Fe: Un Vínkulo di Konfiansa i Lealtat
Fe ta sprui segun ku nos konfia den Hesu-Kristu i ta floria ora ku nos ta fiel i leal na Dje.
Ora mi tabatin diesshete aña, mi a hasi un pakto ku mi amigu José Luis pa siñ’é kon pa landa. Pues un mainta nos a dediká tempu pa praktiká. Ora ku nos lès a kaba i mi tabata bandonando e pisina, mi a skucha mi amigu gritando pa yudansa. E tabata hogando den e profundidat di e pisina.
Mi a benta mi mes den e awa i a landa bai su direkshon tur esten mi ta hasiendo orashon pa yudansa. Ora mi a tene su man pa trèk e bin ariba, mi amigu desesperá a subi riba mi lomba i a tene mi strangulando mi. Awor nos tur dos tabata hogando. Hasiendo mi esfuerso pa alkansá e superfisie, mi a hasi orashon ku tur mi forsa pa un milager di Dios. E ora ei, pokopoko pero firme, e poder di Dios a manifestá ora mi a sinti un man moviendo mi direkshon di e parti menos profundo di e pisina, hibando nos na un lugá sigur.
E eksperensia a konfirmá un lès profundo ku Presidente Russell M. Nelson a siña un bes: “Ora bo buska pa e poder di Señor den bo bida ku e mesun intensidat ku un persona ku ta hogando tin, ora ku e ta gara i ta buska rosea, poder di Hesu-Kristu lo ta di bo.”
Kerido muchanan i hóbennan, awe mi kier papia ku boso tokante e prinsipionan esensial di fe den Hesu-Kristu.
Fe den Kristu ta Nifiká Konfi’É
Kiko ta nifiká di tin fe den Kristu? E ta nifika ku nos ta kere den djE òf tin un testimonio ku E ta real? Esei por ta un komienso, pero e ta mas ku esei. Nunka bo a yega di pensa di fe komokonfiansa? Pensa riba e persona ku bo ta konfia mas—kisas un miembro di famia òf un amigu. Dikon bo ta konfia nan? E ta probablemente pa motibu ku bo a mira nan amor i yudansa konstante.
Ora nos tin fe den Kristu, nos ta rekonosé Su bendishonnan i ta desaroyá un relashon di konfiansa kunÉ.
Kon Bo Por Oumentá Bo Konfiansa den Kristu?
Den un deboshonal di hubentut, resien, boso a wòrdu invitá pa “meditá riba un temporada den boso bida ora ku boso a risibí un rayo di lus selestial. Purba e ehersisio aki!
Kuminsá dor di meditá tokante Kristu i e felisidat ku Su Ekspiashon i evangelio ta trese na bo bida. Tambe, hasi un registro di e “rekuerdonan spiritualmente definí” kaminda Dios tabata tei ei nan pa bo, esnan kerí pa bo, i pa e hendenan den e Skrituranan. Awor, e testimonionan aki lo no trese poder na boso bida te ora ku e spiritu graba nan den e “tablanan di karni” di boso kurason. Pues reflekshoná i registrá tur loke Dios pone den moveshon pa e milagernan aki bini nèt na e momentu korekto.
Despues, usa e ehersisio aki komo un oportunidat pa yega mas serka di Dios. Hasi orashon na bo Tata Selestial manera si tabata e promé biaha. Ekspresá bo amor i gratitut pa Su bendishonnan. Asta puntr’É kon E ta sinti tokante abo i tokante e rumbo ku bo bida ta kohiendo.
Si bo ta sinsero i humilde, lo bo skucha Su kontesta i kuminsá un relashon personal i duradero ku Tata Selestial i Hesu-Kristu. No solamente esaki, pero bo kustumbernan religioso lo bira signifikante. Por ehèmpel, lo bo sigui ku bo orashonnan, estudio personal, i adorashon na tèmpel komo oportunidatnan pa yega na konosé Nan i ta ku Nan.
Fe ta Floresé ku Lealtat
Tuma nota ku fe ta sprùit segun ku nos konfia den Hesu-Kristu i ta floria ora ku nos ta fiel i leal na djE. Si bo kier un relashon berdadero ku Kristu, mustr’É dor di hasi kombenionan i honra nan ku fieldat i lealtat. Hasi kombenionan ku Hesu-Kristu ta konstruí speransa. Honra nan ta konstruí fe.
Laga mi usa un ehèmpel personal: Ora mi tabata mucha, mi a haña mi mama ta yora su so un dia. Ora mi a puntr’é dikon, suavemente el a bisa, “Mi mester pa bo ta un bon mucha hòmber.” Ounke mi tabata sa ku ami no tabata e kousa di su ansha, mi tabata stima i konfia mi mama manera niun otro hende i tabata kier a hasi su bida ménos difísil. Pues, ku lágrima den mi wowonan i ku tur e solemnidat ku un mucha di nuebe aña por tabatin, mi a primintié e dia ei ku semper lo mi lucha pa ta e mihó yu i hasié orguyoso.
Bo por imaginá bo e poder ku e promesa ei tabatin—i ainda tin—riba mi?
E promesa ku ne ei lo guia mi bida. Promé tuma desishonnan, lo mi a konsiderá si mi akshonnan lo komplasé. E vínkulo di e promesa aki i e relashon ku mi mama tabata e ankernan pa mi kondukta durante henter mi bida.
Añanan despues, ora mi a yega na konosé Hesu-Kristu mihó, mi tabata sa kaba kon pa basa mi fe den djE. Mi a hasi kombenionan ku Señor, i segun mi a buska pa honra nan, El a pordoná mi pikánan, guia mi bida, i “yená mi ku Su amor ” te na e profundidat di mi ser. Kristu a inkulká den mi un profundo amor, rèspèt, i lealtat p’E.
Bo ta komprondé dikon “fe ta un prinsipio di akshon” i ku “sin fe e ta imposibel pa komplasé [Dios]”?
Ora bo trata pa hasi loke ta agrad’É, lo bo bisa manera Jozef na Egipto ora ku el a wòrdu tentá pa e kasá di Potifar, “Kon mi por hasi e gran maldat aki, i kometé piká kontra Dios?” I ora bo keda enfrentá ku oposishon, lo bo bisa manera e profeta hóben, José: “Mi tabata sa, i mi tabata sa ku Dios tabata sa, i lo no por a ning’é . Mi tabata sa ku dor di hasi asina lo mi ofend’é Dios.”
Pues fe den Hesu-Kristu ta un vínkulo di konfiansa desaroyá den lealtat i amor. Den otro palabranan, den gratitut pa Dios su amor mizerikòrdioso (hesed), nos ta demostrá nos amor leal (emunah) pa medio di warda Su mandamentunan.
Kristu ta primintí, “Esun ku tin mi mandamentunan, i ta warda nan … lo ta stimá pa mi Tata, i ami lo stim’é, i ami lo manifestá mi mes na dje.” Si bo komprometé pa ta leal na djE, E lo manifestá Su amor pa bo.
Fe den Enfrentá Atversidat
Pero kon lo bo mester respondé riba tal situashonnan atverso ku ta rekerí Su milagernan? Ounke retonan ta inevitabel i tin bia spantoso, simplemente kana sin miedu bai na djE, djis manera e tema di konferensia FSY 2025 ta invitá: “Wak na mi den kada pensamentu; no duda, no teme.”
Kon Bo Por Kana Bai Sin Miedu na djE?
Imaginá ku bo ta un eksploradó den teritorio deskonosí. Pa surpasá e opstákulonan ku ta bini, bo mester di un fuente di lus. Bo fieldat na Dios i bo interakshonnan konstante kunÉ ta e kombustibel pa bo lantèrno. P’esei ora bo kontra situashonnan skur i peligroso, na lugá di kana bai siegamente na nan, lo bo sende bo lampi yená ku e zeta di fe den Kristu pa duna rayonan di lus di speransa na e kaminda insigur. Bo eksperensianan di pasado lo oumentá bo speransa ku Señor lo sostené bo riba bo hornada.
Kon Leu Lo Bo Bai ku Bo Speransa i Fe den Kristu?
Bo ta kòrda mi historia na e pisina? Den e momentu di desesperashon ei, e milager a bini den e manera ku mi a spera, pero Dios no ta garantisá ku semper e lo ta di akuerdo ku nos boluntat. Nos fe mester ta sentrá den Kristu i nos speransa den Su bendishonnan, segun E ta skohe pa manda nan. “Spera milagernan,” pero “laga Dios prevalesé den nos bida.”
E Promesanan di Dios na Su Pueblo Fiel
Mi amigunan hóben, kuantu nos ta stima i konfia boso! Boso ta pertenesé na e famia di Dios i ta yunan di e kombenio. Kere i konfia den Hesu-Kristu. E lo permití bo pa di bèrdat bira Su disipel.
Mi ta invitá bo pa kuminsá awe na nutri bo relashon ku Hesu-Kristu. Komprometé pa nunka bandon’É.
Bo lealtat, amor, i konfiansa den Kristu lo forma bo karakter i identidat segun esun di djE. Lo bo haña konfiansa i forsa pa surpasá e atakenan di Satanas. I ora bo kometé fayonan, lo bo anhelá pa Su pordon. Finalmente, bo speransa pa e futuro lo ta briante. E lo konfia bo ku Su poder pa logra kualkier kos ku E ta spera di bo, asta e poder pa regresá den Su presensia.
Mi ta testifiká ku e goso ku ta bini for di kanta “e kantika di amor ku ta redimí” i ser “rondoná eternamente den e brasanan di su amor.” Den e nòmber sagrado di Hesu-Kristu, amèn.