su karta semanal.

Segun e simannan despues ta pasa, mi por a wak su kartanan semanal ku kosnan tabata mehorando. No solamente mi por a wak mehoransa den su kartanan semanal, pero mi por a wak tambe den e kartanan semanal di su kompañero. Durante nos siguiente entrevista individual, mi a wak un diferensia di anochi pa di dia den su aparensia i spiritu. Mi a puntr’é, “Pues, Elder, ta bèrdat ku karidat nunka ta faya?’” El a respondé ku un gran sonrisa: “Sí, i pa medio di kosnan chikitu i simpel kosnan grandi por sosodé.”

Segun bo ta sigui e Reseta di Bon Notisia pa un bida felis, kòrda Presidente Nelson su siñansa: “Kualkier pregunta òf problema ku bo tin, e kontesta semper por wòrdu hañá bek den e bida i siñansanan di Hesu-Kristu. Siña mas tokante Su Ekspiashon, Su amor, Su mizerikòrdia, i Su evangelio Restourá di sanashon i, progreso. Akudí na djÉ! SiguiÉ!”

Ora bo mester di “skuch’é” i sa kon pa invitá Hesu-Kristu den bo bida, konsiderá pa sigui e pasonan ku Presidente Nelson a siña nos tokante revelashon personal:

“Buska un lugá ketu kaminda bo por bai regularmente. Humiá bo mes dilanti Dios. Drama bo kurason na bo Tata Selestial. Akudí na djÉ pa kontestanan i pa konsuelo.

“Hasi orashon den e nòmber di Hesu-Kristu tokante boso preokupashonnan, boso temornan, boso debilidatnan—si, e anhelonan di boso kurason. I despues skucha! Skirbi e pensamentunan ku ta bini na bo mente. Nota bo sintimentunan i tuma akshonnan ku bo ta wòrdu indiká pa tuma. Segun bo ta ripití e proseso aki dia tras dia, luna tras luna, aña tras aña, lo bo ‘krese den e prinsipio di revelashon.’”

Mi ta testifiká ku Hesu-Kristu ta nos Salbador i Redentor. El a “logra tur loke nos mester pa por regresa na [nos] Tata Selestial.” Den e nòmber di Hesu-Kristu, amèn.