E Tempu di Restitushon di Tur Kos

E organisashon formal di e Iglesia di Hesu-Kristu di e Santunan di e Delaster Dianan tabata e kulminashon di e sekuensia di eksperensianan milagroso. E promé di e eksperensianan aki a sosodé 10 aña ántes den e estado di New York.

Den e primavera di 1820 un mucha hòmber yòn di nòmber José Smith a bai den e Arboleda banda di su kas pa hasi orashon. E tabatin preguntanan tokante e salbashon di su alma, i e tabata anhelá pa sa “kua di tur e [iglesianan] tabata korekto, pa [e] por sa na kual e tin ku uni.” José tabata konfia ku Dios lo kontestá su orashon i dirigié.

Por fabor tuma nota ku José no meramente a hasi orashon pa sa kiko ta korekto. Mas bien, el a hasi orashon pa sa kiko ta korekto p’asina e por hasi loke ta korekto. José a puntra den fe i tabata determiná pa aktuá di akuerdo ku e kontesta ku el a risibí.

“Komo kontesta riba su orashon [sinsero] Dios e Tata i Su Yu, Hesu-Kristu, a aparesé na José i a inougurá e ‘restitushon di tur kos’ (Echonan 3:21 manera predisí den e Beibel. Den e vishon aki, el a siña ku despues di e morto di e Apòstelnan original, Kristu Su Iglesia di Testamènt Nobo a wòrdu pèrdí na mundu.” José Smith lo ta instrumental pa restourá atrobe e doktrina, e outoridat, i e kombenionan i ordenansanan di e Salbador Su Iglesia antiguo.

José Smith a afirmá: “Mi a mira dos Personahe, kende nan brio i gloria ta desafiá tur deskripshon, parando ariba di mi den laira. Un di nan a papia ku mi, yamando mi na mi nòmber i a bisa, mustrando na e otro—Esaki ta Mi Yu Stimá. Skuch‘É !

Dor di e vishon aki i e eksperensianan ku a sigui, José Smith a bin komprondé ku Dios i Hesu_Kristu tabata konosé komo persona, i ta preokupá pa su salbashon, i tabatin un mishon p’e kumpli ku ne. Tambe el a siña lèsnan vital tokante e atributonan, karakter i perfekshonnan di e Deidat—i ku e Tata i e Yu ta Sernan separá i diferente. Hesu-Kristu ta e Yu literal di Dios den Spiritu i den karni.

José Smith a deklará ku Tata Selestial i Hesu-Kristu ta sernan ku tin kurpa. El a bisa, “E Tata tin un kurpa di karni i wesu mes tangibel manera esun di hende; e Yu tambe, pero e Spiritu Santu no tin kurpa di karni i wesu, pero ta un personahe di Spiritu.”

Mi ta testifiká [ku] e bishita di e Tata i e Yu na José Smith tabata e suseso inisial den e gran restourashon di tur kos [manera] bisá pa boka di e santu profetanan for di e prinsipio di mundu.”

E di dos den e sekuensia di eksperensianan milagroso ku a kondusí na e organisashon formal di e Salabdor Su Iglesia restourá tabata e tradukshon i e introdukshon di e Buki di Mormon.

“Jose Smith a wòrdu duná e poder di Dios pa tradusí un registro antiguo: e Buki di Mormon—Un Otro Tèstamènt di Hesu-Kristu. … E teksto sagrado aki ta inkluí un registro di e ministerio personal di Hesu-Kristu na e pueblo di e Hemisferio Oksidental poko despues di Su Resurekshon. [E Buki di Mormon] ta siña di e bida su propósito i ta splika e doktrina di Kristu, ku ta sentral pa e propósito ei. Komo un Skritura ku ta kompañá e Beibel, e Buki di Mormon ta testifiká ku tur hende ta yunan hòmber i yunan muhé di un Tata Selestial amoroso, ku E tin un plan divino pa nos bida, i ku Su Yu, Hesu-Kristu, ta papia awendia, meskos ku den dianan di antaño.”

Komo miembro di e Salbador Su Iglesia restourá, “Nos ta kere ku e Beibel ta e palabra di Dios te asina leu ku e ta korektamente tradusí; tambe nos ta kere ku e Buki di Mormon ta e palabra di Dios.” E Buki di Mormon ta un otro tèstamènt di Hesu-Kristu, ta konfirmá e plenitut di e Beibel i ta restourá bèrdatnan kla i presioso ku a wòrdu pèrdí di e Beibel.

E Iglesia di Hesu-Kristu di e Santunan di e Delaster dianan ta siña ku e Iglesia origibal establesé pa e Salbador ku Su outoridat divino, doktrina i kombenionan i ordenasanan a wòrdu pèrdí for di mundu. Komo parti di e restourashon di tur kos profetisá den e delaster dianan, profetanan i apòstelnan antiguo personalmente a konferí outoridat di saserdosio na José Smith i a konferí e yabinan na dje. Esaki ta e di tres den e sekuensia di eksperensianan milagroso ku a kondusí na e organisashon formal di e Salbador Su Iglesia restourá.

Outoridat di Saserdosio ta permití Dios su siervonan pa “representá [E] i aktua den Su nòmber.” “Yabinan di Saserdosio ta e outoridat pa dirigí e uso di saserdosio pa benefisio di e yunan di Dios.”

Bou di direkshon di e Tata i e Yu, Huan Boutista resusitá a restorá, na 1829, e outoridat pa boutisá pa medio di inmershon pa e remishon di pikánan. Den e mesun aña ei, tres di e Diesdos Apòstelnan original—Pedro, Santiago i Huan—a restourá e apostelado i outoridat i yabinan di saserdosio adishonal.

Seis aña despues di e organisashon formal di e Iglesia, den e Tèmpel di Kirtland, Moises, Elias i Elia a konferí na José e outoridat adishonal nesesario pa kumpli ku Dios Su obra den e delaster dianan.

Moises a konferí e yabinan di e rekohementu di Israel.

Elias a konferí e dispensashon di e evangelio di Abraham, inkluyendo e restourahon di e Kombenio Abrahámiko.

Elia a konferí e yabinan di e poder di seyamentu, proveyendo e outoridat ku ta permití ordenansanan hasí na tera pa ta mará na eternidat, manera uni famianan huntu den relashon eterno ku ta surpasá morto.

Miéntras ku José Smith tabata tradusiendo e Buki di Mormon el a risibí revelashon ku e Iglesia di Hesu-Kristu lo wòrdu restablesé. Pero Señor a instruí José pa no organisá e Iglesia inmediatamente. Mihó bisá, “dor di e spiritu di profesia i revelashon” Señor a revelá na José “e dia eksakto …[ku e] mester prosedé na organisá Su Iglesia un [biaha mas], riba mundu.”

E Iglesia a wòrdu organisá den e sekuensia apropiá solamente despues di e restourashon di e saserdosio i e publikashon di e Buki di Mormon. E promé kopianan di e Buki di Mormon tabata optenibel riba 26 di mart, 1830, i e Iglesia a wòrdu formalmente organisá riba 6 di aprel.

“E Iglesia di Hesu-Kristu di e Santunan di e Delaster Dianan … ta e Kristu Su Iglesia di Tèstamènt Nobo restourá. E Iglesia aki ta ankrá den e bida perfekto di e piedra angular prinsipal, Hesu-Kristu, i den Su Ekspiashon infinito i Resurekshon literal. Hesu-Kristu un biaha mas a yama Apòstelnan i a duna nan outoridat di saserdosio. E ta invitá nos tur pa bini serka DjE i Su Iglesia, pa risibí e Spiritu Santu, e ordenansanan di salbashon i pa haña goso duradero.”

E aparishon di e Tata i e Yu na José Smith, e tradukshon i e introdukshon di e Buki di Mormon, i e restourashon di outoridat i yabinan di saserdosio tabata rekesitonan nesesario pa ku e organisashon di Señor Su Iglesia restourá.

Den e Tèstamènt Bieu e profeta Daniel a interpretá un soño tokante un piedra ku lo wòrdu kòrta for di un seru sin man di hende i yena henter e mundu. Un aña despues di e organisashon di e Iglesia, Señor a instruí José Smith ku e yabinan di e reino di Dios atrobe a wòrdu “konferí na hende i na mundu” i e “evangelio [di Hesu-Kristu lo] lora i bai na finnan di mundu, komo e piedra ku lo ta kòrtá for di e seru sin mannan.”

Mi ta testifiká: Señor ta kumpliendo Su promesa. E Salbador Su Iglesia restourá ta wòrdu establesé rònt mundu i ta e instrumento dor di kual Dios lo “rekohé un pa un tur kos den Kristu tantu den shelu komo na tera; asta den dje.”

Señor Su obra di e delaster dianan “ta un kousa ku a interesá e pueblo di Dios di kada époka; e ta un tema riba kual profetanan, saserdotenan i reinan a kana ku ne ku deleite pekuliar, ku nan wak dilanti ku antisipáshon gososo riba e dia den kual nos ta biba; i yená ku antisipashon selestial i goso nan a kanta i skirbi i a profetisá di nos dia.”

Den e delaster dispensashon aki ku ta esun di mas grandi; “un union kompletu i perfekto, i di vlègtu huntu di dispensashonnan i yabinan, i podernan, i glorianan lo mester tuma lugá, i wòrdu revelá for di dianan di Adam asta na e tempu presente. I no solamente esaki, pero e kosnan ei ku nunka a wòrdu revelá for di e fundashon di e mundu … lo wòrdu revelá … den esaki, e dispensahon di e plenitut di tempu.”

E Profeta, José a sigui splika, “Tur e ordenansanan, i debernan ku hamas a wòrdu rekerí pa e Saserdosio, bou di direkshon i mandamentunan di e Todopoderoso den kualker di e dispensashonnan, tur lo ta den e delaster dispensashon, … realisando e restourashon di kual a wòrdu papiá pa boka di e Santu Profetanan.”

Mi a trata di resumí e elementonan básiko di e “bon notisia” ku ta mas importante i glorioso ku kualke persona na kualke lugá hamas por risibí—e mensahe ku Señor Hesu-Kristu a restourá Su evangelio i Iglesia den e delaster dianan.

Mi ta invitá tur pa siña tokante i purba e mensahe aki. Mi ta primintí ku personanan “ku den orashon ta studia e mensahe di e Restourashon i aktua den fe lo wòrdu bendishoná pa haña nan propio testimonio di su divinidat i di su propósito pa prepará e mundu pa e Segundo Binida primintí di nos Señor i Salbador, Hesu-Kristu.” Miéntras bo ta hasi orashon sinseramente ku e speransa tantu pa risibí komo pa aktua konforme e kontesta di Dios, manera e hóben José smith a hasi, abo su kapasidat pa rekonsé i kontestá e testimonio divino ei lo krese.

Mi ta tèstifiká ku Dios e Tata Eterno, ta nos Tata. Mi ta testifiká i ta testigu ku Hesu-Kristu ta e Tata Su Yu Stimá i Uniko Yu den e karni. E ta nos Salbador i Redentor.

I mi ta tèstifiká gososo ku e Tata i e Yu a aparesé na e mucha hòmber José Smith, kuminsando asina e restourashon di e evangelio di Hesu-Kristu den e delaster dianan. E Buki di Mormon ta un un otro Tèstamènt di Hesu-Kristu i ta kontené e palabra di Dios. Outoridat di Saserdosio pa representá e Salbador i aktua den Su nòmber ta atrobe hañá na mundu. Ku E Iglesia di Hesu-Kristu di e Santunan di e Delaster dianan, ta Kristu Su Iglesia di Tèstamènt Nobo restourá. Mi ta duna mi testimonio sigur ku tur e kosnan aki ta bèrdat den e nòmber sagrado di Hesu-Kristu, amèn.