Adorashon

Un di e formanan di adorashon mas komun i importante ta pa reuní den un espasio konsagrá pa hasi aktonan di devoshon. Señor ta bisa, “I pa boso por mantené boso mes kompletamente sin mancha for di e mundu, boso mester bai na e kas di orashon i ofresé boso sakramentunan riba mi dia santu.” Esaki, naturalmente, ta nos motivashon prinsipal pa konstruí kapianan. Pero, si ta nesesario, un espasio no dediká lo funshoná si nos por proveé esaki ku sierto grado di santidat.

Mas importante ta kiko nos ta hasi ora nos ta reuní riba e dia di Señor. Naturalmente, nos ta bisti mihó ku nos por segun nos medionan—no ekstravagantemente pero modestamente na un manera pa señalá nos rèspèt i reverensia pa Deidat. Nos kondukta ta similarmente reverente i respetuoso. Nos ta adorá dor di uni den orashon; nos ta adorá dor di kanta himnonan (no djis skucha pero kanta e himnonan); nos ta adorá dor di instruí i siña un for di otro. Hesus ta bisa, “kòrda ku riba e dia aki, e dia di Señor, lo bo ofresé bo ofrendanan [kiermen, bo ‘ofrendanan … di tempu, talentonan, òf medionan, den servisio di Dios i próhimo’i bo sakramentonan na e Haltísimo, konfesando bo pikánan na bo rumannan, i dilanti di Señor.” Nos ta bini huntu no pa entretené òf wòrdu entretené—manera dor di un banda, por ehèmpel—pero pa kòrd’É i wòrdu “instruí mas perfektamente” den Su evangelio.

Na e konferensia general mas resien, Elder Patrick Kearon a rekordá nos ku “nos no ta reuní riba Sabat simplemente pa asistí na reunion sakramental i marka esaki for di e lista. Nos ta bini huntu pa adorá. Tin un diferensia signifikativo entre nan dos. Asistí ta nifiká ta presente. Pero pa adorá ta nifiká alabá intenshonalmente i adorá nos Dios den un manera ku ta transformá nos!”

Dedikando nos Sabatnan na Señor i Su propósitonan ta riba su mes un akto di adorashon. Algun aña pasá, e tempu ei-Elder Russell M. Nelson a opservá: “Kon nos ta santifiká e dia di Sabat? Den mi añanan mas yòn, mi a studia e obra di otronan ku a kompilá listanan di kos pa hasi i kos pa no hasi riba Sabat. Ta te despues mi a siña for di e Skrituranan ku mi kondukta i mi aktitut riba Sabat tabata konstituí un señal entre ami i mi Tata Selestial [wak Éksodo 31:13; Ezekiel 20:12, 20]. Ku e entendimentu ei, no tabata nesesario pa un lista di si ku no. Ora mi mester a tuma un desishon si un aktividat tabata apropiá pa e Sabat òf nò, mi a simplemente puntra mi mes, ‘Ki señal mi ke duna Dios?’”

Adorashon riba e dia di Señor ta marká pa un enfoke partikular riba e gran sakrifisio ekspiatorio di Hesu-Kristu. Nos ta selebrá Su Resurekshon apropiadamente i spesialmente na Pasku di Resurekshon, pero tambe kada siman segun ku nos ta partisipá di e emblemanan sakramental di Su Ekspiashon, inkluyendo Su Resurekshon. Pa e penitente, partisipá di e sakramento ta e punto mas haltu di adorashon di Sabat.

Adorando huntu komo e “kurpa di Kristu” tin poder i benefisionan úniko segun ku nos ta siña, sirbi i sostené otro. Interesantemente, un estudio resien a saka afó ku esnan ku ta mira nan bida spiritual komo kompletamente privá tin ménos chèns di priorisá kresementu spiritual, òf di bisa ku nan fe ta hopi importante, òf di tin tempu devoshonal regular ku Dios. Komo un komunidat di Santunan, nos ta fortalesé otro den adorashon i den fe.

Asta asina, nos no por lubidá e aktonan di adorashon diario ku nos ta partisipá aden individualmente i na kas. E Salbador ta rekordá nos, “Sin embargo bo promesanan lo wòrdu ofresé den hustisia riba tur dia i na tur momentu.” Un ruman muhé sabiamente a opservá, “Mi no por pensa riba un manera mas profundo pa adorá Dios ku yama bon biní na Su yunan chikitu den nos bida i kuida nan i siña nan Su plan pa nan.”

Alma i Amulek a siña e zoramitanan ku a wòrdu prohibí for di nan sinagoga pa adorá Dios no solamente un biaha pa siman, pero semper, i “na kualke lugá ku boso por ta aden.” Nan a papia tokante orashon komo adorashon:

“Boso mester drama boso alma den boso kambernan, i boso lugánan sekreto, i den boso desierto.

“Si, i ora boso no sklama na Señor, laga boso kurason ta yen, hala den orashon na dje kontinuamente.”

Nan a papia tambe di skrudiñá e Skrituranan, duna testimonio di Kristu, aktonan i servisio karitativo, risibí e Spiritu Santu, i biba den gradisimentu tur dia. Konsiderá e pensamentu ei: “biba den gradisimentu tur dia.” E ta papia di mi di dos konsepto:

Sinti i ekspresá gratitut na Dios ta, de echo, loke ta inyektá adorashon ku un sentido di renobashon gososo kontrali na mir’é komo djis un deber mas.

Adorashon berdadero ta nifiká stima Dios i entregá nos boluntat na djE—e regalo di mas presioso ku nos por ofresé. Ora nan a puntr’é kua tabata e promé mandamentu den henter e lei, Hesus a kontestá: “Stima Señor bo Dios ku henter bo kurason, i ku henter bo alma i ku henter bo mente.” El a yama esaki tambe e promé gran mandamentu.

Esaki tabata e patronchi di Hesus Su mes adorashon di e Tata. Su bida i Su sakrifisio ekspiatorio tabata dediká na e gloria di e Tata. Profundamente nos ta kòrda e súplika konmovedor di Hesus meimei di sufrimentu i angustia inimaginabel: “O mi Tata, si ta posibel, laga e kopa aki pasa for di mi,” pero despues Su sumiso “sin embargo no manera Mi ke, pero ma manera Abo ke.”

Adorashon ta hasi esfuerso pa sigui e ehèmpel perfekto aki. Nos lo no alkansá perfekshon den e kurso aki di un dia pa otro, pero si kada dia nos “ofresé komo sakrifisio na [E] un kurason kibrá [repentí] i un spiritu [obediente] abatí,” E lo bolbe batisá nos ku Su Spiritu i yena nos ku Su grasia.

Den e promé sekshon di e Doktrina i Kombenionan, Señor ta pronunsiá e akusashon aki di e mundu:

“Nan a desviá for di Mi ordenansanan, i a kibra Mi kombenio eterno;

“Nan no ta buska Señor pa establesé su rektitut, pero kada hòmber ta kana den su mes kaminda, i tras di e imágen di su mes dios, kua su imágen ta meskos kua esun di mundu.”

Ta bon pa nos kòrda e ehèmpel di e tres hóbennan hudiu, Hananias, Misael i Azarias, hibá prezu na Babilonia no muchu despues ku Lehi i su famia a bandoná Herusalèm. Un ofisial di Babilonia a kambia nan nòmber Shadrak, Mesak i Abednego. Despues, ora e tresnan aki a ninga di adorá un imágen ku el a lanta, Nabukodonosor a ordená pa tira nan den un fòrnu di kandela kayente, bisando nan, “i ken ta e Dios ei ku lo libra boso for di mi mannan?”

Lo bo kòrda nan kontesta oudas:

“Nos Dios ku nos ta sirbi ta kapas pa libra nos for di e fòrnu di kandela ardiente, i lo e libra nos for di bo man, O rei.

“Ma si no, laga p’e ta konosí n’abo, … ku nos lo no sirbi bo diosnan, ni adorá e imágen di oro ku bo a lanta.”

E fòrnu tabata asina kayente ku el a mata esnan ku a tira nan den dje, pero Sadrak, Mesak i Abednego tabata ileso. “E ora ei Nabukodonosor a papia, i a bisa: Bendishoná ta e Dios di Sadrak, Mesak i Abed-nego, kende a … libra su siervoan ku a konfia den dje, … i a entregá nan kurpa, pa nan no sirbi ni adorá ningun dios, ku no ta nan mes Dios.” Nan a konfia den Yehova pa liberashon, “pero si no,” esta, asta si Dios den Su sabiduria no a prevení nan morto, tòg nan lo a keda fiel na djE.

Kiko ku ta haña prioridat riba adorashon di e Tata i e Yu ta bira un ídolo. Esnan ku ta rechasá Dios komo e fuente di bèrdat, òf ta ninga kualke responsabilidat na djE, en efekto ta remplasá nan mes komo nan dios. Esun ku ta pone loyalidat na un partido òf kousa promé ku guia divino ta adorá un dios falsu. Asta esnan ku ta pretendé di adorá Dios pero no ta warda Su mandamentunan ta kanando den nan mes kaminda: “Nan ta hala serka mi ku nan lep, ma nan kurason ta leu for di mi.” E opheto di nos adorashon ta eksklusivamente “e úniko Dios berdadero, i Hesu-Kristu, kende [El] a manda.”

Finalmente, e manera ku nos ta biba por ta e mihó forma di adorashon i mas genuino. Mustrando nos devoshon ta nifiká imitá e Tata i e Yu—kultivando Nan atributonan i karakter den nos mes. Si, manera e dicho ta bisa, imitashon ta e forma di hala rosea di mas sinsero, anto nos por bisa ku rèspèt pa Deidat, e tipo di imitahon aki ta e forma di venerashon di mas sinsero. Esaki ta sugerí un esfuerso aktivo i sostené di nos parti pa buska santidat. Pero bira mas manera Kristu tambe ta e resultado natural di nos aktonan di adorashon. E frase di Elder Kearon sitá anteriormente tokante adorashon, “na un manera ku ta transformá nos,” ta signifikante. Adorashon berdadero ta transformativo.

Esaki ta e bunitesa di e kaminda di kombenio—e kaminda di adorashon, amor, i lealtat na Dios. Nos ta drenta e kaminda ei dor di boutismo, primintiendo di tuma riba nos e nòmber di Kristu i di warda Su mandamentunan. Nos ta risibí e don di Spiritu Santu, e mensahero di e grasia di e Salbador ku ta redimí i limpia nos di piká segun ku nos ta arepentí. Nos por asta bisa ku den arepentimentu nos ta adorando E.

Einan ta sigui ordenansanan i kombenionan di saserdosio adishonal hasí den e Kas di Señor ku ta santifiká nos mas aleu. E seremonia i ordenansanan di e tèmpel ta konstituí un forma elevá di adorashon.

Presidente Russell M. Nelson a enfatisá ku “tur hòmber i tur muhé ku ta partisipá den ordenansanan di saserdosio i ku ta hasi i warda kombenionan ku Dios tin akseso direkto na e poder di Dios.” Esaki no ta solamente un poder ku nos ta basa riba dje pa sirbi i pa bendishoná. Tambe e ta e poder divino ku ta obra den nos pa refiná i purifiká nos. Segun nos ta kana e kaminda di kombenio, e “poder di piedat santifikante ta manifestá”den nos.

Laga nos, komo e nefitanan i lamanitanan di antigwedat, “kai abou na pia di Hesus, i … ador’é.” Ku nos, manera Hesus a manda, “kai abou i adorá e Tata den [e] nòmber [di e Yu].” Laga nos risibí e Spiritu Santu i entregá nos kurason na Dios, no tin otro diosnan promé ku nE, i komo disipelnan di Hesu-Kristu, imitá Su karakter den nos mes bida. Mi ta testifiká ku ora nos hasié, nos lo eksperensiá e goso den adorashon. Den e nòmber di Hesu-Kristu, amèn.