E Plan di Mizerikòrdia

Aña pasá aprel, djis despues di e notisia gososo ku Iglesia a atkirí e Tèmpel di Kirtland, Presidente Russell M. Nelson a invitá nos pa studia e orashon dedikatorio di e Tèmpel di Kirtland, registrá den sekshon 109 di e Doktrina i Kombenionan E orashon dedikatorio, Presidente Nelson a bisa, ta un siñansa tokante kon e tèmpel ta duna abo i ami poder spritualmente pa pasa den e retonan di bida den e delaster dianan aki.”

Mi tin sigur ku bo estudio di e sekshon 109 a duna perspektivanan ku a bendishoná bo. E anochi aki, mi ke kompartí un par di kos ku mi a siña ora mi a sigui invitashon di nos profeta. E pas ku mi a sinti pa medio di mi estudio a kòrda mi ku Señor ta mizerikordioso i ku nos Tata Selestial Su plan di salbashon berdaderamente ta un plan di mizerikòrdia.

Manera boso por sa, “mishoneronan resien yamá ta wòrdu enkurashá pa risibí e investidura di tèmpel mas pronto posibel i pa asistí na tèmpel mas tantu posibel segun sirkunstansianan ta permití.” Asina ku nan a risibí investidura, nan “por sirbi tambe komo obreronan … di tèmpel promé nan kuminsá servisio mishonal.”

Tempu den tèmpel promé drenta e sentro pa kapasitashon mishonal (MTC) [SKM] por ta un bendishon maravioso pa mishoneronan nobo miéntras nan ta siña mas tokante kombenionan di tèmpel pormé ku kompartí e bendishonnan di e kombenionan ei ku e mundu.

Pero studiando sekshon 109, mi a siña ku, den tèmpel, Dios ta duna poder na mishoneronan nobo—realmente, nos tur—di un manera adishonal i sagrado. Den e orashon dedikatorio, duná pa medio di revelashon, e Profeta José Smith a hasi orashon pa “ora bo siervonan lo sali for di bo kas … pa duna testimonio di bo nòmber,” e “kurason” di “tur hende”por “wòrdu suavisá”—tantu e “grandinan di e tera” i “tur e pobernan, esnan den nesesidat, i [esnan] aflihí.” El a hasi orashon pa “nan prehuisionan por desviá dilanti e bèrdat, i bo pueblo por optené grasia den bista di tur; ku tur ekstremo di e tera por sa ku nos, bo siervonan, a tende bo stèm, i ku bo a manda nos.”

Esaki ta un promesa bunita pa un mishonero resien yamá—pa tin prehuisionan “desviá dilante e bèrdat,” pa “optené grasia den bista di tur,” i pa laga e mundu sa ku nan ta mandá pa Señor. Kada un di nos sigur mester di e mesun bendishonnan aki. Ki bendishon e lo ta di tin kurasonnan suavisá ora nos ta interaktuá ku bisiñanan i koleganan. E orashon dedikatorio no ta splika eksaktamente kon nos tempu den tèmpel lo suavisá kurason di otronan, pero mi ta kombensí ku e ta konektá ku kon e tempu den e kas di Señor ta suavisá nos mes kurason dor di sentra nos na Hesu-Kristu i Su mizerikòrdia.

Ora mi a studia e orashon dedikatorio di Kirtland, a sorprendé mi ku José kada biaha a supliká pa mizerikòrdia—pa e miembronan di Iglesia, pa e enemigunan di Iglesia, pa e lidernan di e pais, pa e nashonnan di mundu. I, masha personalmente, el a supliká na Señor pa kòrda riba dje i pa tin mizerikòrdia di su estimada Emma i nan yunan.

Kon José mester a sinti ora, un siman despues, riba Pasku di Resurekshon mainta, 3 di aprel, 1836, den e Tèmpel di Kirtland, e Salbador a aparesé na e i Oliver Cowdery i, manera registrá den sekshon 110 di e Doktrina i Kombenionan, a bisa, “Mi a aseptá e kas aki, i mi nòmber lo ta aki; i lo mi manifestá mi mes na mi pueblo den mizerikòrdia den e kas aki.” E promesa di mizerikòrdia aki mester tabatin nifikashon spesial pa José. I manera Presidente Nelson a siña aprel pasá, e promesa aki “ta konta tambe pa tur tèmpel dediká awendia.”

Tin asina tantu manera den kual nos kada un por haña mizerikòrdia den e kas di Señor. Esaki tabata bèrdat for di e promé bia ku Señor a manda Israel pa konstruí un tabernakel i pa pone den su sentro e “asiento di mizerikòrdia.” Den tèmpel, nos ta haña mizerikòrdia den e kombenionan ku nos ta hasi. E kombenionan ei, huntu ku e kombenio boutismal, ta uni nos na e Tata i e Yu i ta duna nos oumento di akseso na lokual Presidente Nelson a siña ta “un tipo di amor i mizerikòrdia spesial… yamá hesed” den hebreo.

Nos ta haña mizerikòrdia den e oportunidat pa wòrdu seyá na nos famianan pa eternidat. Den tèmpel, tambe nos ta yega na komprondé ku mas klaridat ku e Kreashon, e Kaida, e Salbador Su sakrifisio ekspiatorio, i nos abilidat pa drenta atrobe den presensia di nos Tata Selestial—realmente, kada parti di e plan di salbashon—ta un manifestashon di mizerikòrdia. Enbèrdat, lo por bisa e plan di salbashon ta un plan di felisidat, presisamente pasobra e ta un “plan di mizerikòrdia.”

Mi ta gradesido pa e promesa bunita den sekshon 110 ku Señor lo manifestá Su Mes den mizerikòrdia den Su tèmpelnan. Mi ta gradesido tambe pa loke e ta revelá tokante kon Señor lo manifestá Su Mes den mizerikòrdia ki ora ku ta, manera José, a supliká pa mizerikòrdia.

José Smith su súplika pa mizerikòrdia den sekshon 109 no tabata e prome bia ku su súplikanan pa mizerikòrdia a inspirá revelashon. Den e Arboleda Sagrado, e hóben José a hasi orashon no solamente pa sa kua Iglesia tabata bèrdadero, pero el a bisa tambe ku el a “sklama na Señor pa mizerikòrdia, pasobra no tabatin niun otro hende na ken mi por a bai pa optené mizerikòrdia.” Di algun manera su rekonosementu ku e tabatin mester di mizerikòrdia ku solamente Señor lo por proveé a yuda habri e bentananan di shelu. Tres aña despues, e angel Moroni a aparesé, siguiendo loke José a bisa tabata su “orashon i súplika na Dios Todopoderoso pa pordon di tur mi pikánan i mi bobedatnan.”

E modelo aki di revelashon siguiendo, un súplika pa mizerikòrdia ta unu familiar den e Skrituranan. Enos a tende e stèm di Señor solamente despues di hasi orashon pa pordon. Tata di Rei Lamoni su kombershon ta kuminsá ku su orashon: “Lo mi bandoná tur mi pikánan pa mi konosé bo.” Por t’asina ku nos no ta wòrdu bendishoná ku e mesun eksperensianan dramátiko aki, pero pa esnan ku tin bia ta lucha pa sinti kontestanan na orashon, buskando Señor Su mizerikòrdia ta un di e maneranan di mas poderoso pa sinti e testimonio di e Spiritu Santu.

Un prinsipio similar ta wòrdu siñá bunita den Moroni 10:3–5. Hopi bia nos ta resumí e versíkulonan aki pa siña ku pa medio di orashon sinsero, nos por siña si e Buki di Mormon ta berdadero. Pero e resumen aki por neglishá e rol importante di mizerikòrdia. Skucha kon Moroni ta kuminsa su súplika: “Ata awor, ami lo amonestá boso ku ora boso lesa e kosnan aki, … pa boso kòrda kon mizerikordioso Señor tabata na e yunan di hende, for di e kreashon di Adam asta te na e tempu ku boso lo risibí e kosnan aki, i medit’é den boso kurason.”

Moroni ta urgi nos pa no solamente lesa e kosnan aki—e registronan ku e tabata serka di seya—pero tambe pa skrudiñáden nos kurason loke e Buki di Mormon ta revelá tokante “kon mizerikordioso Señor tabata na e yunan di hende.” Ta dor di skrudiñá tokante Señor Su mizerikòrdia ta prepará nos pa “puntra Dios, e Tata Eterno, den e nòmber di Kristu, si e kosnan aki no ta bèrdat.”

Ora nos ta meditá riba e Buki di Mormon, nos por puntra: E ta realmente bèrdat, manera Alma a siña, ku Dios Su plan di mizerikòrdia ta garantisá ku kada persona ku a biba na mundu lo resusitá i ku nan lo “wòrdu restourá na nan … forma perfekto”? Amulek ta korekto—e Salbador Su mizerikòrdia por satisfasé tur eksigensia real i marga di e hustisia ku di otro manera ta obligá na paga i na lugá “[rondoná nos] den e brasanan di seguridat”

Ta bèrdat ku, manera Alma a testifiká, ku Kristu no a sufri solamente pa nos pikánan pero pa “nos dolónan i aflikshonnan” p’asina E por “sa … kon pa yuda Su pueblo di akuerdo ku nan enfermedatnan”? Señor ta realmente asina mizerikordioso, manera Rei Benjamin a siña, ku un regalo gratuito, El a ekspia “pa e pikánan di esnan … ku a muri sin konosé e boluntat di Dios tokante nan, òf kende a hasi piká ignorantemente”

Ta bèrdat, manera Lehi a bisa, ku “Adam a kai pa hende por eksistí; i hende ta eksistí, pa nan por tin goso”? I ta realmente bèrdat, manera Abinadí a testifiká, sitando Isaías, ku Hesu-Kristu a wòrdu heridá pa nos pikánan, el a wòrdu gòlpiá pa motibu di nos maldatnan; e kastigu di nos pas tabata riba dje; i ku su heridanan nos ta wòrdu saná”?

Resumiendo, e plan di e Tata manera siñá den e Buki di Mormon ta realmente asina mizerikordioso? Mi ta testifiká ku e ta i ku e enseñansanan di mizerikòrdia ku ta duna pas i ku ta duna speransa den e Buki di Mormon ta bèrdat.

Tòg, mi ta imaginá ku algun por ta luchando, apesar di boso lesamentu i orashonnan fiel, pa realisá Moroni su promesa ku Tata Selestial “lo manifestá e bèrdat di dje na boso, pa medio di e poder di e Spiritu Santu.” Mi konosé lucha aki pasobra mi a sintié, hopi aña pasá, ora ku e promé dos bianan ku mi a lesa e Buki di Mormon no a duna un kontesta inmediato i kla na mi orashonnan.

Si boso ta luchando, mi ke invitá boso pa sigui e konseho di Moroni pa meditá riba e hopi maneranan ku e Buki di Mormon ta siña “kon mizerikordioso Señor tabata [na] e yunan di hende”? Basá na mi eksperensiá, mi ta spera ku ora boso hasi asina, e pas di e Spiritu Santu por drenta boso kurason i boso por sa, kere, i sinti ku e Buki di Mormon i e plan di mizerikòrdia ku e ta siña ta bèrdat.

Mi ta ekspresá mi gratitut pa e Tata Su gran plan di mizerikòrdia i pa e Salbador Su boluntat pa kumpli kuné. Mi sa ku E lo manifestá Su Mes den mizerikòrdia den Su santu tèmpel i den kada parti di nos bida si nos ke busk‘É. Den e nòmber di Hesu-Kristu, amèn.