Karidat—Un Señal di Disipulado Berdadero

Un disipel ta un siguidó òf studiante di un otro. E disipelnan ta “aprendisnan” ku ta dediká nan bida na bira manera nan maestro. P’esei, ta un disipel di Hesu-Kristu ta nifiká mas ku solamente kere den Su enseñansanan i doktrina. E ta nifiká mas ku solamente rekonosé Su divinidat i asept’É komo nos Salbador i Redentor, maske esei ta di vital importansia.

Presidente Dallin H. Oaks a splika: “Sigui Kristu no ta un práktika kasual òf okashonal. E ta un kompromiso i manera di biba kontinuo ku mester guia nos tur tempu i den tur lugá.” Disipulado ta un biahe deliberá ku nos ta tuma pa nos transformá pa medio di e sakrifisio ekspiatorio di Señor i Su poder habilitante. E meta real di disipulado ta pa bira literalmente manera Hesu-Kristu ta—te na e punto ku nos ta risibí Su imágen den [nos] kara.”

Pa ta disipelnan di Señor, nos mester intenshonalmente imitá Su pensamentunan i akshonnan tur dia, por ehèmpel, Su obedensia, humildat i pasenshi. Ora nos inkorporá gradualmente e atributonan aki den nos propio identidat, nos ta bira “partisipantenan di [Su] naturalesa divino”. E imitashon aki di e karakter di e Salbador ta den e kurason di adorashon na djE. Manera Presidente Nelson a siña, “Nos adorashon pa Hesus ta wòrdu ekspresá mihó dor di nos imitashon di Hesus”.

Di tur e hopi atributonan divino di Hesu-Kristu ku nos mester imitá, un ta sali na kla i ta representá tur e otronan. E atributo ei ta Su amor puru, òf karidat. Tanto e profeta Mormón komo e Apòstel Pablo ta kòrda nos ku sin karidat, “nos no ta nada.” Òf, manera a wòrdu revelá na e profeta José Smith, sin “karidat, [nos] no por hasi nada.”

E Salbador Mes a identifiká amor komo un marka òf señal pa kual Su disipelnan berdadero lo a wòrdu rekonosé ora El a deklará:

“Un mandamentu nobo Mi ta duna boso; Pa boso stima otro, manera Ami a stima boso.

“Pa medio di esaki tur hende lo sa ku boso ta mi disipelnan, si boso tin amor pa otro”

Karidat ta un konsepto riku ku por ta difisil pa definí, pero ku ta wòrdu fásilmente persibí pa tur ku ta tok’é. Prediká Mi Evangelio ta siña ku “karidat, meskos ku fe, ta kondusí na akshon.” Di bèrdat, por deskribí karidat komo “amor den akshon”. E deskripshon aki ta proveé un bista grandi riba e deklarashon di resumen di e bida di e Salbador—El a “bai hasi bon.”

Komo siguidónan di Hesu-Kristu, nos mester trata di imitá e manera ku nos Señor a demostrá Su amor puru pa otro hende. Aunke e Salbador ta manifestá su amor den hopi forma, mi ke yama atenshon riba tres tipo di amor ku Su disipelnan berdadero ta demostrá.

Promé, e Salbador a demostrá su bondat dor di ta kompasivo. Durante Su ministerio entre e Nefitanan manera ta registrá den e Buki di Mormon, Señor a invitá e pueblo pa bai kas i meditá riba e kosnan ku El a siña i pa prepará pa Su regreso e siguiente dia. E registro ta bisa despues:

“Nan tabata den lágrima, i a keda mir’é ku firmesa manera si nan a pidié pa keda un tiki mas tempu serka nan.

“I el a bisanan: Mira, mi entraña ta yen di kompashon pa boso.”

Kompashon ta e parti di karidat ku ta buska pa aliviá sufrimentu. Ku hopi mizerikòrdia, Señor a kura e enfermonan i esnan afligí den e pueblo. Despues, El a bendishoná nan yunan ora angelnan for di shelu a baha i a rondoná nan. El a hasi e aktonan aki di ternura i amor, i hopi mas, pasobra E tabata “konmoví pa kompashon”.

Miéntras mi tabata sirbiendo komo misionero hóben na Sur Amérika, mi tambe a benefisiá di e kompashon di un amigu stimá. Un atardi miéntras mi tabata koriendo ku mi kompañero pa kas di nos presidente di mishon, un hóben riba un baiskèl a bira diripente dilanti di e outo. E kos a sosodé asina lihé ku mi no por a evitá e aksidente. Trágikamente, e hóben aki a muri dor di e impakto. Mi tabata hopi tristu riba e pèrdida di su bida. Spantá i den shòk ora e realidat teribèl di loke a kaba di sosodé a dal mi, mi a wòrdu hibá prizòn i a keda será. Nunka mi no a yega di sinti mas miedu i mi so. Mi tabata yen di desesperashon i miedu ku lo mi a keda será pa e restu di mi bida.

Un kompañero mishonero, Elder Brian Kochever, a tende di e aksidente i tabata konmoví ku kompashon. El a bini prizòn i a supliká e outoridatnan pa nan lag‘é keda ku mi den mi sèl pa mi no ta mi so. Milagrosamente, nan a bai di akuerdo. Te dia di awe, mi ta sinti gratitut profundo pa e akto di amor di e disipel aki, ku tabata manera esun di Kristu, ku a kalma, konsolá mi durante e momentu di mas angustia den mi bida. Su kompashon karitativo tabata un señal kla di su disipulado. Manera Presidente Russell M. Nelson a opservá, “Un di e maneranan mas fásil pa identifiká un berdadero siguidó di Hesu-Kristu ta ku kuantu kompashon e persona ei ta trata otro hende.”

Un otro ehèmpel di kon e Salbador ta demostrá Su amor ta dor di Su atenshon i Su ministerio na e nesesidatnan di otro hende ku no a wòrdu ekspresá. E hòmber ku tabata paralítiko pa 38 aña i ku no tabatin niun hende pa yud’é, Señor a kur’é i a anim’é pa biba hustamente. Na e muhé ku a wòrdu gará den adulterio, El a ofresé speransa i konsuelo na lugá di kondenashon. Pa e hòmber paralítiko ku a baha for di dak, Señor a ofresé pordon di pikánan, no solamente sana e kurpa.

Ora mi a wòrdu yamá pa sirbi komo obispo, nos seis yu chikitu a hasi e reunionnan sakramental un reto pa mi kasá, Cristin, kende mester a manehá nan su so miéntras mi tabata sintá riba e podio. Manera bo por imaginá, nos yunan hopi biaha tabata ménos ku reverente. Mirando su situashon, dos miembro di nos bario, John i Debbie Benich, a kuminsá sinta serka dje tur djadumingu pa yuda. Nan bondat a sigui pa añanan largu, i nan a bira welonan sustituto pa nos famia. Meskos ku e Señor, e disipelnan aki a nota e nesesidat no ekspresá i a aktua den amor—un señal prominente di nan disipulado.

Finalmente, e amor perfekto di e Salbador ta enfoká riba permití tur yu di Dios pa kumpli ku nos potensial divino pa nos por partisipá di su salbashon,i e poder di su redenshon.” Ora nos ta bira mas manera nos Maestro, nos deseo pa yuda nos rumannan riba e kaminda di e kombenio lo bira naturalmente mas grandi.

Por ehèmpel, nos por animá i bira amigu di esnan ku ta sinti nan ofendí òf lubidá, yuda esnan ku ta nobo den nos kongregashon pa sinti nan bon biní, òf invitá amigunan pa adorá huntu ku nos na e reunion sakramental, kisas e próksimo Pasku di Resurekshon. Tin maneranan inkontabel pa enkurashá i asistí otronan den nan progreso si nos deliberadamente i ku orashon buska yudansa di shelu pa tin wowo pa mira i un kurason pa sinti kon Hesu-Kristu ta mira i sinti pa nan.

Yudando otro hende riba nan kaminda di kombenio por tuma forma di un akto di servisio inkonvenshonal. Por ehèmpel, durante mi asignashon na Filipinas, mi a tende di e famia Agamata. Nan a batisá na 2023, i despues ku entusiasmo nan a pone un fecha pa wòrdu seyá komo un famia den e Tèmpel di Urdaneta na Filipina. Sinembargo, net promé ku e sita di famia, varios tifon a ataká e region. Hermano Agamata, ku ta un agrikultor di aros, no por a planta su kultivo durante e tormentanan violento. Ora e tempestatnan a pasa, e mester a planta aros lihé miéntras e tera tabata muhá ku awa—kondishon ideal pa planta. Lamentabelmente, e biahe pa tèmpel mester a keda posponé.

Dos disipel, Elder i Hermana Cauilan, huntu ku tres mishonero hobèn di servisio, a tende di e lucha di e famia Agamata i a ofresé yudansa apesar di no tabatin eksperensia den agrikultura. Trahando bou di solo hopi kayente nan a yuda planta e simianan, lagando e Agamatanan kumpli ku nan tarea i asistí na e seyamentu di tèmpel segun e programa. Elder Cauilan a bisa ku e kara di “[e Agamatanan] tabata bria ora nos a mira nan bistí na blanku den e kas di Señor. E goso ku nos a sinti ora nos a ministrá na esun ta un goso inkomparabel!”

Awor e Agamatas ta disfrutá di e bendishonnan abundante di a wòrdu seyá komo un famia eterno, pasobra un algun otro disipelnan ku tabata yen di karidat— un señal di nan disipulado—a disidí di yuda nan rumannan sigui dilanti riba nan kaminda di kombenio.

Rumannan, disipulado di Hesu-Kristu ta e úniko manera pa optené felisidat duradero. E ta un kaminda yen di aktonan deliberá i intenshoná di amor pa otronan. Aunke e kaminda di disipulado por ta difísil i desafiante, i ounke tin biaha nos por lucha i faya, nos por haña konsuelo di sa ku Dios ta kòrda riba nos i ta anhelá pa yuda nos kada biaha ku nos hasi esfuerso. Isaías ta rekòrdá nos ku “Dios lo tene [nos] man, bisando: …, No tene miedu; lo mi yuda boso.”

Ku e garantia aki di nos Tata den shelu na mente, ta mi orashon sinsero pa nos sigui e invitashon di presidente Nelson pa duna prioridat na nos disipulado. Laga nos “hasi orashon na e Tata ku tur nos kurason” pa nos “ta yená ku e amor aki, ku El a duna na tur ku ta siguidónan berdadero di su Yu, Hesu-Kristu; … ku ora E aparesé nos lo ta manera E” pasobra nos ta karga un señal di berdadero disipulado, ku ta “karidat … e amor puro di Kristu.”

Mi ta testifiká ku Hesu-Kristu ta nos Salbador glorioso, Redentor, Ehèmpel, i Amigu. Den e nòmber di Hesu Kristu, amèn.