Nan ta Nan Propio Huesnan

E propósitonan prinsipal di e Tata su plan ta pa proveé Su yunan spiritual ku oportunidatnan pa risibí un kurpa físiko, siña “bon for di malu” pa medio di eksperensianan mortal, krese spiritualmente, i progresá eternamente.

Loke Doktrina i Kombenionan ta referí na dje komo “albedrio moral” ta sentral den Dios su plan pa efektuá inmortalidat i bida eterno di Su yunan hòmber i muhé. E prinsipionan esensial aki ta deskribí den Skrituranan tambe komo albedrio i e libertat di eskoho i pa aktua.

E término “albedrio moral” ta instruktivo. Sinónimonan pa e palabra “moral” ta inkluí “bon,” “honesto,” i “virtuoso.” Sinónimonan pa e palabra “albedrio” ta inkluí “ akshon,” “aktividat,” i “obra.” Pues, “albedrio moral” por wòrdu komprondé komo e abilidat i privilegio pa skohe i aktua pa nos mes den maneranan ku ta bon, honesto, virtuoso, i berdadero.

Kreashonnan di Dios ta inkluí tantu “kosnan ku ta aktua i kosnan pa aktua ariba.” I albedrio moral ta e “poder di akshon independiente” diseñá na un manera dibino ku ta empoderá nos komo Dios su yunan pa bira agentenan ku ta aktua i no simplemente ophetonan pa aktua ariba.

E mundu a wòrdu kreá komo un lugá riba kual Tata Selestial su yunan lo por wòrdu pruebá pa wak si nan lo “hasi “tur koskualkier kos ku Señor nan Dios lo manda nan.” Un propósito primario di e Kreashon i di nos eksistensia mortal ta pa proveé nos e oportunidat pa aktua i bira loke Señor ta invitá nos pa bira.

Señor a instruí Enoch:

“Mira esnan aki, bo rumannan; nan ta e obra di mi mes mannan, i mi a duna na nan konosementu, e dia ku mi a krea nan; i den e Hardin di Eden, mi a duna hende su albedrio.

“I na bo rumannan mi a bisa, i a duna mandamentunan ku nan lo stima un na otro, i ku nan lo skohe ami, nan Tata.”

E propósito fundamental pa e ehersisio di albedrio ta pa stima un na otro i skohe Dios. I e dos propósitonan aki ta alineá presisamente ku e promé i di dos gran mandamentunan pa stima Dios ku hinter nos kurason, alma, i mente, i pa stima nos próhimo manera nos mes.

Konsiderá ku ta manda nos—no solamente spièrtá òf konsehá, pero ta manda nos—pa usa nos albedrio pa stima un na otro i skohe Dios. Permití mi sugerí ku den e Skrituranan, e palabra modifikadó “moral” no ta solamente un athetivo pero kisas tambe un direktiva divino tokante kon nos albedrio lo mester wòrdu usá.

Un himno konosí ta titulá “Skohe loke ta Korekto” ku un motibu. Nos no a wòrdu bendishoná ku albedrio moral pa hasi kualkier kos ku nos kier ora nos kier. Mas bien, di akuerdo ku e Tata su plan, nos a risibí albedrio moral pa buska i aktua den konkordansia ku e bèrdat eterno. Komo “agentenan di [nos mes],” nos mester komprometé ku anhelo den bon kousanan, “hasi hopi kosnan di [nos] propio boluntat, i efektuá hopi hustisia.”

E importansia eterno di e albedrio moral ta keda enfatisá den e relato di Skrituranan di e konsilio pre terenal. Lusifer a rebeldiá kontra e plan di e Tata pa Su yunan i buska pa destruí e poder di akshon independiente. Ta signifikante ku e desafio di e diabel tabata enfoká direktamente riba e prinsipio di e albedrio moral.

Dios a splika, “Pues, pasobra … Satanas a rebeldiá kontra mi, i buska pa destruí e albedrio di hende, … Mi a kousa ku el lo wòrdu saká afó.”

E plan egoista di e atversario tabata pa priva e yunan di Dios di e kapasidat pa yega na bira “agentenan pa nan mes” ku lo por aktua ku rektitut. Su intenshon tabata pa konsigná Tata Selestial su yunan pa ta ophetonan ku solamente lo por a aktua ariba.

Presidente Dallin H. Oaks a enfatisá ku e evangelio di Hesu-Kristu ta invitá nos pa tantu sa algu i pa bira algu pa medio di e ehersisio rekto di e albedrio moral. El a bisa:

“Hopi Beibel i Skrituranan moderno ta papia di un huisio final na kual tur persona lo wòrdu rekompensá di akuerdo ku nan aktonan i obranan òf e deseonan di nan kurason. Pero otro Skrituranan ta amplia riba esaki dor di referí ku nos lo wòrdu husgá pa e kondishon ku nos a logra.

“E profeta Nefi ta deskribí e Huisio Final den términonan di loke nos a yega na bira: ‘I si nan obranan tabata impuro e ta nesesario pa nan ta impuro; I si nan ta e ta nesesario ku nan no por biba den e reino di Dios’ [1 Nefi 15:33; énfasis agregá]. Moroni ta deklará, ‘Esun ku ta impuro lo ta impuro ainda; i esun ku ta rekto lo ta rekto ainda’ [Mormon 9:14; énfasis agregá].”

Presidente Oaks a kontinuá: “Di e tipo di siñansanan asina nos por konkluí ku e E huisio final no ta djis un evaluashon òf un resúmen total di aktonan bon òf malu—di loke nos a hasi. E ta un rekonosementu di e efekto final di nos aktonan i pensamentunan—di lokual nos a bira.”

Nos obranan i deseonan so no ta i no por salba nos. “Despues di hasi tur loke nos por,” nos lo rekonsiliá ku Dios solamente pa medio di e mizerikòrdia i grasia disponibel pa medio di e sakrifisio di ekspiashon infinito i eterno di e Salbador.

Alma a deklará, “Kuminsá kere den e Yu di Dios, ku el lo bini pa redimí su pueblo, i ku el lo sufri i muri pa ekspiá pa nan pikanan; i ku e lo lanta atrobe for di e mortonan, kual lo efektuá e resurekshon, pa tur hende por para dilanti dje, pa wòrdu husgá na e delaster dia di huisio, di akuerdo ku nan obranan.”

“Nos ta kere ku pa medio di e Ekspiashon di Kristu, henter humanidat por wòrdu salbá, dor di obediensia na e leinan i ordenansanan di e Evangelio.” Kon agradesido nos lo mester ta ku nos pikánan i akshonnan malu lo no para komo un testimonio kontra nos si di bèrdat nos “nase di nobo,” ehersé fe den e Redentor, arepentí ku “sinseridat di kurason ” i “berdadero intenshon,” i “perseverá te na fin.”

Hopi di nos ta spera ku nos aparensia dilanti e tribunal di e hues eterno lo ta similar na e prosedimentu den un korte di lei mundano. Un hues lo presidí. Evidensia lo wòrdu presentá. Un veredikto lo wòrdu presentá. I probablemente nos lo ta insigur i ku temor te na momentu ku nos sa e resultado final. Pero mi ta kere ku tal karakterisashon ta inkorekto.

Diferente, pero relashoná ku e temornan mortal ku hopi biaha nos ta eksperensiá ta loke e Skrituranan ta deskribí komo “e temor pa Dios” òf “e temor pa Señor.” Distinto na e temor mundano ku ta krea alarma i ansiedat, temor pa Dios ta invitá den nos bida pas, siguridat i konfiansa.

Temor hustu ta enserá un sintimentu profundo di reverensia i asombro pa Señor Hesu-Kristu, obediensia na Su mandamentunan, perspektiva di e Huisio Final, i e hustisia den Su man. Temor pa Dios ta surgi di un komprondementu korekto di e naturalesa divino i mishon di e Redentor, deseo pa someté nos boluntat na Su boluntat, i un konosementu ku kada hòmber i muhé lo bai ta responsabel pa nan propio deseonan mortal, pensamentunan, palabranan, i aktonan riba e Dia di Huisio.

E temor pa Dios no ta un temor pa drenta den Su presensha pa wòrdu huzgá. Mas bien, e ta e perspektiva di finalmente rekonosé kosnan tokante nos mes manera nan ta i manera nan lo ta.

Kada persona ku a biba, ku ta biba awor aki, i ku ainda lo bai biba riba e mundu “lo wòrdu hibá pa komparesé dilanti e Tribunal di Dios, pa wòrdu huzgá dor di djE di akuerdo ku [su] obranan sea nan ta bon òf sea nan ta malu.”

Si nos deseonan tabata rekto i nos obranan bon—na moda di bisa nos a ehersé fe den Hesu-Kristu, hasi i warda kombenionan ku Dios, i arepentí di nos pikanan—e ora ei e tribunal di huisio lo ta plasentero. Manera Enos a deklará, nos lo “para dilanti [e Redentor]; e ora ei [nos] lo wak su kara ku plaser.” I riba e delaster dia nos lo “wòrdu rekompensá den hustisia.”

Kontrali, si nos deseonan tabata pa maldat i nos obranan maligno, e ora ei e tribunal di hustisia lo ta kousa di temor. Nos lo tin un “konosementu perfekto,” “un rekuerdo briante,” i un “sintimentu bibu di [nos] propio kulpa.” “Nos lo no tribi di wak nos Dios; i nos lo ta hopi kontentu si nos lo por a manda e barankanan i e serunan pa kai riba nos pa skonde for di Su presensia.” I riba e delaster dia nos lo “tin [nos] rekompensa di maldat.”

Finalmente, e orei, nos ta nos propio huesnan. Niun hende lo no mester bisa nos unda pa bai. Den Señor su presensia, nos lo rekonosé loke nos a skohe pa bira den mortalidat i sa pa nos mes unda nos mester ta den eternidat.

Komprondé ku e Huisio Final por ta plasentero e no ta un bendishon reservá solamente pa Moroni.

Alma a deskribí e bendishonnan primintí ku ta na alkanse di tur disípulo deboto di e Salbador. El a bisa:

“E signifikado di e palabra restourashon ta pa trese bèk atrobe malu pa malu, òf karnal pa karnal, òf diabóliko pa diabóliko—bon pa loke ta bon; rekto pa loke ta rekto; hustu pa loke ta hustu, mizerikòrdioso pa loke ta mizerikòrdioso.

“… Trata korektamente, husga hustamente, i hasi bon kontinuamente, i si bo hasi tur e kosnan aki e ora ei lo bo risibí bo rekompensa; sí, lo bo tin mizerikòrdia restourá bèk na bo; lo bo tin hustisia restourá bèk na bo; lo bo tin huisio hustu restourá bèk na bo; i lo bo wòrdu rekompensá bék ku loke ta bon.”

Mi ta tèstifiká ku goso ku Hesu-Kristu ta nos Salbador bibu. Alma su promesa ta bèrdat i ta aplikabel pa abo i ami—awe, mañan, i pa tur eternidat. Asina mi ta testifiká den e nòmber sagrado di Señor Hesu-Kristu, amèn.