Bendishonnan ku ta Kompensá

Sirbiendo den Presidensia di Obispado, mi tabatin e privilegio di topa ku Santunan di Delaster Dianan rònt mundu den un variedat di luganan i kulturanan. Mi a wòrdu inspirá kontinuamente pa boso fe duradero i devoshon na Señor Hesu-Kristu. Sinembargo mi tabata konmoví tambe pa e diferente i hopi bia sirkunstansianan difísil ku hopi di boso ta enfrentá—retonan manera malesa, desabilidat, rekursonan limitá, ménos oportunidat pa matrimonio òf edukashon, abuso dor di otronan, i otro limitashonnan òf restrikshonnan. Tin bia, e pruebanan aki por parse di ta stroba bo progreso i desafiá bo esfuersonan sinsero pa biba e evangelio kompletamente, hasiend’e mas difísil pa sirbi, adorá, i kumpli ku debernan sagrado.

Mi kerido amigunan, si bo a yega di sinti bo limitá òf den desbentaha pa sirkunstansianan di bo bida, mi ke pa bo sa esaki: Señor ta stima bo personalmente. E konosé bo sirkunstansianan, i e porta na Su bendishonnan ta keda hanchu habrí pa bo sin importá e retonan ku bo ta eksperensiá.

Mi a siña e bèrdat aki dor di un eksperensia personal ku, aunke aparentemente insignifikante, a laga un impreshon duradero riba mi. Na edat di 22 aña, durante servisio den e Forsa Aéreo Franses na Paris, mi tabata emoshoná di sa ku Elder Neal A. Maxwell, un Apòstel di Señor, lo papia na un konferensia na Champs-Élysées. Sinembargo, djis promé ku e evento, mi a risibí òrdunan pa kore hiba un ofisial haltu aeropuerto na mesun momentu ku e konferensia mester a tuma lugá.

Mi tabata despshoná. Pero determiná pa asistí, mi a baha e ofisial i a bai purá na e konferensia. Despues di haña un lugá pa parker, mi a kore bai Champs-Élysées pa e lugá di e reunion i a yega sin rosea faltando solamente sinku minüt promé e reunion kaba. Nèt ora mi a drenta, mi a tende Elder Maxwell bisa, “Awor lo mi duna boso un bendishon apostóliko.” Na e momento ei, mi a tabatin un eksperensia spiritual bunita, i inolvidabel. Mi tabata yená pa e Spiritu i e palabranan di e bendishon ku a parse di a penetrá den kada fibra di mi alma, manera si nan tabata intenshoná solamente p’ami.

Loke mi a eksperensiá e dia ei tabata un manifestashon chikitu sinembargo poderoso di un aspekto konsoladó di Dios Su plan pa Su yunan: Ora sirkunstansianan for di nos kontrol ta prevení nos pa kumpli e deseonan rekto di nos kurason, Señor lo kompensá den maneranan ku lo permití nos risibí Su bendishonnan primintí.

E bèrdat trankilisante aki ta basá firmemente den tres prinsipio klave hañá den e evangelio restourá di Hesu-Kristu:

1. Dios ta stima kada un di nos perfektamente. “E ta invitá [nos] tur pa bini na dje i partisipá di Su bondat.” Su plan di redenshon ta sigurá ku tur hende, sin eksepshon, lo wòrdu otorgá un oportunidat hustu pa un dia risibí e bendishonnan di salbashon i eksaltashon.

2. Pasobra Dios ta tantu hustu i mizerikordioso i Su plan ta perfekto, E lo no tene nos responsabel pa kosnan for di nos kontrol. Elder Neal A. Maxwell a splika ku “Dios … mizerikodiasamente ta tene no solamente nos deseonan i nos aktuashon na kuenta, pero tambe e grado di difikultat ku vários di nos sirkunstansianan a imponé riba nos.”

3. Pa medio di Hesu-Kristu i Su Ekspiashon, nos por haña e forsa pa perseverá i finalmente vense tur retonan di bida. Manera Alma a siña, E Salbador a tuma riba djE no solamente e pikánan di esun ku arepentí pero tambe “e dolónan i e malesanan di su pueblo” i “nan enfermedatnan.” Pues, mas leu ku redimí nos for di nos fayonan, Señor Su mizerikòrdia i grasia ta sostené nos dor di inhustisia, defisiensianan, i limitashonnan imponé pa nos eksperensia mortal.

Risibí e bendishonnan ku ta kompensá aki ta bin ku sierto kondishonnan. Señor a pidi nos pa hasi “tur loke nos por hasi” i pa “ofresé henter [nos] alma komo un ofrenda na dje.” Esaki ta rekerí un deseo profundo, un kurason sinsero i fiel, i nos diligensia máksimo den warda Su mandamentunan i aliniá nos boluntat ku di djE.

Ora nos esfuersonan mas sinsero no ta satisfasé nos aspirashonnan dor di sirkunstansianan for di nos kontrol, Señor ainda lo por aseptá e deseonan di nos kurason komo un ofrenda digno. Presidente Dallin H. Oaks a siña, “Nos lo wòrdu bendishoná pa e deseonan rekto di nos kurason aunke algun sirkunstansia djafó a hasi imposibel pa nos hiba e deseonan aki den akshon.”

Ora e Propheta José Smith tabata prekupá pa su ruman Alvin, ku a muri sin risibí e ordenansanan esensial di evangelio, el a risibí e revelashon konsoladó aki: “Tur ku lo muri di awor pa dilanti sin konosementu di [e evangelio], ku lo a risibié ku henter nan kurason, lo ta herederonan di [e reino selestial di Dios]. ” Señor e ora ei a agregá, “Pasobra ami, Señor lo husga tur hende segun nan obranan, segun e deseo di nan kurason.”

Loke ta importante pa Señor no ta meramente si nos ta kapabel pero ku nos ta dispuesto pa hasi tur loke nos por pa siguiÉ komo nos Salbador.

Un amigu un bia a konsolá un mishonero hóben den tristesa tokante su relevo tempran pa motibunan di salú, apesar di su orashon i deseonan sinsero pa sirbi. El a kompartí un Skritura na unda Señor ta deklará ku ora Su yunan “bai ku tur nan forsa” i “no stòp nan diligensia” pa kumpli ku Su mandamentunan, “i nan enemigunan [kual por inkluí sirkunstansianan di atversidat den nos bida] stroba nan di kumpli e obra ei, mira, ta kumbiní mi pa no eksigí e obra ei mas di mannan di e [hendenan] ei, sino aseptá nan ofrendanan.”

Mi amigu a testifiká na e hòmber hóben aki ku Dios tabata sa ku el a duna tur loke e tabata por den kontestá e yamada pa sirbi. El a sigur’é ku Señor a aseptá su ofrenda i ku e bendishonnan primintí na tur mishonero fiel lo no wòrdu retené.

Señor Su kompensashon pa bendishonnan hopi bia ta bin pa medio di amabilidat i serviso di otronan ku ta yuda nos logra loke nos no por hasi nos mes. Mi ta kòrda un tempu ora, bibando leu for di un di nos yunan muhé na Fransia, nos a sinti nos inkapas pa asistié despues di un parto difísil. Den e mesun siman ei den nos bario na Utah tabata buska yudansa pa un mama ku a kaba di duna lus na ohochi. Mi kasá, Valérie, a ofresé pa hiba kuminda p’e, ku un orashon den su kurason pa tantu e mama nobo i nos yu muhé den nesesidat. Poko despues, nos a haña sa ku e hermananan den nos yu muhe su bario na Fransia a organisá pa proveé kuminda pa su famia. Pa nos, Dios a kontestá nos orashonnan, mandando Su angelnan pa trese konsuelo ora nos no tabata por.

Ora nos ta enfrentá limitashonnan i retonan, laga pa nos rekonosé nos mes bendishonnan—nos donnan, rekursonan, i tempu—i usa nan pa sirbi otronan den nesesidat. Hasiendo asina, nos lo no solalmente bendishoná otronan pero ta invitá sanashon i kompensashon den nos mes bida.

Un di e maneranan mas poderoso ku nos por kontribuí na Dios Su bendishonnan ku ta kompensá ta pa medio di e obra vikario ku nos ta hasi pa nos antepasadonan den e kas di Señor. Ora nos realisá ordenansanan den nan nòmber, nos ta partisipá aktivamente den Señor Su obra grandi di salbashon, usando nos donnan i abilidatnan pa proveé bendishonnan na esnan ku no tabatin e oportunidat pa risibí nan durante nan bida mortal.

E servisio di amor ku nos ta ofresé den e santu tèmpelnan ta rekordá nos ku e Salbador Su grasia ta ekstendé mas leu ku e bida aki. Den e bida binidero, nos por haña oportunidatnan nobo pa logra loke nos no por a hasi den e bida mortal aki. Papiando na hermananan ku ainda no a haña un kompañero eterno, Presidente Lorenzo Snow kariñosamente a bisa: “No tin niun Santu di e Delaster Dianan ku ta muri despues di a biba un bida fiel ku lo pèrdè kualke kos pasobra el a faya pa hasi sierto kosnan ora e oportunidat no a wòrdu proporsioná na dje. … Nan lo tin tur e bendishonnan, eksaltashon, i gloria ku kualke hòmber òf muhé ku tabatin e oportunidat aki lo tin.”

E mensahe di speransa i konsuelo aki ta pa nos tur, yunan di Dios. Nos niun no por skapa e retonan i limitashonnan di mortalidat. Alfin, nos tur a nase ku un inkapasidat natural pa salba nos mes. Sinembargo nos tin un Salbador amoroso, i “nos sa ku ta pa medio di [Su] grasia nos ta wòrdu salbá, despues di tur loke nos por hasi.”

Mi ta testifiká ku miéntras hopi sirkunstansia den bida por ta for di nos kontrol, nos niun ta for di alkanse di Señor Su bendishonnan infinito. Pa medio di Su sakrifisio ekspiatorio, e Salbador lo kompensá pa tur inkapasidat i inhustisia si nos ofresé henter nos alma na djE. Den e nòmber di Hesu Kristu, amèn.