Preparashon Personal pa Topa e Salbador

Mi kerido rumannan, òktober ùltimo, Presidente Russell M. Nelson a siña, “Awor ta e tempu pa abo i pa ami prepará pa e Segunda Benida di nos Señor i Salbador, Hesus e Kristu.” Ora Presidente Nelson ta papia tokante e Segunda Benida, e ta semper ku optimismo gososo. Sinembargo, un mucha muhé den Primaria resientemente a bisa mi ku e ta bira anshá semper ku e Segunda Benida ta wòrdu menshoná. El a bisa, “Mi tin miedu pasobra kosnan malu ta bai pasa promé ku Hesus bini atrobe.”

No ta mucha so por sinti asina. E mihó konseho p’e, pa abo, i pa ami ta pa sigui e siñansanan di e Salbador. Su instrukshonnan no ta ni misterioso ni kompleho. Ora nos sigui nan, nos no mester tin miedu òf ta anshá.

Na final di Su ministerio mortal, Hesu-Kristu a wòrdu puntrá ki dia E lo bini atrobe. Den kontestamentu, El a siña tres parábola, registrá den Mateo 25, tokante kon pa prepará pa topa kunÉ—sea na Su Segunda Benida òf ki ora ku nos bandoná e mundu aki. E siñansanan aki ta krusial pasobra preparashon personal pa topa kuné ta sentral pa e propósito di bida.

E Salbador promé a konta e parábola di e dies bírgen. Den e parábola aki, dies bírgen a bai un fiesta di kasamentu. Sinku, di un manera sabí a trese zeta pa yena nan lampinan, i sinku bobo no a hasié. Ora a anunsiá e yegada inminente di e brùidehòm, e bírgennan bobo a bai kumpra zeta. Ora nan a regresá, tabata muchu lat; e porta di e fiesta tabata será.

Hesus a identifiká tres aspekto di e parábola pa yuda nos. El a splika:

“I riba e dia ei, ora Mi bini den mi gloria, e parábola ku Mi a papia di e dies bírgen lo wòrdu kumplí.

“Pasobra esnan ku ta sabí i a risibí e bèrdat, i a tuma Spiritu Santu komo nan guia, i no a wòrdu engañá—di bèrdat mi ta bisa boso, nan lo … keda e dia.”

Ku otro palabra, nan no tabatin nodi di tin miedu òf ta anshá, pasobra nan lo a sobrebibí i prosperá. Nan lo prevalesé.

Si nos ta sabí, nos ta risibí e bèrdat dor di aseptá e evangelio di Hesu-Kristu dor di ordenansanan i kombenionan di saserdosio. Siguiente, nos ta hasi esfuerso pa keda digno di tin e Spiritu Santu semper ku nos. E kapasidat aki mester wòrdu atkerí individualmente i personalmente, gota pa gota. Aktonan di deboshon konsistente, personal i privá ta invitá e Spiritu Santu pa guia nos.

E di tres elemento ku Hesus a destaká ta evitá engaño. E Salbador a atvertí:

“Tene kuidou pa niun hende no gaña boso.

“Pasobra hopi lo bini den mi nòmber, bisando: Ami ta e Kristu; i lo gaña hopi.”

E Salbador tabata sa ku pretendentenan lo a purba di gaña e elektonan mes i ku hopi disipel lo a wòrdu engañá. Nos no mester kere esnan ku ta reklamá falsamente sanshon divino ni aventurá den desiertonan metafóriko òf kambernan sekreto pa wòrdu siñá pa medio di falsifikashonnan.

E Buki di Mormon ta siña nos kon nos por diferensiá gañadónan for di disipelnan. Disipelnan semper ta promové kere den Dios, sirbiÉ i hasi bon. Nos lo no wòrdu engañá ora nos buska i tuma konseho serka individuonan di konfiansa ku nan mes ta disipelnan fiel di e Salbador.

Tambe nos por evitá engaño dor di adorá regularmente den e tèmpel. Esaki ta yuda nos mantené un perspektiva eterno i ta protehá nos di influensianan ku por distraí òf desviá nos for di e kaminda di kombenio.

E lès esensial di e parábola aki di e dies bírgen ta ku nos ta sabí ora nos aseptá e evangelio, buska pa tin e Spiritu Santu ku nos, i evitá engaño. E sinku bírgen sabí no por a yuda esnan sin zeta; niun hende no por aseptá e evangelio, tuma e Spiritu Santu komo un guia, i evitá engaño na nos fabor. Nos tin ku hasi esaki pa nos mes.

E Salbador e ora ei a konta e parábola di e talentonan. Den e parábola aki, un hòmber a duna diferente kantidat di plaka, referí na dje komo talento, na tres kriá. Na un kriá el a duna sinku talento, na un otro el a duna dos i na un di tres un. Ku tempu, e promé dos kriánan a dòbel loke nan a risibí. Pero e di tres kriá simplemente a dera su solo talento. Na tur dos kriá ku a redoblá nan talentonan, e hòmber a bisa, “Bon hasí, … kriá bon i fiel: bo tabata fiel riba poko kos, lo mi pone bo gobernante riba hopi kos: drenta den e goso di bo señor.”

E hòmber despues a reprendé e kriá ku a dera su talento pa ta “malbado i floho.” E talento di e kriá aki a wòrdu kitá, i a kore ku ne. Tòg, si e kriá aki a redobla su talento, e lo a risibí e mesun elogio i rekompensa ku e otro kriánan.

Un mensahe di e parábola aki ta ku Dios ta spera di nos pa engrandesé e abilidatnan ku nos a haña, pero E no ke pa nos kompará nos abilidatnan ku esnan di otronan. Konsiderá e perspikasia aki ku e erudito hasídiko di siglo18 Zusya di Anipol a duna. Zusya tabata un maestro renombrá ku a kuminsá teme segun ku e tabata aserkando morto. Su disipelnan a puntra: “Maestro, pakiko bo ta tembla? Bo a biba un bon bida; siguramente Dios lo otorgá bo un gran rekompensa.”

Zusya a bisa: “Si Dios bisa mi, ‘Zusya, dikon bo no tabata un otro Moises?’ Lo mi bisa: ‘Pasobra bo no a duna mi e grandesa di alma ku bo a duna Moises.’ I si mi para dilanti Dios i E bisa, ‘Zusya, dikon bo no tabata un otro Salomon?’ Lo mi bisa: ‘Pasobra bo no a duna mi e sabiduria di Salomon.’ Pero, lamentablemente, kiko lo mi bisa si mi para dilanti di mi Kreador i E bisa, ‘Zusya, dikon bo no tabata Zusya? Dikon bo no tabata e hòmber ku mi a duna bo e kapasidat pa ta?’ Ah, p’esei mi ta tembla.”

Di bèrdat, Dios lo ta desepshoná si nos no dependé riba e méritonan, mizerikòrdia i grasia di e Salbador pa engrandesé e abilidatnan duná pa Dios ku nos a risibí. Ku Su asistensia amoroso, E ta spera ku nos ta bira e mihó vershon di nos mes. Ku nos por kuminsá ku abilidatnan diferente ta irrelevante p’E. I e mester ta pa nos.

Finalmente, e Salbador a konta e parábola di e karné i kabritunan. Ora E regresá den Su gloria, “Su dilanti tur nashon lo wòrdu reuní: i E lo separá nan for di otro, manera un wardadó ta separá su karnénan for di e kabritunan: i E lo pone e karnénan na Su man drechi, i e kabritunan na Su man robes.”

Esnan na Su man drechi a bira heredero den Su reino, i esnan na Su man robes no a risibí ningun herensia. E karakterístika distintivo tabata si nan a dun’É kuminda ora E tabatin hamber, a dun’E di bebe ora E tabatin set, a hosped’É ora E tabata un strañero, a bisti’É ora E tabata sunú, i a bishit’É ora E tabata malu òf enkarselá.

Tur hende tabata konfundí, tantu esnan na man drechi komo esnan na man robes. Nan a puntra ki ora nan a, òf ki ora nan no a, dun’É kuminda, kos di bebe i paña òf a yud’É ora E tabata vulnerabel. Komo kontesta, e Salbador a bisa, “Di bèrdat mi ta bisa boso, tur loke boso a hasi na un di e mas chikitu di mi rumannan aki, boso a hasié na ami.”

E mensahe di e parábola ta kla: ora nos sirbi otronan, nos ta sirbi Dios;ora nos no hasié, nos ta desepshon’É. E ta spera di nos pa usa nos donnan, talentonan, i abilidatnan pa bendishoná e bida di e yunan di Tata Selestial. E impulso divino pa sirbi otronan ta ser ilustrá den un poema épiko skirbí den siglo 19 dor di e poeta finlandes Johan Ludvig Runeberg. Ami ku mi rumannan a tende e poema “Kunukero Paavo” repetidamente durante henter nos infansia. Den e poema, Paavo tabata un kunukero pober ku tabata biba ku su kasá i 10 yu den e region di lago di Finlandia sentral. Vários aña tras di otro, mayoria di su kultivonan a wòrdu destruí, sea pa medio di e derame di e smelt di sneu di primavera, tormentanan di hagel di verano, òf un friu trempan di otoño. Kada bes ku e kosecha magro a drenta, e kasá di e kunukero tabata lamentá, “Paavo, Paavo, abo bieu lamentabel, Dios a bandoná nos.” Paavo, na su turno, a bisa stoikamente, “Meskla kaska ku e hariña di sebada pa traha pan pa e muchanan no pasa hamber. Lo mi traha mas duru pa drena e kunukunan di mondi. Dios ta tèst nos, pero E lo proveé.”

Kada bes ku e kultivonan tabata wòrdu destruí, Paavo tabata dirigí su kasá pa redobla e kantidat di kaska ku e tabata meskla den e hariña pa evitá hamber. E tabata traha mas duru tambe, kobando trinchera pa dren e tera i baha e suseptibilidat di su kunukunan na un derame di primavera i un eis trempan di ougùstùs.

Despues di añanan di difikultat, Paavo porfin a kosechá un kosecha riku. Su kasá a eksultá, “Paavo, Paavo, esakinan ta tempu felis! Ta tempu pa tira e kaska afó, i horna pan trahá solamente ku sebada.” Pero Paavo a kohe man di su kasá solemnemente i a bisa, “Meskla mitar di e hariña ku kaska, pasobra e kunuku di nos bisiña a yena.” Paavo a sakrifiká su abundansia i di su famia pa yuda su bisiña devastá i pober.

E lès di e parábola di e Salbador di e karnénan i kabritunan ta ku nos mester usa e donnan ku nos a haña—tempu, talentonan, i bendishonnan—pa sirbi e yunan di Tata Selestial, spesialmente esnan mas vulnerabel i den nesesidat.

Mi invitashon na e mucha di Primaria anshá ku mi a menshoná anteriormente, i na kada un di boso, ta pa sigui Hesu-Kristu i pa konfia e Spiritu Santu manera lo bo hasi ku un amigu stimá. Konfiá riba esnan ku ta stima bo i ku ta stima e Salbador. Buska Dios Su guia pa desaroyá bo abilidatnan úniko, i yuda otronan, asta ora e no ta fásil. Lo bo ta kla pa topa e Salbador, i bo por uni ku Presidente Nelson den ta alegremente optimista. Hasiendo esaki, bo ta yuda e mundu prepará pa e Segunda Benida di Hesu-Kristu, i lo bo wòrdu bendishoná ku sufisiente speransa pa drenta e sosiegu i goso di Señor, awor i den futuro.

Manera nos ta kanta den un di nos himnonan nobo:

Den e nòmber di Hesu-Kristu, amèn.