Yudansanan Divino pa Mortalidat

Pa medio di e profeta José Smith, Señor a revelá algun kos tokante nos bida preterenal. Einan, nos a eksistí komo yunan spiritual di Dios. Pasobra Dios tabata deseá pa yuda Su yunan progresá, El a disidí pa krea un mundu na unda nos por risibí un kurpa, siña dor di eksperensia, desaroyá atributonan divino, i wòrdu probá pa wak si nos lo warda Dios Su mandamentunan. Esnan ku kualifiká lo “tin gloria oumentá riba nan kabes pa semper hamas” (Abraham 3:26).

Pa establesé e kondishonnan di e plan divino aki, Dios a skohe Su Uniko Yu pa ta nos Salbador. Lusifèr, kende su sugerensia alternativo lo a destruí e albedrio di hende, a bira Satanas i a wòrdu “bentá abou.” Saká afó pa mundu i nengá e privilegio di bida mortal, Satanas a wòrdu permití pa purba “pa gaña i hasi hende siegu, i hiba nan koutivo na su boluntat, asta mes tantu ku no ke skucha [Dios Su] stèm” (Moises 4:4).

Esensial pa Dios Su gran plan pa kresementu mortal di Su yunan tabata pa nan eksperensiá “oposishon den tur kos” (2 Nefi 2:11). Meskos ku nos múskulonan físiko no por wòrdu desaroyá òf mantené sin resistensia kontra e lei di gravedat, asina kresementu mortal ta rekerí nos pa tin resistensia kontra Satanas su tentashonnan i otro oposishonnan mortal. Mas importante pa nos krsementu spiritual ta pa skohe entre bon i malu. Esnan ku a skohe bon lo progresá pa nan destino eterno. Esnan ku a skohe malu—manera tur lo hasi den vários tentashon di mortalidat—lo tin mester di yudansa pa salbashon, kual un Dios amoroso a diseñá pa proveé.

Sin duda, Dios Su yudansa mortal mas fuerte tabata ku El a proveé un Salbador, Hesu-Kristu, ku lo sufri pa paga e preis i duna pordon pa pikánan pa kual a arepentí. E Ekspiashon mizerikordioso i glorioso ei ta splika dikon fe den Señor Hesu-Kristu ta e promé prinsipio di evangelio. Su Ekspiashon “ta efektuá resurekshon di e mortonan” (Alma 42:23, i e “ta ekspiá pa e pikánan di e mundu” (Alma 34:8, kitando tur nos pikánan di kual nos a arepentí i dunando nos Salbador poder pa yuda nos den nos enfermedatnan mortal.

Mas leu ku kita pikánan kometé i wòrdu pordoná, e plan di un Tata den Shelu amoroso ta proveé hopi otro donnan pa protehá nos, inkluso protehá nos for di hasi piká na promé lugá. Nos bida mortal semper ta kuminsá ku un tata i un mama. Idealmente, tur dos ta presente ku diferente talento pa guia nos kresementu. Si no ta asina, nan ousensia ta un parti di e oposishon ku nos mester vense.

E plan di Tata Selestial ta proveé otro yudansanan pa guia nos dor di nos hornadanan mortal. Lo mi papia di kuater di esakinan. Por fabor no tene mi na mi kantidat di kuater, pasobra e yudansanan aki ta traspasá otro. Mas ainda, tin otro protekshonnan mizerikordioso huntu ku esunnan aki.

Di promé, lo mi papia di e Lus òf Spiritu di Kristu. Den su gran siñansa den e buki di Moroni, Moroni ta sita e siñansa di su tata ku “e Spiritu di Kristu ta wòrdu duná na tur hende, pa e por konosé bon for di malu” (Moroni 7:16 Nos ta lesa e mesun siñansa aki den revelashonnan moderno:

“I e Spiritu ta duna lus na tur hende ku ta bini na mundu; i e Spiritu ta iluminá tur hende den e mundu, ku ta skucha na e stèm di e Spiritu” (Doktrina i Kombenionan 84:46).

Atrobe: “Pasobra mi Spiritu ta mandá den e mundu pa iluminá esnan humilde i abatí, i pa kondenashon di esnan malbado” (Doktrina i Kombenionan 136:33.

Presidente Joseph Fielding Smith a splika e Skrituranan aki: “Señor no a laga hende (ora nan nase den e mundu aki) indefenso, buskando pa haña e lus i bèrdat, pero kada hende … ta nase ku e derechi di risibí e guia, e instrukshon, e konseho di e Spiritu di Kristu òf Lus di Bèrdat.”

E di dos di e asistensianan grandi ku Señor ta proveé ​​pa yuda nos skohe loke ta korekto ta un grupo di direkshonnan interrelashoná den e Skrituranan komo parti di e plan di salbashon (plan di felisidat). E instrukshonnan aki ta mandamentunan, ordenansanan, i kombenionan,

Mandamentunan ta definí e kaminda ku nos Tata Selestial a marka pa nos pa progresá te na bida eterno. Hende ku imaginá mandamentunan komo e manera ku Dios ta disidí ken pa kastigá ta faya pa komprondé e propósito di Dios Su plan amoroso di felisidat. Riba e kaminda ei, nos por logra gradualmente e relashon nesesario ku nos Salbador i ta kualifiká pa un oumento di Su poder pa yuda nos riba nos kaminda pa e destinashon ku E ta deseá pa nos tur. Nos Tata Selestial ta deseá pa tur Su yunan regresá na e reino selestial, kaminda Dios i nos Salbador ta biba, i pa tin e tipo di bida manera esnan ku ta biba den e reino di gloria selestial aki.

Ordenansa i kombenionan ta parti di e lei ku ta definí e kaminda pa bida eterno. Ordenansanan, i e kombenionan sagrado ku nos ta hasi ku Dios pa medio di nan, ta pasonan rekerí i baranan di guia esensial riba e kaminda. Mi gusta pa pensa di e ròl di kombenionan komo e manera pa demostrá ku den Dios Su plan, Su bendishonnan di mas haltu ta wòrdu duná na esnan ku ta primintí adelantá pa warda sierto mandamentunan i ku ta warda e promesanan ei.

Otro yudansanan duná di Dios pa skohe bon ta e manifestashonnan di e Spiritu Santu. E Spiritu Santu ta e di tres miembro di e Deidat. Su funshon, definí den Skritura, ta pa testifiká di e Tata i e Yu, pa siña nos, pa trese tur kos na nos rekuerdo, i pa guia nos den tur bèrdat. E Skrituranan ta inkluí hopi deskripshon di e manifestashonnan di e Spiritu Santu, manera un testimonio spiritual na kontesta di un pregunta tokante e bèrdat di e Buki di Mormon. Un manifestashon no tin di wòrdu konfundí ku e don di e Spiritu Santu, ku ta wòrdu konferí despues di boutismo.

Un dje yudansanan di mas signifikante di Dios pa Su yunan fiel ta e don di e Spiritu Santu. E importansia di e don aki ta evidente den e echo ku e ta wòrdu konferí formalmente despues di arepentimentu i boutismo pa awa, “i despues [e Skrituranan ta splika] ta bini un remishon di boso pikánan pa medio di kandela i pa medio di e Spiritu Santu.” (2 Nefi 31:17). Personanan ku tin e remishon di pikánan aki—i despues regularmente ta renobá nan limpiesa spiritual [puresa] pa medio di arepentimentu diario i biba konforme e kombenionan ku nan a hasi pa medio di e ordenansa di e sakramento—ta kualifiká pa e promesa ku e Spiritu Santu, e Spiritu di Señor, “por ta semper … ku nan” (Doktrina i Kombenionan 20:77).

Pues, Presidente Joseph F. Smith a siña ku e Spiritu Santu lo “iluminá e mente di e hendenan tokante e kosnan di Dios, pa konvensé nan na e tempu di nan kombershon di a hasi e boluntat di e Tata, i pa tin den nan un testimonio duradero komo un kompaño durante bida, aktuando komo e guia sigur i safe den tur bèrdat i yena nan tur dia ku goso i alegria, ku un disposishon pa hasi bon na tur hende, pa sufri e malu na lugá di hasi malu, pa ta amabel i mizerikordioso, soportá ku pasenshi i tin karidat. Tur ku ta poseé e don balioso aki, e perla di gran balor aki, tin un set kontinuo pa rektitut. Sin e yudansa di e Spiritu Santu,” Presidente Smith a konkluí, “ningun ser mortal por kana den e kaminda stret i smal.”

Ku tantu yudansa poderoso na nos alkanse pa guia nos den nos hornadanan mortal, ta desepshonante ku asina hopi ta keda sin preparashon pa nan reunion planiá ku nos Salbador i Redentor, Hesu-Kristu. Su parábola di e dies bírgen, ku a papia di dje asina frekuentemente den e konferensia aki, ta sugerí ku di esnan invitá pa topa kunÉ, solamente mitar lo ta prepará.

Nos tur konosé ehèmpelnan di esnan no prepará: mishoneronan regresá ku a interumpí nan kresementu spiritual pa periodonan di inaktividat, hubentut ku a pone nan kresementu spiritual na peliger dor di no partisipá na enseñansa di Iglesia i su aktividatnan, hòmbernan ku a posponé nan ordenashon pa e Saserdosio di Melkisedèk, hòmber i muhénan—tin biaha desendiente di pioneronan noble òf mayornan digno—ku a kita for di e kaminda di kombenio sin a hasi òf warda kombenionan den e santu tèmpel.

Hopi di e desviashonnan ei ta sosodé ora miembronan faya pa sigui e plan di mantenshon spiritual fundamental di orashon personal, estudio regular di Skritura, i arepentimentu frekuente. Algun ta neglishá renobashon semanal di kombenionan dor di no partisipá di e sakramentu. Algun ta bisa ku Iglesia no ta duna nan loke nan ta spera; esnan ku ta supstituí loke nan persibí komo nan nesesidatnan di futuro dilanti di loke Señor a proveé den hopi di Su siñansa i oportunidatnan pa nos servisio esensial na otronan.

Humildat i konfiansa den Señor ta e solushonnan pa desviashonnan asina. Manera e Buki di Mormon ta siña, Señor “ta bendishoná i ta laga prosperá esnan ku ta pone nan konfiansa den dje” (Helaman 12:1). Konfia den Señor ta un nesesidat partikular pa tur ku ta skrudiñá e mandamentunan di Dios i e siñansanan di Su profetanan kontra di delaster informashonnan hañá segun sabiduria di hende.

Mi a papia di hopi di e yudansanan mortal ku nos amoroso Tata den Shelu a dunan pa yuda Su yunan regresá na djE. Nos parti den e plan divino aki ta pa konfia den Dios i buska i usa e yudansanan divino aki, spesialmente e Ekspiashon di Su Yu Stimá, nos Salbador i Redentor, Hesu-Kristu. Mi ta pidi ku nos lo siña i biba e prinsipionan aki, den e nòmber di Hesu-Kristu, amèn.