E Poder di Ministrá na Esun

Rumannan, danki pa boso deboshon fiel den bini serka Hesu-Kristu durante e tempu difísil aki. Boso ta maravioso; boso ta bunita; boso kada unu ta un yu di Dios. Ta mi orashon ku nos lo rekonosé e influensia di e Spiritu Santu segun ku nos ta bira i yuda otro bira disipelnan dediká di Hesu-Kristu i sinti di Su goso segun ku nos ta adorá den e kas di Señor.

Presidente Russell M. Nelson a deklará: “Awor ta e tempu p’abo, i ami, pa prepará pa e Segunda Benida di nos Señor i Salbador, Hesus e Kristu. Awor ta e tempu pa nos hasi nos disípulado nos prioridat di mas haltu. Den un mundu yená ku distraishonnan loko, kon nos por hasi esaki?”

El a perkurá e kontesta: “Adorashon regular den tèmpel lo yuda nos. Den e kas di Señor, nos ta enfoká riba Hesu-Kristu. … Nos lo yega na konosE. … Kada buskadó sinsero di Hesu-Kristu lo hañ’É den tèmpel.”

Pues kon nos ta bira i yuda otro bira disipelnan deboto di Hesu-Kristu? Nos ta ministrá na esun. Ministrá den e manera di e Salbador ta enserá kompashon, bondat, pasenshi, i amor sin huisio. Segun nos ta ministrá na esun, nos ta invitá esun pa bin serka Hesu-Kristu i pa adorá den e kas di Señor pa risibí di Su poder redentor. Ku otro palabra, nos ta yuda otro bira disipelnan deboto segun ku nos ta ministrá na esun den maneranan ku ta kondusí na e kas di Señor.

Nos ta siña for di Señor Hesu-Kristu e poder di ministrá na esun ku amor i sin husga. Bo ta kòrda e muhé samaritano na e pos. E muhé aki kisas a sinti su mes no importante, su so, desanimá i invisibel. E por a sinti ku e no tabata pertenesé. Durante su bida e tabatin sinku kasá, i e hòmber ku e tabata biba kuné no tabata su kasá. Otronan por a imponé huisio inhustu sin sa e sirkunstansianan di su bida. Esaki por ta un di e motibunan ku el a bin na e pos su so den e momentu mas kayente di dia. I tòg, e tabata un di e proménan na ken Hesu-Kristu a deklará ku E tabata e Mesias. Pa E, e muhé aki tabata un yu muhé di Dios.

Hesu-Kristu a siña e muhé ku pa medio di djE un hende por risibí bida eterno dor di partisipá di e awa bibu. El a deklará, “Ken ku bebe di e awa ku lo Mi duna … lo no tin set nunka, ma e awa ku lo Mi duna … lo ta … un pos di awa ku ta brota pa bida eterno.”

E muhé di Samaria a sinti e amor di e Salbador i a risibí un testimonio pa medio di e Spiritu ku E ta e Mesias. Despues di e testimonio aki, el a regresá na e siudat, a invitá otronan pa bin wak, i hopi a kere ku Hesus tabata “enbèrdat e Kristu, e Salbador di mundu.” Kristu a ministrá na esun ku amor; komo resultado, otronan a bira Su disipelnan deboto.

Nos ta siña di e poder di ministrá na esun ku kompashon for di e Apòstelnan di Kristu, Pedro i Juan. Bo ta kòrda un sierto hòmber, lam for di nasementu, ku tabata drumí tur dia na porta di tèmpel pidiendo plaka. E hòmber aki kisas a sintié no importante, su so, desanimá i invisibel. E por a sinti ku e no tabata pertenesé.

“E ora ei Pedro a bisa: “Mi no tin plata ni oro, ma mi ta duna bo loke mi tin: den nòmber di Hesu-Kristu di Nazaret, lanta i kana.”

Pedro a kohe e hòmber na su man drechi i lant’é, i e hòmber a bira bon. Inmediatamente despues di e milager, e hòmber a drenta e tèmpel ku Pedro i Huan, “kanando, i bulando, i alabando Dios.” Pedro i Huan a ministrá na esun den maneranan ku a kondusí na e kas di Señor, i e hòmber a bira e disipel deboto di Kristu.

Mi amigunan, tabatin momentunan den mi bida kaminda ami tambe a sinti mi no importante, mi so, deskurashá i invisibel. Mi a sinti manera si mi no tabata pertenesé. Mi a wòrdu batisá i konfirmá un miembro di e Iglesia di Hesu-Kristu di e Santunan di e Delaster Dianan ora mi tabatin19 aña di edat. Un aña despues, mi a aseptá e yamada pa sirbi komo un mishonero di tempu kompletu, pero tabatin hopi kos ku mi no a siña ainda tokante historia di Iglesia.

Na kuminsamentu di mi servisio misional, mi a siña ku tabatin un periodo ku esnan di desendensia afrikano Pretu no tabata permití pa disfrutá di tur e bendishonnan di adorá den e kas di Señor. Siñando esaki pa promé biaha a trese sintimentunan di rabia, konfushon, duda i miedu. E sintimentunan aki tabata asina intenso ku mi abilidat pa rekonosé e Spiritu Santu a bai pèrdí pa un temporada.

Afortunadamente, mi tabatin un kompañero mishonero maravioso, Kevin Vick, kende a ministrá na mi ku amor, pasenshi i bondat. Kada anochi ora e tabata testigu di mi sintimentunan di duda i insertidumbre, e tabata simplemente bisa, Elder Johnson, “mi stima bo.” Despues di mas o ménos dos siman, mi a permití mi mes sinti e amor di Kevin. Mi a haña e kurashi pa hasi orashon na Tata Selestial den e nòmber di Hesu-Kristu. Miéntras mi tabata hasi orashon, mi a wòrdu atraé na sekshon 6 di Doktrina i Kombenionan, versíkulonan 21–23, kual ta bisa:

“Mira, Ami ta Hesu-Kristu, e Yu di Dios. … “Ami ta e lus kual ta bria den skuridat. …

“… Pone bo mente riba e anochi ku bo a sklama na mi den bo kurason, pa bo por sa tokante e bèrdat di e kosnan aki.

“Mi no a papia pas den bo mente konserniente e asunto? Ki testimonio mas grandi bo por tin ku esun di Dios?”

Segun mi tabata lesa, mi a kòrda. Mi a kòrda e dia ku mi a yuna i hasi orashon pa sa ku e Buki di Mormon ta e palabra di Dios i ku José Smith ta e Profeta di e Restourashon. Mi a kòrda kombenionan hasí den e kas di Señor ku ta konektá mi ku Hesu-Kristu na un manera asina personal i íntimo. Mi a sinti di e Salbador su amor, Su mizerikòrdia, i di Su siguransa ku E Iglesia di Hesu-Kristu di Santunan di e Delaster Dianan ta Su reino riba tera i ta nesesario pa prepará nos pa Su Segundo Binida. Pasobra mi a kòrda, mi por a rekonosé atrobe e Spiritu Santu i pa komprondé mas kompletamente ku Hesus ta e Kristu i ami ta Su disipel.

Tin bia nos lo tin preguntanan sin kontesta i sintimentunan di ta menos importante, desanimá, nos so i no ta wòrdu mirá. Sinembargo, mi amigunan, nos mester sigui padilanti ku fe den Hesu-Kristu i kòrda Su palabranan:

“No laga boso kurason bira intrankil.”

“Den mundu boso lo tin tribulashon, ma tene kurashi, Mi a vense e mundu.”

Mi ta un testigu di e realidat aki i di e bendishon primintí di e Salbador.

Pues kiko nos por hasi pa garantisá ku nos ministerio na esun den e manera di Señor ta mas efektivo? Bibando e doktrina di Kristu lo yuda nos. “Bibando e doktrina di Kristu,” manera Presidente Nelson ta deskribí, “por produsí e siklo birtuoso mas poderoso, kreando impulso spiritual den nos bida.

Segun nos ta hasi esfuerso pa biba e leinan mas haltu di Hesu-Kristu … e Salbador ta alsa nos riba e forsa di e mundu kaí aki dor di bendishoná nos ku mas karidat, humildat, generosidat, bondat, disiplina propio, pas i sosiegu.”

“[E impulso spiritual] aki, produsí dor di biba e doktrina di Kristu,” manera Elder Dale G. Renlund ta splika, “no solamente ta poderá e transformashon di nos naturalesa divino den nos destino eterno pero tambe ta motivá nos pa yuda [pa ministrá na] otronan den maneranan apropiá.” Elder Renlund ta kòrda nos ku “e Salbador su trabou ta pa kura [pa hasi nos kompletu]. Nos trabou ta pa stima—pa stima i ministrá di tal manera ku otronan ta wòrdu atraé na Hesu-Kristu.”

Nos abilidat pa biba e doktrina di Kristu lo wòrdu enrikesé dor di estudio diario di e Buki di Mormon i partisipashon semanal di e sakramento. Presidente Nelson a deklará ku e Buki di Mormon “ta siña e doktrina di Kristu … [i] ta proveé ​​e komprondementu mas kompletu i outoridat di e Ekspiashon di Hesu-Kristu ku por wòrdu hañá na kualke kaminda.” Mi ta stima e buki aki. I partisipando den orashon na e ordenansa di e sakramento kada siman lo oumentá nos entendimentu di e Ekspiashon di Hesu-Kristu i proveé ​​renobashon spiritual, konsuelo, i e poder di piedat den nos bida. Kòrda, “den e ordenansanan [di e saserdosio], e poder di piedat ta manifestá,” i e poder aki, kual ta bini di Hesu-Kristu, ta fortalesé nos deseo i nos abilidat pa ministrá na esun.

Mi estudio di e Buki di Mormon i partisipá di e sakramento ta minimalisá sintimentunan di desanimo, ta eskalá mi determinashon pa ministrá na esun den e kaminda di e Salbador, i ta yuda hasi disipulado mi prioridat di mas haltu.

Mi amigunan, mi ta primintí ku segun ku nos ta biba e doktrina di Kristu i ta ministrá na esun den maneranan ku ta kondusí na e kas di Señor, nos lo por sigui padilanti ku fe den Hesu-Kristu asta meimei di preguntanan sin kontesta i sintimentunan di no ta importante, di ta so, deskurashá, i invisibel. Nos lo invitá esun pa bini serka Hesu-Kristu i pa adorá den e kas di Señor pa risibí di Su poder redentor i amor. Den e kas di Señor, nos lo “sinti [e Salbador su] mizerikòrdia. [Nos] lo haña kontesta riba [nos] preguntanan mas pisá. [I nos] lo komprondé mihó e goso di Su evangelio.” Den e nòmber di Hesu Kristu, amèn.