Risibí Su Regalo

Dunamentu di regalo ta un kustumber sosial ku ta abarká tur kultura, sivilisashon i milenio. Durante tempu, hende a duna regalonan na otro pa fortalesé relashonnan, ekspresá amor i gratitut, i selebrá eventonan importante manera kasamentu, kumpleaño, i dianan di fiesta. I sernan humano no ta e únikonan di Dios Su kreashonnan ku ta duna regalo na otro! Entre otro hopi ehèmpel ku nos por indiká, pinguino ta konosí pa duna piedranan chikitu briante na nan prospekto kompañeranan, i bonobos (un primu di e chimpansé) ta duna fruta pa ekspandé nan sírkulo di amistat.

Kua regalonan abo a yega di duna? Pensa di un tempu ora bo a haña—òf a krea—e regalo perfekto pa un persona ku bo ta stima. Simpelmente bo tabata sa ku ku e regalo tabata esaktamente loke e ser stimá aki tabata ke i algu ku nan lo a apresiá. Kiko e regalo tabata? E tabata pa bo mama? un amigu? bo yu? uun maestro? bo tawela? Kon bo a sinti bo ora bo a haña e regalo aki? Kon bo a sinti ora bo a pensa di e persona aki ku bo stima habriendo e regalo? Similarmente, ki ora un persona a duna abo e regalo perfekto, i kon tabata pa a risibié?

Tempu mi tabatin mas o ménos shete aña, bibando ku mi mayornan na Arabia, un pelíkula pa mucha yamá {Chitty Chitty Bang Bang a sali. E pelíkula ta tokante un outo mágiko ku por kore su mes, drif riba awa i asta bula! Mi tabata sa ku na kas na Inglatera nan a traha un outo di hunga miniatura meskos ku Chitty Chitty Bang Bang, i o, mi tabatin masha deseo di tin unu! Bo por a trèk un palanka, i e outo di hunga su alanan lo sali afó! Mi tata a bai un biahe di negoshi na Inglatera i a puntra si mi tabata ke pa e trese kualke kos bèk pa mi, i mi a bisé kuantu gana mi tabatin di tin un dje outonan Chitty Chitty Bang Bang.

El a bini bèk for di su biahe, i niun outo no a apraresé. Mi tabata masha tristu i a pensa ku e mester a lubidá. Pero mas o ménos di 10 dia despues tabata mi kumpleaño i un pakete chikitu, bunita lorá, tabata warda riba mi. Ku gran antisipashon, i apénas sin tribi di spera muchu hopi, mi a habri e regalo i a haña mi outo. Mi tabata asina felis ku mi a yora. Mi a trèk na e palanka, i e alanan a sali afó, meskos ku e outo den e pelíkula! Kon mi a gradesí mi tata pa e regalo tan apresiá aki. Mi a hunga ku e outo ei pa añanan largu i a ward’é pa hopi aña mas. Mi ta pensa ku mi tata a gusta pa duna mi e outo ei mes tantu ku ami a gusta pa risibié.

Nos por pensa di dunamentu di regalo komo algu ku tin tres parti:

1. E dunamentu di e regalo, kaminda e dunadó ta selektá, traha, òf ta prepará e regalo i ta presenté na esun ku e stima. Esaki ta envolví intenshon bon pensá di parti di e dunadó pa duna algu signifikante.

2. E aseptamentu i habrimentu di e regalo, ora e risibidó tuma e regalo for di e dunadó—hopi biaha ku ekspreshonnan di sorpresa, gratitut, i emoshon—promé habri’é, kitando e streki i habriendo e pakete pa deskubrí kiko e regalo ta.

3. I despues tin kisas e parti mas importante, e risibimentu di e regalo. Risibí un regalo duná sinseramente ta muchu mas ku aseptá i despues habri’é. E ta asta, mas ku rekonosé e balor di e regalo i ekspresá gratitut na e dunadó. Pa berdaderamente risibí un regalo, nos ta yega na balor’é pa nos mes hasi bon uso di dje den nos bida, i despues kòrda ku gratitut na e dunadó.

Risibí un regalo no ta pasivo pero un proseso untenshonal i signifikativo ku ta bai mas leu ku meramente habri un pakete. Pa risibí ta pa apresiá i konektá ku tantu e regalo i e kurason di e dunadó den un manera ku ta fortalese e vínkulonan entre e dunadó i e risibidó. Pensando riba e outo di hunga ei ta trese bèk un kantidat di rekuerdonan presioso, mientras mi ta sinti un biaha mas mi tata su amor i kuido profundo pa mi, representá pa e regalo ei i otro aktonan generoso inkontabel.

Nos Tata Selestial tin innumerabel donnan di lus i bèrdat prepará pa basha riba kada un di nos, Su yunan stimá. Nan ta kore for di nos Dunadó Abundante manera un fuente den desierto for di Su kurason benevolente. “Tur don bon i tur don perfekto ta bini di ariba, i ta baha for di e Tata di lusnan.” Den e vínkulo di nos kombenio ku e Tata, E ta semper e Dunadó i nos ta e risibidó humilde.

Pero nos lo no por a risibí nada sin e regalo di mas grandi di tur e Tata Su regalonan, Su Lamchi stimá, Su Yu, Hesu-Kristu. Tur di e regalonan di nos Tata ta bini for i ta duná pa e Salbador Su sakrifisio boluntario den Getsémani i riba e krus, i Su Resurekshon triunfante. Hesu-Kristu, nos Redentor mizerikordioso, ta e regalo supremo di nos Tata di lusnan. “Den e don di su Yu, Dios a prepará un kaminda mas ekselente.”

Lo mi gusta pa papia tokante un regalo ku ta abarká tur kos di bèrdat eterno ku ta sostené nos abilidat pa risibí tur otro kos ku nos Tata ke dota nos kuné—un regalo esensial di konosementu ku, ora e wòrdu aseptá kompletamente i risibí profundo den e alma ta kontekstualisá e goso i difikultatnan di bida, i nos preguntanan sin kontesta: E ta ku nos ta realmente yunan di Dios. E Bèrdat ei ta asombroso! Impreshonante! I e no ta figurativo

Imagina bo ta tende biaha esaki pa e promé bia! Bo ta realmente Su yu muhé stimá. Bo ta realmente Su yu hòmber presioso. I e kaminda ku bo ta riba dje ta Su plan ta Su plan di felisidat. Ku Su amor omnisiente, E sa eksaktamente ken bo ta promé bo a wòrdu mandá na mundu, i loke bo a eksperensiá te asina leu den bo bida mortal, i E tin plannan mizerikordioso pa bo kada mañan. I o, kon E ta anhelá pa un dia bo ta di regreso na djE, pa risibí e intenshon supremo di tur Su bunita donnan, bida eterno kunÉ.

E pregunta no ta si e don di bèrdat aki ta real pero si nos lo deskubrié i risibi‘é. E don a wòrdu dramá riba nos kaba pa E Tata. E preis pa e propósito final di e don aki a wòrdu pagá kaba pa e Salbador. Pero si bo a wòrdu siñá esaki, a bisa esaki, a kanta e bèrdat aki pa hopi aña, kisas e milager asombroso di dje a bira vago pa hopi tempu i bo no ta sinti su poder i pas mas.

Si e don impagabel di e entendimentu—i tur e bondat, pas, i speransa ku ta flui for di dje—ta keda sin wòrdu aseptá, será, i sin wòrdu risibí, ki un desperdisio teribel pa nos! Ki tristesa pa e Dunadó! “Pasobra di kiko e ta benefisiá un hende si un regalo wòrdu ortorgá na dje i e no risibí e regalo? Tende, e no ta regosihá den loke a wòrdu duná na dje, tampoko e ta regosihá den esun ku ta e dunadó di e regalo.”

Mi ta invitá bo pa risibí sea pa e di promé biaha òf mas ampliamente ku nunka promé, e realisashon magnífiko ku berdaderamente bo ta yu stimá di Dios. Bo mester deshasí di e streki, ranka e papel di envoltura, habri e kaha, i risibí aktivamente ku humildat gradesido un entendimentu berdadero, puru di e bèrdat fundamental aki. E Spiritu Santu por duna testimonio na bo kurason ku bo ta enberdat un yu di Esun Altísimo.

Ora bo yama bon biní na e realidat mahestuoso aki den bo alma i sinti konsuelo i e emoshon di dje, henter bo manera mira kos ta kambia. Bo por sinti Su amor, tende Su stèm, i rekonosé Su man, sin importá kiko ta pasando, òf no ta pasando, den bo bida. Bo por definí atrobe kon bo ta mira bo mes i otronan. Bo vínkulo di kombenio ku bo Salbador ta bira asta mas fuerte, i dor di e lèns di e don spesial aki, bida ta mustra mas briante, bunita, i ku speransa.

Por fabor, lo bo hasi orashon pa komprondé si berdaderamente bo ta risibiendo e konosementu tranformadó aki profundamente den bo alma? Lo bo aseptá e don por fabor? Lo bo hasi mas profundamente, mas libremente, mas abundantemente ku bo a yega di hasi promé—i hasiendo asina bendishoná ki tur otro donnan ku ta bini ku ne?

Lo bo ta puntrando, “Kiko mi tin ku hasi pa risibí e don aki di Dios?” Awèl, aktualmente, nada. E ta un don di e Dunadó. E ta simplemente un echo. Djis lag‘e paden. Bo ta Su Yu. Bo ta stimá pa E. No komplik’é. No blòkia e risibimentu di e don aki ku pensamentunan ku di un òf otro manera bo no meresé. E realidat ta, nos niun no ta “meresedó”—tur e donnan di e Tata ta wòrdu risibí solamente pa medio di e méritonan, mizerikòrdia, i grasia di e Santu Mesias, pero kon E ta anhelá masha tantu pa kada un di Su yunan risibí nan! Despues, ora bo komprendementu nobo òf renobá baha riba bo, regosihá den duna danki na e Dunadó di e don aki.

For di ku mi a haña mi kreensia durante mi 20 piko aña, mi a spièrta na e realisashon ku di bèrdat mi ta un yu hòmber di Dios. Mas mi ta internalisá e don aki, mas profundo mi sa ken mi ta i kon kompletamenté stimá mi ta. Algun kos ku a yuda mi krese den entendimentu ta e palabranan di Skritura, mi bendishon patriarkal, adorashon den tèmpel, sirbi otronan, ekspresá gratitut i orashon sagrado ku mi Tata. Mi ta maraviá kon mi tristesa, doló, i pena anterior den bida a wòrdu transformá i kalmá, si mi a tabata konosé e bèrdat buni ta aki.

Moroni ta ekshortá nos pa “no ninga e donnan di Dios,” pero pa “bini na Kristu, i tene na tur bon don.” Bo por bini na Kristu ku konfiansa den Su amor bondadoso i risibí tur Su donnan di goso, pas, speransa, lus, bèrdat, revelashon, konsementu, i sabiduria—ku bo kabes na laira, bo brasanan ekstendé, i bo mannan habrí, kla pa risibí. Bo por risibí e donnan aki pasobra bo ta sigur i firme den e konosementu ku bo ta un yu muhé stimá di Dios, bo ta un yu hòmber kerí di Dios, i El a regalá bo Su Yu santu i perfekto pa redimí bo, hustifiká bo, i santifiká bo.

Bo ta un yu di Dios. Esaki no ta solamente un kanshon bunita ku nos ta kanta. Lo bo akseptá, por fabor, habri, i risibí e don di konosementu i entendimentu aki serka djE ? Lo bo tené serka manera e tesoro presioso ku e ta? Risibí e don aki atrobe, òf kisas risibié di bèrdat pa di promé biaha, i lag‘é transformá tur aspekto di bo bida. Esaki ta e kaminda di mas ekselente ku Dios a prepará pa bo pa medio di e don di Su Yu. Bo ta eksistí realmente pa bo tin goso! Den e nòmber di Hesu Kristu, amèn.