Nèt Dilanti Nos Wowonan

Rumannan, mi ta asina agradesido di ta huntu ku boso. Nos ta stima boso, nos ta gradesido pa boso; i nos ta sinti nos bendishoná pa boso orashonnan.

Presidente Russell M. Nelson a bisa na nos delaster konferensia: “Bo ta mira kiko ta pasando nèt dilanti di nos wowonan? Ta mi orashon ku nos lo no pèrdè e mahestat di e momentu aki! Señor enbèrdat ta purando Su obra.”

Purando Su obra. “Purando” ta un palabra importante. E ta sugerí move lihé, aselerá, i asta urgensia. Den e kresementu di e Iglesia i e plan di Kristu, purando ta tumando lugá. I nos tur ta parti di dje.

Na aprel 1834 na Kirtland, Ohio, e Profeta José Smith a reuní tur ku tabatin e saserdosio den un kas di skol chikitu, mas o ménos 14 pia (4.3 m) kuadrá. Nos por a hinka desenas di e kasnan di skol ei den e Sentro di Konferensia aki, ku espasio pa sobra. José Smith a bisa, “Solamente un man yen di Saserdosio boso ta mira aki awe nochi, pero e Iglesia aki lo yena Nort i Sur Amérika—e lo yena mundu.”

E profesia ei ta kumpliendo “nèt dilanti di nos wowonan.” E Iglesia di Hesu-Kristu di e Santunan di e Delaster Dianan ta kresiendo den miembronan i famianan, mishonnan i mishoneronan, kasnan di reunion i tèmpelnan, i den inskripshon den nos seminarionan, institutonan, i universidatnan rònt mundu.

Nos ta agradesido di ta riba mundu ora Iglesia ta oumentando den kantidat i influensia, pero mas importante den kurason i bida di su miembronan. Nos ta disipelnan konosí di Hesu-Kristu. Nos ta kompartí nos testimonionan di djE, Su Iglesia, Su maneranan, i Su kaminda di Kombenio. Nos ta Su pueblo, i E ta nos Salbador.

Mi ta asombrá di loke Presidente Nelson ta yama e “mahestat di e momentu aki” i ta ekspresá gratitut profundo na Señor pa Su obra. Mi ta enkurashá nos pa para haltu komo Su disipelnan, testigunan okular di e kumplimentu di profesia, tantu antiguo komo moderno.

Tin esnan ku ta bisa ku no ta grita, “‘Mira, aki!’ i … ‘Mira, aya!’” meskos ku nan a hasi den tempu di Profeta José Smith. Sinembargo, nan ta i lo ta djis notanan na pia di página den e obra noble aki. Kòrda e palabranan di José Smith: “Ningun man no sagrado por stòp e trabou di progresá; persekushonnan por rabia, … pero e bèrdat di Dios lo bai dilanti ku kurashi, noblemente, i independiente, te ora el a penetrá tur kontinente, bishitá tur klima, bari tur pais, i zona den tur orea, te ora e propósitonan di Dios wòrdu kumplí, i e obra grandi lo bisa ta kla.”

Den mi asignashonnan e aña aki, mi tabatin un asiento den promé fila pa Señor su “aselerá Su obra.” E Iglesia ta konstruyendo tèmpelnan na un ritmo sin presedente, dunando mas miembro un oportunidat pa adorá den e kas di Señor. Na di dos lugá, e obra misional ta rekohé kantidatnan rèkòrt pa e tou di e Bon Wardadó, Hesu-Kristu. I di tres, edukashon di Iglesia den hopi konfigurashon ta na un nivel nobo den siña esnan ku “ta buska e Hesus aki.”

Awendia e Iglesia tin 367 tèmpel den vários etapa di diseño, konstrukshon, òf operashon. I pa kua propósito? E kontesta ta wòrdu proklamá riba kada tèmpel: “Santidat na Señor.” E tèmpel ta habri e kaminda pa e bendishonnan di mas haltu ku nos Tata den Shelu tin pa kada un di nos. Rumannan, nos ta aselerando nos “santidat” miéntras nos ta biba digno pa tèmpel, miéntras nos ta adorá den e kas di Señor, i miéntras nos ta sera kombenionan ku Dios pa nos mes i na nòmber di nos antepasadonan na e otro banda di e velo.

Presidente Nelson a bisa: “E atakenan di e atversario ta oumentando eksponensialmente, den intensidat i den variedat. Nos nesesidat pa ta den tèmpel riba un base regular nunka tabata mas grandi. Mi ta supliká boso pa konsiderá den orashon riba kon boso ta usa boso tempu.” Den Su kas nos por sinti e presensia santifiká di Señor i pas trasendental.

Aña pasá mi tabatin e privilegio di presidí na e dedikashon di e Tèmpel di Mendoza Argentina. Den mi mensahe, mi a referí na Elder Melvin J. Ballard su profesia di 1926 ku e obra di Señor lo a krese pokopoko pa un tempu na Sur Amérika, “meskos ku un roble ta krese pokopoko for di un nechi. E lo no bula sali den un dia,” pero míles lo uni na Iglesia, i e nashonnan di Sur Amérika lo bira “un poder den Iglesia.” Mi a mira e profesia ei kumpli nèt dilanti di mi wowonan.

Mendoza, un tempu un nechi chikitu, a bira un roble poderoso. E kresementu ei ta wòrdu ripití den kontinentenan i islanan di laman.

Nos ta mira Señor ta aselerá Su obra den mishonnan. Na 2024, 80.000 mishonero tabata sirbi den 450 mishon. Trintiseis di esakinan ta mishonnan nobo. Aña pasá obra misional a trese mas ku 300.000 miembro nobo den Iglesia. Mas ku sifranan, e spiritu di e rekohementu ta trese almanan na Hesu-Kristu i Su evangelio.

Mi ta pensa riba e Apòstelnan Brigham Young i Heber C. Kimball, kende na 1839 a sali komo mishonero pa e Islanan Britániko. Nan tabata malu; nan a laga famianan malu i desampará. No opstante, nan dos a subi den un wagòn, i miéntras ku nan tabata den bista di nan sernan kerí, ​​Heber a bisa, “Ban lanta i duna nan un saludo.” Nan dos a lucha pa lanta para i a grita, “Hurá, hurá pa Israel.”

Mi a mira e mesun entusiasmo ei pa e obra di Señor na Lima, Peru, ora mi a topa ku mishoneronan di e Sentro di entrenamentu pa mishonero i mishonnan na Lima. Ki un bista! Mi a mira e aselerá nèt dilanti di mi wowonan. Awor tin shete mishon den djis e siudat di Lima.

Na final di nos reunion, e mishoneronan tabatin un sorpresa spesial pa mi. Nan a lanta i a grita: “Hurá pa Israel.” Nunka lo mi lubidá e momentu ei; Mi ta deseá ku boso tur por tabata einan. “Nèt dilanti di mi wowonan” tabata mishoneronan ku a pone un banda “e kosnan di e mundu aki” pa sirbi Señor i yuda aselerá Su binida.

Nos ta mira Señor ta aselerá oportunidatnan edukativo pa nos miembronan i asta esnan ku no ta di nos fe rònt mundu. Un di e kosnan ku ta distinguí nos komo Iglesia ta nos énfasis riba edukashon. Señor a ordená den e promé dianan di e Restourashon pa “buska siñamentu, asta pa medio di estudio i tambe pa medio di fe.” Esei ta pasando awe i ta digno di un “hurá” resonante.

Aktualmente mas ku 800.000 studiante rònt mundu ta inskribí den seminario i instituto, e inskripshon di mas haltu den historia di Iglesia. Nos hóbennan ta reuní den un variedat di manera, for di mainta trempan, den dia i lèsnan di anochi te na estudio virtual i estudio na kas. Nan ta un batayon poderoso i hustu, ganando forsa for di otro segun ku nan ta siña di Hesu-Kristu, sigui, i testifiká di djE komo e Yu Dios.

Hèrfst último mi a papia na un devoshon na un arena yen di studiantenan di seminario i instituto i nan mayornan na Universidat di Utah. Nan asistensia a bisa hopi tokante nan deseo pa konosé i sigui Hesu-Kristu. Mi mensahe pa e studiantenan ei tabata kla: Duna Señor mes tantu tempu. Mi a konsehá nan pa balansá nan estudio ku berdadero enseñansa superior, asta un estudio di “e Yu di e Dios bibu.”

Mi ta pidi e mesun kos di tur hende awe: Kiko ku ta riba bo lista di kosnan pa hasi, duna tempu igual, no tempu liber, na Señor den estudio personal di skritura, estudio familiar di Bin, Sigui Mi, orashon, yamadanan di Iglesia, ministrá, partisipá di e sakramento, adorá den tèmpel, i meditá riba e kosnan di Dios. Nos Señor i Salbador a bisa, “Siña di mi … i boso lo haña sosiegu na boso alma.” Konfia den Su palabra. I dun’E mesun tantu tempu.

Presidente Nelson a bisa: “Mi ta roga na laga Dios prevalesé den boso bida? Dun’E un parti hustu di boso tempu. Ora bo hasié, tuma nota kiko ta pasa ku bo momentum spiritual positivo.”

Nos ta mira e momentum ei kresiendo den seminario, instituto i universidatnan di Iglesia. Den e ambientenan aki, Señor ta un prioridat. Asina E mester ta den kada un di nos su bida.

Un otro área ku ta mustra e alkanse kresiente di edukashon den Iglesia ta BYU–Pathway Worldwide. Rònt mundu, e inskripshon a yega kasi 75.000 i ta sigui krese rápidamente. Mayoria ta miembro, i mas ku un tersera parti ta na Afrika. Pathway ta tur loke ta trata akseso na edukashon. Kompletá e kursonan ta nifiká akseso na empleo, i akseso na empleo ta nifiká un mihó bida pa famianan i mas oportunidat pa sirbi Señor.

Ora mi tabata reuní ku lidernan di estaka na Uganda, mi a siña ku henter e presidensia di staka tabata inskribí den BYU–Pathway. Mas prepará nos ta temporalmente i spiritualmente, mas nos por stroba e atakenan astuto di e atversario. Kòrda e palabranan di Pedro: “Diabel, manera un leon ku ta gruña, ta kana rònt, buskando ken e por devorá.”

Mi ta rekonosé ku meimei di e bon notisia di e evangelio, tin esnan ku ta lucha, ku tin desafionan di fe, dudanan, i preguntanan ku ta parse di no tin kontesta. Rumannan, Hesu-Kristu ta e kontesta. Kuminsá Kun’É. Buska Su man den boso bida. Skuch’É. “No laga boso kurason ta preokupá,” El a bisa den Su último oranan na Su disipelnan promé ku Getsémani, promé ku e karga Su krus dor di e kayanan di Herusalèm, dilanti Gólgota, kaminda El a kompletá Su sakrifisio ekspiatorio—loke solamente E, e Yu Úniko di Dios, por a hasi.

Sa ku E ta komprondé. El a tuma riba Su mes tur nos pikánan, erornan, miseria, i dianan hopi malu pa nos por biba atrobe ku nos Tata den Shelu den eternidat. El a bisa, “Mira na ami den kada pensamentu; no duda, no teme.” Fe den Hesu-Kristu por alsá bo i kura bo alma heridá. Konfi’E i lo bo aselerá bo regreso na “e brasanan di Su amor.”

Mi ta enfatisá atrobe e palabranan di nos profeta bibu: “Bo ta mira kiko ta pasando nèt dilanti di nos wowonan? Ta mi orashon ku nos lo no pèrdè e mahestat di e momentu aki! Señor enbèrdat ta purando Su obra.” Laga nos komo disipelnan di nos dia grita, “Hurá pa Israel” miéntras nos ta prepará pa e regreso di nos Señor i Salbador. Den e nòmber di Hesu-Kristu, amèn.