Manera un Mucha Chikitu

Hesus a kuminsá e delaster aña di Su bida mortal intensifikando e entrenamentu di Su Apòstelnan. Si Su mensahe i Su Iglesia mester a kontinuá, mas mester a wòrdu imprimí den kurason di 12 hòmber masha komun ku a konos’É pa apénas 24 luna.

Un dia Hesus a presensiá un diskushon entre e Diesdos i despues a puntra, “Kiko boso tabata diskutí entre boso mes?” Aparentemente bergonsá, nan “a keda ketu,”e registro ta bisa. Pero e maestro mas grandi aki di tur a persibí e pensamentunan di nan kurasoni a sinti e promé sombra di orguyo personal. Pues El a “yama un mucha chikitu serka dje, …

“I a bisa, di bèrdat mi ta bisa na boso, eksepto ku boso kombertí, i bira manera un mucha chikitu, boso lo no drenta den e reino di shelu.”

“P’esei ken ku lo humiá su mes manera e mucha chikitu aki, esei ta e mas grandi den e reino di shelu.”

Mester tuma nota ku asta promé ku Kristu su nasementu, e sermon di despedida di Rei Benjamin a inkluí e komentario profundo aki riba humildat di un mucha. E ta bisa, “E hende natural ta un enemigu di Dios, … i lo ta, pa semper i semper, a ménos ku e bira un santu pa medio di e ekspiashon di Kristu e Señor, i bira manera un mucha, sumiso, … humilde, … yen di amor, … meskos ku un mucha [ta respondé] na su tata.”

Awor, opviamente tin algun inklinashon infantil ku nos no ta enkurashá. Binti sinku aña pasá, mi nietu di e tempu ei di tres aña a morde su ruman muhé di sinku aña na brasa. Mi yerno, ku tabata kuida e muchanan e anochi ei, a siña su yu muhé tur e lèsnan tokante pordon ku e por a pensa, konkluyendo ku su ruman hòmber chikitu probablemente no tabata sa mes kon un mordementu na brasa ta sinti. E komentario paternal mal konsebí ei a funshoná pa mas o ménos un minüt, kisas un minüt i mei, te ora ku tabatin un gritu for di e kamber di e muchanan, kaminda mi ñetu a grita trankilamente, “E ta hasié awor.”

Pues kiko nos mester wak den e birtutnan di e nobatonan hubenil den bida? Kiko a pone ku Kristu mes a saka lágrima den e esena mas tierno di e Buki di Mormon? Kiko Hesus tabata siña ora ku El a yama kandela for di shelu i angelnan protektor pa rondoná e muchanan aki, mandando e adultonan pa “wak [nan] yunan chikí”?

Nos no sa kiko a impulsá tur esei, pero mi mester pensa ku e tabatin algu di haber ku nan puresa i inosensia, nan humildat innato, i kiko e lo por a trese den nos bida si nos retené.

Dikon nos dianan di desesperashon ta wòrdu etiketá pa unu komo “banidat di banidatnan”? Kon por ta ku “imaginashonnan vano i e orguyo di e yunan di hende” ta e palabranan ku ta karakterisá e edifisio grandi i espasioso, asina spiritualmente morto den e vishon di Lehi? I e zoramitanan, e grupo ei ku a hasi orashon ku asina un egoismo? Di nan Alma a bisa, “O Dios, nan [ta hasi orashon] na bo ku nan boka, miéntras nan ta hinchá … ku e kosnan bano di mundu.”

Den kontraste, tin algu mas dushi, mas puru òf mas humilde ku un mucha na orashon? Ta komo si fuera shelu ta den e kamber. Dios i Kristu ta asina real, pero pa otronan, mas despues, e eksperensia por bira mas superfisial.

Komo Elder Richard L. Evans a sita un 60 aña pasá: “Hopi di nos ta profesá di ta kristian, tòg nos … no ta tum’É na serio. … Nos ta respet’É, pero nos no ta sigui’É. … Nos ta sita Su dichonan, pero nos no ta biba segun nan.” “Nos ta atmirá E, pero nos no ta adorá E.”

Kon diferente bida lo por ta si mundu tabata stima Hesus riba e nivel di un racha di huramentu profano di tempu pa tempu.

Pero muchanan realmente ta stim’É, i e amor ei por sigui pa nan otro relashonnan den e tereno di wega di bida. Komo regla, asta den nan añanan di mas yòn, muchanan ta stima asina fásil, ta pordoná asina fásil, i ta hari asina delisioso ku asta e kurason di mas friu i duru por dirti.

Pues, e lista ta sigui i sigui. Puresa? Konfiansa? Kurashi? Karakter?

Bin ku mi pa mira e humildat dilanti di Dios demostrá pa un amigu yòn, hopi kerí di mi.

Riba 5 di yanüari 2025,—91 dia pasá— Easton Darrin Jolley a haña e saserdosio Aaróniko konferí riba dje i a wòrdu ordená un diákono den e Iglesia di Hesu-Kristu di e Santunan di e Delaster Dianan.

Easton tabata anhelá pa pasa e sakramento di Señor su Sena for di dia ku e ta kòrda. Pero e oportunidat sagrado aki tabata kompañá pa un temor profundo ku e lo a frakasá, ku e lo a kai, ku e lo a wòrdu burlá òf pone su mes i su famia na bèrgwensa.

Bo sa, Easton tin un malesa hopi straño i destruktivo, e distrofia muskular kongénito di Ullrich. Progresivamente el a yena su bida hóben ku retonan formidabel miéntras e ta kibra na pida pida su speransa i soñonan pa futuro. Pronto e lo ta den ròlstul permanentemente. Su famia no ta papia tokante kiko ta sper’é despues di esei.

E djadumingu despues di su ordenashon, Easton lo a pasa e sakramento pa promé biaha. I su motivashon den privá tabata ku e por presentá su mes i e emblemanan sagrado aki na su tata, ku tabata e obispu di e rama. Antisipando riba e tarea ei el a roga i supliká, yora i roga, pa risibí e garantia ku niun hende, ni un lo trata na yud’é. Pa hopi motibu, privá pa su mes, e tabatin nesesidat di hasi esaki su so i sin yudansa.

Despues ku e saserdote a kibra e pan i a bendishon’é—un emblema ku ta representá e kurpa kibrá di Kristu—Easton, ku su kurpa kibrá, a lanta pa risibí su baki. Sinembargo, tabatin tres subida konsiderabel for di e flur di e kas di reunion te na e podio na laira. Pues, despues di a risibí su skalchi, el a rèk bai mas haltu ku e tabata por i pone su skalchi riba e parti ariba kaminda por gara ku man. Despues, sintá riba un di e trapinan mas haltu, ku tur dos man el a hala su pia drechi ariba riba e promé stap. E ora ei el a pusha su pia robes riba e mesun stap, i asina el a sigui bai ariba te ora ku hopi difikultat el a yega na e kabes di su Seru Mount Everest personal di tres stap.

E ora ei el a maniobrá su mes bai na un palu struktural pa medio di kual e por a subi yega na un posishon pará riba pia. El a bai bèk na su skalchi. Algun stap mas i el a para dilanti di e obispu, su tata, kende, ku lágrimanan ta muha su wowonan i ta basha riba su kara, mester a frena su mes di brasa e yu hòmber perfektamente balente i fiel aki. I Easton, aliviá ku un sonrisa enorme riba su kara, lo por a bisa, “Mi a glorifiká [mi tata i] a terminá e trabou ku [el a duna] mi pa hasi.”

Fe, lealtat, puresa, konfiansa, honor, i, na final, amor pa e tata ku el a deseá pa komplasé asina tantu. Esaki i un otro dosein di kalidatnan ta laga nos tambe bisa, “Ken ku … lo humiá nan mes manera e mucha chikitu aki, ta esun di mas importante den e reino di shelu.”

Rumannan muhé i rumannan hòmber i amigunan, na kabes di e lista di e imágennan di mas bunita ku mi konosé ta beibi i mucha i hóbennan asina konsiente i impagabel manera esnan ku nos a referí na dje awe. Mi ta testifiká ku nan ta imágennan di e reino di Dios floresiendo riba tera den tur su forsa i bunitesa.

Den e mesun spiritu di testimonio ei, mi ta duna testimonio ku den su hubentut, José Smith a mira loke el a bisa ku el a mira i a kombersá ku esnan ku el a bisa ku el a papia ku ne. Mi ta testifiká ku un Russell M Nelson humilde y puro ta Dios su profeta i vidente ordená i dotá. Biniendo for di un bida di lesamentu konstante, mi ta duna testimonio ku e Buki di Mormon ta e buki mas gratifikante ku mi a yega di lesa i e piedra klave di mi bibienda chikitu den un reino di hopi kas grandi. Mi ta duna testimonio ku saserdosio i orashon ta restourando mi bida—e saserdosio di Kristu i boso orashonnan. Mi sa ku tur esaki ta bèrdat i ta duna testimonio di dje den nòmber di esun mas leal i humilde di tur e yunan di Dios—Alfa i Omega, e Gran Ami Ta, esun krusifiká, e testigu fiel—asta Señor Hesu-Kristu, amèn.