Tumando riba nos e Nòmber di Hesu-Kristu

Na 2018, na e Universidat di Utah, a krea un puesto di profesor spesial, yamá e “Dr. Russell M. Nelson i Dantzel W. Nelson Distinshon Akadémiko den Sirugia Kardiotorásiko”—kardio, kiermen “kurason,” i torásiko, kiermen “pechu.” E tabata honra Presidente Nelson su trabou importante komo un siruhano di kurason i e sosten ku el a risibí di su defuntu esposa, Dantzel. E puesto di profesor aki tabata pagá dor di un fondo diseñá pa dura te den futuro. E persona selektá pa e tipo di puesto di profesor prestigioso aki ta risibí rekonosementu, sosten di salario, i fondonan pa investigashon.

E promé siruhano skohé pa okupá e puesto di profesor tabata Dr. Craig H. Selzman, un siruhano di kurason talentoso ku no ta miembro di nos iglesia. Na e seremonia pa otorgá e puesto di profesor aki na Dr. Selzman, tabatin hopi huéspet importante presente, inkluyendo Presidente Nelson i su kasá Hermana Wendy W. Nelson. Durante e reunion, Presidente Nelson a papia ku modestia di su karera pionero di siruhano.

E ora ei Dr. Selzman a kompartí kiko a nifiká p’e pa wòrdu nombrá ku e puesto di profesor aki. El a relatá ku kuater dia promé, despues di un dia largu den sala di operashon, el a deskubrí ku un di su pashèntnan mester a wòrdu operá atrobe. E tabata kansá i desepshoná, sabiendo ku e lo tin ku pasa otro anochi den hòspital.

E anochi aki, Dr. Selzman tabatin un kombersashon ku su mes ku a kambia su bida. Na e momentu, ei el a pensa: “Riba djabièrnè, lo mi wòrdu nombrá pa un puesto di profesor ku ta hiba e nòmber di Dr. Nelson. E semper tabata konosí komo un persona ku ta tene su emoshonnan bou di kontrol, trata tur hende ku rèspèt, i nunka ta pèrdè su temperamentu. Awor ku mi nòmber lo ta ligá ku di dje, mi mester purba pa ta mas manera e.” Dr. Selzman tabata un siruhano hopi respetá kaba. Pero e kier a bira mas mihó ainda.

Den pasado, su ekipo di siruhano por tabata konsiente di su kansansio i frustrashon pasobra e por a mustra esaki den su manera i tono di bos. Pero den e sala di operashon e anochi ei, Dr. Selzman a hasi un esfuerso konsiente pa ta spesialmente di sosten i komprensivo pa su ekipo. El a sinti ku esaki a hasi un diferensia i a disidí pa sigui purba pa ta mas manera Dr. Nelson.

Sinku aña despues, Presidente Nelson a hasi donashon di su papelnan profeshonal na e Universidat di Utah. Dignatarionan di e universidat a bini pa gradisí Presidente Nelson formalmente. Durante e evento aki, Dr. Selzman a papia atrobe. Refiriendo na e inisialnan di Presidente Nelson, RMN, el a bisa, “Tin un karakter distintivo ‘RMN’ ku awor ta penetrá den e Divishon di Sirugia Kardiotorásiko na e Universidat di Utah.”,

Den situashonnan frustrante, Dr. Selzman a splika, “Mi ta hasi loke nos ta siña nos praktikantenan pa hasi—enfoká, superé, i hasi e mihó ku bo por. E karakter distintivo aki ta biba den nos tur dia. Nos ta duna spèlchi na tur miembro di e divishon i kada praktikante nobo. Na e parti abou di e spèlchi tin e lèternan ‘RMN.’ E karakter distintivo ‘RMN’ ta fundamental pa nos entrenamentu; nos ta siñé na tur hende. Dr. Selzman intenshonalmente a improvisá su aktitut i aspirashonnan anterior pasobra awor su nòmber tabata ligá na esun di Presidente Nelson.

E serienan di evento ku ta enbolbí Dr. Selzman a pone mi puntra mi mes: “Kon mi a kambia for di dia ku mi a liga mi nòmber ku e nòmber di Hesu-Kristu? Mi a adoptá un karakter distintivo manera Kristu komo resultado? Mi a purba sinseramente pa bira mihó i mas manera E?”

Den Dr. Selzman su eksperensia, nos por mira por lo ménos sinku paralelo na e proseso dor di kua nos ta tuma riba nos mes e nòmber di Hesu-Kristu. Maske e proseso ei ta kuminsá ku boutismo, e no ta kompleto te ora nos ta mas puru i santu i a bira mas manera E.

E promé paralelo ta identifikashon. Dr. Selzman su nombramentu pa e puesto di pofesor yamá Nelson a liga su nòmber na esun di Presidente Nelson, i Dr. Selzman a kuminsá identifiká ku Presidente Nelson. Ora nos tuma riba nos mes e nòmber di Hesu-Kristu, nos ta liga nos nòmber ku di djE. Nos ta identifiká kunÉ. Gustosamente nos ta bira konosí komo kristian. Nos ta rekonosé e Salbador i ta lanta para ku kurashi pa wòrdu kontá komo di djE.

Estrechamente relashoná na identifikashon tin un otro paralelo—memoria. Ora Dr. Selzman ta bai den su ofisina, su wowonan ta fihá na e medalion ku el a risibí ora el a wòrdu nombrá pa e puesto di profesor yamá Nelson. E medalion aki ta kòrdé diariamente di e karakter distintivo RMN. Pa nos, partisipá di e Santa Sena kada siman ta yuda nos kòrda Hesu-Kristu durante siman. Ora nos partisipá di e Santa Sena, nos ta hasi asina den memoria di e preis ku El a paga pa redimí nos. Nos ta hasi kombenio di nobo, pa kòrd’É, rekonosé Su grandesa, i apresiá Su bondat. Nos ta rekonosé repetidamente ku ta solamente den i pa medio di Su grasia nos ta salbá for di morto físiko i spiritual.

Memoria kier men ku nos ta sigui e konseho duná pa e profeta Alma den Buki di Mormon. Nos “ta laga tur [nos] echonan ta pa Señor, i unda ku [nos bai nos] laga esaki ta den Señor; … [nos] ta laga tur [nos] pensamentunan wòrdu dirigí na Señor; … [i nos] ta laga e afektonan di [nos kurason] wòrdu fundá den Señor pa semper.” Asta ora nos ta okupá ku otro asuntunan, nos ta keda konsiente di djE, meskos ku nos ta kòrda nos mes nòmbernan, sin importá riba kiko otro nos ta enfoká ariba.

Un kresementu di kòrda loke e Salbador a hasi pa nos ta un di tres paralelo—imitashon. Dr. Selzman a kuminsá imitá Presidente Nelson i e karakter distintivo RMN. Mi ta kere ku Presidente Nelson su karakter distintivo ta simplemente un manifestashon di su disipulado di Hesu-Kristu di bida largu. Pa nos, mas nos ta identifiká ku i kòrda Hesu-Kristu, mas nos ke ta manera E. Komo Su disípelnan, nos ta kambia pa mihó ora nos enfoká riba djE, mas ainda ku ora nos enfoká riba nos mes. Nos ta hasi esfuerso pa bira mas manera E i buska pa ta bendishoná ku Su atributonan. Nos ta hasi orashon fervientemente pa ta yená ku karidat, e amor puru di Kristu.

Manera Presidente Nelson a siña na aprel: “Segun ku karidat ta bira parti di nos naturalesa, nos lo pèrdè e impulso pa rebahá otronan. Nos lo stòp di husga otronan. Nos lo tin karidat pa esnan di tur ramo di bida. Karidat pa ku tur hende … ta esensial pa nos progreso. Karidat ta e fundeshi di un karakter piadoso.” Banda di karidat, nos ta buska, “kultivá, … i ekspandé” otro donnan spiritual di e Salbador, inkuyendo birtut, integridat, pasenshi, humildat, i diligensia.

Imitá Hesu-Kristu ta hiba nos na un di kuater paralelo—alineashon ku Su propósitonan. Nos ta uni kunÉ den Su obra. Komo un siruhano, Dr. Nelson tabata konosí komo un maestro, un sanadó, i un investigadó. E spèlchi usá den Dr. Selzman su divishon ta enfatisá e esfuersonan aki, presentando e palabranan siña, sana, i deskubrí. Pa nos, parti di tuma riba nos mes e nòmber di Hesu-Kristu ta enbolbí alinea nos metanan ku di djE di manera boluntario, intenshonal, i entusiasmá. Nos ta uni na djE den Su obra ora nos “stima, kompartí, i invitá.” Nos ta uni na djE den Su obra ora nos ta ministrá na otronan, spesialmente esnan vulnerabel i esnan ku a wòrdu heridá, kibrá, òf aplastá pa nan eksperensianan terenal.

Asina ku nos ta tuma riba nos mes e nòmber di Hesu-Kristu mas kompletamente pa medio di identifikashon, memoria, imitashon, i alineamentu. Hasiendo e kuaternan aki ta hiba nos na un di sinku paralelo—poderashon. Nos tin akseso na poder i bendishonnan di Dios den nos bida. E puesto di profesor Nelson ta proveé Dr. Selzman rekonosementu i fondonan di sosten ku e ta usando pa kambia e kultura den su divishon. E ta apliká e “investidura di poder” aki pa yuda otronan. Den un manera similar, ora nos tuma riba nos mes e nòmber di e Salbador, nos Tata Selestial ta bendishoná nos ku Su poder pa yuda nos kumpli ku nos mishon den mortalidat.

Ora nos hasi kombenionan adishonal ku Dios, nos ta tuma riba nos mes e nòmber di Hesu-Kristu mas kompletamente. Konsekuentemente, Dios ta bendishoná nos ku mas di Su poder. Manera Presidente Nelson a siña: “Kada persona ku hasi kombenionan den pilanan boutismal i den tèmpelnan—i warda nan—tin mas akseso na e poder di Hesu-Kristu. … E premio pa warda e kombenionan ku Dios ta poder selestial … ku ta fortalesé nos pa wanta tur tribulashon, tentashon, i angustia mihó.”

Nos ta bira spiritualmente mas reseptivo. Nos tin mas kurashi pa konfrontá sirkunstansianan ku ta parse imposibel. Nos ta wòrdu fortalesé mas den nos resolushon pa sigui Hesu-Kristu. Nos ta arepentí lihé i ta regresá na djE ora nos transgredí. Nos ta bira mihó den kompartí Su evangelio ku Su poder i outoridat. Nos ta yuda esnan den nesesidat miéntras nos ta ménos huisioso, muchu ménos huisioso. Nos ta mantené un remishon di nos pikánan. Nos tin mas pas, i nos ta mas alegre pasobra nos por regosihá semper. Su gloria lo ta rondó di nos, i Su angelnan lo tin vigilansia riba nos.

E Salbador ta invitá nos, “Bini na e Tata den mi nòmber, i na e debido tempu risibí di su plenitut.” Mi ta urgi boso pa hasi esaki. Bini na nos Tata Selstial. Tuma riba boso mes e nòmber di Hesu-Kristu. Identifiká kunÉ. Rekord’É semper. Hasi esfuerso pa bira manera E. Uni na djE den Su obra. Risibí Su poder i bendishonnan den boso bida. Graba Su nòmber den boso kurason, boluntariamente i intenshonalmente. Esaki ta duna boso “posishon” dilanti Dios i kualifiká boso pa e Salbador Su defensa na boso bienestar. Boso lo bira un heredero eksaltá den e reino di nos Tata den Shelu, un heredero konhunto ku Su Primogénito, nos Salbador i Redentor stimá.

E ta bibu. Mi sa esei apsolutamente. E stima boso. El a duna Su bida pa boso. E ta supliká boso pa bini na e Tata pa medio di djE. Den e nòmber di Hesu-Kristu, amèn.