E Don Eterno di Testimonio

E sa tur kos i e ta omnipotente. Pa medio di e Lus di Kristu i e ministrashon di e Spiritu Santu, Su influensia ta tur kaminda. E ta den Su naturalesa pa bendishoná nos.

E ta wak nos pasado, presente, i destino eterno. Nada no por wòrdu skondí p’E.

Presidente Russell-M. Nelson su invitashon pa “pensa selestial” ta enkurashá nos pa emulá nos Tata Selestial Su vishon i naturalesa.

Pa motibu di Su atributonan divino, nos Tata Selestial ta duna nos tur bon don, kada un ku Su perspektiva eterno i vishon den mente.

Tambe ta e responsabilidat pa skohe bon.

Hesu-Kristu a paga e preis final pa e privilegio ei ku Su sanger presioso.

Tin biaha nos por kere ku albedrio ta nifiká hasi loke nos kier. Pero e echo ku e preis a wòrdu pagá ta nifiká ku albedrio ta un don sagrado.

Nos ta agentenan, i agentenan ta responsabel pa algu. Den e kaso aki, nos ta responsabel pa e eskóhonan ku nos ta hasi basá riba e konosementu ku nos tin i e donnan duná na nos. Nos no por hasi un eskoho sin ta responsabel pa e konsekuensianan.

Dikon nos tin albedrio?

Pa skohe bon.

Pa skohe Kristu.

Pa skohe bida eterno—kada bes di nobo.

Un testigu di e Spiritu Santu ta mas grandi ku bista. E ta e testigu preeminente di e Tata i e Yu. Presidente Nelson a siña, “Den e dianan benidero, lo no ta posibel pa sobrebibí spiritualmente sin e guia, direkshon, konsuelo, i influensia konstante di e Spiritu Santu.”

Rumannan, esaki ta e motibu pakiko nos kada un mester di e poder di Spiritu Santu awe.

Un testimonio pa medio di e Spiritu Santu por bini den hopi manera. Meskos ku un pera di lus den un kamber skur, e por sende di manera drástiko i diripiente. E por yega manera e salida di solo gradualmente i ku tempu. E por bini manera rayonan di lus, eksposishon intermitente na inteligensia puru. Sea kual sea e manera, e ta bini pa medio di e Spiritu Santu.

Mi a lanta den bunita Jamaica; tabata dibertido i maravioso. Sinembargo, ora mi a kuminsá skol sekundario, algun kompañero di klas i amigunan no por a komprondé mi desishon pa ta un miembro di e Iglesia di Hesu-Kristu. “Kon bo por a uni na e iglesia ei?,” nan ta puntra. “Kon bo por a kere e historia ei?”—refiriendo na e Promé Vishon. “Kon bo por a lesa e buki ei?”—refiriendo na e Buki di Mormon. “Bo ta kere tur esei di bèrdat?” I “Dikon bo ta malgastando bo bida?”

E tabata doloroso, spesialmente ora ku e tabata bini for di hendenan ku mi tabata stima.

Pero loke nan no tabata sa tabata esaki: Mi tabatin un eksperensia ku e Spiritu Santu. Segun ku e testimonio ei a yena mi kurason, el a kalma e doló di dianan, i “pa un momentu kòrtiku, e bista di shelu a [aparesé] dilanti di mi mirada.”

Kisas bo a yega di hasi algun di e preguntanan aki. Kisas asta awor aki bo ta wòrdu bombardiá manera mi tabata.

E don i testimonio di e Spiritu Santu ta disponibel pa tur hende.

Jamaica ta pa mi manera Palmyra tabata pa José Smith. E ta mi Arboleda Sagrado. Mi no sa e lugá eksakto kaminda José a hinka rudia pa hasi orashon den e Arboleda Sagrado, pero mi sa eksaktamente unda ami tabata ora mi Arboleda Sagrado a bira realidat. El a sosodé na Four Grove Road, Mandeville, Jamaica, den mi baño, pa 6:00 a.m. riba un djárason tres aña despues di mi boutismo. E eksperensia sagrado aki a sosodé pasobra dos siman promé un hermana misionero inspirá a invitá mi pa lesa e Buki di Mormon. Hermana Audrey Krauss ta asistiendo na e konferensia aki awe ku su famia, i mi ta stim’é pa semper.

E eksperensia ei a kambia mi.

Rumannan, un testimonio no ta keda duná pa uso temporal. E regalo aki di nos Tata Selestial amoroso ta destiná pa ta eterno pasobra e dunadó ta eterno. Un testimonio no mester tin un fecha di vensementu. E no mester debilitá òf disminuí pasobra algu den mi bida a kambia òf algu den mundu a kambia. E mester bira mas fuerte pasobra, meskos ku e sirbidó den e parábola di e talentonan, mi testimonio personal ta un regalo pa wòrdu multipliká—no derá.

Mirando bèk riba e dianan difísil ei di prueba i persekushon ku mi a pasa aden komo mucha a yuda mi yega na e lugá kaminda awor mi sa pa mi mes. No solamente mi ta kere, spera, òf konfia, aunke esakinan ta partíkulanan signifikante di fe riba e kaminda pa un testimonio sigur. Mi ta elogiá boso pa a hasi boso propio progreso dor di hasi preguntanan, studiando, hasiendo orashon, ayunando i skrudiñando. Por fabor no stòp. Ta bale la pena tur esfuerso pa sigui e kaminda aki pa testimonio. Ken òf kiko lo bo permití pa kita esei? “Ki testimonio mas grandi bo por tin ku esun di Dios?”

Kada yu hòmber òf yu muhé di Dios por haña un konosementu mas profundo, mas firme i mas sigur pa nan mes. Meskos ku José Smith, kende a afirmá su testimonio apesar di oposishon, nos por bisa ku kurashi, “Mi tabata sa, i mi tabata sa ku Dios tabata sa, i mi no por a nenga, ni lo mi no tribi hasié.”

Mi kerido rumannan, laga e simia chikitu di testimonio obra den boso te ora e brota i bira un konosementu glorioso sigur eternamente.

Si bo ta un miembro batisá i konfirmá di E Iglesia di Hesu-Kristu di Santunan di e Delaster Dianan pero tòg ta lucha ku “Mi no ta sigur si mi sa,” por fabor kòrda e promesa aki den e orashon di sakramento: “Pa nan por tin su Spiritu semper huntu ku nan.” Pa motibu di e promesa aki, kada un di nos por sigui e kaminda pa un testimonio i un konosementu sigur.

Awor ata un bèrdat grandi aki: Den ​​kualke manera ku un testimonio ta wòrdu duná—sea e ta wòrdu destilá manera salida di solo òf ta bini den un vishon glorioso—e ta rekerí un eskoho pa risibí e don presioso aki.

Bisando “Mi ta skohe pa kere”, ta hasié mas fásil pa risibí un testimonio di Dios. Si nos ta haña nos testimonio ta debilitando, kòrda ku ta e eskohonan ku nos ta hasi ta mengua e poder di e testimonio. Pero e testimonio no a bai niun kaminda. Nos mester djis skohe pa rekonektá kuné.

Skohiendo pa kere ta un manera sabio i poderoso pa usa bo albedrio.

Mi no por mira un mihó manera pa usa mi albedrio ku den defensa di mi testimonio.

Presidente Nelson a siña: “Mi ta supliká boso pa tuma kargo di boso testimonio. Traha p’e. Hasié di bo. Kuid’é. Nutrié pa asina e krese. Aliment’é ku e bèrdat.”

Pa mi, e palabranan tuma enkargo, traha, kuida, poseé, kuida, i alimentá ta zona manera un agente ku a dune mayordomia pa algu presioso i importante.

Den e Iglesia di antaño, Parley P. Pratt a sinti su mes malkontentu ku e Profeta José Smith i a skohe pa kritiká e i e Iglesia. Ora John Taylor kende Parley a siña e evangelio a yega na e pueblo, Parley a halé un banda i a atvertí pa e no sigui José. John Taylor a bisa na Parley:

“Promé ku bo a bandoná Canada, bo a duna un testimonio fuerte di José Smith komo un profeta di Dios, … i bo a bisa ku bo tabata sa e kosnan aki dor di revelashon i e don di e Spiritu Santu.”

“… Mi tin awor e mesun testimonio ku e tempu ei abo a regosihá aden. Si e obra tabata bèrdat seis luna pasá, e ta bèrdat awe. Si José Smith tabata un profeta e tempu ei, e ta un profeta awor.”

Mi ta testifiká ku José Smith tabata un profeta di Dios i ku e mantel profétiko ku el a risibí ta kontinuá te awe. Hesu-Kristu ta dirigí e obra aki.

Mi ta invitá bo pa pensa riba bo kaminda pa un testimonio sigur di Hesu-Kristu i Su evangelio. Tuma enkargo di bo testimonio; usa bo albedrio sabiamente i rekonosé e dunadó i tur Su atributonan glorioso. Mi ta duna testimonio ku e poder ta den bo. Ningun por skohe p’abo. Ningun por kita e don aki for di bo. Bo por skohe pa kere.

Mi ta primintí ku segun bo ta hasi esaki, bo testimonio lo ta un “fuente di awa bibu, brotando pa bida eterno.” E lo ta un anker i un motivadó, i e lo sostené bo den tempunan difísil. E lo permití bo pa desaroyá donnan spiritual. E lo yuda bo den bo ministerio personal i servisio. E lo ta un arma kontra Satanas i bo atversarionan. Bo testimonio lo ta un goso segun ku bo ta mir’é repliká den bo yunan, nietunan, i bisanietonan i den esnan ku bo ta stima i sirbi. E lo ta poderoso ora bo kompartí esaki i us’é pa testifiká.

Si bo sa, bo sa. Ami sa ku mi sa. Nos mester di mas testimonio sigur di Hesu-Kristu i Su evangelio. Yega einan! Busk’é! E ta urgente! Esaki ta e último dispensashon—e dispensashon di e plenitut di tempu.

Hesu-Kristu a deklará e bèrdat aki: “Shelu i tera lo pasa bai, ma mi palabranan lo no pasa bai.”

Rumannan, un testimonio di Hesu-Kristu nunka tabata destiná pa ta un don temporal. Nada tokante di dje ta temporal—ni e dunadó, ni e regalo mes, ni e entregádó di e regalo, ni tokante ken e regalo ta. Ku bo testimonio wòrdu deskribí di e mesun manera aki. Ounke “shelu i tera lo pasa bai,” bo testimonio di e evangelio di Hesu-Kristu lo no pasa bai. Awor ta e tempu pa gara e regalo presioso aki. Den e nòmber di Hesu Kristu, amèn.