Reverensia pa Kosnan Sagrado

Den e buki di Éksodo, nos ta biaha ku Moises na e subidanan di e Seru Horeb miéntras el a apartá for di su preokupashonnan diario—algu ku nos tur mester ta dispuesto pa hasi—pa wak e mata kimando ku no tabata wòrdu destruí. Segun e tabata yega serka, “Dios a yam’é for di entre e mata, i bisa, Moises, Moises. I el a bisa, ata mi aki. I [Dios] a bisa, … kita bo sapatunan for di bo pia, pasó e lugá riba kual bo ta para ta tera santu.” Den gran reverensia, humildat, i asombro, Moises a kita su sapatunan i prepará su mes pa skucha e palabra di Señor i pa eksperensiá Su presensia santu.

E seru santu di epifania ei, tabata un eksperensia yená ku reverensia inspirá, a konektá Moises na su identidat divino i tabata, en realidat, un elemento klave di su transformashon for di un wardadó di karné humilde pa un profeta poderoso, guiando e pa kana un kaminda nobo den bida. Di manera similar, kada un di nos por transformá nos disipulado den un patronchi mas elevá di spiritualidat dor di hasi e virtut di reverensia un parti sagrado di nos karakter spiritual.

E palabra reverensia por wòrdu destilá for di e verbo latin revereri, kual ta nifiká “sinti un atmirashon grandi pa Den e sentido di evangelio, e definishon aki ta mesklá ku un sintimentu òf aktitut di rèspèt profundo, amor, i gratitut. Tal ekspreshon pa e loke ta sagrado dor di esnan ku tin un kurason kontrito i deboshon profundo na Dios i Hesu-Kristu ta fomentá mas goso den nan alma.

Reverensia pa kosnan sagrado ta e manifestashon di mas grandi di un kualidat spiritual vital; e ta derivá for di nos konekshon ku loke ta santu i ta reflehá nos amor pa i e serkania na nos Tata Selestial i nos Salbador, Hesu-Kristu. E ta tambe un di e eksperensianan mas elevá di e alma. Tal virtut ta dirigí nos pensamentunan, kurason, i bida na Deidat. En realidat, reverensia no ta solamente un aspekto di spiritualidat; e ta e esensia di dje—e fundeshi riba kual spiritualidat ta konstruí, kreando un konekshon personal na e divino, manera ta wòrdu siñá dor di nos muchanan ora nan ta kanta: “Ora mi ta reverente, mi sa den mi kurason ku Tata Selestial i Hesus ta serka.”

Komo disipelnan di Hesu-Kristu, nos ta invitá pa kultivá e don di reverensia den nos bida pa por habri nos mes pa un komunion mas profundo ku Dios i Su Yu Hesu-Kristu, simultaniamente fortalesiendo nos karakter spiritual. Si nos tabatin mas di e tipo di sintimentunan aki den nos kurason, lo tabatin sin duda mayor goso i delisia den nos bida, i lo tabatin ménos espasio pa doló i tristesa. Nos mester kòrda ku mustrando reverensia pa kosnan sagrado ta duna nifikashon na hopi di loke nos ta hasi tur dia i ta fortalesé nos sintimentu di gratitut—inspirando reverensia, rèspèt, i amor pa kosnan mas elevá i santu.

Lamentablemente, nos ta biba den un mundu kaminda demostrá reverensia pa kosnan sagrado a bira kada bes ménos komun. En realidat, mundu ta selebrá loke ta ireverente, manera kualkier lektura di un revista ku ta brinda sensashon, programa di televishon, òf Internèt ta indiká. E falta di rèspèt pa loke ta sagrado ta produsí mas i mas un komportashon sin preokupashon i kondukta sin kunes, kual por hiba un generashon ku rapides den apatia i hiba e siguiente generashon den miseria.

Ireverensia por alehá nos tambe for di e lasonan ku kombenionan di Dios ta proveé i disminuí nos sentido di responsabilidat dilanti e Deidat. Konsekuentemente, nos ta kore riesgo di preokupá solamente tokante nos propio komodidat; satisfasiendo nos apetitnan inkontrolabel; i finalmente yega na e lugá impio ku ta despresiá kosnan sagrado, asta Dios, i konsekuentemente nos naturalesa divino komo yunan di Tata Selestial. Falta di reverensia pa ku kosnan sagrado ta fomentá e atversario su propósito dor di interumpí nos kanalnan di revelashon sensibel kual ta krusial pa nos sobrebibensia spiritual den nos dianan.

E nifikashon i importansia di reverensia pa loke ta sagrado ta bon alineá denter di e Skrituranan. Un ehèmpel den Doktrina i Kombenionan ta parse di indiká ku reverensia na nos Tata Selestial i Su Yu Hesu-Kristu ta un virtut esensial pa esnan ku logra e reino selestial.

Komo iglesia nos ta lucha pa trata e Tata i Yu den tur santidat i rèspèt den tur aspekto, inkluyendo kon nos ta representá Nan imágennan. E guia di e Spiritu Santu ta un komponente krusial den determiná kon e imágennan aki mester reflehá e naturalesa sagrado, karakter, i atributonan santu di e Tata i di e Yu. Nos ta hopi kouteloso pa evitá di ilustrá elementonan ku por distraí for di nos enfoke primario riba nos Tata Selestial i Su Yu Hesu-Kristu i Nan siñansanan, inkluyendo kon nos ta apliká hèrmèntnan avansá ofresé dor di teknologia, manera usa inteligensia artifisial (AI) pa generá kontenido i imágennan.

E mesun prinsipio ta wòrdu apliká na kualkier fuente di informashon disponibel denter di kanalnan di komunikashon ofisial di Iglesia. Kada lès, buki, manual, i mensahenan ta wòrdu kreá kuidadosamente i aprobá bou di e direkshon di e Spiritu pa ta sigur ku nos ta mantené e virtut sagrado, balornan, i normanan di e evangelio di Hesu-Kristu. Den un mensahe resien pa e hóbennan adulto di Iglesia, Elder David A. Bednar a siña, “Pa nabegá e intersekshon kompleho di spiritualidat i teknologia, Santunan di Delaster Dianan mester (1) identifiká prinsipionan di e evangelio ku por guia nan uso di inteligensia artifisial humildemente i den orashon (2) lucha sinseramente pa e kompania di e Spiritu Santu i e don spiritual di revelashon.”

Mi kerido rumannan, pa mas sofistiká komo moderno ku teknologia a bira, simplemente e no por simulá e maravia, reverensia, i asombro ku por keda hañá den e tipo di reverensia ku ta nase for di e influensia di e Spiritu Santu. Komo siguidónan di Hesu-Kristu, nos mester ta kuidadoso pa no debilitá nos konekshon ku Dios i Su Yu dor di usa kontenido generá dor di AI i imágennan no apropiá. Nos mester kòrda ku dependé riba un “brasa di karni” teknológiko moderno ta un remplasante inadekuá i sin rèspèt pa e inspirashon, edifikashon, i testigu ku por wòrdu risibí solamente pa medio di e poder di e Spiritu Santu. Manera Nefi a deklará: “O Señor, mi a konfia den bo, i lo mi konfia den bo pa semper. Lo mi no pone mi konfiansa den e man di karni.”

Den un otro revelashon, e Profeta José Smith a wòrdu instruí ku tèmpelnan konstruí pa Señor lo mester ta un lugá di reverensia p’É. Dor di hinter Su ministerio, nos kerido profeta, Presidente Russell M. Nelson, a enfatisá fuertemente nos adorashon den reverensia den e tèmpel sagrado. Den e kas di Señor, nos ta wòrdu siñá tokante drenta den e presensia sagrado di e Tata i e Yu. Semper mi a hañ’é instruktivo i asta inspirativo ku un di e promé kosnan ku nos ta hasi ora drenta tèmpel i prepará nos mes pa partisipá den e ordenansanan sagrado ta kita nos sapatu i bisti nos paña blanku. Manera Moises, si nos hasié intenshonalmente, nos por rekonosé ku kita nos sapatunan mundano ta e komienso di drenta den tera santu i wòrdu transformá den kamindanan mas elevá i santu.

Rumannan, nos no mester subi na e tòp di un seru, manera Moises a hasi, pa deskubrí reverensia pa kosnan sagrado i kombertí nos disipulado den un nivel mas profundo di spiritualidat i devoshon. Nos por hañ’é, por ehèmpel, miéntras nos ta lucha pa protehá ambiente di nos hogar for di influensianan mundano. Esaki por keda lográ dor di hasi orashon sinsero i ferviente dilanti nos Tata Selestial den e nòmber di Hesu-Kristu i buska pa konosé nos Salbador mihó pa medio di nos estudio diligente di e palabra di Dios hañá den Skrituranan i den e siñansanan di nos profetanan. Adishonalmente, tal transformashon spiritual por bini miéntras nos ta lucha pa honra e kombenionan ku nos a hasi ku Señor dor di biba den obediensia na e mandamentunan. E esfuerso nan aki por trese un inkietut hopi silensioso na nos kurason. Enfoká riba tal akshonnan seguramente por yuda transformá nos hogarnan den lugánan reverente di refugio spiritual—santuarionan personal di fe kaminda e Spiritu ta biba, paresido na e eksperensia di Moises riba e seru.

Nos tambe por eksperensiá tal transformashon spiritual miéntras nos ta partisipá fielmente den e servisionan di adorashon den Iglesia, inkluyendo dirigí nos kurason na Señor pa medio di nos kanto sinsero di himnonan sagrado. Apartá un banda—manera Moises—for di distraishonnan mundano, spesialmente nos telefònnan of kualkier kos ku no ta den harmonia ku e momentu sagrado aki, ta permití nos dediká tur nos atenshon na partisipá di e sakramento, ku nos mente i kurason enfoká riba e Salbador i Su sakrifisio di ekspiashon huntu ku nos propio kombenionan. Tal enfoke riba e sakramento lo fomentá un momentu di renovashon ku reverensia ku e Salbador i lo hasi e Sabat un delisia i transformá nos bida.

Finalmente, nos por eksperensiá e kambio di spiritu aki den nos disipulado miéntras nos ta adorá regularmente den e seru di Señor Su kas nos tèmpelnan sagrado i lucha pa biba ku konfiansa di kombenionan, spesialmente ora nos ta enfrentá e pruebanan di bida mortal.

Mi kasá i ami a eksperensiá personalmente algun momentunan di seru santu den reverensia miéntras nos tabata lucha pa apliká e prinsipionan aki den nos bida, kual a kousa un transformashon signifikante den nos disipulado. Mi ta kòrda tabata manera ayera kanando den e santana promé ku dera nos di dos yu, ku a nase prematuro i no a sobrebibí, miéntras mi kasá tabata rekuperando ainda den hospital. Mi ta kòrda di a hasi orashon ku gran fervor i reverensia, pidiendo yudansa pa lucha ku e pruebanan difísil ei. Na e momentu ei, mi a risibí un siguransa spiritual kla i poderoso den mi kurason: tur kos lo ta bon den nos bida si mi kasá i ami perseverá, teniendo na e goso ku ta bini for di biba e evangelio di Hesu-Kristu. Loke tabata parse un reto insuperabel i doloroso na e momentu ei a kulminá den un eksperensia reverente i sagrado, un piedra angular ku a yuda nos sostené nos fe i a duna nos un konfiansa den e kombenionan ku nos a hasi ku Señor i den Su promesanan pa mi i mi famia.

Mi kerido rumannan, reverensia pa loke ta sagrado ta fomentá gratitut sinsero, ekspandé felisidat berdadero, ta guia nos mente na revelashon, i trese gran goso na nos bida. E ta pone nos pia riba tera santu i elevá nos kurason na Deidat.

Mi ta testifiká ku segun nos lucha pa inkorporá tal virtut den nos bida diario, nos lo por oumentá nos humildat, ekspandé nos entendimentu di Dios Su boluntat pa nos, i fortalesé nos konfiansa den e promesanan di e kombenionan ku nos a hasi ku Señor. Mi ta duna testimonio ku si nos brasa e don di reverensia pa loke ta sagrado—sea den e seru di Señor Su kas, den un kas di reunion, òf den nos propio hogar—nos lo wòrdu yená ku asina un asombro i reverensia ora ku nos konektá ku e amor perfekto di nos Tata Selestial i Hesu-Kristu. Ku reverensia mi ta testifiká di e bèrdatnan aki den e nòmber sagrado di nos Salbador i Redentor Hesu-Kristu, amèn.