Mi Amor pa e Salbador Ta Mi “Pakiko”

Bo a yega di tuma nota ku nos kerido profeta, Presidente Russell M. Nelson, kontinuamente ta ekstendé invitashonnan na nos? No ta nada straño ku el a invitá nos pa studia i meditá riba e mensahenan kompartí durante e dos último konferensianan. Na aprel 2024, el a bisa, “Mi ta spera ku durante e próksimo lunanan boso lo studia e mensahenan di e konferensia aki.” Despues, na òktober 2024, el a bisa: “Mi ta urgi boso pa studia e mensahenan [di e oradornan]. Usa nan komo un tèst di tornasol di loke ta bèrdat, i loke no ta, durante e siguiente seis lunanan.”

E invitashonnan aki por wòrdu agregá na e invitashonnan profétiko ku nos a risibí durante nos bida, inkluso i spesialmente esnan ku nos a risibí den añanan resien. Nos por sinti òf pensa ku e invitashonnan aki ta un otro kos ku nos mester añadí na nos lista di kosnan ku nos mester hasi simplemente pasobra nos a wòrdu invitá òf a pidi nos pa hasi esaki. Pero por tin mas kos ku esaki?

Pensando riba esaki i riba tur e invitashonnan ku nos a risibí, mi a kòrda riba un kos ku mi a siña i a disidí hopi tempu pasá. Mi ta purba di hasi e kosnan aki, kual ta esensial pa mi pasobra mi ta stim’É; Mi ta stima nos Salbador. Esaki ta e motibu real i di mas poderoso pakiko mi ta hasi loke mi ta hasi, i despues konektá ku esaki ta mi amor pa boso, mi rumannan.

Komo boso ruman, mi ta spera ku boso ta konsiderá mi palabranan komo un invitashon sinsero pa buska pa komprondé e oportunidat pa konektá tur kos ku nos ta hasi ku nos amor pa e Salbador.

Hasiendo esaki lo yuda nos komprondé e berdadero “pakiko” tras di tur loke nos ta hasi komo disipelnan di e Salbador. Esaki lo yuda nos fortalesé nos konekshon di kombenio ku Dios, komprondiendo Su bèrdatnan divino i eterno—Su bèrdatnan eterno i apsoluto ku nunka lo kambia. Bèrdatnan eterno manera “Pasobra Dios a stima mundu asina tantu, ku El a duna Su Úniko Yu, pa ken ku kere den djE no bai pèrdí, ma tin bida eterno.”

Ta interesante ku tin biaha nos ta hasi kosnan ku nos a hasi konsistentemente te na e punto ku nan a bira tradishon, anto nos ta permití e tradishonnan òf aktividatnan aki na dikta nos esfuersonan pa edifiká fe den Hesu-Kristu. Ta parse ku nos ta hasi e kosnan aki pasobra nos a hasi nan pa hopi aña, sin konsiderá nan impakto riba nos konekshon di kombenio ku e Salbador.

Den nos mundu, nos ta konsentrá nos mes riba loke nos ta hasi i riba kumpli ku nos tareanan i metanan. Den e ambiente spiritual aki, nos tin e oportunidat pa bai mas leu ku djis hasi kosnan òf logra metanan dor di komprondé dikon nos ta hasiendo nan. Si nos por komprondé i konektá ku e motibu tras di nos akshonnan ta relashoná ku nos amor pa e Salbador i nos Tata Selestial, dor di probechá di e oportunidatnan aki nos lo komprondé ku ounke hasi kosnan hustu manera tin aktividatnan òf tradishonnan di Iglesia i apropiadamente hasi nan ta un bon kos, tòg, ora nos konektá nan ku e “pakiko,” nos lo ta bendishoná pa komprondé e motibu. E no lo ta djis hasi kosnan bon òf hasié korekto; nos tambe lo hasié korekto.

Por ehèmpel, ora bo ta pone bo meta pa lesa Skritura, hasi orashon sinseramente, òf prepará un aktividat pa bo famia òf bario, bo meta real ta djis pa kumpli ku e tareanan aki? Òf ta e akshonnan aki ta e medio, e hèrmèntnan na bo disposishon, pa alkansá e meta berdadero? E intenshon ta djis pa tene un aktividat pasobra nos a hasié pa hopi aña i despues marka e kuadro ku nos a kumpli kuné? Òf, un biaha mas, ta esakinan ta e medionan ku nos ta usa pa siña, pa sinti i pa konektá ku e Salbador?

Por fabor no malkomprondé mi punto tokante tin aktividat i tradishonnan òf pone metanan i traha duru pa logra nan; no tin nada malu den esaki. Sin embargo, mi ta invitá boso pa habri boso kurason i mente pa e oportunidat i bendishon di komprondé dikon nos ta hasi e kosnan aki i kon nos ta praktiká nos religion.

Un ehèmpel prinsipal di tradishonnan sentrá riba Kristu ta e desafio ku Presidente Dallin H. Oaks a ekstendé na nos tur na nòmber di e promé presidensia. Presidente Oaks a bisa: “Miéntras nos ta drenta e aña nobo aki, laga nos prepará pa un selebrashon di Pasku di e sakrifisio ekspiatorio di Hesu-Kristu. … No ta importá loke otronan ta kere òf hasi, nos mester selebrá e Resurekshon di nos Salbador bibu dor di studia Su enseñansanan i yuda establesé tradishonnan di Pasku di Resurekshon den nos sosiedat en general, spesialmente den nos propio famianan.” Manera bo por mira, e no ta djis un invitashon pa tene tradishonnan. Na lugá di esei, nos ta usa e tradishonnan aki komo un medio pa siña mas tokante e Salbador i pa kòrda riba Su Resurekshon.

Mas nos por konektá e rason ku nos amor pa e Salbador, mas nos lo por risibí loke nos mester òf ta buskando. Presidente Nelson a bisa, “Kualke pregunta òf problema ku bo tin, e kontesta ta semper hañá den e bida i enseñansanan di Hesu-Kristu.” I despues el a ekstendé su invitashon: “Siña mas tokante di Su Ekspiashon, Su amor, Su mizerikòrdia, i Su evangelio restourá di sanashon i, progreso. Bira na djE! SiguiÉ!”

Skudriñá esaki den boso kurason i mente: Boso ta kere ku invitashon di Presidente Nelson tabatin e intenshon di yuda nos prepará un lista di kontrol kaminda nos lo akumulá mas konosementu i kompletá tareanan pa asina nos por marka su invitashon for di nos lista di tareanan ku nos mester hasi? Òf e ta invitá nos pa konsiderá e aspektonan di e bèrdatnan i prinsipionan eterno aki komo un oportunidat pa komprondé e “pakiko” i konektá e kombenio di amor di e Salbador pa nos ku nos biahe di disipulado pa henter bida?

Laga mi ilustrá e prinsipio ku mi ta trata di transmití. Un opshon, ku probablemente ta ekstremo, por ta pa lesa tur e mensahenan di e konferensia, i despues, ora mi ta kla, lo mi kontrolá e invitashon aki for di mi lista di kosnan pa hasi sin hasi nada otro ku loke mi a lesa. Mi ta komprondé ku esaki ta un kaso ekstremo, pero e no ta ireal. Probablemente, hopi ta na sierto momento entre esaki i e ideal.

E invitashon ta pa studia i meditá riba e mensahenan di e konferensia general i usa nan pa determiná i komprondé kiko kada un di nos por hasi pa mehorá.

Ora nos aseptá e invitashon, komprondé e “pakiko” tras di e invitashon, nos lo tin mas oportunidat pa bira mas serka di e Salbador. Nos lo kuminsá komprondé ku pasobra mi ta stima e Salbador, mi ke siña mas tokante di djE dor di studia e palabranan di e profetanan bibu. I pasobra mi ta stima mi próhimo tambe, lo mi kompartí e enseñansanan di profetanan, videntenan, i reveladónan ku otronan, kuminsando ku mi sernan kerí.

Den tur dos kaso bo ta hasi loke ta korekto. Den un di nan, e meta ta pa usa e medionan ku nos Tata Selestial i e Salbador a duna nos, kual ta e mensahenan kompartí durante e konferensia general. E di dos vershon ta enserá e bendishon profundo di haña un bista di e motibunan ku ta basa esaki, ofresé un kaminda pa komprondé bèrdatnan eterno i e bendishonnan primintí na tur ku ta pone e enseñansanan i bida di nos Salbador, Hesu-Kristu, komo e punto sentral di nan bida.

Rumannan stimá, mi ta spera ku boso por sinti i mira e importansia di konektá nos akshonnan ku nos amor pa e Salbador. Den un mundu globalisá, hopi hende lo purba influensiá bo i, si ta posibel, laga bo kere ku algun bèrdat fundamental di e evangelio restaurá di Hesu-Kristu no ta nesesario. E bosnan aki ta kuminsá ku e bèrdat esensial di e nesesidat di un restorashon den e último dianan aki, inkluyendo e nesesidat di tin e reino di Dios riba tera, representá pa e Iglesia di Hesu-Kristu di e Santunan di Delaster Dianan restourá.

Boso por tende hende ta insistí ku solamente un relashon personal òf un entendimentu ku e Salbador ta sufisiente i ku religion òf e Iglesia restourá no ta nesesario òf no ta esensial. Mi ta invitá boso pa ta pokopoko pa konsiderá òf asta ta imun pa wòrdu influensiá pa e ideanan engañoso aki i pa ta mas lihé pa kòrda loke e Salbador a bisa i siña nos for di tempu antiguo—kuminsando ku e amor di nos Tata Selestial i Hesu-Kristu pa nos i konektando nos amor pa nan komo e motibu pa sigui nan.

Dios e Tata i Su Yu a bini i a papia ku José Smith pa restourá e Iglesia di Hesu-Kristu i pa inisiá e dispensashon di e plenitut di tempu, Su Reino riba tera. P‘esei, E Iglesia di Hesu-Kristu di e Santunan di e Delaster Dianan ta e medio establesé dor di Tata Selestial pa nos haña akseso na kombenionan ku ta hasi nos kapas pa nos bai kas bèk. Pues, nos mester di mas ku djis un relashon personal ku nos Tata Selestial i Su Yu; nos mester di ordenansanan esensial di e saserdosio pa medio di kual nos ta hasi kombenionan ku Nan. Esaki ta duna nos un konekshon di kombenio ku nan i ta duna nos akseso na nan amor di kombenio, hasiendo posibel pa nos alkansá e reino di gloria di mas haltu prepará pa esnan ku ta sinsero i fiel na nan kombenionan.

Ku tur e energia di mi alma, mi ta duna testimonio di e realidat i divinidat di nos Salbador, Hesu-Kristu. E stima boso. E sa kiko ta pasando den boso bida. Su brasa ta habrí, i ta ekstendé e invitashon: “Bini serka mi, … i lo mi duna boso sosiegu.”

Mi ta stima e Salbador, i mi amor p’E ta mi “pakiko.” Den e nòmber di Hesu Kristu, amèn.