Goso Pa Medio di Kombenio di Disipulado

Un dia na 2023, Uyanga Altansukh tabata na trabou den e siudat nort di Mongolia, Darkhan, ora e presidente di mishon Mongolia a drenta su lugá di trabou. Den su palabranan:

“Mi a mir’é i a kere ku e tabatin e lus briante aki den su kara. E tabata hopi bondadoso i alegre ku esnan rondó di dje, i mi a sinti su kalor. Prome ku el a bai, mi a hasié algun pregunta. Un par di dia despues, el a bin na mi trabou atrobe i a puntra mi si mi por a asistí na su iglesia. Mi a pensa ku e por ta útil. Mi tabata preokupá pa e futuro di mi yunan, pasobra e sosiedat tabata parse yen di strès i skuridat. Mi tabata ke pa mi yunan ta manera e hòmber aki ku un lus den nan kara, ku ta trese goso na otro hende rondó di nan.

“Un dia e mishoneronan a siña nos e lei di diesmo. Mi yunan a bisa ku entusiasmo: ‘Nos mester paga nos diesmo, Mama.’ Mi por a wak e fe di mi yunan na e momentu ei. Promé ku mi a uni na Iglesia, mi a mira konferensia general i a skucha Presidente Russell M. Nelson papia. El a anunsiá tempèlnan nobo rònt mundu i a bisa ku lo a konstruí un tempèl nobo na Ulaanbaatar, Mongolia. Mi a regosihá i a yora, maske mi no tabata komprondé dikon. Ku e goso aki, mi por a bisa ku mi fe i mi testimonio tabata kresiendo.”

Uyanga, meskos ku miónes di otro hende, ta parti di e gran rekohementu di Israel den preparashon pa e Segundo Benida di Hesu-Kristu. El a kuminsá su biahe riba e kaminda di e kombenio i a bira un disipel di Kristu. Kiko ta nifiká pa ta un disipel di Kristu? Mi ta apresiá e palabra Hapones pa disipel—deshi—de ta nifiká ruman hòmber chiki, i shi ta nifiká mucha.

Hesu-Kristu a deklará, “Mi tabata na e kuminsamentu ku e Tata, i mi ta e Promé Yu.” Pa motibu di ken E ta i kiko El a hasi, nos ta ador’E, nos ta reverensi’É, nos ta glorifik’É, i nos ta sigui’É. Kristo a redimí nos, i nos ta eternamente agradesido pa Su sakrifisio infinito i ekspiatorio.

Nos tin un Tata Selestial, ku ta stima nos komo Su yunan. Su amor pa nos ta perfekto. Hesu-Kristu i Su mishon ta ilustrá e amor di Dios pa nos. Manera Huan a skirbi, “Pasó Dios a stima mundu asina tantu ku El a duna Su úniko Yu, pa tur esnan ku kere den djE no bai pèrdí, pero haña bida eterno.”

Den nos búskeda pa komprondé loke nos no sa, tin biaha nos por konfia riba nos eksperensia mortal familiar, òf kosnan ku nos si sa. Por ehèmpel, nos por siña algu di Dios e Tata dor di nos propio bida komo mayor i relashonnan familiar mortal. Sin embargo, nos mester ta kuidadoso pa no apliká e komparashonnan aki demasiado leu den nos intento pa komprondé nos Tata Selestial. E atributonan di Dios Tata ta surpasá kualke atributonan ménos-ku-perfekto di un hombèr kaí. Dios e Tata ta e Tata perfekto. E ta perfekto den amor, bondat, pasenshi, i entendementu i ta perfekto den gloria. Nos por kere den djE perfektamente. E amor di Kristu ta reflehá e amor di Dios Tata i ta un representashon di e amor ei.

Hesu-Kristu ta tantu e ehèmpel komo e medio. Den Kristu, nos por komprondé mas mihó e atributonan perfekto di e Tata i Su plan. Pa medio di Kristu, nos a risibí e poder ku ta yuda nos vense e tendensianan di e hòmber i muhénan natural pa nos por bira mas manera e Tata.

Meskos ku nos Tata Selestial, Hesu-Kristu ta perfekto den mizerikòrdia i hustisia. E atributonan divino aki di hustisia i mizerikòrdia no ta den oposishon. Nan ta komplementario. Hustisia i mizerikòrdia ta ilustrá e amor perfekto ku Dios tin pa Su yunan. Nos por konfia den Dios e Tata i den Hesu-Kristu pasobra Nan ta hustu ku nos tur.

Dios e Tata i Su Yu Hesu-Kristu ta kompletamente di akuerdo den propósito i amor. Pasobra Dios i Hesu-Kristu ta stima nos, nos ta haña e oportunidat i privilegio komo disipelnan berdadero di hasi kombenionan ku Nan. Hasiendo esei, nos relashon ku Kristu lo krese: “I awor, pa motibu di e kombenio ku boso a hasi boso lo wòrdu yamá e yunan di Kristu, su yunan hòmber i yunan muhé; pasobra tende, e dia aki el a engendrá boso spiritualmente; pasobra boso ta bisa ku boso kurason ta kambiá dor di fé den su nòmber; di manera ku, boso ta nasé di dje i a bira su yunan hòmber i su yunan muhé.”

Komo disipelnan, ora nos hasi i warda kombenionan sagrado, nos ta wòrdu bendishoná ku poder spiritual. Nos ta konektá ku Kristu i Dios Tata den un relashon spesial i nos por eksperensiá nan amor i goso den un medida ku ta reservá pa esnan ku a hasi i a warda kombenionan. Nos abilidat pa sinti e amor di Dios na un grado kompleto, òf pa keda den Su amor, ta dependé di nos deseonan i akshonnan hustu.

Den Huan, kapítulo 15, versíkulo 9, nos ta lesa: “Meskos ku e Tata a stima Mi, asina Ami tambe a stima boso.” I e ora ei nos ta risibí un invitashon: “Boso kontinuá den mi amor.”

Den e siguiente versíkulo, nos ta haña e manera pa sigui den Su amor: “Si boso obedesé mi mandamentunan, boso lo keda den mi amor; meskos ku mi a obedesé mandamentunan di mi Tata, i mi ta keda den su amor.”

E ora ei nos ta mira e propósito di warda e mandamentunan den versíkulo 11: “Mi a bisa boso e kosnan aki pa mi goso keda den boso i pa boso goso ta kompletu.”

Pa medio di kombenio berdadero di disipulado, nos por kuminsá komprondé e naturalesa di Dios mihó i e goso ku E ke pa tur Su yunan eksperensiá. Tambe nos por kuminsá komprondé algun prinsipio ku na promé instante por parse konfundí. Por ehèmpel, kon Dios por tin un goso kompletu ora algun di Su yunan ta sufri asina tantu? E kontesta ta den e perspektiva perfekto di Dios i den Su plan perfekto. E ta mira nos for di kuminsamentu te na nos futuro glorioso. El a proveé un manera, pa medio di Su Yu, Hesu-Kristu, pa nos tur, Su yunan, por vense e doló, sufrimentu, piká, kulpa i soledat di nos mortalidat. Dios a duna nos e kaminda i e opshon.

E ehèmpelnan di esnan ku a eksperensiá goso pa medio di bira disipel por yuda nos komprondé e konsepto aki mihó. Kisas bo a tende e frase ku nos ta solamente felis te ora nos yu mas infelis ta felis. Mi a mira ku esaki no mester ta e kaso. Mi mama di 94 aña tin mas ku 200 desendiente bibu. Na un momentu dado, por lo ménos un di e 200 lo ta infelis. Si e deklarashon aki tabata bèrdat, mi mama lo tabata den un estado di tristesa permanente, loke e no ta. Esnan ku konos’é sa kon alegre e ta.

Awor mi ke konta boso un otro eksperensia. Na yanüari 2019, mi kasá, Debbie, i ami a wòrdu invitá den e ofisina di Presidente Nelson. El a pone un stul serka di nos, i nos a sinta kasi rudia ku rudia. Despues di a ekstendé na nos nos yamamentu aktual, Presidente Nelson a bira wak Debbie i a enfoká riba dje. E tabata bondadoso, amoroso, suave i yen di goso, manera un tata òf welo perfekto. El a tene Debbie su man i a karisi’e, sigurand’e ku e lo ta bon i ku nos famia lo ta bendishoná. Na e momentu ei nos a haña ku nos tabata e personanan di mas importante pa e i ku e tabatin tur su tempu na mundu pa nos. Nos a sali for di su ofisina e djabierne atardi ei sintiendo nos sigur, stimá i kontentu.

Riba djaluna nos a wak e notisia. Durante e mesun dia ku Presidente Nelson a pasa ku nos, un di su yunan muhé a fayesé di kanser. Nos a keda sorprendí. Nos kurason tabata yen di tristesa ora nos a lamentá pa e i su famia. Nos kurason tabata yen di gratitut tambe pa e atenshon ku manera di Kristu el a demostrá na nos ora e tabata tristu pa su yu muhé ku tabata sufriendo.

Ora nos a pensa riba e eksperensia aki, nos a puntra nos mes: “Kon e por ta asina bondadoso, amoroso i asta alegre den un tempu asina difísil?” E kontesta ta pasobra e sa. E sa ku Kristu a logra e viktoria. E sa ku e lo ta huntu ku su yu muhé atrobe i lo pasa e eternidat huntu kuné. E alegria i e perspektiva eterno ta bini dor di ta ligá na e Salbador dor di hasi i kumpli ku kombenionan i dor di ta un disipel manera Kristu.

Presidente Nelson a siña: “Meskos ku Señor ta ofresé pas ku ta ‘surpasá tur entendimentu’ [Filipensenan 4:7], E tambe ta ofresé intensidat, profundidat, i aliento di alegria ku ta bai kontra di lógika humano òf entendimentu mortal. Por ehèmpel, no ta parse posibel pa sinti felisidat ora un yu ta sufri ku un malesa inkurabel, òf ora bo pèrdè bo trabou, òf ora bo kasá traisioná bo. Esei ta presisamente e felisidat ku e Salbador ta ofresé.”

Ora nos ta hasi i kumpli ku kombenionan, naturalmente nos ta wak pafó i tin e deseo di yuda otronan sinti e grado di goso i amor ku nos ta sinti den nos relashonnan di kombenio. Nos por ta parti di e kousa di mas grandi riba tera awe—e rekohementu di Israel. Nos por yuda trese e yunan di Dios serka Kristu. Manera e profeta Yakob a siña:, “Bendishoná boso ta; pasobra boso a traha duru huntu ku mi den mi hòfi di wendrùif, boso a kumpli ku mi mandamentunan i a trese fruta natural pa mi, … boso lo gosa huntu ku mi pa motibu di e fruta di mi hòfi di wendrùif.”

Ora nos ta obligá nos mes pa aktua komo disipelnan di e kombenio, den kualke nivel di kapasidat ku nos tin, nos relashon ku e Tata i e Yu ta bira mas fuerte, nos goso ta bira mas grandi i nos perspektiva eterno ta bira mas grandi. E ora ei nos ta dotá ku poder i por sinti goso den un medida ku ta reservá pa e disipelnan di e kombenio berdadero di Dios. Den e nòmber sagrado di Hesu-Kristu, amèn.