Fiel na e Fe Ku Nos Mayornan A Tesorá

Durante un bishita ku mi a hasi na e Tèmpel di Nashville na Tennessee pa un revishon, mi tabatin e privilegio di hasi un rekorido dor di e tempel komo parti di e asignashon, revisando asina e bunita kas di Señor aki. Mi a keda spesialmente impreshoná ku e pintura di Mary Wanlass yamá Carry On na e muraya den ofisina di e kasá di e presidente di tèmpel.

Esaki ta e historia tras di e pintura:

Na aña 1862 na Missouri, Mary Wanlass na edat di 14 aña a hasi un promesa na su mama di kriansa ku tabata muriendo, ku lo e sòru pa su kasá ku ta deshabilitá [i su kuater rumannan mas hóben ku e mes, lo yega] na e vaye di e Great Salt Lake. … Mary tabata kore e bueynan i bakanan di lechi ku tabata hala e garoshi den kual su tata [tabata na kama, i] el a kuida su … rumannan. Despues di kada biahe di dia, e tabata alimentá e famia dor di buska mata, flor i bèshinan komibel. Su úniko kompas tabata e instrukshon ku el a risibí pa sigui biaha bai wèst te ora e nubianan kambia i bira serunan.

Nan a yega [e] vaye di Utah den sèptèmber, despues di a biaha henter primavera i zomer. Su tata a muri no muchu tempu despues ku e famia a establesé nan mes den Utah County, kaminda Mary despues a kasa i a lanta su [mes] famia.”

Esaki ta un historia asombroso di e fe i forsa di un mucha muhé di 14 aña ku por yuda kada un di nos awe pa “djis sigui.”

“Just Carry On,” [Djis Sigui bai] òf tradusí libremente den mi idioma nativo hulandes, Gewoon Doorgaan— tambe ta e slogan di bida di mi mama i tata.

Mi mayornan i suegronan ta e pioneronan den nos famia. Nan a krusa nan mes “planonan,” meskos ku tur esnan ku ta biniendo den Iglesia, e tou di Señor, tur dia. Nan historianan tin tiki di haber ku buey i wagòn pero tin e mesun efekto riba futuro generashonnan.

Nan a brasa e evangelio i a wòrdu batisá den nan añanan di hóben adulto. Tur dos mi mayornan tabatin un infansia difísil. Mi tata a lanta i krese na e isla di Java na Indonesia. Durante Segundo Guera Mundial, el a wòrdu separá ku forsa for di su famia i interná den un kampo di konsentrashon, kaminda el a sufri difikultatnan indeskribibel na un edat yòn.

Mi mama a lanta den un kas kibrá i tambe a sufri di hamber i e difikultatnan di Segundo Guera Mundial. Tin bia e mester a asta rekurí na kome bulbo di tùlp. Debí na e akshonnan di su tata, i despues su divorsio for di su mama, tin bia tabata difísil p’e mira Tata Selestial komo un Tata amoroso.

Mi mayornan a topa na un aktividat di Iglesia i poko despues a disidí di kasa i seyá den e Tèmpel di Bern Suisa. Wardando na e stashon di trein, despues di a gasta e último di nan tiki sèn di spar pa e biahe pa e tèmpel, nan a puntra nan mes kon nan lo a topa nan fin pero tabata sigur ku tur kos lo a bai bon. I asina a sosodé!

Nan a kuminsá lanta nan famia for di un apartamento hopi humilde ku un solo kamber den zòlder den kurason di Amsterdam. Despues di vários aña di laba nan paña na man, nan porfin a spar sufisiente sèn pa kumpra un mashin di laba paña. Djis promé ku nan lo a hasi e kompra, e obispu a bishitá nan, pidiendo nan pa un kontribushon pa konstruí un kas di reunion na Amsterdam. Nan a disidí di duna tur loke nan a spar pa e mashin di laba paña i a sigui laba paña na man.

Komo famia nos a pasa den algun difikultat, meskos ku kualke otro famia. Esakinan solamente a hasi nos mas fuerte i a profundisá nos fe den Señor Hesu-Kristu, meskos ku ora Alma tabata kompartí su historia ku su yu Helaman, kaminda el a kont’é ku el a wòrdu “sostené bou di pruebanan i problemanan di tur klase” pasobra el a pone su konfiansa den Señor Hesu-Kristu.

Kon dos hende ku a eksperensiá asina tantu prueba den nan añanan mas hoben a bira e mihó mayornan ku mi por a deseá? E kontesta ta simpel: nan a brasa e evangelio kompletamente i ta biba segun nan kombenionan te dia di awe mes!

Despues di mas ku 65 aña di matrimonio, mi mama, kende tabata sufri di malesa di Alzheimer, a fayesé na febrüari. Mi tata, na edat di 92 aña i ainda bibando na kas, tabata bishit’é mas frekuente ku e tabata por te ora ku el a fayesé. Algun tempu pasá el a menshoná na mi rumannan mas hóben ku e eksperensianan spantoso den e kampamentu na Indonesia durante Segundo Guera Mundial a prepar’é pa kuida su kasá ku pasenshi pa hopi aña ora ku el a bira malu i sigi deteriorá di e malesa horibel aki i tambe pa e dia fatal ku e mester a konfia su kuido primario na otronan i no por tabata na su banda mas. Nan lema tabata i ainda ta pa “Djis Sigui bai,” teniendo un speransa perfekto den Kristu pa wòrdu lantá riba e delaster dia i pa biba huntu kuné den gloria pa semper.

Nan fe i testimonionan ta un forsa impulsor pa e generashonnan ku a bini despues di nan.

Den e pueblo kaminda mi kasá a lanta, su mayornan, ku tabata bon hendenan ku ta bai iglesia, a brasa e evangelio komo un pareha kasá yòn, ku mi kasá komo nan yu muhé di dos aña i tambe nan úniko yu e tempu ei. Nan desishon pa bira miembro di e Iglesia di Hesu-Kristu di e Santunan di e Delaster Dianan tabatin un impakto grandi riba nan bida ya ku nan a wòrdu evitá pa e habitantenan di e pueblo i nan famia. A tuma hopi aña, notanan amoroso pa miembronan di famia, i servisio na komunidat promé ku nan a wòrdu aseptá finalmente.

Na un okashon ora ku e tata di mi kasá tabata sirbi komo obispu, el a wòrdu akusá falsamente di algu i mesora el a wòrdu relevá. Mi suegra a keda ku asina doló ku el a puntra su kasá si nan mester a sigui bai iglesia. El a kontestá ku nan naturalmente lo sigui bai iglesia ya ku esaki no ta e iglesia di hende, sino ku esaki ta e iglesia di Hesu-Kristu.

A dura algun tempu promé ku e berdat a sali na kla i diskulpa a wòrdu pidí. Loke por tabata nan punto di kiebro a djis agregá na nan forsa i konvikshon.

Dikon ta ku algun di nos ta tuma komo nada e fe i testimonionan di nos mayornan ku atraves di tur nan difikultatnan a keda fiel? Nos ta kere ku nan no tin un entendimentu kla di kosnan? Nan no tabata i no ta wòrdu engañá! Nan tabatin bastante eksperensia ku e Spiritu i por bisa ku e Profeta José, “Mi tabata sa, … i mi no por a neng’é.”

Bo no ta stima e kantika tokante e ehérsito di Helaman, hañá den e Buki di Kantika di Primaria?

Asta ora esaki kisas no ta e kaso, manera mi mama a eksperensiá komo mucha, bo por bira un di e “bon mayornan ei ku ta stima Señor” i proveé ​​un ehèmpel hustu na otronan.

Nos ta sinti ku esaki ta apsolutamente bèrdat ora nos kant’é? Bo ta sinti ku bo ta “manera e ehersito di Helaman i” ku lo bo “ta Señor Su mishoneronan pa trese Su bèrdat na mundu”? Ami a sinti esei na asina tantu okashon ora mi ta kantando e kansion aki na diferente sekshonnan di FSY i otro reunionnan di hubentut.

Òf kiko nos ta sinti ora nos ta kanta e himno “Fiel na Fe”?

Na esnan di e generashon kresiente na unda ku bo ta i den kua situashon ku bo por haña bo mes aden, por fabor siña i risibí forsa for di e fe i testimonionan di esnan ku a biba promé ku abo. E lo yuda bo komprendé ku pa logra gana i krese un testimonio, sakrifisionan mester wòrdu hasí i ku “sakrifisio ta trese bendishonan di Shelu.”

Pensando riba un sakrifisio ku realmente lo bendishoná bo bida, por fabor konsiderá i hasi orashon tokante e invitashon di nos profeta stimá, Presidente Russell-M. Nelson, ora ku el a pidi “kada hóben digno, kapas, pa prepará su mes pa i sirbi un mishon. Pa hombernan hoben Santu di e Delaster Dianan, servisio misional ta un responsabilidat di saserdosio. …

Pa … rumannan muhéhan hoben i kapas, un mishon tambe ta un oportunidat poderoso, pero opshonal”,

Bo por wòrdu yamá komo un mishonero den servisio òf enseñansa. Tur dos tipo di mishonero ta kontribuí na e mesun meta di trese almanan na Kristu, kada un den nan propio manera úniko i poderoso.

Den tur dos tipo di servisio, lo bo mustra Señor ku bo ta stim’É i ku bo ke siña konos’É mihó. Kòrda, “Pasobra kon un hende konosé e maestro ku e no a sirbi, i ku ta un strañero p’e, i ta leu for di e pensamentunan i intenshonnan di su kurason?”

Nos tur, sea nos ta e promé generashon den e evangelio òf e di sinku, mester puntra nos mes, Kua historianan di fe, forsa, i kompromiso selestial lo mi pasa pa e siguiente generashon?

Laga nos tur sigui den nos esfuersonan pa konosé nos Salbador, Hesu-Kristu, mihó i pa hasi’E e sentro di nos bida. E ta e baranka riba kual nos mester konstruí pa ora tempu bira difísil, nos por para firme.

Laga nos ta “fiel na e fe ku nos mayornan a tesorá, fiel na bèrdat pa kual mártirnan a muri, na e mandamentu di Dios, alma, kurason i man, fiel i berdadero semper nos lo para ” Den e nòmber di Hesu Kristu, amèn.